पुणे- पर्वती पायथा परिसरात एका अवघ्या नऊ वर्षांच्या चिमुरडीवर तिच्याच नातलगाने अत्याचार करण्याचा प्रयत्न केल्याच्या धक्कादायक घटनेच्या निषेधार्थ आज तीव्र आंदोलन करण्यात आले. या अमानुष आणि संतापजनक घटने विरोधात स्थानिक महिलांसह सामाजिक कार्यकर्त्यांनी आरोपीच्या प्रतीकात्मक तिरडी आंदोलन करत निषेध नोंदवला.

या आंदोलनादरम्यान आरोपीच्या प्रतीकात्मक तिरडीला चपला मारत परिसरात फिरवण्यात आले. “अशा नराधमांना समाजात जागा नाही”, “लहान मुलींवरील अत्याचार थांबवा”, “महिलांच्या सुरक्षिततेसाठी कठोर कारवाई करा” अशा जोरदार घोषणांनी परिसर दणाणून गेला.यावेळी घटनेच्या परिसरातील अनेक स्थानिक महिला मोठ्या संख्येने उपस्थित होत्या. आंदोलनात माननीय रूपाली पाटील, सामाजिक कार्यकर्त्या संगीता तिवारी, प्रिया सूर्यवंशी यांनी सहभाग घेत पीडितेला न्याय मिळवून देण्याची ठाम भूमिका मांडली.या संपूर्ण आंदोलनाचे नियोजन व आयोजन भारती लोंढे यांनी केले होते. उपस्थित महिलांनी प्रशासनाकडे आरोपीवर कठोरात कठोर कारवाई करण्याची मागणी केली असून, अल्पवयीन मुलींवरील वाढत्या अत्याचारांच्या घटनांबाबत तीव्र संताप व्यक्त केला.“आज जर अशा विकृत प्रवृत्तीविरोधात समाज रस्त्यावर उतरला नाही, तर उद्या प्रत्येक घरातील मुलगी असुरक्षित होईल. अशा नराधमांना तात्काळ कठोर शिक्षा झालीच पाहिजे,” अशी भावना आंदोलनकर्त्यांनी व्यक्त केली

पुणे, दि. ६ मे २०२४: एमएसईबी होल्डिंग कंपनीद्वारे आयोजित अखिल भारतीय विद्युत क्रीडा नियंत्रण मंडळाच्या ४५ व्या राष्ट्रीय कबड्डी स्पर्धेत बुधवारी (दि.६) झालेल्या चुरशीच्या साखळी सामन्यांमध्ये महावितरणच्या पुरुष व महिला संघाने प्रतिस्पर्धी संघावर सहज विजय मिळवला. तर खो-खोमध्ये महावितरणच्या पुरुष संघासह राजस्थानच्या महिला व पुरूष संघाने आगेकूच केली आहे.

बालेवाडी येथील श्री शिवछत्रपती क्रीडा संकुलात आज पहिल्या सत्रात कबड्डी, खो-खोचे साखळी सामने झाले. कबड्डीच्या सामन्यांमध्ये महापारेषण संघाने मध्यप्रदेशच्या एमपी पॉवर संघाचा ३ गुणांनी पराभव केला. तर महावितरणने एकतर्फी वर्चस्व गाजवत महानिर्मिती संघाचा २६ गुणांनी पराभव केला. पंजाब पॉवरने उत्तराखंडच्या पॉवर ट्रान्समिशन कंपनीचा १७ गुणांनी आणि हरियाणा संघाने गुजरात संघाचा ३० गुणांनी पराभव केला. कबड्डीच्या महिला गटात हिमाचल प्रदेशने महापारेषण संघाचा ३२ गुणांनी तर महावितरणने हरियाणा पॉवर संघाचा ४८ गुणांनी एकतर्फी पराभव केला.

खो खोच्या महिला गटात राजस्थान संघाने गुजरात ऊर्जा विकास निगम संघाचा पराभव केला. तर पुरुष गटात हरियाणा पॉवर संघाने मध्यप्रदेश पॉवर संघाचा, राजस्थान विद्युत निगम संघाने गुजरात ऊर्जा विकास निगमचा तर राष्ट्रीय खो खो संघाचा कर्णधार व महावितरणचा खेळाडू प्रतिक वाईकर याच्या नेतृत्वात महावितरणने हिमाचल प्रदेश राज्य विद्युत मंडळ संघाचा सहज पराभव केला.

