पुणे शहरातील सातारा रस्ता ते सोलापूर रस्ता यांना जोडणाऱ्या कात्रज कोंढवा रस्त्यावर अत्यंत गंभीर बनलेली वाहतूककोंडी सोडवण्यासाठी महापालिका प्रशासनाने अत्यंत महत्त्वाचे आणि धाडसी पाऊल उचलले आहे. गेल्या अनेक वर्षांपासून रखडलेल्या आणि नागरिकांसाठी डोकेदुखी ठरलेल्या कात्रज कोंढवा रस्तारुंदीकरण प्रकल्पाला थेट गती देण्याचा निर्णय घेऊन भूसंपादनासाठी मनपा निधीतून प्रथमच भरीव तरतूद महापालिका आयुक्त नवल किशोर राम यांनी केल्याने तसेच शासनाकडून काही निधी उपलब्ध झाल्याने सदरच्या भूसंपादनासाठी निवाडा जाहीर झाला. विशेष भूसंपादन अधिकारी क्र.१५ श्रीमती श्वेता दारुणकर यांचेकडून सदर निवाड्यानुसार रस्त्याखाली जाणाऱ्या जागांचा महापालिका भूसंपादन व मालमत्ता व्यवस्थापन विभागांकडे ताबा घेण्याची कार्यवाही गेल्या काही दिवसांपासून सुरु होती. ती बहुतांशी पूर्ण झाली आहे. आज दिनांक ०३.०६.२०२६ रोजी अतिरिक्त महापालिका आयुक्त (विशेष) ओमप्रकाश दिवटे यांनी मुख्य अभियंता (पथ) राजेश बनकर, विशेष भूसंपादन अधिकारी क्र.१५ श्रीमती श्वेता दारुणकर व अतिक्रमण प्रभारी रमेश शेलार, मालमत्ता व्यवस्थापन, भूसंपादन व व्यवस्थापन या विभागांसह राजस सोसायटी चौकापासून ते पिसोळी हद्दीपर्यंत प्रत्यक्ष पाहणी करून व रस्ता विकसनात येणाऱ्या अडचणीबाबत चर्चा करून संबंधित विभागांना काम त्वरित करणेबाबत निर्देश देण्यात आले.

• या रस्त्यासाठी आवश्यक असणारी जागा देण्यास टाळाटाळ करणाऱ्या किंवा नकार देणाऱ्या मालमत्ताधारकांवर आता सक्तीने पोलीसांमार्फत ताबा घेण्याची कार्यवाही केली जाणार आहे. तसेच या जागांवरील असलेली अतिक्रमणे / अनधिकृत बांधकाम पुढील दोन दिवसांत हटविणेबाबत उप आयुक्त (अतिक्रमण) रमेश शेलार यांना निर्देश दिलेले आहेत.
• ज्या जागा आधीच महापालिकेच्या ताब्यात आल्या आहेत, त्या ठिकाणी रस्त्याच्या कामात अडथळा ठरणाऱ्या सर्व कात्रज-कोंढवा रस्त्यावरील लहान-मोठी स्ट्रक्चर हटवली जाणार असल्याची स्पष्ट माहिती महापालिका प्रशासनाकडून देण्यात आली आहे. या धडक मोहिमेअंतर्गत रस्त्याच्या हद्दीत येणारी सर्व प्रकारची अनधिकृत बांधकामे निष्कासित करण्यासाठी महापालिकेचे विशेष पथक सक्रिय करण्याचे निर्देश देण्यात आले आहेत.
• ताब्यात आलेल्या सर्व मोकळ्या जागेवर रस्ता विकसनाचे काम दर्जेदार व गतीने करणेबाबत पथ विभाग प्रमुख यांना सूचना देण्यात आल्या. कात्रज कोंढवा रस्त्याच्या विकासनासाठी पथ विभाग, भूसंपादन विभाग, मालमत्ता व व्यवस्थापन विभाग या सर्व विभागांनी एकत्रितपणे कार्यवाही करावयाची आहे. या कामात कुठल्याही प्रकारची हलगर्जी खपवून घेतली जाणार नाही. असा इशारा अतिरिक्त महापालिका आयुक्त (विशेष) यांनी दिला आहे.
• प्रशासनाच्या या आक्रमक भूमिकेमुळे कात्रज-कोंढवा रस्तारुंदीकरणाच्या कामाला आता मोठी गती मिळण्याची दाट शक्यता वर्तवली जात आहे. हा महत्त्वाकांक्षी प्रकल्प वेळेत पूर्ण झाल्यास परिसरातील वाहतूककोंडीचा प्रश्न कायमचा निकाली निघणार असून, नागरिकांचा रोजचा प्रवास अत्यंत सुलभ आणि गतिमान होणार आहे.

