पुणे.दि.३: महाराष्ट्र पोलीस दलात गेल्या काही वर्षांत महिला पोलीस अधिकारी व कर्मचाऱ्यांचा सहभाग लक्षणीयरीत्या वाढला आहे. सुमारे १७-१८ वर्षांपूर्वीच्या तुलनेत आज महिला पोलिसांची संख्या मोठ्या प्रमाणावर वाढलेली असली, तरी त्यांच्या कामकाजासंदर्भात काही तक्रारी आणि प्रश्न वेळोवेळी समोर येत असतात. अशाच काही मुद्द्यांकडे एका महिला पोलीस अधिकाऱ्यांनी एका वाहिनीवरील मुलाखतीत लक्ष वेधले असून, त्या अनुषंगाने वस्तुस्थिती समोर आणण्याची आवश्यकता असल्याचे मत शिवसेना नेत्या व आमदार डॉ. नीलम गोऱ्हे यांनी व्यक्त केले.

डॉ. गोऱ्हे म्हणाल्या की, राज्यातील प्रत्येक जिल्ह्यात कार्यस्थळी लैंगिक छळविरोधी तक्रारींच्या निवारणासाठी समित्या कार्यरत आहेत. या समित्यांमध्ये वरिष्ठ महिला पोलीस अधिकारी अध्यक्ष म्हणून काम पाहतात. असे असतानाही काही महिला अधिकाऱ्यांकडून तक्रारी समोर येत असतील, तर त्यांची गांभीर्याने दखल घेणे आवश्यक आहे.

मुलाखतीत करण्यात आलेल्या आरोपांचा उल्लेख करताना डॉ. गोऱ्हे म्हणाल्या की, काही पोलीस अधिकाऱ्यांवर विनयभंग किंवा बलात्कारासारख्या गंभीर स्वरूपाचे गुन्हे दाखल असूनही ते महत्त्वाच्या पदांवर कार्यरत असल्याचा आरोप करण्यात आला आहे. या आरोपांमध्ये कितपत तथ्य आहे, व अशा प्रकारच्या प्रकरणांमध्ये किती अधिकारी सध्या सेवेत आहेत, त्यांच्यावरील प्रकरणांची स्थिती काय आहे, याबाबतची माहिती पुनश्च तपासुन योग्य ते बदल करावेत .

महिला पोलीस अधिकाऱ्यांच्या बदली व नियुक्त्यांबाबतही काही अपेक्षा व्यक्त करण्यात आल्या आहेत. कुटुंबीय जबाबदाऱ्या, मुलांचे संगोपन आणि इतर वैयक्तिक अडचणी यांचा विचार पोस्टिंग देताना पुरेशा प्रमाणात केला जात नाही, अशी भावना काही महिला अधिकाऱ्यांमध्ये असल्याचे समोर आले आहे. काही वेळा गैरसोयीच्या ठिकाणी काम करावे लागते, हे वास्तव असले तरी महिलांना जाणीवपूर्वक दुय्यम किंवा बाजूच्या पोस्टिंग दिल्या जात आहेत का, याचा आढावा घेणे हे पूर्णपणे पोलीस प्रशासनाच्या अंतर्गत परीक्षणाचा विषय असल्याचे डॉ. गोऱ्हे यांनी नमूद केले.

समाजातील महिलांवर घरगुती जबाबदाऱ्यांचा अधिक भार पडत असल्यामुळे त्यांच्या व्यावसायिक प्रगतीवर परिणाम होतो, हा मुद्दाही संबंधित महिला अधिकाऱ्यांनी मांडला आहे. याबाबत बोलताना डॉ. गोऱ्हे म्हणाल्या की, हा प्रश्न केवळ पोलीस दलापुरता मर्यादित नसून सर्व क्षेत्रांतील कामकाजी महिलांना भेडसावणारा आहे. समाजातील पुरुषप्रधान मानसिकतेच्या पार्श्वभूमीवर शासनाने मुलांच्या संगोपनासह इतर घरगुती जबाबदाऱ्यांमध्ये महिलांना मदत करणाऱ्या सुविधा आणि यंत्रणा अधिक सक्षम करण्याची गरज आहे.

