सांगली- मराठ्यांची ताकद आज राज्याला दिसतेय. चारही बाजूने मराठ्यांना घेरले जात आहे, आपल्याला हे षडयंत्र मोडून काढायचे, सावध राहा, गाफील राहू नका, 70 वर्षापासून मराठ्यांना वेढा पडलाय, हा वेढा तोडायचा आहे. आज समितीला पुरावे सापडले आहे. मराठा 50 टक्क्यांच्या आतमध्येच आहे. मराठा ओबीसी आरक्षणात आहे हे सिद्ध झाले आहे, असे मत मनोज जरांगे पाटील यांनी म्हटले आहे.

दरम्यान मनोज जरांगे पाटील म्हणाले की, ओबीसी प्रवर्गात सामाविष्ट व्हायचे असेल तर कुठल्याही जातीला निकष पूर्ण करावे लागतात. मराठा समाजाने हे सर्व निकष पूर्ण केलेत. विदर्भात मराठ्यांना कुणबी प्रमाणपत्र देऊन त्यांचा समावेश केला. व्यावसायावर आधारित जाती निर्माण झाल्या, त्यावर आरक्षण मिळाले असेल तर आमचाही व्यवसाय शेती आहे, असेही त्यांनी म्हटले आहे.

मनोज जरांगे पाटील म्हणाले की, आता इथून पुढच्या काळात आपल्या लेकरांचे वाटोळे होऊ द्यायचे नाही. आपल्या मुलांना सावली मिळण्यासाठी आज आपल्याला उन्हात बसावं लागेल. सांगलीत प्रचंड संख्येत जमलेल्या लोकांनी मराठ्यांची एकजूट दाखवली. एकजुटीशिवाय पर्याय नाही. महाराष्ट्रातील मराठा समाजाला माझे आवाहन आहे, की, आता एकजूट दाखवण्याची गरज आहे. बिगर कामाचे कळप एकत्र यायला लागलेत. आपली जात वाचवणे गरजेचे आहे. त्यासाठी आरक्षण असलेल्या आणि नसलेल्या मराठा बांधवांनी ताकदीने एकजूट दाखवा. मी मराठा समाजाला पाया पडून विनंती करतो. आपल्याला आव्हान पेलायचे आहे. स्वत:च्या लेकरांच्या हितासाठी लढायचे आहे. आपली जात उद्ध्वस्त होता कामा नये. पोरं संपली तर जात संपली, पोरांचे करिअर बर्बाद होऊ देऊ नका. आजपासून प्रत्येकाच्या खांद्यावर जबाबदारी आहे.

मनोज जरांगे पाटील म्हणाले की, तुमची जात ओबीसी आरक्षणात गेली, ती कुठल्या आधारे गेली हे सांगा. या राज्यात मराठ्यांची त्सुनामी आली आहे. एवढ्या ताकदीने समाज आज रस्त्यावर उतरला आहे. आरक्षण नसलेल्या भावाच्या मदतीला ज्या मराठ्यांना आरक्षण मिळाले आहे, त्यांनी मदतीला या. आपल्याला लढून वेढा तोडायचा आहे. माझ्या सांगण्याकडे मराठा समाजाने बारकाईने लक्ष द्या, आम्ही संपलो तर उद्या मराठ्यांना संपवायला मागेपुढे पाहणार नाही. मराठ्यांची लेकरं पुढे जाऊ नये असा चंग बांधला आहे. यांचे स्वप्न पूर्ण होऊ द्यायचे नाही. आमचे आरक्षण 70 वर्ष खाल्ले आहे. ज्या ज्या वेळी समिती झाल्या तेव्हा प्रत्येक समितीने पुरावे दिले. परंतु तरीही मराठ्यांना आरक्षण दिले नाही. मराठ्यांच्या ताकदीवर हे पुरावे आता समोर आलेत. मराठ्यांना आरक्षण मिळाले असते तर सर्वात प्रगल्भ जात मराठाच राहिली असती असेही त्यांनी म्हटले आहे.

