पुणे – शहर एकच मेट्रोही एकच त्याचे तुम्ही कितीवेळा उद्घाटन करणार? यामुळे सरकारी तिजोरीतील जनतेच्या कोट्यवधी रुपयांचा चुराडा होत आहे. केवळ आगामी निवडणुका डोळ्यासमोर ठेवून भाजपकडून उद्घाटनाचे घाट रचले जात आहेत, अशी टीका काँग्रेसचे आमदार रवींद्र धंगेकर यांनी गुरुवारी केली.

जिल्हा न्यायालय मेट्रोस्थानक ते स्वारगेट स्थानक या भूमिगत मार्गावरील प्रवासी सेवेचा शुभारंभ आणि स्वारगेट स्थानक ते कात्रज स्थानक टप्पा एक या विस्तारित भूमिगत मार्गीकेचे भूमिपूजन पंतप्रधान नरेंद्र मोदी यांच्या हस्ते गुरुवारी होणार होते. मात्र अतिवृष्टीमुळे त्यांचा दौरा अचानक रद्द झाला. या पार्श्वभूमीवर, आमदार धंगेकर बोलत होते.

आमदार धंगेकर म्हणाले, एकाच शहरात मेट्रोचे टप्प्याटप्प्याने उद्घाटन केले जात आहे. केवळ निवडणुका डोळ्यासमोर ठेवून हे इव्हेंट भाजप आयोजित करत आहे आणि त्यातून ते स्वतःची जाहिरातबाजी करीत आहेत. पण, यामुळे सरकारच्या तिजोरीतील सर्वसामान्यांचा पैसा खर्च होतोय. याआधी पंतप्रधानांनी ऑनलाईन माध्यमातून उद्घाटने केली आहेत. तसेच याही वेळेस त्यांना ऑनलाईन माध्यमातून उद्घाटन करता आले असते. पण तसे करण्यातबाले नाही. कारण भाजपच्या डोक्यात केवळ निवडणुका आहेत.

पंतप्रधान येणार म्हणून कोट्यवधी रुपये खर्च करून तयारी करण्यात आली होती. अखेरच्या क्षणाला त्यांचा दौरा रद्द झाला. पण सर्वसामान्यांचे कोट्यवधी रुपये वाया गेले. याला जबाबदार कोण? पंतप्रधानांचा दौरा रद्द करण्याची नामुष्की कोणामुळे ओढावली? याची उत्तरेही जनतेसमोर आली पाहिजेत, असे आमदार धंगेकर यांनी सांगितले.

काँग्रेसने ‘असे’ कधीही केले नाही!

या देशात मेट्रो आणण्याचे पहिले ऐतिहासिक पाऊल काँग्रेसने उचलले. दूरदृष्टी ठेवून डीपीआर आणला. हे देशातील जनतेला माहिती आहे. पण, याची जाहिरातबाजी काँग्रेसने कधीही केली नाही. जनतेचा पैसा जपून, काळजीपूर्वक वापरण्याचे काम काँग्रेसने केले. पण सध्याच्या सरकारमध्ये तसे होताना दिसत नाही, अशी खंत आमदार धंगेकर यांनी व्यक्त केली.

जिल्हा न्यायालय मेट्रोस्थानक ते स्वारगेट स्थानक या भूमिगत मार्गावरील प्रवासी सेवेचा शुभारंभ पंतप्रधानांच्या हस्ते होवू शकला नाही. त्यामुळे सर्वसामान्य पुणेकर नागरिकाच्या हस्ते हा शुभारंभ करायला हवा होता. पण, सत्ताधाऱ्यांनी तसे केले नाही.

रवींद्र धंगेकर,आमदार

पुणे – मेट्रो उदघाटनाच्या निमित्ताने पंतप्रधान नरेंद्र मोदी पुण्यात येऊन भाजपचा प्रचार करणार होते. पण, पावसाने व्यत्यय आणला आणि हा दौरा रद्द झाला, त्यामुळे पुणेकरांनी सुटकेचा निःश्वास सोडला. अशी प्रतिक्रिया प्रदेश काँग्रेसचे उपाध्यक्ष, माजी आमदार मोहन जोशी यांनी आज (गुरुवारी) व्यक्त केली.

