४१ अभियंत्यांसह एजन्सीजच्या प्रतिनिधींची संयुक्त कार्यशाळा

पुणे, दि. ४ मे २०२३: पुणे परिमंडलामध्ये छतावरील सौर ऊर्जा निर्मिती प्रकल्पाच्या उभारणीसाठी वीजग्राहकांकडून प्रतिसाद वाढत आहे. आतापर्यंत छतावरील सौर ऊर्जेचे लघु व उच्चदाबाचे घरगुती, वाणिज्यिक, औद्योगिक व इतर वर्गवारीतील ११ हजार ७०० पेक्षा अधिक प्रकल्प कार्यान्वित झाले आहेत. या योजनेस आणखी वेग देण्यासोबतच सौर ऊर्जा प्रकल्पांची उभारणी करताना विद्युत सुरक्षेकडे अधिक लक्ष द्यावे असे निर्देश मुख्य अभियंता श्री. राजेंद्र पवार यांनी दिले आहेत.

छतावरील सौर ऊर्जा प्रकल्पांच्या उभारणीसाठी प्रत्यक्ष काम करणारे सर्व ४१ उपविभाग कार्यालयांतील सहायक अभियंता (गुणवत्ता नियंत्रण) आणि सौर ऊर्जा प्रकल्पाची उभारणी करणाऱ्या एजन्सीजच्या प्रतिनिधींची संयुक्त कार्यशाळा रास्तापेठ येथील सर मोक्षगुंडम् विश्वेश्वरय्या बहुउद्देशीय सभागृहात नुकतीच झाली. यावेळी मुख्य अभियंता श्री. पवार बोलत होते. अधीक्षक अभियंता श्री. प्रकाश राऊत व श्री. सतीश राजदीप यांच्यासह सर्व विभागाचे कार्यकारी अभियंत्यांची कार्यशाळेत प्रमुख उपस्थिती होती.

मुख्य अभियंता श्री. राजेंद्र पवार म्हणाले की, छतावरील सौर ऊर्जा प्रकल्प कार्यान्वित करण्यासाठी गेल्या तीन-चार महिन्यांपासून अभियंता, कर्मचाऱ्यांना व एजन्सीजच्या प्रतिनिधींना प्रशिक्षण तसेच तांत्रिक व प्रशासकीय गतिमानतेतून वेग देण्यात आला आहे. यासह महावितरण आणि एजन्सीजच्या प्रतिनिधींसाठी कार्यशाळेचे आयोजन करण्यात आले आहे. यापुढे दोहोंच्या समन्वयातून वीजग्राहकांकडील सौर ऊर्जा प्रकल्प विनाविलंब मार्गी लागतील अशी अपेक्षा श्री. पवार यांनी व्यक्त केली.  

या कार्यशाळेत महावितरणचे सहायक अभियंता व एजन्सीजच्या प्रतिनिधींनी छतावरील सौर ऊर्जा प्रकल्पांना गती देण्याच्या विविध मुद्द्यांवर सांगोपांग चर्चा केली. त्यातून अनेक अडचणींचे मुद्दे व प्रश्न निकाली काढण्यात आले. तसेच तांत्रिक व प्रशासकीय कार्यवाहीची माहिती देत मार्गदर्शन करण्यात आले. त्यानंतर पुणे परिमंडलासाठी महावितरण व एजन्सीजच्या संबंधित कामांसाठी संयुक्त कृती आराखडा ठरविण्यात आला. या कार्यशाळेचे समन्वयक म्हणून उपकार्यकारी अभियंता डॉ. संतोष पटनी यांनी काम पाहिले. महावितरणच्या अभियंत्यांसह स्मिता जाधव, समीर गांधी यांच्यासह महाराष्ट्र सोलर मॅन्युफॅक्चरर्स असोशिएशनचे (MASMA), ऑल इंडिया रिन्यूऐबल एनर्जी असोशिएशनच्या (AIREA) तसेच इतर एजन्सीजचे प्रतिनिधी सहभागी झाले होते.

