पुणे

जुन्या पुणे मुंबई महामार्गावर असलेला बोपोडी येथील ऐतिहासिक हजरत शमसुद्दीन दर्गा महापालिका प्रशासनाने कोणतेही संयुक्तिक कारण न देता, स्थानिक लोकप्रतिनिधींना विश्वासात न घेता आणि आवश्यक त्या कायदेशीर बाबींची पूर्तता न करता मनमानी पद्धतीने कारवाई करून उध्वस्त केला आहे, असा आरोप उपमहापौर व स्थानिक नगरसेवक परशुराम वाडेकर यांनी पत्रकार परिषदेत बोलताना केला. याप्रकरणी सर्वसाधारण सभेत प्रशासनाला जाब विचारला जाईल, असा इशाराही त्यांनी दिला.

बोपोडी येथे संबंधित दर्गा तब्बल दीडशे वर्षांपासून उभा आहे. त्याला राज्य शासनाचा अ वर्ग प्राप्त आहे. मेट्रो अथवा रस्ता रुंदीकरणात या दर्ग्याची कोणतीही अडचण नाही. या दर्ग्याबाबत कोणत्याही स्थानिक नागरिकाने अथवा लोकप्रतिनिधी तक्रार केलेली नाही. हा दर्गा या परिसरातील हिंदू मुस्लिम एकतेचे प्रतिक होता. तरीही महापालिका प्रशासनाने लोकप्रतिनिधींची दिशाभूल करून या दर्ग्यावर अन्यायकारक कारवाई केल्याचे वाडेकर यांनी सांगितले.

शिवशंकर स्वामी नामक एका व्यक्तीने हा दर्गा हटवण्यासाठी महापालिका प्रशासनाकडे पाठपुरावा केल्याची माहिती मिळाल्याचे वाडेकर यांनी सांगितले. दर्ग्याच्या ट्रस्टला पूर्वकल्पना न देता, नोटीस न बजावता, उपमहापौर व स्थानिक नगरसेवक म्हणून आपल्याला व अन्य स्थानिक लोकप्रतिनिधींना विश्वासात न घेता रात्रीच्या अंधारात करण्यात आलेली ही कारवाई सांस्कृतिक राजधानी असलेल्या पुण्याची मान खाली घालायला लावणारी आहे. रिपब्लिकन पक्षाच्या वतीने आपण त्याच्यात तीव्र निषेध करतो, असे वाडेकर यांनी सांगितले.

या प्रकाराची कल्पना आपण राज्य मंत्रिमंडळातील ज्येष्ठ मंत्री चंद्रकांत पाटील यांना दिली असून त्यांनी देखील या प्रकाराबद्दल तीव्र नाराजी व्यक्त केली आहे. मुख्यमंत्री देवेंद्र फडणवीस यांच्यासह सर्व महत्त्वाच्या नेत्यांचे प्रशासनाच्या मनमानी कारभाराकडे लक्षवेध होणार असल्याचेही वाडेकर यांनी स्पष्ट केले.

प्रतिबंधित अन्न पदार्थांवर १४ ठिकाणी धाडी; दोषींवर गुन्हे दाखल

पुणे, दि. ४: पुणे विभागात अन्न व औषध प्रशासन विभागाने १ व २ जून २०२६ रोजी भेसळीच्या संशयावरून ठिकठिकाणी छापे टाकून केलेल्या कारवाईत ३१ लाख ७३ हजार रुपयांचे अन्न पदार्थांची जप्ती केली आहे. तसेच या कालावधीत तब्बल ५ लाख ४५ हजार रुपयांचा प्रतिबंधित अन्न पदार्थ साठा जप्त करण्यासह त्यासंबंधी १४ जणांवर गुन्हे दाखल करून अटक करण्यात आली आहे, अशी माहिती पुणे विभागाचे सह आयुक्त (अन्न) दि. वा. भोगावडे यांनी दिली आहे.

अन्न सुरक्षा आयुक्त, महाराष्ट्र राज्य यांच्या ‘सुरक्षित अन्न, सुरक्षित औषधे, सुरक्षित महाराष्ट्र’ या मोहिमेनुसार अन्न व औषध प्रशासन पुणे विभागात पुणे, सातारा, सांगली, सोलापूर व कोल्हापूर जिल्ह्यात विविध आस्थापनाची तपासणी व धडक कारवाई करण्यात आली आहे. या कारवाईत संबंधित जिल्ह्यातील सहायक आयुक्त (अन्न) यांच्या मार्गदर्शनाखाली अन्न सुरक्षा अधिकारी व कर्मचाऱ्यांनी भाग घेतला.

