स्थानिकांच्या हक्कांवर गदा: पदोन्नती डावला न सरकारी अधिकारी आणा -धोरणाने प्रशासनात असंतोष
पदोन्नती डावलल्याने उपमुख्य लेखा व वित्त अधिकारी न्यायालयात जाण्याचा इशारा
पुणे – पुणे महानगरपालिकेतील ‘मुख्य लेखा व वित्त अधिकारी’ या रिक्त पदावरील नियुक्तीवरून नवा वाद समोर आला आहे. महापालिकेत गेली १५ वर्षे उपमुख्य लेखा व वित्त अधिकारी म्हणून कार्यरत असलेले डॉ. कुणाल मंडवाले यांनी सेवाज्येष्ठतेनुसार आपली पदोन्नती न झाल्यास उच्च न्यायालयात दाद मागण्याचा इशारा दिला आहे. या संदर्भात त्यांनी थेट महापालिका आयुक्तांना पत्र लिहून आपले गाऱ्हाणे मांडले आहे.
नेमके प्रकरण काय?
डॉ. कुणाल मंडवाले यांनी आयुक्तांना दिलेल्या पत्रात म्हटले आहे की, नियमानुसार सेवाज्येष्ठतेच्या अनुषंगाने पुणे महानगरपालिकेतील रिक्त असलेल्या मुख्य लेखा व वित्त अधिकारी पदावर त्यांची पदोन्नती होणे आवश्यक आहे. या पदोन्नतीच्या प्रक्रियेसाठी त्यांनी सामान्य प्रशासन विभाग आणि विभागीय आयुक्तांकडे सातत्याने पत्रव्यवहार केला असून, ही कार्यवाही अंतिम टप्प्यात आहे.असे असतानाच, २९ मे २०२६ रोजी महाराष्ट्र शासनाच्या वित्त विभागाने एक आदेश काढून श्री. भगवान दत्तात्रय घाडगे यांची या रिक्त पदावर प्रतिनियुक्तीने (Deputation) नियुक्ती केली आहे. शासनाच्या या निर्णयामुळे आपल्यावर पुन्हा एकदा अन्याय होत असल्याची भावना डॉ. मंडवाले यांनी व्यक्त केली आहे.
पत्रातील मुख्य मागण्या व इशारा:
रुजू करून न घेण्याची विनंती: प्रतिनियुक्तीने नियुक्त केलेले अधिकारी श्री. भगवान दत्तात्रय घाडगे यांना पुणे महानगरपालिकेकडे रुजू करून घेऊ नये, अशी विनंती डॉ. मंडवाले यांनी केली आहे.नियमानुसार पदोन्नती द्या: सेवाज्येष्ठतेचा सहानुभूतीपूर्वक विचार करून आपल्यालाच मुख्य लेखा व वित्त अधिकारी पदावर नियमानुसार पदोन्नती देण्यात यावी.न्यायालयात जाण्याचा इशारा: पदोन्नती प्रक्रियेला विलंब होत असल्यामुळे आधीच अन्याय झाला आहे. आता पुन्हा रिक्त पदावर प्रतिनियुक्तीने अधिकारी आणल्यास उच्च न्यायालयात दाद मागण्याशिवाय पर्याय उरणार नाही.या पत्रामुळे आता पुणे महानगरपालिकेतील प्रशासकीय वर्तुळात खळबळ उडाली असून, महापालिका आयुक्त यावर काय निर्णय घेतात याकडे सर्वांचे लक्ष लागले आहे.
