मुंबई- महाराष्ट्रातून राज्यसभेसाठी जाणाऱ्या नेत्यांची नावे आता समोर आल्यानंतर राज्याच्या राजकारणात नव्या पर्वाला सुरुवात होणार आहे. राज्यसभेच्या निवडणुकीत सात महत्त्वाचे नेते दिल्लीच्या सभागृहात प्रतिनिधित्व करणार आहेत. या यादीत भाजप, राष्ट्रवादी काँग्रेस, शिवसेना आणि आरपीआय यांसारख्या पक्षांतील नेत्यांचा समावेश आहे.या यादीत भाजपचे विनोद तावडे, माया ईवनाते आणि रामराव वडकुते, तर आरपीआयचे रामदास आठवले यांची नावे जाहीर झाली आहेत. त्याचबरोबर राष्ट्रवादी काँग्रेस (अजित पवार गट) कडून पार्थ पवार, शिवसेना (शिंदे गट) कडून ज्योती वाघमारे, आणि राष्ट्रवादी काँग्रेस (शरद पवार गट) कडून शरद पवार यांच्या नावावर शिक्का मोर्तब झाले आहे ,

राष्ट्रवादी काँग्रेस (अजित पवार गट) कडून पार्थ पवार यांना उमेदवारी देण्यात आली आहे . पार्थ पवार हे अजित पवार यांचे सुपुत्र असून युवा नेतृत्व म्हणून त्यांच्याकडे पाहिले जाते. त्यामुळे त्यांच्या संभाव्य राज्यसभा प्रवेशामुळे नव्या पिढीच्या नेतृत्वाबाबत चर्चा सुरू झाली आहे.दुसरीकडे राष्ट्रवादी काँग्रेस (शरद पवार गट) कडून ज्येष्ठ नेते शरद पवार यांनी आपला उमेदवारी अर्ज दाखल केला शरद पवार हे देशातील ज्येष्ठ नेत्यांपैकी एक मानले जातात. त्यांच्या संभाव्य राज्यसभा प्रवेशामुळे राष्ट्रीय राजकारणातही लक्ष वेधले गेले आहे.

भाजपने राज्यसभेसाठी विविध भागांना प्रतिनिधित्व देण्याचा प्रयत्न केल्याचे दिसून येते. भाजपचे नेते विनोद तावडे हे दीर्घकाळ संघटनात्मक काम करणारे नेते मानले जातात. पक्ष संघटनेत त्यांनी महत्त्वाच्या जबाबदाऱ्या सांभाळल्या आहेत. त्यामुळे त्यांच्या नावाची घोषणा ही त्यांच्या कार्याची दखल मानली जात आहे.भाजपच्या दुसऱ्या उमेदवार माया ईवनाते या राष्ट्रीय अनुसूचित आयोगाच्या सदस्य राहिल्या आहेत. त्या विदर्भातील असल्यामुळे या भागाला प्रतिनिधित्व मिळणार आहे. तसेच रामराव वडकुते हे शेळी-मेंढी महामंडळाचे माजी अध्यक्ष राहिले आहेत. ते मराठवाडा भागातील असून धनगर समाजाचे प्रतिनिधित्व करतात. आरपीआयचे अध्यक्ष आणि केंद्रीय मंत्री रामदास आठवले यांचे नावही राज्यसभेसाठी निक्षित झाले आहे . आठवले हे दलित राजकारणातील प्रमुख नेते मानले जातात. केंद्रातील मंत्रिमंडळातही त्यांनी भूमिका बजावली आहे.

तसेच शिवसेना (शिंदे गट) कडून ज्योती वाघमारे यांनी उमेदवारी अर्ज दाखल केला आहे . त्या पक्षाच्या महिला नेत्यांपैकी एक असून सामाजिक आणि राजकीय क्षेत्रात सक्रिय आहेत.