सातारा जिल्ह्यात १ जून रोजी गोडोली, सातारा येथील मेसर्स धन्वंतरी डिस्ट्रीब्यूटर्स प्रा.लि. येथे केलेल्या कारवाईत प्रोटिरिच- डब्ल्यू हर्बल हेल्थ ड्रिंक, चॉकलेट कंपाऊंड, सी बकथॉर्न ज्यूस याचा एकूण २१ लाख ४० हजार ९४६ रुपयांचा अन्न पदार्थ साठा जप्त करण्यात आला आहे.

पुणे जिल्ह्यात २ जून रोजी ४२३, मार्केट यार्ड येथील मेसर्स प्राज ट्रेडर्स येथे कारवाई करून रिफाईन्ड सोयाबीन ऑईल, आर.बी.डी. पामोलीन ऑईल याचा एकूण ५ लाख ३४ हजार २५२ रूपयांचा साठा जप्त करण्यात आला आहे. केशवनगर, काळेवाडी रोड, चिंचवड येथील मे. महाराष्ट्र मिल्क डेअरी येथे धडक कारवाईअंतर्गत २७ हजार ६०० रूपयांचे ‘चीज ॲनालॉग’ जप्त करण्यात आले आहे.

वडगाव शेरी येथील स.नं. ५०/४, मते नगर येथील मे. विठूमाऊली डेअरी येथे भेसळयुक्त गाईचे तूप आणि पनीर असा सुमारे १५ हजार रुपये किंमतीचा साठा जप्त करण्यात आला. स.नं. ३७/१, सुप्रिया बिल्डिंग, खराडी येथील मे. शिवदत्त डेअरी येथे १ लाख ७३ हजाराहून अधिक रकमेचे पनीर जप्त करण्यात आले.

कोल्हापूर जिल्ह्यात २ जून रोजी बाजारगेट, कोल्हापूर येथील मे. बनछोडे ब्रदर्स ऑईल मिल येथे ९२ हजार रुपयांचा रिफाईन्ड कॉटनसीड ऑईल व फिल्टर्ड ग्राऊंडनट ऑईलचा साठा जप्त करण्यात आला. हातकणंगले तालुक्यात इचलकरंजी येथील बालाजी चौकातील मे. रामगोपाल भवरलाल सोनी येथे ९७ हजार ६०० रुपये किमतीचा रिफाईन्ड सोयाबीन ऑईल साठा भेसळीच्या संशयावरून जप्त करण्यात आला. धरणगुट्टी ता. शिरोळ येथे मे. हिदांश इंडस्ट्रीज येथे टाकलेल्या छाप्यात ८ हजार ८८० रुपयांचा ॲनालॉग सुपारी साठा भेसळीच्या संशयावरून व लेबलदोष, मिथ्याछाप असल्याचे आढळून आल्याने जप्त करण्यात आला.

५ लाख ४५ हजार रुपयांचा प्रतिबंधित अन्न पदार्थ साठा जप्त
पुणे विभागात ठिकठिकाणी १४ आस्थापनांची तपासणी करून ५ लाख ४५ हजार रुपयांचा प्रतिबंधित अन्न पदार्थ साठा जप्त करून संबंधितांवर भारतीय न्याय संहितेनुसार गुन्हा दाखल करण्यासह अटकेची कारवाई करण्यात आली आहे.

१ जून रोजी बाणेर येथील शंभो पान शॉप व जय मल्हार पान शॉप या ठिकाणी तपासणी केली असता तेथून ७ हजार ५०० हून अधिक रुपयांचा प्रतिबंधित अन्न पदार्थ साठा जप्त करण्यात आला आहे. हिंजवडी फेज-१ येथे विनोद पान शॉप, रायरेश्वर पान शॉप, आयटी स्मोक झोन पान शॉप, सिद्धेश्वर पान शॉप व लक्ष्मी पान शॉप अशा एकूण ५ आस्थापनानंमधून एकूण २५ हजार रुपयांचा प्रतिबंधित अन्न पदार्थ साठा जप्त करण्यात आला आहे. इंदापूर तालुक्यात १ जून रोजी केलेल्या कारवाईत १ लाख ०७ हजार रुपयांचा प्रतिबंधित अन्न पदार्थ साठा व वाहतूक करणारी १ लाख ५० हजार रूपये किमतीची गाडी जप्त करण्यात आली आहे.

सातारा जिल्ह्यात १ जून रोजी साताऱ्यातील बुवा पान शॉप, सदर बाजार, सातारा येथे धडक कारवाईदरम्यान ३० हजार ६०० रूपये किंमतीचा प्रतिबंधित अन्न पदार्थ साठा जप्त करण्यात आला.