या पाहणीदरम्यान उपस्थित अधिकारी
१.श्री.राजेश बनकर, मुख्य अभियंता (पथ विभाग)
२.श्री रमेश शेलार, उप आयुक्त (अतिक्रमण विभाग)
३.श्री प्रशांत ठोंबरे, उप आयुक्त (मालमत्ता व्यवस्थापन व भूसंपादन व्यवस्थापन)
४.श्री अजय वायसे, अधीक्षक अभियंता (पथ)
५.श्री अनिल सोनावणे, कार्यकारी अभियंता (पथ)
६.श्री संतोष लांजेकर, कार्यकारी अभियंता (बांधकाम)
७.श्री दिगंबर बांगर, उप अभियंता (भूसंपादन व व्यवस्थापन)
८.श्री बागवान, उप अभियंता (मालमत्ता व्यवस्थापन )
९. श्रीमती श्वेता दारुणकर, विशेष भूसंपादन अधिकारी क्र.१५

पुणे, दि. ३ जून, २०२६ : पुणे शहरातील मान्सूनपूर्व नाले, कल्व्हर्ट व जलनिस्सारण व्यवस्थेशी संबंधित विविध कामांच्या प्रगतीचा आढावा घेण्यासाठी अतिरिक्त महापालिका आयुक्त (इस्टेट) प्रजित नायर यांच्या अध्यक्षतेखाली सर्व परिमंडळ उपायुक्त, क्षेत्रीय कार्यालयांचे सहाय्यक आयुक्त व संबंधित विभागांच्या अधिकाऱ्यांची आढावा बैठक आयोजित करण्यात आली.

बैठकीत शहरातील विविध भागांमध्ये सुरू असलेल्या नाले रुंदीकरण, खोलीकरण, गाळ काढणे, कल्व्हर्ट दुरुस्ती व बांधकाम, जलनिस्सारण व्यवस्थेची क्षमता वाढविणे तसेच पूरजन्य परिस्थिती टाळण्यासाठी हाती घेण्यात आलेल्या कामांचा सविस्तर आढावा घेण्यात आला. प्रत्येक परिमंडळनिहाय कामांची सद्यस्थिती, प्रलंबित बाबी, अडचणी आणि त्यावरील उपाययोजनांबाबत चर्चा करण्यात आली.

अतिरिक्त महापालिका आयुक्त (इस्टेट) प्रजित नायर यांनी सर्व संबंधित अधिकाऱ्यांना मान्सूनपूर्व नियोजित कामे वेळेत व दर्जेदार पद्धतीने पूर्ण करण्याच्या सूचना दिल्या. ज्या ठिकाणी कामांची गती अपेक्षेपेक्षा कमी आहे, तेथे आवश्यक मनुष्यबळ व यंत्रसामग्री उपलब्ध करून कामे तातडीने पूर्ण करण्याचे निर्देश देण्यात आले.

तसेच, पुढील आठवड्यापासून विविध क्षेत्रीय कार्यालयांच्या हद्दीतील नाले व कल्व्हर्ट कामांची प्रत्यक्ष स्थळपाहणी करण्यात येणार असून, सुरू असलेल्या कामांच्या गुणवत्तेची व प्रगतीची तपासणी करण्यात येणार असल्याचे मा. अतिरिक्त महापालिका आयुक्त (इस्टेट) श्री. प्रजित नायर यांनी सांगितले. प्रत्यक्ष पाहणीदरम्यान आढळून येणाऱ्या त्रुटी तात्काळ दूर करून नागरिकांना पावसाळ्यात कोणत्याही प्रकारचा त्रास होणार नाही, यासाठी सर्व विभागांनी समन्वयाने काम करावे, असे निर्देशही त्यांनी दिले.