मुंबई- आज राष्ट्रवादी काँग्रेस पक्षाचे युवा नेते पार्थ अजितदादा पवार यांनी राज्यसभेच्या निवडणुकीसाठी आपला उमेदवारी अर्ज दाखल केला.या प्रसंगी महाराष्ट्राचे मुख्यमंत्री देवेंद्र फडणवीस, उपमुख्यमंत्री श्रीमती सुनेत्रा अजितदादा पवार, राष्ट्रवादी काँग्रेस पक्षाचे राष्ट्रीय कार्याध्यक्ष खासदार प्रफुल पटेल, प्रदेशाध्यक्ष खासदार सुनिल तटकरे, ज्येष्ठ नेते तसेच अन्न व नागरी पुरवठा मंत्री छगन भुजबळ यांच्यासह पक्षाचे मंत्री, आमदार, पदाधिकारी आणि कार्यकर्ते मोठ्या संख्येने उपस्थित होते.

यावेळी उपस्थित सर्व मान्यवरांनी पार्थ पवार यांना शुभेच्छा देत त्यांच्या उमेदवारीसाठी पाठिंबा दर्शविला. राज्याच्या विकासासाठी तसेच जनतेच्या प्रश्नांना संसदेत प्रभावीपणे मांडण्यासाठी पार्थदादा अजितदादा पवार निश्चितच सक्षम नेतृत्व करतील, असा विश्वास यावेळी व्यक्त करण्यात आला.

राष्ट्रवादी काँग्रेसकडून अजित पवारांचे पुत्र पार्थ पवार यांना दुपारी उमेदवारी जाहीर झाली त्उयानंतर मेदवारी अर्ज दाखल करण्यासाठी पार्थ पवार विधानभवनात दाखल झाले. यावेळी उपमुख्यमंत्री सुनेत्रा पवार व राष्ट्रवादीचे आमदार देखील उपस्थित होते. पार्थ पवार येताच विधानभवनाच्या पायऱ्यांवर ‘अजित दादा अमर रहे’ घोषणा देण्यात आल्या.
यावेळी पार्थ पवार म्हणाले कि,’ राज्यसभा निवडणुकीच्या पार्श्वभूमीवर आज उमेदवारी अर्ज दाखल केला. राष्ट्रवादी काँग्रेस परिवारातील ज्येष्ठ नेते, पदाधिकारी आणि कार्यकर्त्यांनी माझ्यावर दाखवलेल्या विश्वासाबद्दल मी सर्वांचे मनापासून आभार मानतो.
हा क्षण माझ्यासाठी केवळ राजकीय टप्पा नसून मोठ्या जबाबदारीची जाणीव करून देणारा आहे. माझे वडील, राज्याचे दिवंगत उपमुख्यमंत्री मा. अजितदादा पवार यांनी आयुष्यभर जनतेच्या सेवेला प्राधान्य देत विकासाचे राजकारण कसे करावे, याचा आदर्श घालून दिला. त्यांच्या कार्यातून मिळालेली प्रेरणा आणि त्यांनी दिलेले संस्कार हेच माझ्यासाठी पुढील वाटचालीचे मार्गदर्शन ठरतील.
दादांनी जपलेली जनतेशी असलेली नाळ, प्रामाणिकपणे काम करण्याची वृत्ती आणि महाराष्ट्राच्या प्रगती तसेच विकासासाठीची तळमळ या मूल्यांना पुढे नेण्याचा मी प्रामाणिक प्रयत्न करेन. जनतेच्या अपेक्षा, कार्यकर्त्यांचा विश्वास आणि पक्षाची विचारधारा यांना न्याय देत देश आणि महाराष्ट्राच्या प्रश्नांना प्रभावीपणे मांडण्यासाठी मी कटिबद्ध राहीन.

मुंबई-राज्यसभा निवडणुकीच्या रणधुमाळीत उपमुख्यमंत्री एकनाथ शिंदे यांनी सर्वांचे अंदाज चुकवत मोठे ‘धक्कातंत्र’ वापरले आहे. शिवसेना शिंदे गटाच्या वाट्याला तांत्रिकदृष्ट्या राज्यसभेची एकच जागा येत असताना, उपमुख्यमंत्र्यांनी सोलापूरच्या आक्रमक प्रवक्त्या ज्योती वाघमारे यांना मैदानात उतरवले आहे. ज्योदी वाघमारे यांनी आपला उमेदवारी अर्ज आज दाखल केला.