“कोणतीही व्यक्ती आपले गाऱ्हाणे मांडत असेल, तर त्याकडे दुर्लक्ष करण्याऐवजी त्यामागील वस्तुस्थिती समजून घेणे आवश्यक आहे.
राज्याचे पोलीस महासंचालक अत्यंत कार्यक्षम आणि संवेदनशील अधिकारी आहेत. त्यांनी या तक्रारींकडे लक्ष घालून आवश्यक ती माहिती घेऊन योग्य उपाययोजना कराव्यात.
नीलम गोर्हे वरील मुद्यांचे पुढील काही दिवसांत या संदर्भात प्रशासनाने केलेल्या कार्यवाहीबीबत निवेदन देत आहे.
आठवडा भरानंतर मी स्वतः पोलीस महासंचालकांची भेट घेऊन त्यांचे विचार जाणून घेईन,” असेही डॉ. गोऱ्हे यांनी स्पष्ट केले.

पोलीस दलासह कोणत्याही कार्यस्थळी महिला-पुरुषांमध्ये समन्वय, सुसंवाद आणि परस्पर आदराचे वातावरण निर्माण होणे अत्यावश्यक असल्याचे सांगत, अशा वातावरणातूनच अधिक सक्षम आणि संवेदनशील प्रशासन उभे राहू शकते, असा विश्वासही डॉ. गोऱ्हे यांनी व्यक्त केला.

ज्यांना आधी मुली आहेत अशा गर्भवतींची विशेष काळजी ठेवून समुपदेशनासाठी आशा व अंगणवाडी यंत्रणा सक्रिय करण्याची गरज

पुणे.दि.३: पुणे जिल्ह्यात मुलींच्या जन्माचे प्रमाण सातत्याने घटत असल्याची चिंताजनक बाब समोर आली असून, गर्भलिंग निदान आणि बेकायदेशीर गर्भपाताच्या प्रकरणांतील आरोपींवर संघटित गुन्हेगारीविरोधी कायद्यांतर्गत कारवाई करण्याची गरज असल्याचे मत शिवसेना नेत्या व आमदार डॉ. नीलम गोऱ्हे यांनी व्यक्त केले.

२८ मे रोजी वृत्तपत्रातून प्रसिद्ध झालेल्या अहवालानुसार पुणे जिल्ह्यात १००० मुलांमागे केवळ ८६४ मुलींचा जन्म होत आहे. दौंड तालुक्यात हे प्रमाण ८९२ असले तरी पुरंदरमध्ये ते अवघे ७९२ इतके आहे. याउलट राजगड तालुक्यात ११८४ मुलींची नोंद झाल्याने तेथील चित्र तुलनेने सकारात्मक असल्याचे दिसून येते.

डॉ. गोऱ्हे यांनी सांगितले की, २०१७ मध्ये दौंड तालुक्यातील बिरोबावाडी येथे सुरू असलेल्या गर्भलिंग निदान रॅकेटवर छापा टाकण्यात आला होता. मात्र, या प्रकरणात गुन्हा दाखल होऊनही तब्बल नऊ वर्षांनंतरही अंतिम शिक्षा झालेली नाही. अशा प्रकरणांमध्ये न्यायप्रक्रिया विलंबित राहिल्याने हवेली, दौंड, शिरूर तसेच पुणे शहरालगतच्या ग्रामीण भागांमध्ये अवैध गर्भलिंग निदान आणि बेकायदेशीर गर्भपाताचे प्रकार वाढीस लागल्याचे दिसून येत आहे.