पुणे महानगरपालिका शहरातील पूरस्थिती टाळणे, पावसाच्या पाण्याचा सुरळीत निचरा होणे आणि नागरिकांची सुरक्षितता सुनिश्चित करणे यासाठी विविध विभागांच्या माध्यमातून नियोजनबद्ध कामे राबवत असून, सर्व संबंधित यंत्रणांनी कामांच्या अंमलबजावणीत अधिक गती आणावी, असे आवाहन यावेळी करण्यात आले.

याप्रसंगी, परिमंडळ अधिकारी उपायुक्त विजयकुमार थोरात, उपायुक्त अरविंद माळी, उपायुक्त माधव जगताप, उपायुक्त श्री. अविनाश सकपाळ, उपायुक्त श्रीमती आशा राऊत, गणेश सोनुने आपत्ती व्यवस्थापन प्रमुख, क्षेत्रीय कार्यालयांचे सहाय्यक आयुक्त व संबंधित अधिकारी उपस्थित होते.

पुणे-

       पुण्यातील वाहतुकीची समस्या अधिक गंभीर बनत असून त्यासाठी विचारविनिमय करून मार्ग शोधण्यासाठी पुणे शहर जिल्हा कॉंग्रेस कमिटीतर्फे शनिवार दिनांक ६ जून रोजी सकाळी १०.०० ते दुपारी १.०० या वेळेत पत्रकार भवन नवीपेठ येथे ‘पुणे ट्रॅफिक परिषदेचे’ आयोजन करण्यात आले आहे. यामध्ये वाहतूक संबंधी विविध संस्थांचे वरिष्ठ अधिकारी, तज्ञ, पत्रकार व नागरिक सहभागी होणार आहेत. नागरिकांनी देखील या परिषदेत आवर्जून यावे असे या परिषदेच्या आयोजिका पुणे शहर काँग्रेसच्या पश्चिम विभागाच्या अध्यक्षा दीप्ती चवधरी यांनी सांगितले.

      त्या म्हणाल्या की या परिषदेतील ‘शिफारसी व निष्कर्ष यांचा एकत्रित अहवाल तयार करून त्याची अंमलबजावणी व्हावी यासाठी हा अहवाल महाराष्ट्राचे मुख्यमंत्री आणि पुणे महानगरपालिका आयुक्तांना सादर करून त्याचा पाठपुरावा केला जाईल. तसेच या ट्रॅफिक परिषदेतील सहभागी वरिष्ठ शासकीय अधिकारी व तज्ञ यांच्या चर्चेचा गोषवारा व शिफारसी यावर आधारित पुस्तक प्रकाशित केले जाणार आहे’ असे त्यांनी सांगितले.  

      या परिषदेत अपर पोलीस आयुक्त मनोज पाटील, पोलीस उपायुक्त (वाहतूक) संदीप भाजीभाकरे, प्रादेशिक परिवहन अधिकारी अर्चना गायकवाड, मनपा पथविभाग प्रमुख रोहितदास गव्हाणे, पुणे मनपाचे मुख्य अभियंता (प्रकल्प) दिनकर गोजारे, पी.एम.आर.डी.ए. च्या चीफ इंजिनिअर श्रीमती पठाण, पी.एम.पी.एम.एल.च्या जॉइंट एम.डी. श्रीमती पोरे, पुणे मेट्रोचे प्रोजेक्ट डायरेक्टर अतुल गाडगीळ, सी.आय.आर.टी चे तांत्रिक विभाग प्रमुख एस. एन. ढोले तसेच सजग नागरिक मंचाचे विवेक वेलणकर, पुणे वाहतूक समस्यांचे अभ्यासक पत्रकार मंगेश कोळपकर यांना निमंत्रित करण्यात आले आहे. हे सर्वजण सहभागी होऊन विविध उपाययोजनांबाबत मार्गदर्शन करतील. असे दीप्ती चवधरी यांनी सांगितले.