विद्युत कंपन्यांच्या राष्ट्रीय क्रीडा स्पर्धेचे पुण्यात थाटात उद्घाटन

पुणे, दि. ६ मे २०२६: सर्व खेळाडूंना एकत्रितपणे, एकजुटीने व सहकार्याने खेळूनच विजयाला गवसणी घालावी लागते. त्यामुळे कोणत्याही संघात सर्वप्रथम संघभावना निर्माण झाली की प्रत्येकाच्या वैयक्तिक कौशल्याला संधी मिळते. अनेक राष्ट्रीय व आंतरराष्ट्रीय स्पर्धांमध्ये प्रामुख्याने विद्युत कंपन्यांमधील खेळाडूंचा सहभाग व नावलौकीक वाढत आहे, ही अभिमानाची बाब आहे असे प्रतिपादन महावितरणचे संचालक (मानव संसाधन) श्री. राजेंद्र पवार यांनी बुधवारी (दि. ६) केले.

बालेवाडी (पुणे) येथील श्री शिवछत्रपती क्रीडा संकुलमध्ये एमएसईबी होल्डिंग कंपनीद्वारे आयोजित अखिल भारतीय विद्युत क्रीडा नियंत्रण मंडळाच्या ४७व्या राष्ट्रीय कबड्डी, कुस्ती, खो-खो व बास्केटबॉलच्या तीन दिवसीय क्रीडास्पर्धेला प्रारंभ झाला. महावितरणचे संचालक श्री. राजेंद्र पवार यांच्याहस्ते क्रीडाज्योत प्रज्वलित करून या स्पर्धेचे उद्घाटन झाले. कार्यक्रमाच्या अध्यक्षस्थानी पुणे प्रादेशिक संचालक (प्र.) श्री. सुनील काकडे, आयोजन समितीचे उपाध्यक्ष व मुख्य अभियंता श्री. अनिल कोलप (महापारेषण)व श्री. अशोक घाडगे, मुख्य अभियंता श्री. धनराज पेठकर, मुख्य महाव्यवस्थापक (मानव संसाधन) श्री. भूषण कुलकर्णी , मुख्य औद्योगिक संबंध अधिकारी श्री. संजय ढोके (महावितरण) व पुरुषोत्तम वारजुरकर (महानिर्मिती), विद्युत क्रीडा नियंत्रण मंडळाचे अध्यक्ष श्री. जिग्नेश राय, सरचिटणीस श्री. नरेश कुमार, उपाध्यक्ष श्री. भरत पाटील, खजीनदार श्री. ललित गायकवाड यांची व्यासपीठावर उपस्थिती होती.

विद्युत नियंत्रण मंडळाच्या राष्ट्रीय क्रीडा स्पर्धा खऱ्या अर्थाने देशातील सर्व विद्युत कंपन्यांच्या खेळाडूंचे हक्काचे व्यासपीठ बनले आहे. सर्व विद्युत कंपन्या आणि त्यांच्या उत्कृष्ट खेळाडूंना देशपातळीवर एकत्र आणण्यासाठी या मंडळाची भूमिका अतिशय महत्त्वाची आहे, असे गौरवोद्गार संचालक श्री. पवार यांनी काढले. प्रादेशिक संचालक श्री. सुनील काकडे यांनी सांगितले, की विद्युत क्षेत्र धकाधकीचे आहे. त्यामुळे क्रीडा स्पर्धेतून कर्मचारी मानसिक व शारीरिकदृष्ट्या कणखर बनतात. यासह त्यांच्या मैदानातील शिस्तीने कार्यालयातील कार्यक्षमतेत देखील वाढ होते.  

अत्यंत नेत्रदीपक व उत्साहात झालेल्या स्पर्धेच्या उद्घाटन सोहळ्यात सर्व खेळाडूंनी संचलन करीत पाहुण्यांना मानवंदना दिली. यावेळी काश्मिर ते कन्याकुमारीपर्यंत विविध राज्यांतील सांस्कृतिक कार्यक्रमाने उपस्थितांना मंत्रमुग्ध केले. कार्यक्रमाचे प्रास्ताविक विद्युत क्रीडा नियंत्रण मंडळाचे खजिनदार श्री. ललित  गायकवाड यांनी केले. सूत्रसंचालन डॉ. संतोष पाटणी,  रामगोपाल अहीर, भक्ती जोशी, सोनाली बाविस्कर, स्वागती सोळंकुरे यांनी केले तर श्री. अशोक घाडगे यांनी आभार मानले.