मेट्रोच्या स्वारगेट येथील अर्धवट कामाची पहाणी मोहन जोशी यांनी केली. या अर्धवट प्रकल्पाचे उदघाटन पंतप्रधान मोदी करणार होते आणि त्यातून पुणेकरांची दिशाभूल केली जाणार होती. हा दौरा वादग्रस्त ठरून आपल्या अंगलट येईल, याची जाणीव मोदी आणि त्यांच्या पक्षाला झाली असावी, त्यातूनच त्यांनी हा दौरा रद्द केला. मेट्रोच्या ३२ किलोमीटर मार्गावरील वेगवेळ्या टप्प्यांचे भूमिपूजन आणि उदघाटन यासाठी पंतप्रधान मोदी आधी ५ वेळा येऊन गेले याच प्रकल्पातील एका टप्प्याच्या उदघाटनासाठी ते आज सहाव्यांदा येथे येणार होते. त्यातून वाद निर्माण झाला असता. सध्या महाराष्ट्रात भाजपसाठी प्रतिकूल वातावरण आहे. त्यात पुन्हा नव्याने काही वाद निर्माण होणे म्हणजे प्रकरण अंगलट येण्यासारखेच होते. म्हणून त्यांनी दौरा टाळला, असे मोहन जोशी म्हणाले.

पंतप्रधान मोदींची सभा स.प.महाविद्यालयाच्या पटांगणावरती होणार होती. ही सभा म्हणजे विधानसभा निवडणुकीच्या प्रचाराचाच एक भाग होता. या सभेसाठी शहराच्या मध्यवस्तीतील अनेक रस्त्यांवरची वाहतूक बंद करण्यात येणार होती. पाऊस आणि वाहतूक कोंडीचा त्रास सहन करणाऱ्या पुणेकरांसाठी मोदींचा पुणे दौरा हा त्या त्रासात भर घालणारा होता. त्यामुळे हा दौरा रद्द झाल्याने पुणेकरांनी सुटकेचा निःश्वास सोडला.

पुणे, दि. २६: शासकीय औद्योगिक प्रशिक्षण संस्था, औंध येथे ३० सप्टेंबर २०२४ रोजी सकाळी १०.३० वाजता मुख्यमंत्री युवा कार्य प्रशिक्षण योजना व शिकाऊ उमेदवारी योजनेंतर्गत भरती मेळाव्याचे आयोजन करण्यात आले आहे.

या मेळाव्यास आय.टी.आय. उत्तीर्ण उमेदवार, एमसीव्हीसी बायफोकल उत्तीर्ण झालेले प्रशिक्षणार्थी तसेच यापूर्वी उत्तीर्ण झालेले परंतु, शिकाऊ उमेदवारी न मिळालेले प्रशिक्षणार्थी व इतर १२ वी, पदविकाधारक, पदवीधारक व पदव्युत्तर अशा नोकरी इच्छुक उमेदवारांनी क्यूआर कोड स्कॅन करुन नोंदणी करावी आणि मेळाव्यात उपस्थित रहावे, असे आवाहन मुलभूत प्रशिक्षण तथा अनुषंगिक सूचना केंद्राचे सहाय्यक प्रशिक्षणार्थी सल्लागार डी. एन. गडदरे तसेच औद्यागिक प्रशिक्षण संस्थेचे उपसंचालक आर. बी. भावसार यांनी केले आहे

पुणे, दि २६ : महिला व बाल विकास विभागाच्यावतीने महिलांसाठी सुरू करण्यात आलेल्या ‘पिंक (गुलाबी) ई-रिक्षा’ वाटप योजनेचा लाभ घेण्याचे आवाहन करण्यात आले आहे.

या योजनेमुळे महिलांना रोजगार निर्मितीस चालना मिळण्यासोबतच त्या स्वावलंबी, आत्मनिर्भर होण्यास मदत होणार आहे. विधवा, कायद्याने घटस्फोटित, राज्यगृहातील इच्छुक प्रवेशित, अनाथ युवती, अनुरक्षणगृह, बालगृहातील आजी, माजी प्रवेशित तसेच दारिद्रय रेषेखालील महिलांना लाभाकरीता प्राधान्य देण्यात येणार आहे.