      १९९२ ते २००७ या काळात कॉंग्रेस पक्ष पुणे महानगरपालिकेत सत्तेत होता. पुण्याची भविष्यातील लोकसंख्या वाढ आणि वाहतूक या संदर्भात कॉंग्रेस पक्षाने विचारपूर्वक अनेक प्रकल्प राबवले. रस्ता रुंदीकरण, सिमेंट कॉंक्रीटचे रस्ते, मोठे फुटपाथ, बहुमजली वाहनतळ, उड्डाणपूल, भुयारीमार्ग, नदीकाठचा रस्ता, सिन्क्रोनाइज्ड सिग्नल सिस्टीम आदि पायाभूत विकासावर भर दिला. तसेच सतत १३ वर्षे पाठपुरावा करून सन २०१३ मध्ये पुणे मेट्रो प्रकल्पाला केंद्र शासनाची मंजुरी मिळवली. या प्रकारेच सातत्याने पाठपुरावा करीत पुण्याच्या वाहतूक समस्यांबाबत उपाययोजना शोधली जावी व त्याची अंमलबजावणी व्हावी यासाठी कॉंग्रेस पक्ष सदैव प्रयत्नशील राहील. त्यासाठीच या ट्रॅफिक परिषदेचे आयोजन केले आहे असे त्या म्हणाल्या.

“साहेबांच्या” पुण्यतिथी निमित्त वृंदावन शैक्षणिक प्रकल्पास क्रिएटिव्ह फाउंडेशन तर्फे विविध वस्तू भेट.

पुणे–भारतीय जनता पार्टीच्या संघर्षाच्या काळातील मोठ्या मनाचे व उत्तुंग नेतृत्व म्हणून गोपीनाथराव मुंडे साहेब सदैव स्मरणात राहतील अश्या शब्दात संदीप खर्डेकर यांनी त्यांच्या आठवणींना उजाळा दिला. 2002/2003 च्या चांदा ते बांदा ह्या संघर्ष यात्रेदरम्यान अनुभवलेले मुंडे साहेब यांच्या अनेक आठवणी सांगता येतील मात्र मुंबईतील गुन्हेगारी विरुद्ध, नक्षलवाद्यावर कठोर कारवाई करणारे कणखर साहेब हे वैयक्तिक जीवनात तितकेच हळवे होते हे वेगळेपण विसरता येणार नाही. गोर गरीब व शेतकऱ्यांप्रती कणव असणारे मुंडे साहेब हे संवेदनशील नेतृत्व होते व कार्यकर्त्यांवर प्रेम करणारे आणि त्यांच्या सुख दुःखात सहभागी होणारे लोकनेते होते असेही संदीप खर्डेकर म्हणाले.

आज गोपीनाथराव मुंडे साहेबांच्या पुण्यतिथी निमित्त सेवाव्रत फाउंडेशन संचालित वृंदावन शैक्षणिक प्रकल्पा अंतर्गत कर्वेनगर च्या कामना वसाहत, वारजे च्या म्हाडा वसाहत आणि पानमळा वसाहतीतील पहिली ते दहावीच्या विद्यार्थ्यांना क्रिएटिव्ह फाउंडेशन तर्फे शैक्षणिक व क्रीडा साहित्य भेट देण्यात आले त्या प्रसंगी खर्डेकर यांनी ह्या आठवणींना उजाळा दिला.या वेळी वस्तीतील मुलं पत्र्याच्या शेड मध्ये उकाड्यात अभ्यास करत असल्याचे लक्षात आल्यावर संदीप खर्डेकर यांनी शेड मध्ये गारवा रहावा यासाठी त्वरित कुलर भेट दिला.
या प्रसंगी नगरसेविका व क्रिएटिव्ह फाउंडेशन च्या विश्वस्त मंजुश्री खर्डेकर, सेवाव्रत फाउंडेशन चे संचालक प्रदीप देवकुळे, क्रिएटिव्ह चे विश्वस्त प्रतीक खर्डेकर, सौ. प्रणेती लवंगे, पतित पावन संघटनेचे उपाध्यक्ष राहुल पडवळ, कोथरूड पतित पावन संघटनेचे विभाग प्रमुख अण्णा बांगर, श्री.अश्विन लवंगे, भाजपा महिला आघाडी सरचिटणीस कल्याणी खर्डेकर व इतर मान्यवर उपस्थित होते.
मुंडे साहेब हे सातत्याने सामान्यांच्या उत्कर्षाचा ध्यास घेतलेले लोकनेते होते त्यामुळे त्यांना श्रद्धांजली अर्पण करताना ज्या घटकांकडे काही कमी आहे त्यांना मदत करावी असे क्रिएटिव्ह फाउंडेशन ने ठरविले असल्याचे विश्वस्त मंजुश्री खर्डेकर म्हणाल्या.
सेवाव्रत फाउंडेशन वस्तीतील विद्यार्थ्यांसाठी निस्पृह वृत्तीने कार्यरत असून क्रिएटिव्ह फाउंडेशन ह्या प्रकल्पांना वेळोवेळी मदत करते याबद्दल प्रदीप देवकुळे यांनी कृतज्ञता व्यक्त केली.
कार्यक्रमाचे संयोजन विश्वस्त प्रतीक खर्डेकर व प्रणेती लवंगे यांनी केले.