या राष्ट्रीय स्पर्धेमध्ये महाराष्ट्रासह गुजरात, हरियाणा, तेलंगाणा, राजस्थान, उत्तराखंड, पंजाब, हिमाचल प्रदेश, मध्यप्रदेश, दिल्ली आदी राज्यांतील सरकारी व खासगी विद्युत कंपन्यांचे ४१ संघ आणि सुमारे ५३८ महिला व पुरुष खेळाडू सहभागी झाले आहेत.

पुणे :  महाराष्ट्र जीवन प्राधिकरण (म.जी.प्रा.) मधील सेवानिवृत्त कर्मचाऱ्यांना मागील दोन महिन्यांपासून निवृत्ती वेतन मिळाले नसल्यामुळे राज्यभर संतापाची लाट उसळली असून आज पुण्यात धरणे आंदोलन करण्यात आले. भीषण उन्हाळ्यात वयोवृद्ध कर्मचाऱ्यांवर उपासमारीची वेळ येत असल्याने तात्काळ पेन्शन तत्काळ सुरू करण्याची मागणी करण्यात आली आहे.

म.जी.प्रा. कर्मचारी संघर्ष कृती समितीच्या वतीने राज्यातील सर्व कार्यालयांसमोर आंदोलन करण्यात आले. या वेळी शासनाकडे निवेदन सादर करून तातडीने हस्तक्षेप करण्याची मागणी करण्यात आली. हे निवेदन मुख्यमंत्री देवेंद्र फडणवीस यांच्याकडे जिल्हाधिकाऱ्यांच्या मार्फत पाठविण्यात आले आहे. तसेच म.जी.प्रा. च्या मुकह्या अभियंता वैशाली आवटे यांना मागण्यांचे निवेदन देण्यात आले. यावेळी संघटनेचे अध्यक्ष  एस. डी. देशपांडे, उपाध्यक्ष स. सी. आलेकर , कार्याध्यक्ष ए. जी. देशमुख, अरुण निर्भवणे,  गजानन गटलेवार,  ए. जी. देशमुख, सरचिटणीस संजय केळकर, डी . के. इनामदार,  प्रिया माळी, श्रीकांत राऊत  यांच्यासह शेकडो निवृत्त कर्मचारी , अभियंते उपस्थित होते. 

संघटनेच्या वतीने जिल्हाधिकाऱ्यांना दिलेल्या निवेदनात म्हंटले आहे की, महालेखाकार कार्यालयाने लेखाशीर्ष गोठविल्यामुळे मार्च २०२६ पासून सेवानिवृत्ती वेतन देणे थांबवले आहे. तसेच वेतनासाठी वापरण्यात येणाऱ्या तात्पुरत्या कोडची मुदत ३१ मार्च २०२६ रोजी संपल्याने पुढील वेतन वितरण अशक्य झाल्याचे सांगण्यात आले आहे. यामुळे अनेक ज्येष्ठ नागरिक आर्थिक संकटात सापडले असून त्यांचे दैनंदिन जीवन विस्कळीत झाले आहे. औषधोपचारांसाठीही पैसे उपलब्ध नसल्याने अनेकांची प्रकृती खालावत असल्याचा आरोप संघटनेने केला आहे.

संघटनेने नमूद केले की, २३ मार्च २०१७ रोजी शासनाने म.जी.प्रा. कर्मचाऱ्यांना शासकीय दर्जा देऊन त्यांच्या वेतन व निवृत्ती वेतनाची जबाबदारी स्वीकारण्याचा निर्णय घेतला होता. मात्र, त्या निर्णयाची अंमलबजावणी अद्याप पूर्णपणे झालेली नाही.

या पार्श्वभूमीवर, शासनाने तातडीने निर्णय घेऊन प्रलंबित बाबी मार्गी लावाव्यात आणि सेवानिवृत्त कर्मचाऱ्यांना त्वरित पेन्शन अदा करण्याचे आदेश द्यावेत, अशी मागणी करण्यात आली आहे.

