कोंढवा पोलिसांची तातडीची कारवाई; खंडणी मागणाऱ्या अज्ञाताविरुद्ध गुन्हा दाखल

पुणे, दि. २१ जून : कोंढवा परिसरातील १७ वर्षीय मुलीचे अपहरण झाल्याची तक्रार दाखल झाल्यानंतर कोंढवा पोलिसांनी अवघ्या काही तासांत तपासाची चक्रे फिरवत मुलीला झारखंडमधून सुखरूप ताब्यात घेतले. याचवेळी मुलीच्या कुटुंबीयांना व्हिडीओ कॉल करून खंडणीची मागणी करणाऱ्या अज्ञात व्यक्तीविरुद्धही गुन्हा दाखल करण्यात आला आहे.

पोलिसांनी दिलेल्या माहितीनुसार, १८ जून रोजी कोंढवा बुद्रुक परिसरातील रहिवासी असलेल्या तक्रारदाराची १७ वर्षीय मुलगी घरातून निघून गेल्याची तक्रार कोंढवा पोलीस ठाण्यात दाखल झाली होती. त्यानुसार भारतीय न्याय संहितेच्या कलम १३७(२) अंतर्गत गुन्हा नोंदवून तपास सुरू करण्यात आला.

तपास सुरू असतानाच तक्रारदाराला एका अज्ञात व्यक्तीने व्हिडीओ कॉल करून “तुमची मुलगी आमच्या ताब्यात आहे” असा दावा करत पैशांची मागणी केली. त्यासाठी यूपीआय स्कॅनरही पाठविण्यात आला. याबाबतची माहिती मिळताच पोलिसांनी घटनेचे गांभीर्य ओळखून तपास अधिक वेगाने सुरू केला.

सीसीटीव्ही फुटेज, तांत्रिक विश्लेषण आणि रेल्वे प्रवासाची माहिती तपासताना संबंधित मुलगी आजाद हिंद एक्सप्रेसने हावडा दिशेने जात असल्याचे निष्पन्न झाले. त्यानंतर कोंढवा पोलिसांनी तत्काळ रेल्वे प्रशासन व झारखंडमधील टाटानगर (जमशेदपूर) रेल्वे पोलिसांशी संपर्क साधला. त्यांच्या समन्वयातून मुलीचा शोध घेण्यात यश आले आणि तिला सुखरूप ताब्यात घेण्यात आले.

यानंतर कोंढवा पोलिसांचे पथक आणि मुलीचे नातेवाईक झारखंडला रवाना झाले. मुलीला सुरक्षितपणे पुण्यात आणण्याची प्रक्रिया सुरू असून तिच्या कुटुंबीयांना मोठा दिलासा मिळाला आहे.

दरम्यान, बनावट अपहरणाचा बनाव करून व्हिडीओ कॉलद्वारे खंडणी मागणाऱ्या अज्ञात व्यक्तीविरुद्ध भारतीय न्याय संहितेच्या विविध कलमांसह माहिती तंत्रज्ञान कायद्यान्वये स्वतंत्र गुन्हा दाखल करण्यात आला असून पुढील तपास सुरू आहे.

आंतरराष्ट्रीय योग दिनानिमित्त वस्ती भागातील ३५०० मुलींकडून योग प्रात्यक्षिके

योगाच्या शास्त्रोक्त प्रशिक्षणासाठी ‘योग निकेतन’ची स्थापना

पुणे-आपला समाज निरोगी आणि सुदृढ असावा, असा माननीय पंतप्रधान नरेंद्र मोदी यांचा आग्रह असून, मानसी उपक्रमाच्या माध्यमातून संस्कारक्षम आणि निरोगी पिढी घडवण्याचा संकल्प असल्याची भावना राज्याचे उच्च व तंत्रशिक्षण मंत्री चंद्रकांतदादा पाटील यांनी व्यक्त केली.

आंतरराष्ट्रीय योग दिनानिमित्त मानसी प्रेरणा फाऊंडेशनच्या वतीने विशेष कार्यक्रमाचे आयोजन करण्यात आले होते. यावेळी वस्ती भागातील सुमारे ३,५०० मुलींनी उत्स्फूर्तपणे योग प्रात्यक्षिके सादर केली. कार्यक्रमात ना. चंद्रकांतदादा पाटील यांनीही सहभागी होत मुलींसोबत योगाभ्यास केला.