महाराष्ट्रातील आगामी राज्यसभा निवडणुकीच्या पार्श्वभूमीवर राजकीय घडामोडींना वेग आला असून महायुतीकडून उमेदवारीबाबत चर्चा सुरू आहेत. भाजपकडून चार उमेदवार देण्यात आल्यानंतर आता शिवसेना शिंदे गट आणि राष्ट्रवादी काँग्रेस अजित पवार गटाकडूनही उमेदवारांची नावे पुढे येऊ लागली आहेत. शिवसेना शिंदे गटाकडून राज्यसभेसाठी प्राध्यापक ज्योती वाघमारे यांचे नाव जाहीर झाले आहे. सुरुवातीला माजी खासदार राहुल शेवाळे यांचे नाव आघाडीवर असल्याचे बोलले जात होते. मात्र ऐनवेळी त्यांचे नाव मागे पडल्याची माहिती समोर येत असून आता ज्योती वाघमारे यांना राज्यसभेची संधी मिळण्याची शक्यता व्यक्त केली जात आहे.

ज्योती वाघमारे यांनी शिवसेना शिंदे गट स्थापन झाल्यापासून पक्षाची वैचारिक भूमिका प्रभावीपणे मांडण्याचे काम केले आहे. विविध राजकीय मुद्द्यांवर त्यांनी सातत्याने माध्यमांमध्ये पक्षाची बाजू ठामपणे मांडली आहे. विशेष म्हणजे शिवसेना ठाकरे गटाचे नेते संजय राऊत आणि सुषमा अंधारे यांच्याकडून करण्यात येणाऱ्या आरोपांना प्रत्युत्तर देण्याची जबाबदारीही ज्योती वाघमारे यांनी सातत्याने पार पाडली आहे. आक्रमक आणि अभ्यासू वक्तृत्वामुळे त्या शिंदे गटाच्या प्रमुख प्रवक्त्यांपैकी एक म्हणून ओळखल्या जातात.
काँग्रेसमधून शिवसेना शिंदे सेनेत दाखल

ज्योती वाघमारे या फुले-शाहू-आंबेडकर विचारसरणीतून पुढे आलेल्या असून सामाजिक आणि राजकीय क्षेत्रात त्यांनी सक्रिय काम केले आहे. यापूर्वी त्या काँग्रेस पक्षातही कार्यरत होत्या. त्यांच्याकडे काँग्रेसच्या महिला शहर अध्यक्षाची जबाबदारी होती. प्रणिती शिंदे यांच्या प्रचार सभांचे सुत्रसंचलन, संयोजन देखील त्या करीत होत्या‌.

दरम्यान, सोलापूर लोकसभा मतदारसंघात काँग्रेसच्या खासदार प्रणिती शिंदे यांच्याविरोधात मजबूत वैचारिक आणि राजकीय आव्हान उभे करण्याच्या दृष्टीनेही ज्योती वाघमारे यांना संधी देण्यात येत असल्याची राजकीय वर्तुळात चर्चा सुरू आहे. राज्यसभेच्या निवडणुकीसाठी अधिकृत उमेदवारी जाहीर झाल्यानंतरच या चर्चाना अंतिम स्वरूप मिळणार असले तरी शिंदे गटाकडून ज्योती वाघमारे यांच्या नावावर शिक्कामोर्तब होण्याची शक्यता सध्या राजकीय वर्तुळात व्यक्त केली जात आहे.