या प्रकरणांमध्ये डॉक्टरांसह विविध व्यक्तींचा सहभाग समोर आल्याचे सांगत डॉ. गोऱ्हे यांनी संबंधित आरोपींविरुद्ध कठोर कारवाईची मागणी केली. हे गुन्हे वैयक्तिक नसून संघटित स्वरूपाचे असल्याने त्याकडे संघटित गुन्हेगारीच्या दृष्टिकोनातून पाहण्याची आवश्यकता असल्याचे त्यांनी नमूद केले.

प्रलंबित प्रकरणांचा वेगाने निपटारा करण्यासाठी आरोग्य विभाग आणि पोलिसांनी समन्वयाने काम करावे, असे आवाहनही त्यांनी केले. विविध पोलीस ठाण्यांतील अधिकारी या प्रकरणांचा पाठपुरावा करत असले तरी जिल्हा व अंतरजिल्हा स्तरावर अधिक प्रभावी यंत्रणा उभारण्याची गरज असल्याचे त्यांनी सांगितले.

राज्यस्तरीय समितीप्रमाणेच दोन किंवा तीन जिल्ह्यांचा समावेश असलेल्या अंतरजिल्हा समित्या स्थापन करून त्यामध्ये सामाजिक संस्थांचे कार्यकर्ते, महिला संघटना आणि स्थानिक प्रतिनिधींचा सहभाग वाढवावा, अशी सूचनाही त्यांनी केली.

याशिवाय अंगणवाडी सेविका आणि आशा स्वयंसेविकांच्या माध्यमातून ज्या महिलांना यापूर्वी मुली आहेत आणि ज्या गर्भलिंग निदानाच्या दबावाला बळी पडण्याची शक्यता आहे, अशा ‘संकटग्रस्त’ महिलांची ओळख पटवून त्यांचे समुपदेशन करण्यात यावे. प्रतिबंधात्मक उपाययोजना आणि कठोर शिक्षा या दोन्ही बाबींची प्रभावी अंमलबजावणी झाल्यासच गर्भलिंग निदान आणि बेकायदेशीर गर्भपाताच्या प्रकारांना आळा बसू शकेल, असे डॉ. गोऱ्हे यांनी स्पष्ट केले.

पुणे शहरातील सातारा रस्ता ते सोलापूर रस्ता यांना जोडणाऱ्या कात्रज कोंढवा रस्त्यावर अत्यंत गंभीर बनलेली वाहतूककोंडी सोडवण्यासाठी महापालिका प्रशासनाने अत्यंत महत्त्वाचे आणि धाडसी पाऊल उचलले आहे. गेल्या अनेक वर्षांपासून रखडलेल्या आणि नागरिकांसाठी डोकेदुखी ठरलेल्या कात्रज कोंढवा रस्तारुंदीकरण प्रकल्पाला थेट गती देण्याचा निर्णय घेऊन भूसंपादनासाठी मनपा निधीतून प्रथमच भरीव तरतूद महापालिका आयुक्त नवल किशोर राम यांनी केल्याने तसेच शासनाकडून काही निधी उपलब्ध झाल्याने सदरच्या भूसंपादनासाठी निवाडा जाहीर झाला. विशेष भूसंपादन अधिकारी क्र.१५ श्रीमती श्वेता दारुणकर यांचेकडून सदर निवाड्यानुसार रस्त्याखाली जाणाऱ्या जागांचा महापालिका भूसंपादन व मालमत्ता व्यवस्थापन विभागांकडे ताबा घेण्याची कार्यवाही गेल्या काही दिवसांपासून सुरु होती. ती बहुतांशी पूर्ण झाली आहे. आज दिनांक ०३.०६.२०२६ रोजी अतिरिक्त महापालिका आयुक्त (विशेष) ओमप्रकाश दिवटे यांनी मुख्य अभियंता (पथ) राजेश बनकर, विशेष भूसंपादन अधिकारी क्र.१५ श्रीमती श्वेता दारुणकर व अतिक्रमण प्रभारी रमेश शेलार, मालमत्ता व्यवस्थापन, भूसंपादन व व्यवस्थापन या विभागांसह राजस सोसायटी चौकापासून ते पिसोळी हद्दीपर्यंत प्रत्यक्ष पाहणी करून व रस्ता विकसनात येणाऱ्या अडचणीबाबत चर्चा करून संबंधित विभागांना काम त्वरित करणेबाबत निर्देश देण्यात आले.