यावेळी बोलताना ना. पाटील म्हणाले की, पंतप्रधान नरेंद्र मोदी यांनी योगाचे महत्त्व जगभर पोहोचविण्यासाठी आंतरराष्ट्रीय योग दिनाची संकल्पना पुढे नेली. त्यानंतर योगाचा प्रचार आणि प्रसार जगातील अनेक देशांमध्ये मोठ्या प्रमाणावर झाला आहे. योग ही केवळ व्यायाम पद्धती नसून निरोगी, संतुलित आणि सकारात्मक जीवनशैलीची गुरुकिल्ली आहे.

ते पुढे म्हणाले की, स्त्री हा समाजाचा महत्त्वाचा आधारस्तंभ आहे. त्यामुळे संस्कारक्षम, सशक्त आणि निरोगी समाज घडवण्यासाठी मुलींच्या सर्वांगीण विकासावर भर देणे आवश्यक आहे. मानसी उपक्रमाच्या माध्यमातून याच उद्देशाने सातत्यपूर्ण प्रयत्न सुरू आहेत. आज मानसी उपक्रमाचे स्वरूप हे एका प्रगत आणि सातत्याने विकसित होत जाणाऱ्या सामाजिक चळवळीचे झाले असून, नवजात बालकाच्या वाढीप्रमाणे हा उपक्रम दिवसेंदिवस विस्तारत आणि अधिक प्रभावी होत आहे.

याशिवाय, आगामी काळात भारताला मोठ्या आंतरराष्ट्रीय क्रीडा स्पर्धांचे यजमानपद मिळण्याच्या दृष्टीने प्रयत्न सुरू आहेत. या पार्श्वभूमीवर देशातील खेळाडूंना प्रोत्साहन देणे आणि त्यांना सक्षम व्यासपीठ उपलब्ध करून देणे गरजेचे आहे. मानसी उपक्रमाच्या माध्यमातून किमान ५० महिला खेळाडू घडवण्याचा आमचा प्रयत्न असल्याचेही ना. पाटील यांनी सांगितले.

दरम्यान, योगाचे शास्त्रोक्त आणि दर्जेदार प्रशिक्षण उपलब्ध करून देण्यासाठी मानसी प्रेरणा फाऊंडेशन आणि नाशिकच्या योग विद्या गुरुकुल यांच्या संयुक्त विद्यमाने ‘योग निकेतन’ या नव्या केंद्राची स्थापना करण्यात येत आहे. या केंद्राच्या लोगोचे अनावरण ना. चंद्रकांतदादा पाटील यांच्या हस्ते करण्यात आले.

या कार्यक्रमास मानसी प्रेरणा फाऊंडेशनच्या संचालिका मुग्धा भागवत, प्रभाग अध्यक्षा ॲड. वासंती जाधव, मंजुश्री खर्डेकर, नगरसेवक पुनीत जोशी, नगरसेविका ॲड. मिताली सावळेकर, रेश्मा बराटे, माजी नगरसेविका व संचालक मंडळ सदस्या छाया मारणे, स्वाती मोहोळ, अद्वैत जोशी, माजी नगरसेवक दीपक पोटे, सुशील मेंगडे, डॉ. संदीप बुटाला, भाजप कोथरुड दक्षिण मंडल अध्यक्ष गिरीश खत्री तसेच भाजपचे पदाधिकारी, कार्यकर्ते आणि नागरिक मोठ्या संख्येने उपस्थित होते.