पुणे दि.४- पंतप्रधान नरेंद्र मोदी यांच्या संकल्पनेतून सुरू २०१४ मध्ये सुरू करण्यात आलेल्या स्वच्छ भारत अभियानाला लोकचळवळीचे स्वरुप आले असून यात देशातील सर्व नागरिकांचा सहभाग असल्याने अभियान यशस्वी ठरले आहे, असे प्रतिपादन राज्याचे उच्च व तंत्रशिक्षण मंत्री तथा जिल्ह्याचे पालकमंत्री चंद्रकांतदादा पाटील यांनी केले.

पुणे महानगरपालिका येथे दक्षिण गोलार्धातील विविध देशांच्या उच्च पदस्थ अधिकाऱ्यांसमवेत पुणे शहरातील शाश्वत कचरा व्यवस्थापन आणि पुणे महानगरपालिका व कचरा वाचकांच्या स्वच्छ मॉडेल संदर्भातील चर्चेच्यावेळी ते बोलत होते. यावेळी महापालिका आयुक्त विक्रम कुमार, अतिरिक्त आयुक्त कुणाल खेमनार, विशेष कार्य अधिकारी राजेंद्र मुठे, सेंटर फॉर सायन्स ॲण्ड एन्व्हायर्नमेंटचे प्रमुख अतुल विश्वास आदी उपस्थित होते.

श्री.पाटील म्हणाले, स्वच्छ भारत अभियानांतर्गत देशात विविध चांगले उपक्रम राबविण्यात आले. पुणे शहरानेदेखील अभियान यशस्वी करण्यासाठी विशेष प्रयत्न केले आहेत. येथील ‘स्वच्छ मॉडेल’ यशस्वी ठरले आहे. जगातील प्रतिनिधींनी या कार्याची दखल घेणे ही अभिमानाची गोष्ट आहे. शहराला भेट देण्यासाठी आलेले प्रतिनिधी हे आपापल्या देशातील महत्वाचे अधिकारी असून त्यांच्या देशातील घनकचरा व्यवस्थापनासाठी ही भेट उपयुक्त ठरेल, असा विश्वास त्यांनी व्यक्त केला.

आयुक्त विक्रम कुमार म्हणाले, देशात स्वच्छ भारत अभियानाला चांगले यश मिळाले आहे. या माध्यमातून ग्रामीण आणि शहरी भागातील स्वच्छतेवर विशेष लक्ष देण्यात येत आहेत. दक्षिण गोलार्धातील विविध देशांच्या प्रतिनिधींनी पुण्याच्या घनकचरा व्यवस्थापन यंत्रणेचे कौतुक करणे ही शहरासाठी चांगली बाब असून शहर अधिक स्वच्छ ठेवण्यासाठी कर्मचारी आणि नागरिकांना त्यातून प्रोत्साहन मिळेल.

श्री.विश्वास म्हणाले, उत्तम नेतृतव आणि प्रशासकीय पातळीवरील तेवढेच चांगले प्रयत्न यामुहे स्वच्छ भारत अभियान यशस्वी ठरले आहे. पुण्यातील ‘स्वच्छ मॉडेल’ जगात वैशिष्ट्यपूर्ण असल्याचे त्यांनी सांगितले. पाच दिवसाचा दौरा सर्व प्रतिनिधींसाठी उपयुक्त ठरेल, असा विश्वास त्यांनी व्यक्त केला.

श्री.खेमनार यांनी प्रास्ताविकात विविध देशातील प्रतिनिधींच्या भेटीविषयी माहिती दिली. १९ देशांचे ३८ प्रतिनिधी शहरातील घनकचरा व्यवस्थापनाचा अभ्यास करण्यासाठी आले असून त्यात १५ अफ्रीकन देश आणि इतर अशियातील देशांचे प्रतिनिधी आहेत. सेंटर फॉर सायन्स ॲण्ड एन्व्हायर्नमेंटने या भेटीचे आयोजन केले असल्याचे त्यांनी सांगितले.

स्वच्छ पुणे सेवा सहकारी संस्था व कागद, काच, पत्रा कष्टकरी पंचायत समितीच्या संस्थापक लक्ष्मी नारायण यांनी कचरा वेचकांच्या कामाची पद्धत, स्वच्छ व केकेपीकेपी संस्थेची स्थापना व कामकाज याविषयी माहिती दिली.