डॉ. ज्योती वाघमारे यांचा परिचय आणि कौटुंबिक पार्श्वभूमी

सोलापुरातल्या आंबेडकरी चळवळीत सक्रिय काम करणारा चेहरा म्हणून प्रा. डॉ. ज्योती वाघमारे यांची ओळख आहे.
प्रा. डॉ. ज्योती वाघमारे यांचे वडील नागनाथ वाघमारे हे दलित पँथरचे कार्यकर्ते होते. कुटुंबाच्या उदरनिर्वाहासाठी नागनाथ वाघमारे यांनी हॉटेलमध्ये वेटरचे तसेच बांधकाम मजूर म्हणून काम केले.
चळवळीतील कामाचा पोचपावती म्हणून सोलापूरमधील नागरिकांनी सोलापूर महापालिकेच्या निवडणुकीत नागनाथ वाघमारे यांना नगरसेवक म्हणून निवडून दिले होते.
प्रा. डॉ. ज्योती वाघमारे सुरुवातीच्या काळात मानवी हक्क अभियान, विद्रोही संस्कृतिक चळवळ, आंबेडकरी चळवळीतून आपल्या कामाला सुरुवात केली.
प्रा. डॉ. ज्योती वाघमारे यांनी काहीकाळ वृत्त निवेदिका म्हणून काम केलं.
पुढे उच्चशिक्षणाचा उपयोग सामाजिक जनजागृतीसाठी व्हावा, या उद्देशाने प्रा. डॉ. ज्योती वाघमारे यांनी महाराष्ट्र, कर्नाटक, आंध्र प्रदेश या राज्यांत डॉ. बाबासाहेब आंबेडकर, छत्रपती शिवाजी महाराज, महात्मा बसवेश्वर यांच्या जीवनावर आधारित व्याख्यानं दिली.
वालचंद महाविद्यालयात प्रा. डॉ. ज्योती वाघमारे यांनी प्राध्यापिका म्हणून काही काळ काम केले.
शैक्षणिक पार्श्वभूमी

ज्योती वाघमारे यांनी इंग्रजी साहित्यात पीएचडी केलेली आहे. दहावीच्या परिक्षेत त्या ८४% गुण मिळवून उत्तीर्ण झाल्या. बारावीच्या परिक्षेत पुणे विभागातून मागासवर्गीय विद्यार्थ्यांमध्ये प्रथम आलेल्या आहेत. अर्धमागधी विषयात राज्यात प्रथम. महिलांच्या प्रश्नांवरील संशोधनाला राज्यस्तरीय प्रथम पुरस्कार मिळालेला आहे. ज्योती वाघमारे यांना १० वर्षांहून अधिककाळ प्राध्यापिका म्हणून कामाचा अनुभव आहे.

पाच भाषांवर प्रभुत्व

ज्योती वाघमारे यांचे मराठी, हिंदी, इंग्रजी, तेलगू आणि कन्नड या पाच भाषांवर प्रभुत्व आहे.

मूळच्या सोलापूर जिल्ह्यातील धडाकेबाज महिला कार्यकर्त्या म्हणून प्रा. डॉ. ज्योती वाघमारे यांची ओळख आहे.
मागील १५ वर्षांपासून सामाजिक आणि राजकीय क्षेत्रात प्रा. डॉ. ज्योती वाघमारे सक्रियपण काम करत आहेत.
शिवसेना पक्षात उठाव झाल्यानंतर ज्योती वाघमारे यांनी शिवसेना मुख्य नेते एकनाथ शिंदे साहेब यांच्या नेतृत्वाचा स्वीकार करत एप्रिल २०२३ मध्ये शिवसेनेत प्रवेश केला.
प्रा. डॉ. ज्योती वाघमारे यांची शिवसेना पक्षाच्या राज्य प्रवक्त्या आणि धाराशिव जिल्हा संपर्कप्रमुख म्हणून जबाबदारी सोपवण्यात आली.
मागील अडीच वर्षात विविध मंचांवर आणि चर्चासत्रात शिवसेना आणि माननीय श्री. एकनाथजी शिंदे साहेबांनी केलेल्या ऐतिहासिक उठावाबाबत सडेतोड आणि मुद्देसूद बाजू मांडत शिवसेना प्रवक्त्या म्हणून प्रा. डॉ. ज्योती वाघमारे यांनी उपयुक्तता सिद्ध केलेली आहे.
प्रा. डॉ. ज्योती वाघमारे यांनी शिवसेनेच्या ऐतिहासिक दसरा मेळाव्यांमध्ये केलेली भाषणं त्यांच्या वक्तृत्व आणि अभ्यासू व्यक्तिमत्वाची साक्ष देतात.
शिवसेना नेतृत्वावर टीका करणाऱ्या विरोधकांना त्यांच्याच भाषेत किंवा त्याहून विखारी भाषेत सडेतोड उत्तरं देणाऱ्या प्रवक्त्या म्हणून प्रा. डॉ. ज्योती वाघमारे यांनी राजकारणात आपलं वेगळं स्थान निर्माण केलं आहे.
महाराष्ट्राचा इतिहास, डॉ. बाबासाहेब आंबेडकरांचे विचार, संविधान आणि राज्याच्या राजकारणावरील सखोल अभ्यासपूर्ण भाषण ही प्रा. डॉ. ज्योती वाघमारे यांची वैशिष्ट्ये आहेत.
सलग तीन दसरा मेळाव्यात घणाघाती भाषणातून ज्योती वाघमारे यांनी ठाकरे गटाचे नेते आदित्य ठाकरे, संजय राऊत, सुषमा अंधारे यांच्यावर टीका केली.
जनतेतला धडाकेबाज चेहरा खासदार झाल्यास सोलापूर जिल्ह्यासह पश्चिम महाराष्ट्रात शिवसेना विस्तारासाठी फायदा होईल.