पुणे : “ग्रामीण भागातील मुले ही निसर्गतःच विविध कलागुणांनी संपन्न असतात. मात्र, योग्य संधी न मिळाल्यामुळे किंवा त्यांच्यात काहीसा न्यूनगंड असल्यामुळे ती मुख्य प्रवाहाच्या बाहेर राहतात. या मुलांना प्रवाहात आणण्यासाठी त्यांच्यामध्ये आत्मविश्वास निर्माण करण्याची आज नितांत गरज आहे. एकदा का त्यांच्यात हा विश्वास जागवला, की ही मुले यशाची उत्तुंग भरारी घेतील. जीवनातील प्रत्येक गोष्टीकडे सकारात्मकतेने पाहायला शिका, सकारात्मकतेने काम करत राहा आणि कायम संवाद ठेवा, आपल्याला यश नक्कीच मिळेल,” असे प्रतिपादन ”लायब्ररी अँड पोस्टकार्ड मॅन’ म्हणून ओळखले जाणारे व रूरल रिलेशनशिपचे संस्थापक प्रदीप लोखंडे यांनी केले.
‘मानव्य’ संस्थेच्या २९ व्या वर्धापन दिन सोहळ्यात ते मुख्य पाहुणे म्हणून बोलत होते. हा सोहळा रविवारी भूगाव येथील ‘मानव्य गोकुळ’ (माताळवाडी फाटा) संस्थेच्या आवारात अत्यंत उत्साहात पार पडला. कार्यक्रमाच्या अध्यक्षस्थानी संस्थेचे अध्यक्ष शिरीष लवाटे उपस्थित होते, तर व्यासपीठावर, सार्थ वेल्थ’चे संस्थापक अरविंद परांजपे, माजी सरपंच शांताराम इंगवले, शशांक वाघ आणि उज्वला लवाटे यांची प्रमुख उपस्थिती होती. कार्यक्रमाचा प्रारंभ ‘मानव्य’ संस्थेच्या संस्थापिका स्वर्गीय विजयाताई लवाटे यांच्या प्रतिमेला पुष्पहार अर्पण करून व आदरांजली वाहून करण्यात आला.
याच वर्धापन दिनाचे औचित्य साधून ‘मानव्य’ संस्थेत उभारण्यात आलेल्या नवीन सौर ऊर्जा निर्मिती प्रकल्पाचे उदघाटन ‘सार्थ वेल्थ’चे संस्थापक अरविंद परांजपे यांच्या हस्ते व
याप्रसंगी मार्गदर्शन करताना प्रदीप लोखंडे यांनी ग्रामीण शिक्षण, वाचन संस्कृती आणि डिजिटल सक्षमीकरण या विषयांवर विशेष प्रकाश टाकला. देशभरात ‘पोस्ट कार्ड आणि लायब्ररी मॅन’ म्हणून काम करताना आलेले आपले समृद्ध अनुभव त्यांनी उपस्थितांसमोर मांडले. ते म्हणाले की, आपण सर्वांनी कायम लिहिते राहिले पाहिजे आणि लिहिते राहण्यासाठी मुलांमध्ये वाचनाची आवड निर्माण करणे आवश्यक आहे. त्यासाठी प्रत्येक शाळेत समृद्ध वाचनालय सुरू करण्याची गरज आहे, कारण आपण वाचू तरच लिहू शकू. जीवनात सकारात्मकतेला आपलेसे केल्यास नकारात्मकता दूर पळते आणि यशाचा मार्ग सुकर होतो, असा मोलाचा सल्ला त्यांनी यावेळी दिला.
परांजपे म्हणाले की, या नवीन प्रकल्पामुळे संस्था ऊर्जेच्या बाबतीत अधिक स्वावलंबी आणि स्वयंपूर्ण होईल. ‘मानव्य’ संस्थेमध्ये एक विलक्षण ऊर्जा असून ती मुलांच्या पंखात बळ देऊन त्यांना यशस्वी उड्डाणासाठी मोठे सहकार्य करत आहे, अशा सामाजिक कार्यात सहभागी होता आले याचा आपल्याला मोठा आनंद असल्याचे त्यांनी नमूद केले.
अध्यक्षीय मनोगत व्यक्त करताना संस्थेचे अध्यक्ष शिरीष लवाटे यांनी ‘मानव्य’ संस्थेच्या प्रेरणादायी प्रवासाचा आढावा घेतला. संस्थेच्या उभारणीत विजयाताई लवाटे यांचे योगदान अतुलनीय असल्याचे सांगत, देवदासींच्या मुलांचे प्रश्न सरकारी दरबारी मांडून त्यांना समाजात सन्मानाचे स्थान मिळवून देण्यासाठी त्यांनी आयुष्यभर लढा दिल्याचे त्यांनी सांगितले. आज त्यांच्याच प्रेरणेने संस्थेतील मुले केवळ शैक्षणिक प्रगतीच करत नसून स्वतःच्या पायावर उभे राहून आपले संसारही यशस्वीपणे थाटत असल्याचा अभिमान त्यांनी व्यक्त केला. या सोहळ्यात संस्थेच्या मुलांनी विविध सांस्कृतिक व गुणदर्शन कार्यक्रम सादर करून उपस्थितांची मने जिंकली, ज्याला उपस्थितांनी उत्स्फूर्त दाद दिली. कार्यक्रमादरम्यान शामकांत सुतार यांनी माऊथ ऑर्गनचे सुंदर वादन करून उपस्थितांना मंत्रमुग्ध केले आणि भविष्यात संस्थेतील विद्यार्थ्यांना ते विनामूल्य माऊथ ऑर्गन शिकवणार असल्याचे घोषित केले. सूत्रसंचालन आणि आभार प्रदर्शन संस्थेचे विश्वस्त समीर ढवळे यांनी केले.