या योजनेंतर्गत पात्र ठरणाऱ्या महिलांना बँकेकडून ई-रिक्षा किंमतीच्या ७० टक्के कर्ज उपलब्ध करून देण्यात येणार आहे. राज्यशासन २० टक्के आर्थिक भार उचलणार असून लाभार्थी महिलांवर १० टक्के आर्थिक भार असणार आहे. 

या योजनेचा लाभ घेण्याकरीता २० ते ४० वयोगटातील  ३ लाख रुपयांपेक्षा अधिक वार्षिक उत्पन्न नसलेल्या महिलांनी नारीशक्ती दूत ॲपवर ऑनलाईन पद्धतीने अर्ज करावेत.योजनेअंतर्गत करावयाचा अर्जाचा नमुना तसेच आवश्यक कागदपत्रांची माहिती जिल्हा महिला व बाल विकास अधिकारी कार्यालयात उपलब्ध आहे, अशी माहिती जिल्हा महिला व बालविकास अधिकारी मोनिका रंधवे यांनी दिली आहे.

पुणे, दि.२६ : उपमुख्यमंत्री तथा जिल्ह्याचे पालकमंत्री अजित पवार यांच्या हस्ते शिवाजीनगर येथे उभारण्यात येणाऱ्या कामगार भवनाची पायाभरणी करण्यात आली.

यावेळी खासदार डॉ. मेधा कुलकर्णी, कामगार आयुक्त डॉ. एच. पी. तुम्मोड, विभागीय आयुक्त डॉ. चंद्रकांत पुलकुंडवार, पुणे महानगरपालिका आयुक्त डॉ. राजेंद्र भोसले, जिल्हाधिकारी डॉ. सुहास दिवसे, सार्वजनिक बांधकाम विभागाचे मुख्य अभियंता अतुल चव्हाण, अपर कामगार आयुक्त शैलेंद्र पोळ, अधीक्षक अभियंता बप्पा बहीर, कामगार उप आयुक्त अभय गिते आदी उपस्थित होते.

कामगार भवन बाबत
सद्यस्थितीत उद्योग, उर्जा व कामगार विभाग, मंत्रालय, मुंबई यांच्या अधिनस्त पुणे विभागातील अपर कामगार आयुक्त यांचे कार्यालय, पुणे विभाग, पुणे, कामगार उप आयुक्त यांचे कार्यालय, पुणे जिल्हा, औद्योगिक सुरक्षा व आरोग्य संचलनालय, पुणे, बाष्पके संचलनालय, पुणे, महाराष्ट्र इमारत व इतर बांधकाम कामगार कल्याणकारी मंडळ, पुणे, घरेलू कामगार मंडळ, पुणे व सुरक्षा रक्षक मंडळ, पुणे ही कार्यालये पुणे शहरात विविध ठिकाणी कार्यरत आहेत.

ही महामंडळ, विविध विभागस्तरीय आणि जिल्हास्तरीय कार्यालये पुणे शहरातील मध्यवर्ती ठिकाणी एकाच प्रशस्त व दर्जेदार प्रशासकीय इमारतीमध्ये कार्यरत व्हावीत यासाठी पुणे शहरामध्ये मध्यवर्ती ठिकाण असलेल्या बंगला क्र. 5, मुंबई-पुणे रस्ता, शिवाजीनगर येथे हे कामगार भवन उभारण्यास मान्यता मिळाली आहे. याचा लाभ कामगार, त्यांचे प्रतिनिधी, मालक प्रतिनिधी, विविध संघटना, विधीज्ञ तसेच कामगार विभागांतर्गत विविध योजनांचा लाभ घेण्यासाठी येणारा सर्वसामान्य कामगार, महिला व नागरिक यांना मिळणार असल्याची माहिती अपर कामगार आयुक्त शैलेंद्र पोळ यांनी या अनुषंगाने दिली.