मुंबई-राज्यसभेच्या निवडणुकीसाठी आज उमेदवारी अर्ज दाखल करण्याच्या प्रक्रियेत भाजपचे चार, राष्ट्रवादी काँग्रेस आणि शिवसेना शिंदे गटाचा प्रत्येकी एक, तर महाविकास आघाडीकडून शरद पवार यांनी आपला उमेदवारी अर्ज सादर केला. यावेळच्या उमेदवारी अर्जाचे सर्वात महत्त्वाचे वैशिष्ट्य म्हणजे, महाराष्ट्राच्या राजकीय इतिहासात पहिल्यांदाच शरद पवार यांनी प्रत्यक्ष निवडणूक कार्यालयात उपस्थित न राहता आपला अर्ज दाखल केला आहे.

सर्वोच्च न्यायालयाच्या 1968 मधील ‘पशुपतीनाथ विरुद्ध हरिहर प्रसाद सिंग’ या खटल्यातील निवाड्यानुसार, प्रकृती किंवा इतर वैध कारणास्तव उमेदवार प्रत्यक्ष उपस्थित राहू शकत नसेल, तर राज्यघटनेच्या कलम 84(अ) अन्वये विहित नमुन्यात शपथ घेणे बंधनकारक असते. याच कायदेशीर तरतुदीचा आधार घेत, जेजे रुग्णालयाचे अधीक्षक संजय सुरवसे यांनी शरद पवार यांच्या निवासस्थानी जाऊन त्यांची रीतसर शपथ घेतली. त्यानंतर, त्यांचे प्रस्तावक जयंत पाटील यांनी विधिमंडळात निवडणूक अधिकाऱ्यांकडे हा उमेदवारी अर्ज सुपूर्द केला.

शरद पवार यांनी यावेळी खबरदारीचा उपाय म्हणून दोन स्वतंत्र अर्ज दाखल केले आहेत, ज्यामध्ये एक पक्षाचा अधिकृत उमेदवार म्हणून तर दुसरा अपक्ष म्हणून आहे. महाराष्ट्राच्या राजकीय इतिहासात शरद पवार यांनी अशा प्रकारे प्रत्यक्ष उपस्थित न राहता उमेदवारी अर्ज दाखल करण्याची ही पहिलीच वेळ ठरली आहे. कायदेशीर प्रक्रियेचे काटेकोर पालन करून, तांत्रिक अडचण येऊ नये म्हणून दोन अर्ज भरण्यात आले आहेत.

राज्यसभेच्या निवडणुकीत अर्ज दाखल करण्याच्या शेवटच्या दिवशी अनपेक्षित घडामोडी घडल्या असून, उपमुख्यमंत्री एकनाथ शिंदे यांच्या नेतृत्वातील शिवसेनेने केवळ ज्योती वाघमारे यांचाच अर्ज भरल्याने आणि रोहित टिळक यांची उमेदवारी मागे घेतल्याने ही निवडणूक आता बिनविरोध होणार असल्याचे निश्चित झाले आहे. राज्यातील सात जागांसाठी एकूण सातच उमेदवारी अर्ज दाखल झाले असून, यामध्ये सत्ताधारी महायुतीकडून भारतीय जनता पक्षाचे चार, राष्ट्रवादी काँग्रेसचा एक आणि शिवसेनेचा एक, तर महाविकास आघाडीकडून शरद पवार यांचा समावेश आहे. सात जागांसाठी सातच उमेदवार रिंगणात उरल्याने आता मतदानाची औपचारिकता उरली नसून ही निवडणूक बिनविरोध पार पडणार असल्याचे स्पष्ट झाले आहे.