म.जी.प्रा. कर्मचारी संघर्ष कृती समितीचे अध्यक्ष अरुण निर्भवणे व सरचिटणीस गजानन गटलेवार यांनी याबाबत तीव्र नाराजी व्यक्त करत, मागण्या मान्य न झाल्यास आंदोलन तीव्र करण्याचा इशाराही दिला आहे.

पिंपरी, पुणे (दि. ६ मे २०२७) पिंपरी चिंचवड महानगरपालिकेत विरोधी पक्ष सक्षम भूमिका घेत नाही. या महापालिकेतील विरोधी पक्ष महाराष्ट्रात भाजप बरोबर सत्तेत सहभागी आहे. म्हणजेच पिंपरी चिंचवड महानगरपालिकेतील विरोधी पक्ष ही भाजपची “बी” टीम असल्याची टीका शिवसेना उद्धव बाळासाहेब ठाकरे पक्षाचे नवनियुक्त शहराध्यक्ष चेतन पवार यांनी पत्रकार परिषदेत केली.
बुधवारी (दि.६) पिंपरी येथे आयोजित केलेल्या पत्रकार परिषदेत यावेळी उप जिल्हा प्रमुख रोमी संधू, शहर समन्वयक कैलास नेवासकर, पिंपरी विधानसभा प्रमुख तुषार नवले, उपशहर प्रमुख अमोल निकम, शहर कार्यालय सचिव ज्ञानेश्वर शिंदे, उपशहर प्रमुख राजाराम कुदळे, पार्थ गुरव, बाळासाहेब जम, जिल्हा संघटिका अनिता तुतारे, उपजिल्हा संघटिका वैभवी घोडके, कल्पना शेटे, विभाग संघटिका बेबी सय्यद उपस्थित होते.
तत्पूर्वी शहर शिवसेनेच्या वतीने चेतन पवार यांच्या नेतृत्वाखाली पिंपरीतील भारतरत्न डॉ. बाबासाहेब आंबेडकर पुतळा चौक येथे नसरापूर आणि सहकारनगर पुणे येथील अल्पवयीन मुलींवर अत्याचार केलेल्या घटनेचा तीव्र निषेध करण्यात आला. तसेच या घटनांची नैतिक जबाबदारी घेऊन मुख्यमंत्री, गृहमंत्री देवेंद्र फडणवीस यांनी राजीनामा द्यावा अशी मागणी करण्यात आली. या घटनेबाबत भाजपा आमदार चित्रा वाघ यांनी केलेल्या वक्तव्याचा देखील शिवसेनेने निषेध केला.
पत्रकार परिषदेत चेतन पवार यांनी सांगितले की, आदरणीय हिंदू हृदय सम्राट बाळासाहेब ठाकरे यांनी सर्वसामान्यांच्या प्रश्नांना वाचा फोडण्यासाठी आंदोलन आणि संघर्ष करीत शिवसेना पक्षाची स्थापना केली. शिवसेना पक्ष प्रमुख आदरणीय उद्धव ठाकरे, शिवसेना नेते खासदार संजय राऊत आणि पुणे जिल्हा संपर्क प्रमुख सचिन आहेर यांनी नुकतीच माझी शिवसेना उद्धव बाळासाहेब ठाकरे पक्षाच्या पिंपरी चिंचवड जिल्हा शहर अध्यक्षपदावर नियुक्ती केली आहे. पक्षाने माझ्यावर दाखवलेला विश्वास मी सार्थ ठरवेल. आगामी काळात लवकरच पिंपरी, चिंचवड, भोसरी या तीनही विधानसभा मतदार संघातील जुन्या, नव्या शिवसैनिकांना एकत्र घेऊन सर्वांशी योग्य समन्वय साधून नवीन शहर कार्यकारणी जाहीर करण्यात येईल. यामध्ये समाजातील सर्व घटकांना प्रतिनिधित्व देण्यात येईल. पिंपरी चिंचवड महानगरपालिकेला कर्जबाजारी करणाऱ्या तत्कालीन आयुक्त शेखर सिंह यांच्या कारभाराची आणि नुकत्याच ५२ कोटी रुपयांच्या झालेल्या भ्रष्टाचाराविषयी माहिती घेऊन न्यायालयात दाद मागण्यात येईल. पिंपरी चिंचवड महानगरपालिकेत शिवसेनेला प्रतिनिधित्व नसले तरी दखील महापालिकेच्या कारभारावर व भ्रष्टाचारावर लक्ष ठेवण्यासाठी शिवसेनेचे प्रतिनिधी मंडळ नेमण्यात येईल. तसेच महिला सुरक्षा, पाणी, वाहतूक, आरोग्य, शिक्षण, रोजगार, अतिक्रमण, कायदा, सुव्यवस्था याविषयी सामान्य नागरिकांना भेडसावणाऱ्या प्रश्नाबाबत रस्त्यावर उतरून आंदोलने करण्यात येतील आणि भाजपचा तसेच विरोधी पक्षांचा खरा चेहरा जनतेसमोर आणण्याचे काम शिवसेना उद्धव बाळासाहेब ठाकरे पक्षाचे सर्व कार्यकर्ते वेळोवेळी करतील असेही चेतन पवार यांनी सांगितले.