पुणे : किशोरवयात मी सूर्यकांत यांना प्रथम पाहिले, तेव्हा भारल्याप्रमाणे झाले होते. काही काळाने रूपेरी पडद्यावर मी त्यांची नायिका होईन, असे स्वप्नातही वाटले नव्हते. सूर्यकांत यांच्यासारख्या कलाकारासोबत मला काम करण्याची संधी मिळाली, हा मला भाग्ययोग वाटतो, असे उद्गार ज्येष्ठ अभिनेत्री आशा काळे यांनी मंगळवारी येथे काढले. सूर्यकांत अभिनेते म्हणून तर श्रेष्ठ होतेच, पण माणुसकीच्या नात्यानेही ते महान होते, असेही त्या म्हणाल्या.

पूना गेस्ट हाऊस आणि प्रकाश सूर्यकांत मांडरे व परिवार यांच्या वतीने मंगळवारी (दि. २) आयोजित सूर्यकांत मांडरे यांच्या जन्मशताब्दी वर्षाच्या सांगतेनिमित्त ‘सूर्यकांत मांडरे : एक कलासक्त तेजस्वी कलाकार’ या विशेष कार्यक्रमाचे आयोजन बालगंधर्व रंगमंदिरात करण्यात आले होते. ज्येष्ठ संपादक विजय कुवळेकर कार्यक्रमाच्या अध्यक्षपदी होते. कवयित्री प्रतिभा शाहू मोडक, वात्रटिकाकार रामदास फुटाणे, ज्येष्ठ नेते उल्हास पवार, ज्येष्ठ नृत्यांगना लीला गांधी, ज्येष्ठ अभिनेत्री आशा काळे, प्रकाश सूर्यकांत मांडरे, पूना गेस्ट हाऊसचे डॉ. किशोर सरपोतदार आदी मान्यवर व्यासपीठावर होते.

उपस्थित सर्वच कलाकारांनी सूर्यकांत यांच्या आठवणींचा पट यावेळी उलगडला. आशा काळे म्हणाल्या, मी सूर्यकांत यांना प्रथम पाहिले, तेव्हा ते उषा किरण यांच्यासह चित्रीकरण करत होते. मी त्यांच्याकडे भारल्यासारखी बघत होते. कालांतराने भालजी पेंढारकर यांच्या ‘तांबडी माती’ या चित्रपटात मी सूर्यकांत यांची नायिका झाले. नंतरही अनेक चित्रपटांत आम्ही भूमिका केल्या. ‘गनिमी कावा’ चित्रपटात एक प्रेमगीत चित्रित करण्यासाठी मला गजरा हवा होता, ती मागणी सूर्यकांत यांनी पूर्ण केली. छत्रपती शिवाजी महाराज यांच्या परिवेषात ते उभे राहिले, की साक्षात महाराजांची ऊर्जा पोचल्यासारखे वाटत असे, असेही त्या म्हणाल्या.