मनोज जरांगे म्हणाले की, एकही राजकारणी आपल्याला मदत करणार नाही, कुणीही राजकीय नेता आपल्या मदतीला येणार नाही. तुम्ही त्यांना साहेब म्हणता, साहेबांना मोठे केले, त्याच्या वडिलांना मोठे केले. मात्र ते आपल्याला मदत करायला येणार नाही. प्रत्येक पक्षाला मराठ्यांनी मोठे केले. सगळ्यांनाच मोठे व्हायला मदत केली. त्या नेत्यांना आपण मोठे केले कारण आपल्या बापजाद्यांना वाटले होते की हा माणूस मोठा झाला की आपल्या लेकराबाळांना मदत करेल. मात्र एकही राजकीय नेता आपल्याला मदत करत नाही. त्यामुळे आपण त्याला मोठे केले कशाला? असाही प्रश्न मनोज जरांगे पाटील यांनी केला आहे.

मनोज जरांगे म्हणाले की, मराठा समाजाला 70 वर्षांपूर्वी आरक्षण दिले असते तर मराठा जात प्रगत झाली असती. मराठ्यांचे पुरावे असतानाही मराठ्यांना आरक्षण दिले नाही आणि पुरावे ही सापडू दिले नाहीत. आज तेच पुरावे बाहेर निघालेत फक्त मराठ्यांच्या ताकतीवर आणि एकजुटीवर हे पुरावे बाहेर आल्याचे त्यांनी सांगितले. मराठा समाजाला ओबीसी आरक्षण मिळण्यासाठी जरांगे पाटील यांनी आमरण उपोषणाचे हत्यार उपसले होते. त्यांच्या या आंदोलनाला राज्य सरकारने प्रतिसाद दिला. मराठ्यांना ओबीसी कोट्यातून आरक्षण देण्याविषयी न्यायमूर्तींची समिती गठित केली. ही समिती तिचे काम करत आहे.

अंबड-मराठा समाजाची वाताहत कुणी केली? तुमचा खरा शत्रू ओबीसी नाही. तुम्हीच तुमचा खरा शत्रू ओळखा, अशा शब्दात अंबड येथे शुक्रवारी झालेल्या ओबीसींच्या एल्गार परिषदेत भाजप नेते गोपीचंद पडळकर यांनी मराठा आरक्षणावरून राष्ट्रवादी काँग्रेसचे अध्यक्ष शरद पवार यांच्यावर टीका केली.

गोपीचंद पडळकर म्हणाले की, मराठा समाजातील गरिबांना आरक्षण मिळाले पाहिजे. आमचा मराठा आरक्षणाला विरोध नाही. पण त्यांना 346 जाती असणाऱ्या ओबीसी वर्गातील जातींना धक्का न लावता आरक्षण द्या. या प्रकरणी ओबीसी आरक्षणाला धक्का लावण्याचा प्रयत्न झाला तर अवघा महाराष्ट्र पेटून उठेल.ओबीसींची ही सभा पाहून आमच्याविरोधात काम करणाऱ्यांच्या काळजाचा थरकाप उडाला पाहिजे. देशात ओबीसी आरक्षणासाठी अनेक आंदोलने उभी राहिली, त्यानंतर ओबीसींना आरक्षण मिळाले. या आरक्षणात काटे आणण्याचे काम काही जण करत आहेत. त्यांना सरळ करण्याचे काम या ओबीसींमध्ये आहे. मराठा समाजाला आरक्षण मिळाले पाहिजे. पण ओबीसीमधील 346 जातींच्या आरक्षणाला हात लावता काम नये, असेही गोपीचंद पडळकर यावेळी म्हणाले.

मराठा समाजाला आरक्षण देण्यासाठी ओबीसीच्या आरक्षणाला नख लावण्याचा प्रयत्न झाला तर ओबीसी समाज प्रस्थापितांना उत्तर देईल. मराठा समाजाने या प्रकरणी आपली वाताहत कुणी केली हे ओळखावे. ओबीसी समाज मराठ्यांचा शत्रू नाही. 2014 मध्ये तत्कालीन मुख्यमंत्री देवेंद्र फडणवीस यांनी मराठा समाजाला जसे आरक्षण दिले, तसेच आरक्षण मराठा समाजाला आरक्षण देण्याची गरज आहे, असे गोपीचंद पडळकर म्हणाले.गोपीचंद पडळकर यांनी यावेळी मंत्री तथा ओबीसी नेते छगन भुजबळ यांचे तोंड भरून कौतुक केले. आजच्या दिवसाची महाराष्ट्राच्या इतिहासात नोंद होईल. गटातटात विभागालेले ओबीसीचे नेते आता एकत्र आलेत. ओबीसींना सहजपणे आरक्षण मिळाले नाही. त्यासाठी मोठा संघर्ष करावा लागला. पण आता काही जण आरक्षणासाठी त्याची वाटमारी करण्याचा प्रयत्न करत आहेत, असे ते म्हणाले.