•  उत्कृष्ट २५ अभियंत्यांचा सन्मान

पुणे – महावितरणमध्ये अभियंता म्हणून अंधारलेल्या वाटा, घरे प्रकाशाने उजळून टाकण्याचे भाग्य मिळाले आहे. त्यामुळे शासकीय कर्तव्य बजावताना सामाजिक सेवेचा एक वेगळा आनंद आहे. समाधान आहे. दैनंदिन कामात हा आनंद कायम राहील अशी तत्पर व ग्राहकांना समाधान देणारी सेवा द्या असे आवाहन मुख्य अभियंता राजेंद्र पवार यांनी केले.

रास्तापेठ येथील ‘प्रकाशदीप’ सभागृहात मंगळवारी (दि. २४) आयोजित राष्ट्रीय अभियंता दिनाच्या कार्यक्रमात मुख्य अभियंता पवार बोलत होते. यावेळी व्यासपीठावर अधीक्षक अभियंता अरविंद बुलबुले, युवराज जरग, सिंहाजीराव गायकवाड, सहायक महाव्यवस्थापक माधुरी राऊत (वित्त) व ज्ञानदा निलेकर (मानव संसाधन) यांची उपस्थिती होती. यावेळी पुणे परिमंडलातील उत्कृष्ट २५ अभियंत्यांचा सन्मानपत्र प्रदान करून गौरव करण्यात आला.

मुख्य अभियंता राजेंद्र पवार म्हणाले, मूलभूत गरज बनलेल्या वीजक्षेत्रातील महावितरणमध्ये विद्त अभियांत्रिकीचा उज्ज्वल व ऐतिहासिक वारसा लाभला आहे. याच बळावर डोंगरदऱ्या, अतिदुर्गम भागात वीजयंत्रणा उभारून सुमारे ३ कोटी ग्राहकांशी महावितरणने प्रकाशाचे नाते जोडले आहे. हे नाते ग्राहकसेवेतून भक्कम व अतूट राहावे यासाठी सामाजिक जबाबदारीच्या जाणीवेने अभियंता म्हणून कार्यरत राहा असे आवाहन त्यांनी केले.

या कार्यक्रमामध्ये, सन २०२३-२४ मध्ये उत्कृष्ट कामगिरी करणारे अतिरिक्त कार्यकारी अभियंता– विष्णू पवार, नीलेश रोहणकर, कल्याण गिरी, उमेश चव्हाण, स्नेहलता हंचाटे, दीपक भोसले. उपकार्यकारी अभियंता– नीलेश रासकर, सुप्रिया वस्त्रद, अर्णव लिडबिडे, अनुपमा कुद्रे, वैशाली पगारे. सहायक अभियंता– ज्ञानेश्वर धंपलवार, प्राजक्ता रोडे, मनीषा कुदळे, अक्षय पवार, स्वप्निल काटकर, महेश देशमुख, दिनेश बडशे, शैलेश कुलकर्णी, आकांक्षा वाचकवडे, स्वप्ना देव, अनघा कुलकर्णी, सचिन वीर, तेजश्री ठाकूर यांचा गौरव करण्यात आला. कार्यक्रमाचे सूत्रसंचालन उपकार्यकारी अभियंता डॉ. संतोष पाटणी यांनी केले तर कार्यकारी अभियंता श्री. धनराज बिक्कड यांनी आभार मानले. कार्यक्रमाला अभियंता व अधिकारी, कर्मचारी उपस्थित होते.