लीला गांधी म्हणाल्या, ‘प्रीतीसंगम’ या चित्रपटाच्या वेळी सूर्यकांत यांच्याशी पहिली भेट झाली. ते प्रसंग छान समजावून सांगत असत. प्रत्येकाला सांभाळून घेण्याची वृत्ती आणि खेळीमेळीचे वातावरण, हे त्यांचे वेगळेपण होते.

प्रतिभा शाहू मोडक म्हणाल्या, आम्ही १९९३ मध्ये पुण्यात आलो, तेव्हा सूर्यकांत आणि चारुकाका सरपोतदार ही दोनच माणसे परिचयाची होती. आम्ही नेहमी भेटत असू. शाहू मोडकांनंतर सूर्यकांत सातत्याने मला दिलासा देत असत.

रामदास फुटाणे यांनी सूर्यकांत आणि मी चित्रपट महामंडळाच्या निमित्ताने भेटलो आणि स्नेही झालो, अशी आठवण सांगितली. ते उत्तम चित्रकार होते. भालजी पेंढारकर आम्हा सर्वांचे गुरू आणि चारुकाका सरपोतदार हा आम्हाला जोडणारा दुवा होता, असेही ते म्हणाले.

उल्हास पवार यांनी सूर्यकांत यांच्या उत्तुंग व्यक्तिमत्त्वाचा उल्लेख केला. कोल्हापूर तेव्हा कलाकारांचे आगार होते. पुण्यात असले, की सूर्यकांत स्कूटरवरून आमच्या घरी येत असत आणि मनमोकळ्या गप्पा रंगत असत, असे ते म्हणाले.

कलेप्रती, गुरुंप्रती सदैव ईमान हे सूर्यकांत यांच्या व्यक्तिमत्त्वाचे वैशिष्ट्य होते, असे गौरवोद्गार ज्येष्ठ संपादक विजय कुवळेकर यांनी काढले. देखणे व्यक्तिमत्त्व, उत्तम अभिनय, मैत्रीला जागणारा, सगळ्यांना सांभाळून घेणारा आणि चित्रपटसृष्टीच्या झगमगाटापासून दूर राहणारा कलाकार म्हणजे सूर्यकांत. त्यांच्या भूमिकांमधील वैविध्य उल्लेखनीय आहे. मदतीला धावून जाणारा, माणुसकीचे नाते जपणारा मोठा कलावंत, अशा शब्दांत त्यांनी सूर्यकांत यांचे वर्णन केले.

मांडरे यांच्या नातसून युगंधरा मांडरे आणि डॉ. किशोर सरपोतदार यांनी प्रास्ताविक केले. शिल्पकार सुरेश राऊत यांनी कार्यक्रम सुरू असताना सूर्यकांत यांचा अर्धपुतळा साकारला. सूर्यकांत यांच्या चित्रपट कारकिर्दीवर आधारित ध्वनीचित्रफित सुरवातीला दाखवण्यात आली. प्रकाश मांडरे यांनी आभार मानले. रवींद्र खरे यांनी सूत्रसंचालन केले. उत्तरार्धात सूर्यकांत यांच्या गाजलेल्या चित्रपटांतील लोकप्रिय गीतांचा कार्यक्रम पल्लवी आनदेव, प्रा. रवींद्र शाळू यांनी सादर केला. संहितालेखन सुलभा तेरणीकर यांचे होते.

पुणे : एकपात्री या कलाप्रकाराला आजच्या काळात भरपूर वाव आहे. त्यामुळे एकपात्री कलाकाराने आलेली कुठलीही संधी न दवडता कार्यक्रमाची उत्तम तयारी व प्रभावी सादरीकरण केल्यास यश नक्कीच मिळेल, असा सल्ला सुप्रसिद्ध व्याख्याते प्राचार्य श्याम भुर्के यांनी दिला.  स्व. मधुकर टिल्लू यांनी आपल्याला कायम प्रोत्साहित केल्याची आठवण जागवत त्यांच्या स्मृतींना उजाळा दिला.

