विकासकामांना गती देण्याचा संकल्प; स्थानिकांना आधुनिक सुविधांची उपलब्धता
पुणे, दि. १९ एप्रिल २०२६ :
पुण्यातील लोहगाव परिसरात उभारण्यात आलेल्या ‘ईशान मॉल’चा उद्घाटन सोहळा शिवसेना नेत्या व विधानपरिषद उपसभापती डॉ. नीलम ताई गोऱ्हे व उद्योग मंत्री उदय सामंत यांच्या हस्ते उत्साहात पार पडला. यावेळी उदघाटन सोहळ्यानंतर उपस्थितांशी संवाद साधत त्यांनी मॉलच्या प्रगती व भरभराटीसाठी शुभेच्छा दिल्या.
उद्घाटन प्रसंगी बोलताना डॉ. गोऱ्हे यांनी सांगितले की, “पुणे शहरासह वडगाव शेरी, खराडी आणि लोहगाव परिसर झपाट्याने विकसित होत असून नागरिकांच्या वाढत्या गरजा लक्षात घेता स्थानिक पातळीवर आधुनिक सुविधा उपलब्ध होणे अत्यंत आवश्यक आहे. ‘ईशान मॉल’मुळे नागरिकांना तुळशीबागेसारख्या खरेदी सुविधा आपल्या परिसरातच मिळणार असून, हा प्रकल्प स्थानिक विकासाला चालना देणारा ठरेल.”
त्या पुढे म्हणाल्या की, सामाजिक आणि राजकीय क्षेत्रात सातत्याने सकारात्मक काम करणारे आनंद गोयल यांनी उभारलेला हा मॉल स्थानिकांसाठी महत्त्वाचा टप्पा आहे. नागरिकांचे प्रेम आणि सहकार्य यामुळेच असे प्रकल्प यशस्वी होतात, असेही त्यांनी नमूद केले.
उद्योग मंत्री उदय सामंत यांनीही कार्यकर्त्यांच्या अपेक्षांना न्याय देण्यासाठी नेहमीच तत्पर असल्याचे सांगितले. त्यांनी आनंद गोयल यांच्या कार्याचे कौतुक करत ‘ईशान मॉल’साठी शुभेच्छा दिल्या.
या कार्यक्रमाला शिवसेना सहसंपर्कप्रमुख अजय भोसले, पुणे शहरप्रमुख नाना भानगिरे, आबा बागुल यांच्यासह अनेक पदाधिकारी व कार्यकर्ते उपस्थित होते. कार्यक्रमाचे आयोजन आनंदजी गोयल यांनी केले होते.
समारोपात सर्व मान्यवरांनी ‘ईशान मॉल’मुळे परिसराच्या विकासाला नवी दिशा मिळेल, असा विश्वास व्यक्त केला