• दि.१ ऑक्टोबर रोजी शरद पवार यांच्या हस्ते उदघाटन

पुणे :महाराष्ट्र गांधी स्मारक निधी आणि युवक क्रांती दलातर्फे ‘राष्ट्रपिता महात्मा गांधी सप्ताहा’चे पुण्यात दि.१ ते ७ ऑक्टोबर २०२४ दरम्यान आयोजन करण्यात आले आहे. या सप्ताहामध्ये महात्मा गांधींच्या विचारांचा प्रसार, सत्य, अहिंसा आणि शांती यांचे महत्त्व तसेच त्यांच्या योगदानाची आठवण ठेवून व्याख्याने,परिसंवाद,पुस्तक प्रकाशन,भजन, शांती मार्च ,खादी प्रदर्शन,गांधी चित्रपट महोत्सव,पुरस्कार वितरण असे विविध कार्यक्रम  होणार आहेत.गांधी सप्ताह आयोजनाचे हे १३ वे वर्ष आहे. गांधी सप्ताहाचे सर्व कार्यक्रम गांधी भवन, कोथरूड, पुणे येथे होणार आहेत. महाराष्ट्र गांधी स्मारक निधी चे अध्यक्ष डॉ. कुमार सप्तर्षी यांनी पुणे श्रमिक पत्रकार संघ येथे झालेल्या पत्रकार परिषदेत ही माहिती दिली.
विश्वस्त अन्वर राजन, जांबुवंत मनोहर, सचिन पांडूळे, एड. स्वप्नील तोंडे पत्रकार परिषदेत उपस्थित होते.
दि.१ ऑक्टोबर रोजी ज्येष्ठ नेते,माजी संरक्षण मंत्री  शरद पवार यांच्या हस्ते सायंकाळी ५.३० वाजता सप्ताहाचे उद्घाटन होणार आहे. ज्येष्ठ हिंदी साहित्यिक अशोक वाजपेयी यांच्या प्रमुख उपस्थितीत हा कार्यक्रम होणार आहे.सर्वधर्मप्रार्थनेने कार्यक्रमाची सुरुवात होईल. सुरेश द्वाद‌शीवार यांच्या ‘गांधी आणि त्याचे टिकाकार’ या पुस्तकाच्या Gandhi And His Critics या इंग्रजी अनुवादाचे  प्रकाशन होईल.विवेक गोविलकर यांनी हा अनुवाद केला आहे.शरद पवार यांच्या हस्ते ‘सलोखा’  गटाचे प्रमोद मजुमदार यांना सामाजिक योगदानाबद्दल पुरस्कार देऊन गौरविण्यात येणार आहे.उदघाटन कार्यक्रमाच्या अध्यक्ष स्थानी डॉ.कुमार सप्तर्षी असतील.  

 दि.२ ऑक्टोबर रोजी गांधी जयंती आणि जागतिक अहिंसा दिनाच्या निमित्ताने सकाळी ८ वाजता शुभांगी मुळे आणि सहकाऱ्यांचा प्रार्थना आणि भजनाचा कार्यक्रम होणार आहे. ११ ते ३ पर्यंत सर्वांसाठी प्रसादभोजन आयोजित करण्यात आले आहे. याच दिवशी सकाळी साडेनऊ  वाजता गोखले चौक(गुडलक हॉटेल) ते  गांधी पुतळा गांधी भवन  या मार्गावर ‘शांती मार्च’ काढण्यात येणार आहे. पुणे शहर कायम दंगामुक्त राहावे, या संकल्पासाठी हा शांती मार्च काढण्यात येणार आहे.

