वाढती लोकसंख्या, नव्याने समाविष्ट गावे आणि औद्योगिक विस्ताराचा मुद्दा; पुणे महापालिकेच्या पाण्याच्या गरजेकडे लक्ष देण्याचे आवाहन
पुणे, दि. २ नोव्हेंबर २०२६ (माय मराठी प्रतिनिधी) :
पुणे शहराची वाढती लोकसंख्या, महापालिका हद्दीत नव्याने समाविष्ट झालेली गावे, वेगाने होणारे नागरीकरण आणि औद्योगिक विस्तार लक्षात घेता पुणे महानगरपालिकेला मागणीनुसार वाढीव पाणीकोटा मंजूर करण्यात यावा, अशी मागणी महापालिकेतील विरोधी पक्षनेते अ‍ॅड. निलेश निकम यांनी मुख्यमंत्री देवेंद्र फडणवीस यांच्याकडे केली आहे.
यासंदर्भात निकम यांनी २ नोव्हेंबर रोजी मुख्यमंत्र्यांना पत्र पाठवले असून, त्याची प्रत उपमुख्यमंत्री एकनाथ शिंदे आणि उपमुख्यमंत्री सुनेत्रा अजित पवार यांनाही दिली आहे.
पुण्याची लोकसंख्या ८३ लाखांवर गेल्याचा उल्लेख
निकम यांनी पत्रात पुणे महापालिकेची लोकसंख्या जवळपास ८३ लाखांपर्यंत गेल्याचे नमूद केले आहे. शहराची वाढती पाण्याची गरज लक्षात घेऊन महापालिकेने जलसंपदा विभागाकडे अधिक पाणीकोट्याची मागणी केली असताना मंजूर पाणीकोटा अपुरा असल्याचा मुद्दा त्यांनी उपस्थित केला आहे.
महापालिकेच्या मागणीच्या तुलनेत जलसंपदा विभागाने २०२६-२७ साठी ११.३३ टीएमसी पाणीकोटा निश्चित केल्याचे पत्रात म्हटले आहे.
पुनर्वापराच्या पाण्याचे नियोजनही विचारात घ्या
शहरातील पाणीपुरवठ्याच्या नियोजनात प्रक्रिया केलेल्या सांडपाण्याचा पुनर्वापर, सिंचनासाठी पाण्याची उपलब्धता आणि जलसंपदा विभागाशी संबंधित योजनांचा विचार करणे आवश्यक असल्याचे निकम यांनी नमूद केले आहे.
शिवणे जॅकवेल आणि अन्य योजनांच्या माध्यमातून शेतीसाठी पाणी उपलब्ध करून देण्याचे नियोजनही पत्रात मांडण्यात आले आहे.
औद्योगिक आणि रोजगारवाढीमुळे पाण्याची मागणी वाढणार
पुणे शहराला ‘ग्लोबल कॅपेबिलिटी सेंटर’ म्हणून विकसित करण्याच्या प्रयत्नांमुळे आयटी, तंत्रज्ञान, उद्योग आणि व्यावसायिक क्षेत्रातील गुंतवणूक वाढण्याची शक्यता आहे.
या विस्तारामुळे शहरात रोजगारनिर्मिती होण्याबरोबरच नागरिकरण आणि पाण्याची मागणीही वाढेल. त्यामुळे पुण्याच्या भविष्यातील विकासासाठी पुरेशा पाणीपुरवठ्याचे नियोजन आवश्यक असल्याचे निकम यांनी पत्रात स्पष्ट केले आहे.
टीओडी आणि वाढीव एफएसआयमुळे लोकसंख्येची घनता वाढणार
पुणे मेट्रोच्या प्रभावक्षेत्रातील टीओडी झोन, यूडीसीपीआर २०२० अंतर्गत वाढीव एफएसआय तसेच पुनर्विकासाच्या योजनांमुळे शहरातील लोकसंख्येची घनता वाढणार असल्याचे निकम यांनी म्हटले आहे.
हिंजवडी आयटी पार्क, औद्योगिक क्षेत्रे आणि नव्याने विकसित होणाऱ्या परिसरांमुळे पाण्याची आवश्यकता आणखी वाढणार आहे. या पार्श्वभूमीवर पुण्यासाठी पाण्याचा अपुरा कोटा निश्चित करणे शहराच्या भविष्यातील विकासाच्या दृष्टीने योग्य ठरणार नाही, अशी भूमिका त्यांनी मांडली.
पुण्यासाठी १६.१९२ टीएमसी पाणीकोट्याची मागणी
वरील सर्व बाबींचा विचार करून पुणे महापालिकेला १६.१९२ टीएमसी पाणीकोटा मंजूर करावा, अशी विनंती निलेश निकम यांनी मुख्यमंत्री देवेंद्र फडणवीस यांच्याकडे केली आहे.
पुण्याच्या वाढत्या पाणीगरजांचा विचार करून राज्य शासनाने या मागणीवर सकारात्मक निर्णय घ्यावा, अशी अपेक्षा त्यांनी व्यक्त केली आहे.