• या रस्त्यासाठी आवश्यक असणारी जागा देण्यास टाळाटाळ करणाऱ्या किंवा नकार देणाऱ्या मालमत्ताधारकांवर आता सक्तीने पोलीसांमार्फत ताबा घेण्याची कार्यवाही केली जाणार आहे. तसेच या जागांवरील असलेली अतिक्रमणे / अनधिकृत बांधकाम पुढील दोन दिवसांत हटविणेबाबत उप आयुक्त (अतिक्रमण) रमेश शेलार यांना निर्देश दिलेले आहेत.
• ज्या जागा आधीच महापालिकेच्या ताब्यात आल्या आहेत, त्या ठिकाणी रस्त्याच्या कामात अडथळा ठरणाऱ्या सर्व कात्रज-कोंढवा रस्त्यावरील लहान-मोठी स्ट्रक्चर हटवली जाणार असल्याची स्पष्ट माहिती महापालिका प्रशासनाकडून देण्यात आली आहे. या धडक मोहिमेअंतर्गत रस्त्याच्या हद्दीत येणारी सर्व प्रकारची अनधिकृत बांधकामे निष्कासित करण्यासाठी महापालिकेचे विशेष पथक सक्रिय करण्याचे निर्देश देण्यात आले आहेत.
• ताब्यात आलेल्या सर्व मोकळ्या जागेवर रस्ता विकसनाचे काम दर्जेदार व गतीने करणेबाबत पथ विभाग प्रमुख यांना सूचना देण्यात आल्या. कात्रज कोंढवा रस्त्याच्या विकासनासाठी पथ विभाग, भूसंपादन विभाग, मालमत्ता व व्यवस्थापन विभाग या सर्व विभागांनी एकत्रितपणे कार्यवाही करावयाची आहे. या कामात कुठल्याही प्रकारची हलगर्जी खपवून घेतली जाणार नाही. असा इशारा अतिरिक्त महापालिका आयुक्त (विशेष) यांनी दिला आहे.
• प्रशासनाच्या या आक्रमक भूमिकेमुळे कात्रज-कोंढवा रस्तारुंदीकरणाच्या कामाला आता मोठी गती मिळण्याची दाट शक्यता वर्तवली जात आहे. हा महत्त्वाकांक्षी प्रकल्प वेळेत पूर्ण झाल्यास परिसरातील वाहतूककोंडीचा प्रश्न कायमचा निकाली निघणार असून, नागरिकांचा रोजचा प्रवास अत्यंत सुलभ आणि गतिमान होणार आहे.

या पाहणीदरम्यान उपस्थित अधिकारी
१.श्री.राजेश बनकर, मुख्य अभियंता (पथ विभाग)
२.श्री रमेश शेलार, उप आयुक्त (अतिक्रमण विभाग)
३.श्री प्रशांत ठोंबरे, उप आयुक्त (मालमत्ता व्यवस्थापन व भूसंपादन व्यवस्थापन)
४.श्री अजय वायसे, अधीक्षक अभियंता (पथ)
५.श्री अनिल सोनावणे, कार्यकारी अभियंता (पथ)
६.श्री संतोष लांजेकर, कार्यकारी अभियंता (बांधकाम)
७.श्री दिगंबर बांगर, उप अभियंता (भूसंपादन व व्यवस्थापन)
८.श्री बागवान, उप अभियंता (मालमत्ता व्यवस्थापन )
९. श्रीमती श्वेता दारुणकर, विशेष भूसंपादन अधिकारी क्र.१५

पुणे, दि. ३ जून, २०२६ : पुणे शहरातील मान्सूनपूर्व नाले, कल्व्हर्ट व जलनिस्सारण व्यवस्थेशी संबंधित विविध कामांच्या प्रगतीचा आढावा घेण्यासाठी अतिरिक्त महापालिका आयुक्त (इस्टेट) प्रजित नायर यांच्या अध्यक्षतेखाली सर्व परिमंडळ उपायुक्त, क्षेत्रीय कार्यालयांचे सहाय्यक आयुक्त व संबंधित विभागांच्या अधिकाऱ्यांची आढावा बैठक आयोजित करण्यात आली.