दि.३ ऑक्टोबर रोजी सायंकाळी ६ वाजता ‘नागरी समाज व निवडणुका ‘ या विषयावर ज्येष्ठ पत्रकार अशोक वानखेडे (दिल्ली)यांचे व्याख्यान होणार आहे.दि.४ ऑक्टोबर रोजी सायंकाळी ६ वाजता एलोरा बोरा यांचे भरतनाट्यम नृत्य आयोजित करण्यात आले आहे.
दि.५ ऑक्टोबर रोजी सायंकाळी ६ वाजता जेएनयू मधील ज्येष्ठ प्राध्यापक डॉ.मणिंद्रनाथ ठाकूर  यांचे २१ वी सदी की समस्याए और गांधी  ‘ या विषयावर व्याख्यान होणार आहे. दि.६ ऑक्टोबर रोजी सकाळी ११  वाजता संजय रघुवीर यांचे जादूचे प्रयोग होणार आहेत.सायंकाळी ६ वाजता ज्येष्ठ पत्रकार निखिल वागळे  यांचे ‘भारतीय लोकशाही समोरील आव्हाने  ‘ या विषयावर व्याख्यान होणार आहे. दि.७ ऑक्टोबर रोजी सायंकाळी ६ वाजता ‘संसदीय आणि  बिगर संसदीय राजकारण’ या विषयावर परिसंवाद होणार आहे. ज्येष्ठ पत्रकार संजय आवटे,अभ्यासक चैत्रा रेडकर,पत्रकार रवींद्र पोखरकर सहभागी होणार आहेत. डॉ.कुमार सप्तर्षी हे अध्यक्षस्थानी असतील. 
*खादी प्रदर्शन,गांधी चित्रपट महोत्सव*
गांधी सप्ताहानिमित्त ‘राष्ट्रपिता महात्मा गांधी सप्ताह फिल्म फेस्टीव्हल’ आयोजित करण्यात आला आहे.गांधी भवन मध्येच विविध चित्रपट दाखवले जातील.दि.२ ऑकटोबर रोजी दुपारी १ वाजता ऑस्कर विजेता ‘गांधी’ हा चित्रपट दाखवला जाणार आहे.दि.३ ऑक्टोबर रोजी दुपारी २ वाजता ‘जय भीम’,दि.४ ऑक्टोबर रोजी दुपारी २ वाजता ‘टू मच डेमोक्रसी’,दि.५ ऑक्टोबर रोजी दुपारी २ वाजता ‘कोर्ट’,दि.६ ऑक्टोबर रोजी दुपारी २ वाजता ‘द किड’,दि.७  ऑक्टोबर रोजी दुपारी २ वाजता ‘जय भीम कॉम्रेड’ हे चित्रपट दाखवले जाणार आहेत. महात्मा गांधी यांच्या जीवनावरील छायाचित्र प्रदर्शन मुख्य सभागृहात सप्ताहभर खुले असेल. गांधी भवन आवारात खादी प्रदर्शन,पुस्तक प्रदर्शन,इतर गृहोपयोगी वस्तूंचे स्टॉल मांडण्यात येणार आहेत. 

• उपमुख्यमंत्री अजित पवार आणि देवेंद्र फडणवीस यांची उपस्थिती.
• समर्थ प्रतिष्ठान ढोल ताशा ध्वज व ढोल तलवार पथकाचा २५ वा वर्धापन दिन सोहळा 

पुणे : समर्थ प्रतिष्ठान ढोल ताशा ध्वज व ढाल तलवार पथक हे २५ वा वर्धापन दिन सोहळा साजरा करीत आहेत. त्यानिमित्त समर्थ गौरव पुरस्कार प्रदान सोहळ्याचे आयोजन करण्यात आले आहे. यंदाचा समर्थ गौरव पुरस्कार क्वीन मेरी टेक्निकल इन्स्टिट्यूट ला प्रदान करण्यात येणार आहे. यावेळी इन्स्टिट्यूटचे  डीन कर्नल वसंत बल्लेवार (निवृत्त) आणि कर्नल ललित राय (निवृत्त) हे पुरस्कार स्वीकारणार आहेत. बुधवार, दिनांक २ आॅक्टोबर रोजी सकाळी ११ वाजता बालगंधर्व रंगमंदिर येथे पुरस्कार प्रदान सोहळा होणार आहे, अशी माहिती समर्थ प्रतिष्ठानचे अध्यक्ष संजय सातपुते यांनी पत्रकार परिषदेत दिली. 
पुरस्कार वितरण सोहळ्यासाठी उपमुख्यमंत्री अजित पवार आणि देवेंद्र फडणवीस, केंद्रीय राज्यमंत्री मुरलीधर मोहोळ, पोलीस आयुक्त अमितेश कुमार, निवृत्त एअरमार्शल भूषण गोखले, निवृत्त कर्नल चितळे, सामाजिक कार्यकर्त्या शोभा धारिवाल, अ‍ॅड. प्रताप परदेशी, डॉ.मिलिंद भोई, डॉ. अ.ल.देशमुख, हनुमंत बहिरट, यांसह पुण्यातील मानाच्या गणपती मंडळाचे अध्यक्ष उपस्थित राहणार आहेत. कार्यक्रमाचे स्वागताध्यक्ष प्रख्यात उयोजक पुनीत बालन हे आहेत. रुपये ११ हजार, सन्मान चिन्ह, शाल, पुणेरी पगडी असे पुरस्काराचे स्वरूप आहे. यावेळी समर्थ प्रतिष्ठानच्या स्मरणिकेचे प्रकाशन देखील होणार आहे.
संजय सातपुते म्हणाले,  देशसेवेसाठी कार्यरत असताना अपंगत्व आलेल्या सैनिकांना आत्मनिर्भर बनवण्यासाठी आणि त्यांचा आत्मविश्वास पुन्हा जागविण्यासाठी काम  क्वीन मेरी टेक्निकल इन्स्टिट्यूट करीत आहे/ कर्नल बल्लेवार हे संस्थेचे डीन आहेत. यामाध्यमातून सैनिकांसाठी व समाजासाठी संस्था मोठे कार्य सातत्याने करीत आहे. 
दिनांक २ आॅक्टोबर १९९९ रोजी समर्थ प्रतिष्ठान ची स्थापना झाली. संजय सातपुते हे प्रतिष्ठानचे संस्थापक अध्यक्ष आहेत. वादनासोबतच सामाजिक बांधिलकी देखील प्रतिष्ठानच्या माध्यमातून जपली जाते. आजपर्यंत एकूण १ कोटी रुपयांपेक्षा अधिक रक्कम शैक्षणिक व सामाजिक कायार्साठी देणगी देऊन सामाजिक ऋण फेडण्याचा प्रयत्न प्रतिष्ठानने केला आहे. यापूर्वी स्नेहालय संस्थेचे गिरीश कुलकर्णी, भोई फाउंडेशनचे डॉ. मिलिंद भोई, मेळघाट येथील उमंग संस्थेचे ऋषिकेश खिलारे, बाबा आमटे विकास संस्थेचे अनंत झेंडे, सेवा मित्र मंडळ ट्रस्टचे शिरीष मोहिते यांसह सामाजिक क्षेत्रात काम करणा-या व्यक्तींना पुरस्काराने सन्मानित करण्यात आले आहे.