पुणे : पुण्यातील नसरापूर आणि पर्वतीमधील अत्याचाराच्या घटनांमुळे संपूर्ण जिल्ह्यात संतापाची लाट उसळली असताना आता मुळशी तालुक्यातून एक नवी धक्कादायक घटना समोर आली आहे. मुळशी तालुक्यातील एका गावात दुचाकीवरून आईस्क्रीम विकणाऱ्या इसमाने १४ वर्षीय मतिमंद मुलीचा विनयभंग केल्याची घटना घडली आहे. या घटनेमुळे परिसरात तीव्र संताप व्यक्त करण्यात येत आहे.

दुपारी २ च्या सुमारास पीडित मुलगी आपल्या लहान चुलत बहिणीसोबत आईस्क्रीम घेण्यासाठी आरोपी पिंटू शिवकुमार याच्याकडे गेली होती. आरोपीने (रा. सूस, ता. मुळशी, मूळ उत्तर प्रदेश) मुलीला जवळ घेऊन तिचा विनयभंग केला. मुलीने आरडाओरडा केल्याने आरोपी दुचाकी घेऊन पळून गेला.

पीडित मुलीने घरी आल्यावर पालकांना सर्व प्रकार सांगितला. पालक आणि ग्रामस्थांनी तात्काळ आरोपीचा शोध घेत त्याला पकडले आणि पौड पोलिसांच्या स्वाधीन केले. पोलिसांनी आरोपीविरुद्ध पोक्सो कायद्यांतर्गत गुन्हा दाखल केला असून, तपास सुरू आहे. ही घटना समोर आल्याने परप्रांतीय फेरीवाल्यांवर नियंत्रण ठेवण्याची मागणी स्थानिकांकडून करण्यात येत आहे. पुणे जिल्ह्यातील बालिका सुरक्षिततेच्या मुद्द्यावर पुन्हा एकदा प्रश्नचिन्ह निर्माण झाले आहे.

भाजपच्याच सहकारी नगरसेविकेच्या पित्याने दाखल केली तक्रार

पुणे : भाजपाच्या नगरसेविका अर्चना तुषार पाटील(वय ३८ रा. भवानी पेठ कासेवाडी ) आणि त्यांचे पती तुषार तानाजी पाटील(वय ४८ रा. भवानी पेठ कासेवाडी ) यांच्यावर अनुसूचित जाती-जमाती अत्याचार प्रतिबंधक कायद्यान्वये (ॲट्रॉसिटी) गुन्हा दाखल करण्यात आला आहे. पांडुरंग उर्फ बापू दिगंबर कांबळे(वय ५७ रा. १६१ घोरपडे पेठ ) यांनी दिलेल्या तक्रारीवरून खडक पोलीस ठाण्यात हा गुन्हा नोंदवण्यात आला आहे.विशेष म्हणजे, तक्रारदार हे भाजपच्याच नगरसेविका मृणाल कांबळे यांचे वडील आहेत. त्यामुळे एकाच पक्षातील दोन नगरसेविकांमधील वाद थेट पोलिस ठाण्यापर्यंत पोहोचल्याने राजकीय वर्तुळात खळबळ उडाली आहे. गुन्हा रजिस्टर क्रमांक २७१/२०२६ भारतीय न्याय सहिता सन २०२३ चे कलम ३५९.३५२.३(५) व अनुसूचित जाती प्रतिबंधीत कायदा १९८९, सुधारीत २०१६ चे कलम ३(१)(s)अन्वये गुन्हा दाखल करण्यात आला आहे. ज्यात २०१२ पासून २०२६ पर्यंत गुन्हा घडल्याचे म्हटले आहे.