सोलापूर जिल्ह्यात १ जून रोजी बाबा पान शॉप, गांधी चौक, अकलूज या ठिकाणी १ लाख १६ हजार रुपयाचा प्रतिबंधित अन्न पदार्थ साठा तसेच ७५ रूपयांचे गुटखा बनवणारे यंत्र जप्त करण्यात आले. २ जून रोजी अगलगाव रोड, तालुका बार्शी येथील त्रिमूर्ती पान शॉप येथे १३ हजाराहून अधिक किमतीचा प्रतिबंधित अन्न पदार्थ साठा जप्त करण्यात आला.

सांगली जिल्ह्यात २ जून रोजी सांगली येथील मे. ए के पान शॉप तसेच गांधी चौक, विटा येथील मे. बालाजी पान शॉप येथे धडक कारवाईदरम्यान सुमारे २८ हजार रुपये किंमतीचा प्रतिबंधित अन्न पदार्थ साठा जप्त करण्यात आला.

अन्न व औषध प्रशासनामार्फत ग्राहकांच्या आरोग्याशी तडजोड करणाऱ्या तसेच बेकायदेशी प्रतिबंधित अन्न उत्पादन, साठवणूक, वितरण व विक्री करणाऱ्या आस्थापनाविरुद्ध अशा मोहिमा भविष्यातही सुरू राहणार असून नागरिकानी अशा बाबीची माहिती प्रशासनाच्या टोल फ्री क्रमांक १८००२२२३६५ वर द्यावी, असे आवाहन श्री. भोगावडे यांनी केले आहे.
0000

पुणे, दि. 4: नवी दिल्लीतील लोकसभा सचिवालयात संशोधन आणि ग्रंथालय विभागात कार्यरत असलेल्या अधिकाऱ्यांसाठी यशदामध्ये क्षमता बांधणी प्रशिक्षण कार्यक्रम यशवंतराव चव्हाण विकास प्रशासन प्रबोधिनीच्या (यशदा) वतीने आयोजित करण्यात आला आहे.

लोकसभा संशोधन व प्रशिक्षण संस्था (प्राईड) यांनी यांच्यावतीने आयोजित प्रशिक्षण कार्यक्रम यशदाच्या ग्रंथालय येथे आयोजन करण्यात आले आहे. पाच दिवसीय प्रशिक्षण कार्यक्रमात कृत्रिम बुद्धिमत्तेच्या संशोधन व ग्रंथालयाच्या कामकाजात अधिकाधिक प्रभावी वापर करण्याच्यादृष्टीने मार्गदर्शन सत्राचे आयोजन करण्यात आले आहे. त्यामध्ये ग्रंथालयांवर कृत्रिम बुद्धिमत्तेचा परिणाम, आधुनिक तंत्रज्ञान, कृत्रिम बुद्धिमत्ता आणि डिजिटल ज्ञान व्यवस्थापन या विषयांवर विविध तज्ज्ञांचे मार्गदर्शन होणार आहे. या प्रशिक्षण कार्यक्रमात २३ प्रशिक्षणार्थी अधिकारी सहभागी झाले आहेत.

या कार्यक्रमाचे उद्घाटन यशदाचे अतिरिक्त महासंचालक शेखर गायकवाड यांच्या हस्ते झाले. यावेळी उपमहासंचालक पौर्णिमा गायकवाड , ‘प्राईड’चे संचालक पी. के. मल्लिक उपस्थित होते. या प्रशिक्षण कार्यक्रमात तज्ज्ञ मार्गदर्शक चेतन टाकसाळे, डॉ. राजेंद्र कुंभार, विश्वास हसे, प्रल्हाद जाधव आदींनी मार्गदर्शन केले. या कार्यक्रमांतर्गत गोवा येथील सेंट्रल लायब्ररी व गोवा विधानसभेला अभ्यासभेट आयोजित करण्यात आली आहे.

या प्रशिक्षण कार्यक्रमाचे सत्रसंचालक म्हणून यशदाचे ग्रंथपाल शशिकांत चौधरी यांनी तर सहयोगी सत्र संचालक म्हणून विनय कुलकर्णी यांनी काम पाहिले.