बैठकीत शहरातील विविध भागांमध्ये सुरू असलेल्या नाले रुंदीकरण, खोलीकरण, गाळ काढणे, कल्व्हर्ट दुरुस्ती व बांधकाम, जलनिस्सारण व्यवस्थेची क्षमता वाढविणे तसेच पूरजन्य परिस्थिती टाळण्यासाठी हाती घेण्यात आलेल्या कामांचा सविस्तर आढावा घेण्यात आला. प्रत्येक परिमंडळनिहाय कामांची सद्यस्थिती, प्रलंबित बाबी, अडचणी आणि त्यावरील उपाययोजनांबाबत चर्चा करण्यात आली.

अतिरिक्त महापालिका आयुक्त (इस्टेट) प्रजित नायर यांनी सर्व संबंधित अधिकाऱ्यांना मान्सूनपूर्व नियोजित कामे वेळेत व दर्जेदार पद्धतीने पूर्ण करण्याच्या सूचना दिल्या. ज्या ठिकाणी कामांची गती अपेक्षेपेक्षा कमी आहे, तेथे आवश्यक मनुष्यबळ व यंत्रसामग्री उपलब्ध करून कामे तातडीने पूर्ण करण्याचे निर्देश देण्यात आले.

तसेच, पुढील आठवड्यापासून विविध क्षेत्रीय कार्यालयांच्या हद्दीतील नाले व कल्व्हर्ट कामांची प्रत्यक्ष स्थळपाहणी करण्यात येणार असून, सुरू असलेल्या कामांच्या गुणवत्तेची व प्रगतीची तपासणी करण्यात येणार असल्याचे मा. अतिरिक्त महापालिका आयुक्त (इस्टेट) श्री. प्रजित नायर यांनी सांगितले. प्रत्यक्ष पाहणीदरम्यान आढळून येणाऱ्या त्रुटी तात्काळ दूर करून नागरिकांना पावसाळ्यात कोणत्याही प्रकारचा त्रास होणार नाही, यासाठी सर्व विभागांनी समन्वयाने काम करावे, असे निर्देशही त्यांनी दिले.

पुणे महानगरपालिका शहरातील पूरस्थिती टाळणे, पावसाच्या पाण्याचा सुरळीत निचरा होणे आणि नागरिकांची सुरक्षितता सुनिश्चित करणे यासाठी विविध विभागांच्या माध्यमातून नियोजनबद्ध कामे राबवत असून, सर्व संबंधित यंत्रणांनी कामांच्या अंमलबजावणीत अधिक गती आणावी, असे आवाहन यावेळी करण्यात आले.

याप्रसंगी, परिमंडळ अधिकारी उपायुक्त विजयकुमार थोरात, उपायुक्त अरविंद माळी, उपायुक्त माधव जगताप, उपायुक्त श्री. अविनाश सकपाळ, उपायुक्त श्रीमती आशा राऊत, गणेश सोनुने आपत्ती व्यवस्थापन प्रमुख, क्षेत्रीय कार्यालयांचे सहाय्यक आयुक्त व संबंधित अधिकारी उपस्थित होते.