• नांदेड सिटी, मारुंजी, वाघोलीत आयोजन; अधिकाऱ्यांसह जवानांचा सहभाग

पुणे : “आणीबाणीच्या आणि आपत्कालीन परिस्थितीत नागरिकांच्या सुरक्षेसाठी धावून जाणाऱ्या अग्निशमन दलाच्या जवानांना स्वतःला शारीरिक व मानसिकदृष्ट्या सुदृढ ठेवणे अत्यंत गरजेचे असते. या पार्श्वभूमीवर आंतरराष्ट्रीय योग दिनानिमित्त पुणे महानगर प्रदेश विकास प्राधिकरणाच्या (पीएमआरडीए) विविध अग्निशमन केंद्रांमध्ये जवानांनी उत्साहात योगाभ्यास केला,” अशी माहिती मुख्य अग्निशमन अधिकारी देवेंद्र पोटफोडे यांनी दिली.

‘पीएमआरडीए’च्या नांदेड सिटी, मारुंजी आणि वाघोली येथील अग्निशमन केंद्रांमध्ये विशेष योग सत्रांचे आयोजन करण्यात आले होते. ‘योग करा – निरोगी राहा, सक्षम बना आणि सशक्त समाज घडवा’ हा संदेश देत जवानांनी यामध्ये उत्स्फूर्त सहभाग नोंदवला.

मुख्य अग्निशमन अधिकारी देवेंद्र पोटफोडे यांच्या मार्गदर्शनात, आणि विभागीय अग्निशमन अधिकारी सुजित पाटील, तसेच अग्निशमन केंद्र अधिकारी विजय महाजन यांच्या थेट नियोजनाखाली या सत्रांचे आयोजन करण्यात आले होते. संबंधित केंद्रांवरील सर्व अधिकारी आणि कर्मचाऱ्यांनी एकत्र येत सामूहिक योगाभ्यास केला. केवळ व्यायाम म्हणून नव्हे, तर निरोगी जीवनशैली, मानसिक स्वास्थ्य आणि शारीरिक तंदुरुस्तीचा संदेश या माध्यमातून समाजापर्यंत पोहोचविण्यात आला.

अग्निशमन दलातील कर्तव्य हे अत्यंत आव्हानात्मक आणि तणावाचे असते. कोणत्याही क्षणी उद्भवणाऱ्या आपत्कालीन परिस्थितीला सामोरे जाण्यासाठी जवानांची मानसिक एकाग्रता आणि शारीरिक क्षमता उच्च पातळीवर असणे आवश्यक असते. योग ही केवळ व्यायाम पद्धती नसून ती निरोगी, संतुलित आणि सकारात्मक जीवन जगण्याची प्रभावी जीवनशैली आहे. जवानांच्या कार्यक्षमतेचा तो एक महत्त्वपूर्ण आधार असल्याचे मत यावेळी अधिकाऱ्यांनी व्यक्त केले.

आपत्कालीन मदतीसाठी संपर्क
नागरिकांच्या सेवेसाठी सदैव तत्पर असलेल्या ‘पीएमआरडीए’ अंतर्गत कोणत्याही आपत्कालीन परिस्थितीत मदतीसाठी नागरिकांनी ‘पीडीआरएफ’ (PDRF) दलाच्या ९५४५२८२९३० या क्रमांकावर संपर्क साधण्याचे आवाहन प्रशासनाने केले आहे.

कमी पावसाचा अंदाज; पुणे महापालिकेकडून पाणी बचतीसाठी कठोर उपाययोजना

पुणे, दि. २० जून : भारतीय हवामान विभागाने (IMD) यंदाच्या मान्सूनबाबत सरासरीपेक्षा कमी पावसाचा अंदाज व्यक्त केल्याच्या पार्श्वभूमीवर पुणे महानगरपालिकेने शहरात पाणी बचतीसाठी विविध कठोर उपाययोजना लागू करण्याचे आदेश जारी केले आहेत. अतिरिक्त महापालिका आयुक्त (ज) पवनीत कौर यांच्या स्वाक्षरीने हा कार्यालीन आदेश काढण्यात आला आहे.