• केंद्रीय मंत्री मुरलीधर मोहोळ यांचाही होणार विशेष सन्मान
• पुणे नागरी सहकारी बँक्स् असोसिएशन लि. (महाराष्ट्र) तर्फे कार्यक्रमाचे आयोजन 

पुणे : सहकार व बँकिंग क्षेत्रात बहुमूल्य योगदान दिल्याबद्दल पुणे नागरी सहकारी बँक्स असोसिएशन लि. (महाराष्ट्र) तर्फे सन २०२२-२३ वर्षासाठी पुणे कँन्टोमेंट बँकेचे अध्यक्ष कैलास कोद्रे आणि सन २०२३-२४ वर्षासाठी प्रेरणा सहकारी बँक थेरगावचे संस्थापक संचालक तुकाराम उर्फ भाऊसाहेब गुजर यांना जीवन गौरव पुरस्काराने सन्मानित करण्यात येणार आहे. शनिवार, दिनांक २८ सप्टेंबर रोजी दुपारी १२.३० वाजता शिवदर्शन येथील राजीव गांधी अ‍ॅकॅडमी आॅफ ई-लर्निंग स्कूल येथे हा कार्यक्रम होणार आहे, अशी माहिती असोसिएशनचे अध्यक्ष अ‍ॅड.सुभाष मोहिते यांनी पत्रकार परिषदेत दिली. पत्रकार परिषदेला उपाध्यक्ष अ‍ॅड.साहेबराव टकले, सुनिल रुकारी, निलेश ढमढेरे, डॉ. प्रिया महिंद्रे, बाळकृष्ण उंद्रे, मुख्य कार्यकारी अधिकारी चंद्रकांत शेळके आदी उपस्थित होते. अ‍ॅड.सुभाष मोहिते म्हणाले, केंद्र सरकारमध्ये सहकार आणि नागरी विमान वाहतूक राज्यमंत्री म्हणून निवड झाल्याबद्दल केंद्रीय मंत्री मुरलीधर मोहोळ यांचाही यावेळी विशेष सन्मान होणार आहे. तसेच मोहोळ यांच्या हस्ते बँकांचा सन्मान केला जाणार आहे. सन २०२२-२३ व सन २०२३-२४ या वर्षात ज्या बँकांनी शून्य टक्के एन.पी.ए. राखला, त्या बँकांचा गौरव करण्यात येणार आहे. असोसिएशनने आयोजित केलेल्या प्रशिक्षण कार्यक्रमांमध्ये ज्या बँकांनी जास्तीत जास्त सहभाग घेतला, त्या बँकांना देखील सन्मानित करण्यात येईल. कार्यक्रमाच्या अध्यक्षस्थानी राज्याचे सहकार आयुक्त दीपक तावरे हे असणार आहेत. तर, रिझर्व बँक आॅफ इंडियाचे संचालक सतिश मराठे, राज्य सहकारी निवडणूक प्राधिकरणाचे आयुक्त अनिल कवडे, वैकुंठ मेहता राष्ट्रीय सह. प्रबंधन संस्थानच्या निदेशक डॉ.हेमा यादव आणि महाराष्ट्र राज्य सहकारी बँक मुंबईचे प्रशासक विद्याधर अनास्कर आदी मान्यवर उपस्थित राहणार आहेत. अ‍ॅड.साहेबराव टकले म्हणाले, पुणे नागरी सहकारी बँक्स असोसिएशन लि. (महाराष्ट्र) गेली ४५ वर्षे सातत्याने बँकिंग क्षेत्रात शिक्षण, प्रशिक्षण, प्रसार व प्रसिद्धीचे काम करीत आहे. अनेक अडचणींचा सामना करीत, तीव्र स्पर्धेतही सहकारी बँका केवळ टिकून आहेत असे नाही, तर प्रगतीही करीत आहेत. त्यामुळे उल्लेखनीय कामगिरी करणा-या बँकांना असोसिएशनतर्फे गौरविण्यात येणार आहे. या कार्यक्रमाला पुणेकरांनी मोठया संख्येने उपस्थित रहावे, असे आवाहनही त्यांनी केले आहे.