पुणे, दि. ४: नोकरी इच्छुक युवक-युवतींना नामवंत खाजगी कंपन्या, कारखाने, उद्योगसमूह यांच्या माध्यमातून उत्तमोत्तम रोजगाराच्या संधी उपलब्ध करुन देण्याच्या प्रयत्नांचा भाग म्हणून कौशल्य विकास, रोजगार व उद्योजकता मार्गदर्शन केंद्राच्यावतीने प्रत्येक महिन्याला रोजगार मेळावा अर्थात ‘प्लेसमेंट ड्राईव्ह’चे आयोजन करण्यात येत आहे. त्याअंतर्गत २०२३-२४ मधील दुसरा रोजगार मेळावा येत्या १० मे २०२३ रोजी आयोजित करण्यात आला आहे.

कौशल्य विकास, रोजगार व उद्योजकता मार्गदर्शन केंद्र हे कार्यालय वेळोवेळी जिल्ह्यातील वेगवेगळ्या भागात रोजगार मेळावे आयोजित करुन, सर्व स्तरातील जास्तीत जास्त उमेदवारांना रोजगार मिळवून देण्याचा प्रयत्न सातत्याने करीत आहे. याचाच एक पुढील टप्पा म्हणून आता प्रत्येक महिन्याच्या दुसऱ्या बुधवारी या कार्यालयामध्येच प्लेसमेंट ड्राईव्हचे आयोजन करण्याचा निर्णय घेण्यात आला आहे.

याप्रसंगी विविध पदांकरिता वेगवेगळ्या पात्रतेच्या उमेदवारांची तात्काळ नोकरभरती आवश्यक आहे अशा कंपन्यांच्या प्रतिनिधींना या कार्यालयात उमेदवारांच्या थेट प्रत्यक्ष मुलाखती घेण्याकरिता पाचारण करण्यात येणार आहे. या मुलाखतींना प्रत्यक्ष हजर राहून पात्र होतील अशा उमेदवारांना लगेच जागेवरच नोकरीची संधी मिळणार आहे.

पुणे जिल्ह्यातील नोकरीइच्छुक युवक-युवतींनी या संधीचा लाभ व अधिक माहिती घेण्यासाठी विभागाच्या www.rojgar.mahaswayam.gov.in या संकेतस्थळाला भेट द्यावी. नोंदणी नसल्यास प्रथम आपली नावनोंदणी करावी आणि होमपेजवरील नोकरीसाधक (जॉब सीकर) लॉगीन मधून आपापल्या युझर आयडी व पासवर्डच्या आधारे लॉगीन करावे.

उमेदवारांनी लॉगीन केल्यानंतर डॅशबोर्ड मधील ‘पंडीत दीनदयाळ उपाध्याय जॉब फेअर’ या बटनावर क्लिक करुन प्रथम पुणे विभाग व नंतर पुणे जिल्हा निवडून त्यातील ‘2nd PLACEMENT DRIVE-PUNE’ या रोजगार मेळाव्याची निवड करावी. उद्योजकनिहाय त्यांच्याकडील रिक्तपदांची माहिती घ्यावी आणि आवश्यक पात्रता धारण करीत असल्याची खात्री करुन उचित असलेल्या रिक्तपदासाठी ऑनलाईन पद्धतीने आपला पसंतीक्रम नोंदवावा.

ऑनलाईन नोंदणी केलेल्या उमेदवारांनी बुधवार १० मे रोजी समक्ष जिल्हा कौशल्य विकास, रोजगार व उद्योजकता मार्गदर्शन केंद्र, पुणे-११ येथे आपल्या सर्व कागदपत्रांसह उपस्थित राहून या प्लेसमेंट ड्राईव्हमध्ये सहभागी व्हावे आणि रोजगाराच्या या महापर्वणीचा लाभ घ्यावा, असे आवाहन प्र. सहाय्यक आयुक्त सागर मोहिते यांनी केले आहे.