आयएमडीच्या अंदाजानुसार जून ते सप्टेंबर २०२६ या कालावधीत देशातील हंगामी पर्जन्यमान दीर्घकालीन सरासरीच्या (LPA) सुमारे ९० ते ९५ टक्के राहण्याची शक्यता आहे. अल-निनोच्या प्रभावामुळे पर्जन्यमानावर विपरीत परिणाम होण्याची शक्यता लक्षात घेऊन महापालिकेने पाणी बचतीचे उपाय तातडीने राबविण्याचे निर्देश दिले आहेत

प्रमुख निर्णय

• शहरातील सार्वजनिक व खासगी वाहन धुण्याची (वॉशिंग सेंटर्स) केंद्रे बंद ठेवण्याचे आदेश.
• खासगी व सार्वजनिक स्विमिंग पूलमध्ये पिण्याच्या पाण्याचा वापर बंद.
• महापालिकेच्या उद्यानांसाठी पिण्याचे पाणी वापरण्यास मनाई.
• बांधकामे व रस्त्यांच्या कामांसाठी पिण्याच्या पाण्याचा वापर प्रतिबंधित.
• सोसायट्यांना सांडपाणी प्रक्रिया प्रकल्प (STP) वापरणे बंधनकारक.
• पाण्याच्या टाक्या ओव्हरफ्लो होणार नाहीत यासाठी दक्षता घेण्याचे निर्देश.
• अनधिकृत नळजोड व पाणीगळतीवर तातडीने कारवाई.

दंडात्मक कारवाईचा इशारा

महापालिकेच्या आदेशाचे उल्लंघन करणाऱ्या व्यक्ती, संस्था किंवा व्यावसायिक आस्थापनांवर १० हजार रुपयांपर्यंत दंडात्मक कारवाई करण्यात येणार आहे. तसेच दोन वेळा कारवाई झाल्यानंतरही नियमभंग सुरू राहिल्यास संबंधितांविरुद्ध फौजदारी गुन्हा दाखल करण्याचाही इशारा देण्यात आला आहे.

महापालिकेने सर्व विभागांना स्वतंत्र नोडल अधिकारी नियुक्त करण्याचे निर्देश दिले असून पाणी बचतीबाबत जनजागृती मोहीम राबविण्यात येणार आहे.

पुणे-नसरापूर येथील चिमुकलीवरील अत्याचार आणि निर्घृण खून प्रकरणाचा अंतिम निकाल येत्या २५ जून २०२६ रोजी जाहीर होणार आहे. हा खटला महाराष्ट्राच्या न्यायालयीन इतिहासातील सर्वात जलदगतीने चालविलेला खटला ठरण्याची दाट शक्यता आहे, कारण अवघ्या एका महिन्याच्या आतच या संपूर्ण प्रकरणाची सुनावणी पूर्ण होऊन निकाल समोर येत आहे.

या संवेदनशील प्रकरणात गुन्हा घडल्यापासून तपास यंत्रणा आणि न्यायालयाने अत्यंत कौतुकास्पद व वेगाने काम केले आहे. केवळ १६ दिवसांत पोलिसांनी न्यायालयात दोषारोपपत्र (चार्जशीट) दाखल केले. त्यानंतर पुढील १६ दिवसांत सर्व महत्त्वाच्या साक्षी व पुरावे नोंदवून घेण्यात आले. यानंतर २० दिवसांमध्ये अंतिम युक्तिवादही पूर्ण करण्यात आला. संपूर्ण खटल्याची प्रक्रिया अतिशय वेगाने पार पडल्यामुळे महिन्याभराच्या आतच पीडितेला अंतिम न्याय मिळण्याचा मार्ग मोकळा झाला आहे.

या खटल्याचा अंतिम युक्तिवाद देखील पूर्ण झाला आहे. विशेष सरकारी वकील अजय मिसार यांनी न्यायालयात सरकारची बाजू अत्यंत भक्कमपणे मांडली. त्यांनी न्यायालयात गुन्ह्याचा सविस्तर घटनाक्रम दर्शवणारा टाईमलाईन चार्ट, वैद्यकीय पुराव्यांचे विश्लेषण, फॉरेन्सिक डेटा चार्ट, डीएनए प्रोफाईलिंग मॅट्रिक्स आणि आरोपीचा गुन्ह्याशी थेट संबंध सिद्ध करणारा कनेक्टिव्हिटी चार्ट सादर केला. या भक्कम वैज्ञानिक व तांत्रिक पुराव्यांसोबतच ऐतिहासिक सर्वोच्च न्यायालयाच्या निकालांचा संदर्भ देत सविस्तर लेखी युक्तिवाद न्यायालयासमोर ठेवण्यात आला.