पुणे-

       पुण्यातील वाहतुकीची समस्या अधिक गंभीर बनत असून त्यासाठी विचारविनिमय करून मार्ग शोधण्यासाठी पुणे शहर जिल्हा कॉंग्रेस कमिटीतर्फे शनिवार दिनांक ६ जून रोजी सकाळी १०.०० ते दुपारी १.०० या वेळेत पत्रकार भवन नवीपेठ येथे ‘पुणे ट्रॅफिक परिषदेचे’ आयोजन करण्यात आले आहे. यामध्ये वाहतूक संबंधी विविध संस्थांचे वरिष्ठ अधिकारी, तज्ञ, पत्रकार व नागरिक सहभागी होणार आहेत. नागरिकांनी देखील या परिषदेत आवर्जून यावे असे या परिषदेच्या आयोजिका पुणे शहर काँग्रेसच्या पश्चिम विभागाच्या अध्यक्षा दीप्ती चवधरी यांनी सांगितले.

      त्या म्हणाल्या की या परिषदेतील ‘शिफारसी व निष्कर्ष यांचा एकत्रित अहवाल तयार करून त्याची अंमलबजावणी व्हावी यासाठी हा अहवाल महाराष्ट्राचे मुख्यमंत्री आणि पुणे महानगरपालिका आयुक्तांना सादर करून त्याचा पाठपुरावा केला जाईल. तसेच या ट्रॅफिक परिषदेतील सहभागी वरिष्ठ शासकीय अधिकारी व तज्ञ यांच्या चर्चेचा गोषवारा व शिफारसी यावर आधारित पुस्तक प्रकाशित केले जाणार आहे’ असे त्यांनी सांगितले.  

      या परिषदेत अपर पोलीस आयुक्त मनोज पाटील, पोलीस उपायुक्त (वाहतूक) संदीप भाजीभाकरे, प्रादेशिक परिवहन अधिकारी अर्चना गायकवाड, मनपा पथविभाग प्रमुख रोहितदास गव्हाणे, पुणे मनपाचे मुख्य अभियंता (प्रकल्प) दिनकर गोजारे, पी.एम.आर.डी.ए. च्या चीफ इंजिनिअर श्रीमती पठाण, पी.एम.पी.एम.एल.च्या जॉइंट एम.डी. श्रीमती पोरे, पुणे मेट्रोचे प्रोजेक्ट डायरेक्टर अतुल गाडगीळ, सी.आय.आर.टी चे तांत्रिक विभाग प्रमुख एस. एन. ढोले तसेच सजग नागरिक मंचाचे विवेक वेलणकर, पुणे वाहतूक समस्यांचे अभ्यासक पत्रकार मंगेश कोळपकर यांना निमंत्रित करण्यात आले आहे. हे सर्वजण सहभागी होऊन विविध उपाययोजनांबाबत मार्गदर्शन करतील. असे दीप्ती चवधरी यांनी सांगितले.

      १९९२ ते २००७ या काळात कॉंग्रेस पक्ष पुणे महानगरपालिकेत सत्तेत होता. पुण्याची भविष्यातील लोकसंख्या वाढ आणि वाहतूक या संदर्भात कॉंग्रेस पक्षाने विचारपूर्वक अनेक प्रकल्प राबवले. रस्ता रुंदीकरण, सिमेंट कॉंक्रीटचे रस्ते, मोठे फुटपाथ, बहुमजली वाहनतळ, उड्डाणपूल, भुयारीमार्ग, नदीकाठचा रस्ता, सिन्क्रोनाइज्ड सिग्नल सिस्टीम आदि पायाभूत विकासावर भर दिला. तसेच सतत १३ वर्षे पाठपुरावा करून सन २०१३ मध्ये पुणे मेट्रो प्रकल्पाला केंद्र शासनाची मंजुरी मिळवली. या प्रकारेच सातत्याने पाठपुरावा करीत पुण्याच्या वाहतूक समस्यांबाबत उपाययोजना शोधली जावी व त्याची अंमलबजावणी व्हावी यासाठी कॉंग्रेस पक्ष सदैव प्रयत्नशील राहील. त्यासाठीच या ट्रॅफिक परिषदेचे आयोजन केले आहे असे त्या म्हणाल्या.