पुणे- स्थानिक स्वराज्य संस्था मतदारसंघातील विधान परिषद निवडणुकीत अखेरचा सस्पेन्स संपुष्टात आला असून राष्ट्रवादी काँग्रेसच्या वतीने मैदानात उतरलेले विक्रम काकडे यांच्या बिनविरोध निवडीचा मार्ग पूर्णपणे मोकळा झाला आहे. उमेदवारी अर्ज मागे घेण्याच्या अंतिम दिवशी झालेल्या राजकीय घडामोडींमुळे पुण्यातील संभाव्य लढत टळली असून निवडणूक बिनविरोध होण्याचे चित्र स्पष्ट झाले आहे. राज्यातील 17 रिक्त विधान परिषद जागांसाठी निवडणूक प्रक्रिया सुरू असताना पुणे मतदारसंघातील ही सर्वात मोठी घडामोड मानली जात आहे.

विधान परिषद निवडणुकीसाठी अर्ज भरण्याची मुदत 1 जून रोजी संपली होती. त्यानंतर 2 जूनला अर्जांची छाननी करण्यात आली. आज, 4 जून हा अर्ज मागे घेण्याचा शेवटचा दिवस होता. या पार्श्वभूमीवर राज्यभरात अनेक ठिकाणी बंडखोरी, नाराजी आणि उमेदवारीवरून निर्माण झालेले वाद चर्चेत होते. विविध पक्षांचे वरिष्ठ नेते बंडखोरांची मनधरणी करण्यात व्यस्त होते. अनेक ठिकाणी समेटाचे प्रयत्न सुरू असताना पुण्यातील राजकीय घडामोडींनी विशेष लक्ष वेधून घेतले.

या निवडणुकीत राष्ट्रवादी काँग्रेस शरदचंद्र पवार पक्षाचे उमेदवार श्रीकांत पाटील यांनी आपला उमेदवारी अर्ज मागे घेतला. पक्षाच्या आदेशानुसार हा निर्णय घेतल्याचे त्यांनी स्पष्ट केले. त्यामुळे विक्रम काकडे यांच्या विरोधात उभा राहणारा प्रमुख प्रतिस्पर्धी मैदानातून बाहेर पडला. श्रीकांत पाटील यांच्या माघारीमुळे पुण्यातील निवडणूक प्रत्यक्षात बिनविरोध होण्याचा मार्ग खुला झाला. या निर्णयानंतर राजकीय वर्तुळात विविध चर्चांना उधाण आले आहे.

विशेष म्हणजे याआधी राष्ट्रवादी काँग्रेसचे नेते सुनील टिंगरे यांनीही आपला अर्ज मागे घेतला होता. त्यामुळे पुण्यातील बहुचर्चित बंडखोरीचा अध्याय जवळपास संपुष्टात आला. गेल्या काही दिवसांपासून उमेदवारीवरून निर्माण झालेला तणाव आणि अंतर्गत नाराजी आता शांत झाल्याचे दिसत आहे. विविध स्तरांवर सुरू असलेल्या चर्चांनंतर पक्षांतर्गत मतभेद दूर करण्यात नेतृत्वाला यश आल्याचे चित्र आहे. त्यामुळे विक्रम काकडे यांच्यासाठी निवडणुकीचा मार्ग अधिकच सुकर झाला.

दरम्यान, माजी मंत्री दिलीप वळसे-पाटील यांनी शरद पवार यांची घेतलेली भेटही या घडामोडींमध्ये चर्चेचा विषय ठरली. त्या भेटीनंतरच पुण्यातील राजकीय हालचालींना वेग आल्याची चर्चा रंगली आहे. राज्यातील इतर मतदारसंघांमध्येही अनेक बंडखोर उमेदवारांनी माघार घेतली असून पक्ष नेतृत्वाने नाराजांची समजूत काढण्यात यश मिळवले आहे. अशा परिस्थितीत पुण्यातील विधान परिषद निवडणूक आता बिनविरोध होण्याच्या मार्गावर असून विक्रम काकडे यांच्या विजयाची केवळ अधिकृत घोषणा बाकी असल्याचे राजकीय निरीक्षकांचे मत आहे.

पुणे.दि.३: महाराष्ट्र पोलीस दलात गेल्या काही वर्षांत महिला पोलीस अधिकारी व कर्मचाऱ्यांचा सहभाग लक्षणीयरीत्या वाढला आहे. सुमारे १७-१८ वर्षांपूर्वीच्या तुलनेत आज महिला पोलिसांची संख्या मोठ्या प्रमाणावर वाढलेली असली, तरी त्यांच्या कामकाजासंदर्भात काही तक्रारी आणि प्रश्न वेळोवेळी समोर येत असतात. अशाच काही मुद्द्यांकडे एका महिला पोलीस अधिकाऱ्यांनी एका वाहिनीवरील मुलाखतीत लक्ष वेधले असून, त्या अनुषंगाने वस्तुस्थिती समोर आणण्याची आवश्यकता असल्याचे मत शिवसेना नेत्या व आमदार डॉ. नीलम गोऱ्हे यांनी व्यक्त केले.