पुणे-अखिल भारतीय मराठा शिक्षण परिषद आणि सावित्रीबाई फुले पुणे विद्यापीठ यांचे संयुक्त विद्यमाने नॅक:  बेंचमार्किंग फॉर क्वॉलिटी इम्प्रूमेंट इन हायर एज्युकेशन’   या विषयावर राज्यस्तरीय कार्यशाळेचे आयोजन करण्यात आले होते. या कार्यशाळेचे उद्घाटन डॉ. जगन्नाथ पाटील नॅक ॲडव्हायझर बेंगलोर, डॉ.मनोहर चासकर अधिष्ठाता, सायन्स ॲड टेक्नोलॉजी सावित्रीबाई फुले पुणे विद्यापीठ, मा.सौ.प्रमिला गायकवाड सरचिटणीस, अखिल भारतीय मराठा शिक्षण परिषद व खजिनदार श्री. विजयसिंह जेधे यांचे हस्ते  राजर्षी शाहू महाराज यांचे प्रतिमेस पुष्पहार घालून झाले. या प्रसंगी डॉ.पाटील यांनी  नॅक मुल्यांकन ही निरंतर प्रक्रिया असून शैक्षणिक उपक्रमात नॅक मुल्यांकनाला भविष्यात पर्याय नाही.  प्रत्येक महाविद्यालयाला व  शिक्षकांना या प्रक्रियेस सामोरे जायचे आहे. त्यामुळे भीती न बाळगता त्या प्रक्रियेत सहभागी व्हा . या प्रसंगी  बेंचमार्किंग चे विविध प्रकार, स्टुडन्ट  सॅटिस्फॅक्शन सर्वे, कागदपत्र पडताळणी (DVV),ॲल्युमि व इंडस्ट्री सहभाग, बेस्ट प्रॅक्टिसेस या विषयी मार्गदर्शन करताना जागातील शैक्षणिक संस्थांची उदाहरणे देऊन बेंचमार्किंग चे महत्व सांगितले. संस्थेच्या, समाजाच्या व देशाच्या शाश्वत विकासासाठी बेंचमार्क  खूप महत्वाचे आहेत. या बेंचमार्कला मार्क्स आल्यामुळे महाविद्यालयांना आपण कुठे कमी पडतो या विषयी माहिती मिळते. राष्ट्रीय उत्पन्नाच्या सात टक्के खर्च उच्च शिक्षणावर व्हावा.  याच बरोबर नॅक मूल्यांकनासाठी येऊ घातलेल्या ‘परिसस्पर्श’ योजनेविषयी माहिती दिली.  प्राध्यापकांनी गुणवत्तेसाठी काम करत रहावे  शिक्षण संस्थेला चांगला दर्जा आपोआप मिळेल असे सांगून नॅकच्या प्रोसेस मध्ये  सर्वांनी आपले राष्ट्रीय उत्तरदायित्व म्हणून काम करावे अशी अपेक्षा व्यक्त केली. डॉ. मनोहर चासकर यांनीं नॅक हि सर्वांची जबाबदारी असून टीचिंग लर्निंग प्रक्रियेत नवीन शैक्षणिक धोरणानुसार सिस्टम तयार केली पाहिजे . या सिस्टीमचा विद्यार्थ्या बरोबर समाजाला देखील फायदा झाला पाहिजे असे आवाहन शिक्षण संस्थाना केले.

सदर कार्यशाळेसाठी डॉ. जगन्नाथ पाटील, डॉ.मनोहर चासकर, मा.सौ.प्रमिला गायकवाड, श्री. विजयसिंह जेधे कार्यशाळेचे समन्वयक डॉ.राजेंद्र कोळी, महाविद्यालयांचे प्राचार्य डॉ.शुभदा घोलप, डॉ.विलास पाटील, डॉ.सुनिल ठाकरे, विविध शिक्षण संस्थातील प्राध्यापकानी उस्फुर्तपणे सहभाग नोंदविला.या कार्यशाळेचे सूत्र संचालन डॉ. दिपक गायकवाड यांनी केले तर आभार प्रा.रमा गायकवाड यांनी मानले. अखिल भारतीय मराठा शिक्षण परिषदेच्या वतीने योग्य वेळी या कार्यशाळेचे आयोजन केल्यामुळे  एकंदर नॅक प्रक्रिया, ती राबविताना येणारे प्रश्न, त्यातील समस्या व उपाय या विषयावर महाविद्यालयातील प्राध्यापकांच्या शंकांचे निरसन पाटील यांनी केल्याने प्राध्यापकांनी समाधान व्यक्त केले.