मराठी रंगभूमीवर एकपात्री कलाप्रकार रुजवणारे पहिल्या पिढीतील ज्येष्ठ एकपात्री कलाकार स्व. मधुकर टिल्लू यांचा १ जून हा स्मृतिदिन. या निमित्ताने दरवर्षी हा दिवस एकपात्री कलाप्रसार दिन म्हणून साजरा केला जातो. एकपात्री कलाकार परिषद, राष्ट्रसेवा दल सांस्कृतिक विभाग, निळू फुले कला अकादमी यांच्या सहकार्याने एकपात्री कलाप्रसार दिनाचे औचित्य साधून एकपात्री महोत्सवाचे बॅरिस्टर नाथ पै सभागृह, साने गुरुजी स्मारक, राष्ट्रसेवा दल येथे आयोजन करण्यात आले आहे.

या महोत्सवाचे उद्‌घाटन आज (दि. १) प्राचार्य श्याम भुर्के यांच्या हस्ते झाले. त्या वेळी ते बोलत होते. दि. १, दि. २, दि. ३ व दि. ५ या कालावधीत महोत्सव आयोजित करण्यात आला आहे. या महोत्सवानिमित्ताने ‘आर्टिस्ट ऑफ द इयर’ या पुरस्काराने नाना गुजराथी (संगमनेर) आणि लक्ष्मीकांत रानडे (पुणे) यांचा गौरव करण्यात आला. या वेळी निळू फुले अकादमीचे सुरेश देशमुख, मकरंद टिल्लू, एकपात्री कलाकार परिषदेच्या उपाध्यक्ष मंजुषा जोशी मंचावर होते. शाल, स्मृतिचिन्ह, प्रशस्तीपत्र असे पुरस्काराचे स्वरूप होते.

प्राचार्य श्याम भुर्के यांनी आपली कला कशी बहरत गेली हे सांगताना, नकलाकार म्हणून काम करताना नाटकाकडे वळलो आणि पुढे नोकरीत असताना व्याख्याने देऊ लागलो. हा प्रवास साकारताना प्राचार्य शिवाजीराव भोसले, सुधीर फडके, बाबासाहेब पुरंदरे, पु. ल. देशपांडे अशा दिग्गज व्यक्तींच्या सहवासातून आपले व्यक्तिमत्त्व घडत गेले. मधुकर टिल्लू यांचा वारसा टिल्लू कुटुंबातील तीन पिढ्या ही कला जोपासत आहेत. मकरंद टिल्लू उत्तम संघटकाच्या भूमिकेतून सातत्याने कार्यरत असल्याचे त्यांनी आवर्जून सांगितले.

प्रास्ताविकात मकरंद टिल्लू म्हणाले, विनोदी प्रसंगांची गुंफण करत एकपात्री कला सादर करण्याची कला मधुकर टिल्लू यांनी विकसित केली होती. महाराष्ट्रातील एकपात्री कलाकारांना प्रोत्साहित करण्यासाठी ते सातत्याने कार्यशील होते. आज एकपात्री कलेला सुवर्णकाळ आलेला आहे, अशा काळात कला आणि गुणवत्ता वाढवत समोरच्याला अवाक करण्याचे कसब साधणे आवश्यक आहे. एकपात्री कलाकार परिषद कलाकारांना एकत्र आणून एकमेकांना मदत करत कार्यशील राहण्याचे प्रयत्न करत आहे.

उद्घाटन समारंभानंतर भाग्यश्री देशपांडे, अतुल कुलकर्णी, राहुल भालेराव या कलाकारांचे सादरीकरण झाले.

पुरस्काराला उत्तर देताना नाना गुजराथी आणि लक्ष्मीकांत रानडे यांनी मनोगत व्यक्त केले. कार्यक्रमाचे सूत्रसंचालन प्रदीप रत्नपारखे, सतिश कारेकर यांनी केले. पल्लवी परब, नरेंद्र लवाटे यांनी आयोजन केले. सुरुवातीस नटराज पूजन आणि मधुकर टिल्लू यांच्या प्रतिमेस मान्यवरांच्या हस्ते पुष्पहार अर्पण करण्यात आला.