भारतीय जनता पार्टीचे दोन आमदार ,सुनिल कांबळे व हेमंत रासने या स्थानिक आमदार यांचे मध्यस्थीने वाद मिटविण्याचा प्रयत्न केल्याचे फिर्यादीत म्हटले आहे तसेच मी मातंग समाजाचा असल्यानेच पाटील दांपत्य जाणून बुजून वेळोवेळी अशी त्रास देत आहेत. जाणूनबुजून आमच्या समाजाला टार्गेट करून कटकारस्थान करुन त्यांची हाणी करण्यासाठी त्रास देत आहे. तसेच अनुसुचित जातीतील महिलेच्या विरोधात प्रचार करणे, तिला निवडुन येवु नये म्हणून प्रयत्न करणे, प्रचारादरम्यान चार एकत्र उमेदवार यांचे लावलेल्या रिक्षा वरील व सोसायटीतील मुख्य कचेरीवरील बॅनरमधील जातीय द्वेषातून माझी मुलगी मृणाल हिचे फोटो झाकणे ,अनुसूचित जातीतील कार्यकर्त्यांना दमदाटी करून , जातीयवाचक शिवीगाळ करणे,दोन जातीत तेढ निर्माण केल्याचा उल्लेख तक्रारीत करण्यात आला आहे.या सर्व आरोपांच्या आधारे नगरसेविका अर्चना पाटील आणि त्यांचे पती तुषार पाटील यांच्यावर ॲट्रॉसिटी अंतर्गत गुन्हा दाखल करण्यात आला आहे.

हा वाद केवळ एका बाजूने नाही. काही दिवसांपूर्वीच नगरसेविका अर्चना पाटील यांनीही आक्रमक पवित्रा घेतला होता. त्यांनी पोलीस आयुक्तांची भेट घेऊन आपल्या विरोधात कट केला रचला जात असून आपले मॉर्फ केलेले व्हिडिओ प्रसारित केले जात असल्याचा आरोप केला होता. इतकेच नाही तर, या वादाची रीतसर तक्रार त्यांनी थेट मुख्यमंत्री देवेंद्र फडणवीस यांच्याकडेही केल्याचे सांगितले जात आहे.पुण्यातील भाजपचे बडे नेते या दोन्ही नगरसेविकांमधील वाद मिटवण्यासाठी आणि समन्वय साधण्यासाठी पडद्यामागून प्रयत्न करत होते. मात्र, आता थेट ॲट्रॉसिटीसारखा गंभीर गुन्हा दाखल झाल्याने हा वाद मिटण्याऐवजी अधिकच चिघळल्याचे दिसून आले आहे.

सहायक पोलीस आयुक्त ऋषिकेश रावले , अनुजा देशमाने ,पोलीस निरीक्षक शशिकांत चव्हाण,शर्मिला सुतार , सहायक निरीक्षक अर्जुन कुदळे,फौजदार महेंद्र कांबळे यांनी याप्रकरणी काल संध्याकाळी ५ ते ६ या वेळेत तासभर भेट देऊन माहिती घेतळ्यावर सह्यक निरीक्षक अनिता तोंडे यांनी हि फिर्याद दाखल केली आहे. सहायक पोलीस आयुक्त अनुजा देशमाने या स्वतः याप्रकरणी अधिक तपास करत आहेत.

पुणे दिनांक ६ :
पुणे शहरात अलीकडेच नसरापूर व पर्वती परिसरात घडलेल्या लहान बालकांवरील अत्याचार व हत्येसारख्या अत्यंत गंभीर घटनांच्या पार्श्वभूमीवर शहरातील नागरिकांच्या सुरक्षेचा प्रश्न ऐरणीवर आला आहे. या अनुषंगाने पुणे महानगरपालिकेच्या महापौर मंजुषा नागपुरे यांनी पुणे शहर पोलीस आयुक्तांना पत्र देऊन तातडीने उपाययोजना करण्याची मागणी केली आहे.