श्री शक्तीदर्शन योगाश्रम, किन्नीगोळी आणि सुरभिवन गौशाळा यांच्या वतीने आयोजन ; ‘देशी’ – भारतीय गायींच्या लुप्त होत चाललेल्या जातीला वाचवण्याचा एक प्रयत्न
पुणे : समुद्र मंथनातून गोमाता कामधेनूची उत्पत्ती… पृथ्वीला सुजलाम सुफलाम बनविण्यासाठी भूमाताच गोमाता झाल्याची कथा… गाईची पूजा केल्यामुळे इंद्रदेवाने गोकुळात केलेला पावसाचा कहर… गोकुळवासियांना आणि गाईंना वाचवण्यासाठी श्रीकृष्णाने करंगळीवर उचललेला गोवर्धन पर्वत…  अशा विविध कथांच्या माध्यमातून ‘विश्वमाता गौमाता’ ही नृत्य नाटिका सादर झाली. भारतीय गायींचे महत्व आणि त्यांच्या लुप्त होत चाललेल्या जातीला वाचविण्याचा आणि संपूर्ण भारतभर गोमातेचे संरक्षण सुनिश्चित करण्याचा प्रयत्न या नाटिकेतून करण्यात आला.

श्री शक्तीदर्शन योगाश्रम, किन्नीगोळी आणि सुरभिवन गौशाळा – ओम प्रकृती धामा ट्रस्ट, कोंपंडावू यांच्या वतीने बालगंधर्व रंगमंदिरात ‘विश्वमाता गौमाता’ या नृत्य नाटिकेचे आयोजन करण्यात आले होते. यावेळी योगाभ्यासी आचार्य केदारनाथ, प.पू. गुरुजी देवदास राव (देवबाबा), कैलासनाथ नंदा, आदी मान्यवर उपस्थित होते. गोरक्षण व गोसंवर्धन चळवळीचे मूळ प्रवर्तक पूज्य गोजीवन श्री चौंडे महाराज प्रथम गोव्रती पुरस्कार श्री गोवर्धन महिला व बालविकास फाउंडेशन यांच्या तर्फे देवबाबा यांना देण्यात आला. 
आत्तापर्यंत भारतातील विविध भागांमध्ये ‘विश्वमाता गौमाता’ चे ५५  प्रयोग  झाले आहेत व हा ५६ वा प्रयोग आहे. तसेच एकूण १०८  प्रयोगांचा संकल्प करण्यात आला असून संपूर्ण भारत वर्षात त्याचे सादरीकरण करण्यात येणार आहे. यावेळी परीक्षित राजाने गोहिंसकांना, गोहत्या करणाऱ्यांना दिलेली शिक्षा… आपल्या वासराला सिंहापासून वाचवण्यासाठी गाईने केलेला आक्रोश याच्या सादरीकरणाने  उपस्थित रसिक वर्ग थक्क झाला.

आचार्य केदारनाथ म्हणाले, आपल्या भारतीय संस्कृतीत जो आपल्याला चांगल्या गोष्टी देतो, मदत करतो त्याला आपण देव मानतो. मग गौमातेपासून मिळणाऱ्या प्रत्येक गोष्टी महत्वाच्या आहेत. आपल्यासाठी ती देवताच आहे, म्हणून तिचे संरक्षण करणे ही आपली जबाबदारी आहे, असे ही त्यांनी सांगितले.

देवदास राव म्हणाले, आपल्या प्राचीन धर्मग्रंथांनी गोमातेच्या अंगभूत गुणांचा गौरव केला आहे आणि गायीला विश्व मातेचा दर्जा दिला आहे. गाईवर तिच्या उत्पादनावर संशोधन झाले तर अनेक औषधी कंपन्या बंद होतील. गाय ही फक्त दूध देण्याचे मशीन नाही तर तिच्यामध्ये अनेक रोगांचे निवारण करण्याची शक्ती आहे. आपण गाईसाठी फक्त दुःख करतो परंतु तिच्यासाठी काम करण्याची तयारी दाखवत नाही. गाईचे संरक्षण करण्यासाठी आपण पुढे आले पाहिजे, असेही त्यांनी सांगितले.