डॉ. गोऱ्हे म्हणाल्या की, राज्यातील प्रत्येक जिल्ह्यात कार्यस्थळी लैंगिक छळविरोधी तक्रारींच्या निवारणासाठी समित्या कार्यरत आहेत. या समित्यांमध्ये वरिष्ठ महिला पोलीस अधिकारी अध्यक्ष म्हणून काम पाहतात. असे असतानाही काही महिला अधिकाऱ्यांकडून तक्रारी समोर येत असतील, तर त्यांची गांभीर्याने दखल घेणे आवश्यक आहे.

मुलाखतीत करण्यात आलेल्या आरोपांचा उल्लेख करताना डॉ. गोऱ्हे म्हणाल्या की, काही पोलीस अधिकाऱ्यांवर विनयभंग किंवा बलात्कारासारख्या गंभीर स्वरूपाचे गुन्हे दाखल असूनही ते महत्त्वाच्या पदांवर कार्यरत असल्याचा आरोप करण्यात आला आहे. या आरोपांमध्ये कितपत तथ्य आहे, व अशा प्रकारच्या प्रकरणांमध्ये किती अधिकारी सध्या सेवेत आहेत, त्यांच्यावरील प्रकरणांची स्थिती काय आहे, याबाबतची माहिती पुनश्च तपासुन योग्य ते बदल करावेत .

महिला पोलीस अधिकाऱ्यांच्या बदली व नियुक्त्यांबाबतही काही अपेक्षा व्यक्त करण्यात आल्या आहेत. कुटुंबीय जबाबदाऱ्या, मुलांचे संगोपन आणि इतर वैयक्तिक अडचणी यांचा विचार पोस्टिंग देताना पुरेशा प्रमाणात केला जात नाही, अशी भावना काही महिला अधिकाऱ्यांमध्ये असल्याचे समोर आले आहे. काही वेळा गैरसोयीच्या ठिकाणी काम करावे लागते, हे वास्तव असले तरी महिलांना जाणीवपूर्वक दुय्यम किंवा बाजूच्या पोस्टिंग दिल्या जात आहेत का, याचा आढावा घेणे हे पूर्णपणे पोलीस प्रशासनाच्या अंतर्गत परीक्षणाचा विषय असल्याचे डॉ. गोऱ्हे यांनी नमूद केले.

समाजातील महिलांवर घरगुती जबाबदाऱ्यांचा अधिक भार पडत असल्यामुळे त्यांच्या व्यावसायिक प्रगतीवर परिणाम होतो, हा मुद्दाही संबंधित महिला अधिकाऱ्यांनी मांडला आहे. याबाबत बोलताना डॉ. गोऱ्हे म्हणाल्या की, हा प्रश्न केवळ पोलीस दलापुरता मर्यादित नसून सर्व क्षेत्रांतील कामकाजी महिलांना भेडसावणारा आहे. समाजातील पुरुषप्रधान मानसिकतेच्या पार्श्वभूमीवर शासनाने मुलांच्या संगोपनासह इतर घरगुती जबाबदाऱ्यांमध्ये महिलांना मदत करणाऱ्या सुविधा आणि यंत्रणा अधिक सक्षम करण्याची गरज आहे.

“कोणतीही व्यक्ती आपले गाऱ्हाणे मांडत असेल, तर त्याकडे दुर्लक्ष करण्याऐवजी त्यामागील वस्तुस्थिती समजून घेणे आवश्यक आहे.
राज्याचे पोलीस महासंचालक अत्यंत कार्यक्षम आणि संवेदनशील अधिकारी आहेत. त्यांनी या तक्रारींकडे लक्ष घालून आवश्यक ती माहिती घेऊन योग्य उपाययोजना कराव्यात.
नीलम गोर्हे वरील मुद्यांचे पुढील काही दिवसांत या संदर्भात प्रशासनाने केलेल्या कार्यवाहीबीबत निवेदन देत आहे.
आठवडा भरानंतर मी स्वतः पोलीस महासंचालकांची भेट घेऊन त्यांचे विचार जाणून घेईन,” असेही डॉ. गोऱ्हे यांनी स्पष्ट केले.

पोलीस दलासह कोणत्याही कार्यस्थळी महिला-पुरुषांमध्ये समन्वय, सुसंवाद आणि परस्पर आदराचे वातावरण निर्माण होणे अत्यावश्यक असल्याचे सांगत, अशा वातावरणातूनच अधिक सक्षम आणि संवेदनशील प्रशासन उभे राहू शकते, असा विश्वासही डॉ. गोऱ्हे यांनी व्यक्त केला.