महापौरांनी आपल्या पत्रात नमूद केले आहे की, शहरातील कायदा व सुव्यवस्था अधिक सक्षम करण्यासाठी सीसीटीव्ही यंत्रणा पूर्णतः कार्यक्षम असणे अत्यावश्यक आहे. सध्या अनेक ठिकाणी सीसीटीव्ही कॅमेरे नादुरुस्त असल्याचे आढळून येत असून, त्यांची तात्काळ दुरुस्ती व पुनर्स्थापना करण्याची गरज अधोरेखित करण्यात आली आहे.

तसेच, शहरातील सोसायट्या, व्यावसायिक आस्थापना व सार्वजनिक ठिकाणी कार्यरत असलेल्या सुरक्षा कर्मचाऱ्यांची योग्य ती पोलीस पडताळणी (Verification) व पार्श्वभूमी तपासणी (Background Check) सक्तीने करण्यात यावी, अशीही मागणी करण्यात आली आहे. कोणतीही व्यक्ती योग्य पडताळणीशिवाय सुरक्षा कर्मचारी म्हणून कार्यरत राहू नये, यासाठी कठोर अंमलबजावणी करण्याचे निर्देश देण्यात यावेत, असे महापौरांनी स्पष्ट केले आहे.

याचबरोबर, नागरिकांनीही आपल्या परिसरात सतर्क राहणे अत्यंत महत्त्वाचे असल्याचे महापौरांनी नमूद केले आहे. शेजारी राहणाऱ्या व्यक्तींची माहिती, नवीन भाडेकरूंची नोंद, संशयास्पद हालचाली याबाबत स्थानिक पोलीस ठाण्याशी संपर्क ठेवण्याबाबत जनजागृती मोहीम राबविण्याची गरज त्यांनी व्यक्त केली आहे.

महापौरांनी पुढील प्रमुख मागण्या केल्या आहेत :

• शहरातील सर्व सीसीटीव्ही यंत्रणांचा आढावा घेऊन त्या तातडीने कार्यान्वित कराव्यात.
• सर्व सुरक्षा कर्मचाऱ्यांची सक्तीने पडताळणी व नोंदणी प्रक्रिया राबवावी.
• पार्श्वभूमी तपासणीशिवाय कोणालाही सुरक्षा कर्मचारी म्हणून नेमणूक देऊ नये.
• नागरिकांमध्ये सुरक्षा विषयक जनजागृती मोहीम राबवावी.

पुणेकर नागरिकांच्या सुरक्षेला सर्वोच्च प्राधान्य देत, या विषयाकडे पोलीस प्रशासनाने गांभीर्याने लक्ष देऊन तातडीने प्रभावी कार्यवाही करावी, अशी अपेक्षा महापौर मंजुषा नागपुरे यांनी व्यक्त केली आहे.

पोलीस व आपत्ती व्यवस्थापनाने
रात्री वाचविले युवकाचे प्राण

पुणे-काल सिंहगड फिरण्यासाठी आलेले पर्यटक योगेश मोहन शितोळे वय 35 राहणार शिरूर हे सकाळी सिंहगड फिरण्यासाठी आले होते दुपारी साधारण साडेचार पाच वाजता ते सूर्यास्त पाहण्यासाठी पश्चिम दिशेला हवा पॉईंट या ठिकाणी दरिपाशी सूर्यास्ताचे फोटो घेण्यासाठी गेले होते पण काही वेळानंतर गवतावरतून त्यांचा पाय घसरून ते जवळपास खोल दीडशे फूट दरीमध्ये घसरत जाऊन पडले पडल्यानंतर काही वेळातच त्यांची शुद्ध हरपली व संध्याकाळी सात साडेसातला ज्यावेळेस त्यांना शुद्ध आली त्यावेळेस त्यांनी तात्काळ 112 ला कॉल करून दरीमध्ये पडल्याची माहिती दिली.
त्यानंतर हवेली पोलीस स्टेशनचे कर्मचारी अनिकेत काळे यांनी संबंधित घटनेचे गांभीर्य लक्षात घेऊन ही माहिती हवी आपत्ती व्यवस्थापन रेस्क्यू टीमला दिले तात्काळ त्यांच्या बचावासाठी रेस्क्यू टीम व हवेली पोलीस स्टेशनचे कर्मचारी सिंहगडावरती दाखल होऊन साधारण 150 ते 170 फूट खोलदरीमध्ये जाऊन त्यांना सुरक्षितरीत्या दरीमधून वर आणले व खाजगी हॉस्पिटलमध्ये दाखल केले व याची माहिती त्यांच्या नातेवाईकांना देण्यात आली.
सहभागी झालेली रेस्क्यू टीम
तानाजी भोसले
संतोष भगत
गणेश सपकाळ
संजय चोरघे
नाना जरंडे
कृष्णा मरगळे
उत्तम पिसाळ
वैभव भोसले
पोलीस
अनिकेत काळे
प्रवीन तेलवाडे
#sinhgad #pune #पुणे