मंदिराचे २५० वे वर्ष ; फुलांची आकर्षक सजावट व धार्मिक कार्यक्रम
पुणे : सदाशिव पेठेतील श्री लक्ष्मी नरसिंह मंदिरात श्री नृसिंह जयंती निमित्ताने विविध धार्मिक कार्यक्रमांचे आयोजन करण्यात आले होते. सकाळी नृसिंह याग संपन्न झाला. तर,  सायंकाळी कीर्तनकार सदानंद बुवा ताम्हनकर यांचे नृसिंह जन्माचे कीर्तन झाले. मंदिराला आकर्षक पुष्पसजावट व विद्युतरोषणाई करण्यात आली.

मंदिराचे यंदा २५० वे वर्ष आहे. उत्सवाच्या निमित्ताने मुख्य पूजा दिलीप जोशी, अभिजित जोशी, अद्वैत जोशी आणि शेखर नांदे यांनी केली. उत्सवाच्या निमित्ताने दररोज मंदिरात विशेष पूजा होत होती आणि भजन, याग, कीर्तन, संगीत कार्यक्रमांचे आयोजन करण्यात आले होते. तसेच ५६ भोग प्रसाद नैवैद्य दाखवण्यात आला होता.

पुणे- शहरातील तीन बांधकाम व्यावसायिकाशी संबधित ४० ठिकाणांवर प्राप्ती कर विभागाने गुरुवारी एकाचवेळी छापे घातले आहे. प्राप्तीकर विभागाच्या अधिकाऱ्यांनी पुणे आणि पिंपरी-चिंचवड शहर परिसरात ही छापेमारी केल्याने खळबळ उडाली आहे.आयकर खात्याच्या पथकाने बांधकाम व्यावसायिकांचे कार्यालय आणि निवासस्थानी जाऊन कारवाई केलेली आहे. या कारवाईत काही कागदपत्रे आणि इलेक्ट्रॉनिक डाटा जप्त करण्यात आला आहे. पाषाण रस्त्यावरील सिंध सोसायटी आणि पिंपरी चिंचवड भागात संबधित कारवाई करण्यात आली.

या कारवाईत प्राप्तीकर विभागातील मुंबई, पुणे कार्यालयातील अधिकारी आणि कर्मचारी मिळून एकूण २५० जण सहभागी झाले. प्राप्तीकर विभागाच्या अधिकाऱ्यांनी वेगवेगळी तपास पथके तयार करुन ४० ठिकाणी एकाचवेळी छापे टाकले आहे.

औंध परिसरात सिंध सोसायटी ही उच्चभ्रू सोसायटी असून सदर ठिकाणी तीन बांधकाम व्यवसाय राहतात ते एकमेकांचे व्यावसायिक भागीदार असून आयकर विभागाच्या रडावर ते आलेले आहेत. आयकर विभागाने त्यांच्याशी संबंधित कार्यालय आणि निवासस्थानी आदी जागी बांधकाम व्यवसायातील आर्थिक व्यवहारात अनियमित असल्याचे सांगत कागदपत्रांची तपासणी सुरू केली आहे. इतक्या मोठ्या प्रमाणात एकाच वेळी छापेमारी का करण्यात आली याबाबतचा अधिकृत खुलासा आयकर विभागांनी केलेला नाही.

पुणे, ०४ मे २०२३: सह्याद्रि हॉस्पिटल्स च्या ट्रान्सप्लांट टीमने पुण्यातील पहिले स्वॅप यकृत प्रत्यारोपण यशस्वीरित्या पार पाडले. या शस्त्रक्रिया नुकत्याच सह्याद्रि  सुपरस्पेशालिटी हॉस्पिटल, डेक्कन जिमखाना येथे करण्यात आल्या. लिव्हर सिरोसिसने (खराब झालेल्या यकृताने ग्रस्त असलेली परिस्थिती) ग्रस्त असलेल्या दोन रुग्णांवर एकाच वेळी जीवरक्षक यकृत प्रत्यारोपण शस्त्रक्रिया करण्यात आली. सह्याद्रि  हॉस्पिटल्स येथील यकृत आणि बहु-अवयव प्रत्यारोपण विभागाचे प्रमुख डॉ बिपिन विभूते या स्वॅप यकृत प्रत्यारोपणाचे प्रमुख सर्जन होते.