• महाराष्ट्रीयन लेडीज असोसिएशन तर्फे आयोजन ; दोन दिवसीय प्रदर्शनाला विनामूल्य प्रवेश

पुणे : महाराष्ट्रीयन लेडीज असोसिएशन तर्फे राज्यातील महिला उद्योजकांना व्यासपीठ मिळावे, यासाठी  ‘एमएलए नवरात्र उत्सव प्रदर्शना’ चे आयोजन करण्यात आले आहे. दिनांक २८ आणि २९ सप्टेंबर रोजी जंगली महाराज रस्त्यावरील हॉटेल सेंट्रल पार्क येथे हे प्रदर्शन होणार आहे. यामध्ये पुण्यासह संगमनेर, धाराशिव, धुळे, नगर, लोणावळा या ठिकाणाहून महिला उद्योजिका प्रदर्शनास सहभागी झाल्या असून विविध प्रकारचे ७५ स्टॉल्स आहेत, अशी माहिती आयोजिका अभिलाषा बेलुरे यांनी पत्रकार परिषदेत दिली. पत्रकार परिषदेला योगिता सिंघ, अपूर्वा पाटकर, दिशा जोशी, नम्रता जाधव टीकारे आदी उपस्थित होते. 
दोन दिवसीय प्रदर्शन दुपारी १२ ते रात्री ८ वाजेपर्यंत विनामूल्य खुले आहे. या दरम्यान मुलांसाठी आणि महिलांसाठी विविध स्पधेर्चे देखील आयोजन करण्यात आले आहे. नऊवारी ठसका, लहान मुलांसाठी चित्रकला स्पर्धा, दोन दिवसीय विनामूल्य गरबा कार्यशाळा घेण्यात येणार आहे. प्रदर्शनात नवरात्र आणि दिवाळीसाठी लागणारे कपडे दागिने वेगवेगळ्या प्रकारचे सजावटीचे साहित्य लहान मुलांची खेळणी अशा अनेक गोष्टी पुणेकरांना खरेदी करता येणार आहेत.
‘लाडका ग्राहक योजना’ या अंतर्गत रुपये ५० हजारापेक्षा अधिक खरेदी करतील, त्यांना हिरा गिफ्ट म्हणून मिळणार आहे. तसेच रुपये १५ हजारापेक्षा अधिक खरेदी करतील त्यांना कुबेर की भेट म्हणून देण्यात येणार आहे. तरी पुणेकरांनी मोठया संख्येने प्रदर्शनाला भेट द्यावी, असे आवाहन करण्यात आले आहे.