पुणे: पुरंदर आंतरराष्ट्रीय विमानतळ , बाधितांना जमिनीचा मोबदला देण्यास 7 मे पासून सुरुवात होणार असल्याची घोषणा पुणे जिल्हाधिकारी जितेंद्र डुडी यांनी केली आहे.या प्रकल्पासाठी जमीन संपादनाची प्रक्रिया आता शेवटच्या टप्प्यात असून येत्या ऑक्टोबर-नोव्हेंबर महिन्यात विमानतळाचे प्रत्यक्ष काम सुरू होण्याची शक्यता आहे.पुणे जिल्हाधिकारी कार्यालयात आयोजित पत्रकार परिषदेत माहिती देताना डुडी म्हणाले, पुरंदरमधील सात गावांतील सुमारे 1216 हेक्टर आणि अतिरिक्त 242 एकर जमिनीचे अधिग्रहण केले जाणार आहे. यासाठी शेतकऱ्यांना ऐतिहासिक दर जाहीर करण्यात आला असून, व्याजासहित प्रति एकर 1 कोटी 61 लाख 1 हजार 915 रुपये इतका मोबदला दिला जाईल.
विशेष म्हणजे, ज्या शेतकऱ्यांच्या(Farmer)जमिनींत फळबागा आहेत, त्यांना दुप्पट दर मिळणार आहे. तसेच विहीर आणि बोरवेलसाठीही स्वतंत्र तरतूद करण्यात आली आहे. सरासरी प्रत्येक शेतकऱ्याच्या खात्यात जवळपास 2 कोटी रुपये जमा होतील आणि या रकमेवर कोणताही कर आकारला जाणार नाही.जमीन संपादनाची ही संपूर्ण प्रक्रिया अत्यंत पारदर्शक पद्धतीने राबवण्यासाठी जिल्हाधिकारी कार्यालय आणि सासवड उपविभागीय अधिकारी कार्यालयामार्फत सात विशेष पथके तैनात करण्यात आली आहेत. 10 जूनपर्यंत ही प्रक्रिया सुरू राहणार असून, ज्या शेतकऱ्यांचा संमती करार पूर्ण होईल, त्यांच्या खात्यात आरटीजीएसद्वारे तात्काळ पैसे जमा केले जातील. जे शेतकरी सहमती देणार नाहीत, त्यांच्या बाबतीत कायद्यानुसार सक्तीने भूसंपादन केले जाईल, असेही प्रशासनाने स्पष्ट केले
जमिनीच्या दराबाबत कोणताही संभ्रम मनात न बाळगण्याचे आवाहन जिल्हाधिकाऱ्यांनी केले असून, चुकीची माहिती पसरवणाऱ्यांविरोधात गुन्हे दाखल करण्याचे आदेश पोलिसांना दिले आहेत.केवळ आर्थिक मोबदलाच नव्हे, तर बाधितांच्या भविष्याचा विचार करून प्रशासनाने काही महत्त्वाचे निर्णय घेतले आहेत. प्रकल्पासाठी अधिग्रहण केल्या जाणाऱ्या जमिनीतील 6500 कुटुंबांतील प्रत्येकी एका सदस्याला नोकरी दिली जाणार आहे.तसेच, मोठ्या प्रमाणात हाती येणाऱ्या पैशांचा विनियोग कसा करावा, यासाठी गोखले इन्स्टिट्यूटच्या माध्यमातून शेतकऱ्यांना विशेष कौशल्य प्रशिक्षण दिले जाईल. अशी जिल्हाधिकारी जितेंद्र डुडी यांनी व्यक्त केला आहे.