प्रत्येक दाता प्राप्तकर्त्यांपैकी एकाच्या नात्यातला असला तरी त्यांचे यकृत परस्परांशी जुळणारे (कमपॅटीबल) नव्हते म्हणून डॉ. बिपिन विभूते यांनी द्वि-मार्गी प्रत्यारोपण करण्याचा निर्णय घेतला आणि त्याला दोन्ही कुटुंबांनी सहमती दर्शविली. या स्वॅपच्या हृदयस्पर्शी कथेमध्ये महाराष्ट्रातील बुलढाणा येथील शिक्षक अजित (नाव बदलले आहे) आणि अहमदनगर जिल्हयामधील व्यावसायिक अमर (नाव बदलले आहे)  यांचा समावेश आहे. या दोन्ही व्यक्तींचे विधिलिखित सारखेच होते. शस्त्रक्रियेदरम्यान अमर यांच्या पत्नी स्वरा (नाव बदलले आहे) यांनी त्यांचे यकृत अजित यांना दिले. तर अजित यांच्या पत्नी गीता (नाव बदलले आहे) यांनी त्यांचे यकृत अमर यांना दान केले.

२० तासांच्या या कठीण शस्त्रक्रियेने शहरातील पहिले यशस्वी टू-वे यकृत प्रत्यारोपण स्वॅप पार पडले आणि या क्षेत्रातला हा एक मैलाचा दगड ठरला.

सह्याद्रि हॉस्पिटल्स मधील यकृत आणि बहु-अवयव प्रत्यारोपण विभागाचे प्रमुख डॉ. बिपीन विभूते म्हणाले, “स्वॅप प्रत्यारोपण यापूर्वी मुंबई आणि दिल्लीसारख्या प्रमुख शहरांमध्ये झाले आहे, परंतु अलीकडेच झालेले हे प्रत्यारोपण पुण्यातले अशा प्रकारचे पहिलेच आहे. ज्या प्राप्तकर्त्यांचे नातेवाईक वैद्यकीयदृष्ट्या तंदुरुस्त आहेत पण रक्तगट किंवा यकृताचा आकार जुळत नसल्यामुळे ते त्यांचे यकृत दान करू शकत नाहीत अशा प्राप्तकर्त्यांसाठी या प्रकारची देवाणघेवाण जीवनरक्षक सिद्ध झाली आहे. एकाच वेळी दोन दाते आणि दोन प्राप्तकर्त्यांवर शस्त्रक्रिया करून दोन यकृते प्रत्यारोपण करण्यात आली. २५ सदस्यांचा समावेश असलेल्या वैद्यकीय पथकात ११ डॉक्टर आणि इतर कर्मचारी होते. चार ऑपरेटिंग रूममध्ये २० तासांहून अधिक काळ हे अत्यंत कठीण कार्य पूर्ण करण्यासाठी त्यांनी सहकार्य केले.”

अशा शस्त्रक्रियांपूर्वी रुग्णांचे समुपदेशन फार महत्त्वाची भूमिका बजावते यावर त्यांनी भर दिला. भूल देण्यापासून ते प्रत्यारोपण पूर्ण करण्यापर्यंत चारही शस्त्रक्रिया एकाच वेळी चार ऑपरेटिंग रूम मध्ये करणे हे सर्वात मोठे आव्हान होते.

नुकत्याच झालेल्या स्वॅप यकृत प्रत्यारोपणाच्या यशामुळे, सह्याद्रि हॉस्पिटल्स मधील डॉक्टरांना भविष्यात आणखी रुग्णांचे जीव वाचवता येतील असा विश्वास प्राप्त झाला आहे.

प्रत्यारोपण टीममध्ये हेपॅटोबिलरी आणि लिव्हर ट्रान्सप्लांट सर्जन – डॉ. बिपिन विभूते, डॉ. अनिरुद्ध भोसले, डॉ. अभिजीत माने, डॉ. विकास चौधरी, डॉ. शरण नरुटे, डॉ. अनुराग श्रीमल, ट्रान्सप्लांट भूलतज्ञ डॉ. मनीष पाठक, डॉ. मनोज राऊत, ट्रान्सप्लांट कॉर्डिनेटर राहुल तांबे, अरुण अशोकन आणि अमन बेले तसेच वैद्यकीय सामाजिक कार्यकर्ते शर्मिला पाध्ये आणि अजिंक्य बोराटे यांचा समावेश होता.