बचाव पक्षानेही आपला अंतिम युक्तिवाद पूर्ण केला. दोन्ही बाजूंचे युक्तिवाद सविस्तरपणे ऐकल्यानंतर न्यायालयाने या प्रकरणाचा निकाल राखून ठेवला असून, अंतिम निकालासाठी २५ जून २०२६ ही तारीख निश्चित केली आहे. नसरापूरमधील या अत्यंत संतापजनक प्रकरणामध्ये पीडित चिमुकलीला लवकरात लवकर आणि कठोर न्याय मिळावा, अशी संपूर्ण महाराष्ट्राची भावना होती.

• रेल्वेफाटकमुक्तीच्या दिशेने ‘पीएमआरडीए’चे महत्त्वाचे पाऊल!

पुणे : पुणे महानगर प्रदेश विकास प्राधिकरण (पीएमआरडीए) क्षेत्रातील वाहतूककोंडी सोडविण्याच्या आणि रस्ते रेल्वेफाटकमुक्त करण्याच्या दृष्टीने आज (शुक्रवार) एक अत्यंत महत्त्वाचे पाऊल उचलण्यात आले. ‘पीएमआरडीए’ हद्दीतील रेल्वे उड्डाणपूल (आरओबी) आणि रेल्वे मार्गाखालील भुयारी मार्ग (आरयूबी) यांच्या जलद व दर्जेदार बांधकामासाठी ‘पीएमआरडीए’ने ‘महाराष्ट्र रेल इन्फ्रास्ट्रक्चर डेव्हलपमेंट कॉर्पोरेशन लि.’ (महारेल) या कंपनीसोबत अधिकृत सामंजस्य करार केला आहे. या करारामुळे पुणे महानगर प्रदेशातील अनेक वर्षांपासून प्रलंबित असलेल्या वाहतुकीच्या प्रश्नांच्या निराकरणास मोठी मदत होणार आहे.

मुख्यमंत्री तथा ‘पीएमआरडीए’चे अध्यक्ष देवेंद्र फडणवीस यांनी पुणे महानगर प्रदेशातील वाहतूककोंडीची समस्या गांभीर्याने घेत, रेल्वेफाटकमुक्तीसाठी विशेष पुढाकार घेतला होता. यासंदर्भात पूर्वी झालेल्या बैठकींमध्ये रेल्वे मार्गावरील उड्डाणपूल, पादचारी पूल (एफओबी) आणि भुयारी मार्ग यांची कामे वेगवेगळ्या यंत्रणांमार्फत करण्याऐवजी, या कामांमध्ये तांत्रिक अनुभव असलेल्या ‘महारेल’मार्फतच करून घ्यावीत, असे निर्देश देण्यात आले होते. त्यानुसार या प्रक्रियेला गती मिळाली.

या निर्देशांनंतर ‘पीएमआरडीए’अंतर्गत हे प्रकल्प ‘महारेल’कडे सोपविण्याच्या दृष्टीने दोन्ही संस्थांमध्ये बैठकांचे सत्र पार पडले. महानगर आयुक्त डॉ. अभिजित चौधरी यांनी सामंजस्य कराराचा मसुदा तातडीने अंतिम करण्याचे निर्देश दिले होते. त्यानुसार आज या मसुद्यावर दोन्ही बाजूंकडून स्वाक्षऱ्या करण्यात आल्या. ‘महारेल’चे व्यवस्थापकीय संचालक राजेशकुमार जयस्वाल आणि ‘पीएमआरडीए’चे महानगर आयुक्त डॉ. अभिजित चौधरी यांनी या करारावर स्वाक्षरी केली. यावेळी ‘पीएमआरडीए’चे मुख्य अभियंता (प्रभारी) शिवप्रसाद बागडी यांच्यासह दोन्ही संस्थांचे वरिष्ठ अधिकारी उपस्थित होते.

या सामंजस्य करारामुळे पुणे महानगर प्रदेशातील अनेक रस्ते रेल्वेफाटकमुक्त होणार असून, रेल्वे फाटकांमुळे रस्त्यांवर लागणाऱ्या वाहनांच्या लांबच लांब रांगा आता इतिहासजमा होण्यास मदत होणार आहे. तसेच, ‘पीएमआरडीए’ क्षेत्राचा विकास अधिक वेगाने होण्याचा मार्ग मोकळा झाला असून, नागरिकांच्या प्रवासाचा वेळ आणि इंधन या दोन्हींची मोठ्या प्रमाणावर बचत होणार आहे.