“साहेबांच्या” पुण्यतिथी निमित्त वृंदावन शैक्षणिक प्रकल्पास क्रिएटिव्ह फाउंडेशन तर्फे विविध वस्तू भेट.

पुणे–भारतीय जनता पार्टीच्या संघर्षाच्या काळातील मोठ्या मनाचे व उत्तुंग नेतृत्व म्हणून गोपीनाथराव मुंडे साहेब सदैव स्मरणात राहतील अश्या शब्दात संदीप खर्डेकर यांनी त्यांच्या आठवणींना उजाळा दिला. 2002/2003 च्या चांदा ते बांदा ह्या संघर्ष यात्रेदरम्यान अनुभवलेले मुंडे साहेब यांच्या अनेक आठवणी सांगता येतील मात्र मुंबईतील गुन्हेगारी विरुद्ध, नक्षलवाद्यावर कठोर कारवाई करणारे कणखर साहेब हे वैयक्तिक जीवनात तितकेच हळवे होते हे वेगळेपण विसरता येणार नाही. गोर गरीब व शेतकऱ्यांप्रती कणव असणारे मुंडे साहेब हे संवेदनशील नेतृत्व होते व कार्यकर्त्यांवर प्रेम करणारे आणि त्यांच्या सुख दुःखात सहभागी होणारे लोकनेते होते असेही संदीप खर्डेकर म्हणाले.

आज गोपीनाथराव मुंडे साहेबांच्या पुण्यतिथी निमित्त सेवाव्रत फाउंडेशन संचालित वृंदावन शैक्षणिक प्रकल्पा अंतर्गत कर्वेनगर च्या कामना वसाहत, वारजे च्या म्हाडा वसाहत आणि पानमळा वसाहतीतील पहिली ते दहावीच्या विद्यार्थ्यांना क्रिएटिव्ह फाउंडेशन तर्फे शैक्षणिक व क्रीडा साहित्य भेट देण्यात आले त्या प्रसंगी खर्डेकर यांनी ह्या आठवणींना उजाळा दिला.या वेळी वस्तीतील मुलं पत्र्याच्या शेड मध्ये उकाड्यात अभ्यास करत असल्याचे लक्षात आल्यावर संदीप खर्डेकर यांनी शेड मध्ये गारवा रहावा यासाठी त्वरित कुलर भेट दिला.
या प्रसंगी नगरसेविका व क्रिएटिव्ह फाउंडेशन च्या विश्वस्त मंजुश्री खर्डेकर, सेवाव्रत फाउंडेशन चे संचालक प्रदीप देवकुळे, क्रिएटिव्ह चे विश्वस्त प्रतीक खर्डेकर, सौ. प्रणेती लवंगे, पतित पावन संघटनेचे उपाध्यक्ष राहुल पडवळ, कोथरूड पतित पावन संघटनेचे विभाग प्रमुख अण्णा बांगर, श्री.अश्विन लवंगे, भाजपा महिला आघाडी सरचिटणीस कल्याणी खर्डेकर व इतर मान्यवर उपस्थित होते.
मुंडे साहेब हे सातत्याने सामान्यांच्या उत्कर्षाचा ध्यास घेतलेले लोकनेते होते त्यामुळे त्यांना श्रद्धांजली अर्पण करताना ज्या घटकांकडे काही कमी आहे त्यांना मदत करावी असे क्रिएटिव्ह फाउंडेशन ने ठरविले असल्याचे विश्वस्त मंजुश्री खर्डेकर म्हणाल्या.
सेवाव्रत फाउंडेशन वस्तीतील विद्यार्थ्यांसाठी निस्पृह वृत्तीने कार्यरत असून क्रिएटिव्ह फाउंडेशन ह्या प्रकल्पांना वेळोवेळी मदत करते याबद्दल प्रदीप देवकुळे यांनी कृतज्ञता व्यक्त केली.
कार्यक्रमाचे संयोजन विश्वस्त प्रतीक खर्डेकर व प्रणेती लवंगे यांनी केले.