आता ओबीसी समाज जागा झाला आहे. छगन भुजबळ ओबीसींचा ढाण्या वाघ आहे. वाघ म्हातारा झाला तरी तो डरकाळी फोडणे थांबवत नाही. म्हातारा झाला तरी तो गवत खात नाही. आम्ही सर्वजण छगन भुजबळ यांच्या पाठिशी आहेत, असेही ते यावेळी म्हणाले.गोपीचंद पडळकर म्हणाले, महात्मा फुले, सावित्री फुले यांचे रक्त आमच्या रक्तात सळसळत आहे. अन्यायाविरोधात बंड केले पाहीजे, हा महात्मा फुलेंचा मंत्र तंतोतत पाळण्याचे काम छगन भुजबळांनी केले आहे. पडळकर म्हणाले, गरीब मराठा समाजाला आरक्षण मिळाले पाहीजे, याला आमचा विरोध नाही. परंतू ३४६ जातींचा समावेश असलेल्या ओबीसींच्या आरक्षणाला धक्का लागला नाही पाहीजे, ही आमची भूमिका आहे. अजूनही ओबीसीमधील अनेक जातींना आरक्षणाचा लाभ मिळालेला नाही. अनेक जाती अशा आहेत ज्यामधील व्यक्तींना अजून सरपंच, ग्रामपंचायत सदस्य होता आलेले नाही. त्यामुळे ओबीसींच्या या आरक्षणाला धक्का लावला तर ओबीसी चवताळून उठल्याशिवाय राहणार नाही.पडळकर म्हणाले, ओबीसीत अजून कितीतरी जातसमूह अजून वंचित आहेत. त्यामुळे छगन भुजबळांनी जी भूमिका घेतली आहे, ती अतिशय योग्य आहे. महाराष्ट्रातील ५ कोटी धनगर समाज भुजबळांच्या सोबत आहे. मराठा समाजाची वाताहत कोणी केली? मराठा समाजाचा विरोधक कोण आहे? ओबीसी मराठ्यांचा शत्रू नाही. मराठा समाजातील नेतेच या समाजाचे शत्रू आहेत. ओबीसी फक्त स्वत:चे आरक्षण वाचवण्याचा प्रयत्न करत आहे. यासाठी महाराष्ट्रातील सर्व ओबीसींनी एकत्र येण्याची गरज आहे. .प्रस्थापितांना आपल्याला आता टक्कर द्यायची आहे. यासाठी ओबीसींची एक मोट बांधण्याची गरज आहे.

जालना-जालन्याच्या आंतरवाली सराटीत मराठा आंदोलकांवर लाठीचार्ज झाल्यानंतर मनोज जरांगे पाटील आपल्या घरात जाऊन झोपले होते. पण राष्ट्रवादी काँग्रेसचे आमदार राजेश टोपे व रोहित पवार यांनी त्यांना उठवून उपोषण स्थळी नेऊन बसवले, असा मोठा आरोप मंत्री छगन भुजबळ यांनी शुक्रवारी केला.

जालना जिल्ह्यातील अंबड येथे शुक्रवारी ओबीसींचा महामेळावा झाला. राज्याचे अन्न व नागरी पुरवठा मंत्री छगन भुजबळ यांनी या मेळाव्यात मनोज जरांगे पाटील यांच्यावर जोरदार हल्ला चढवला. यावेळी त्यांनी लाठीचार्जनंतर पडद्यामागे घडलेला घटनाक्रमही सांगितला.छगन भुजबळ यांनी सांगितले की, आंतरवाली सराटीत पोलिसांनी केलेला लाठीचार्ज सर्वांनी पाहिला. त्यात महिला पोलिसांसह जवळपास 70 पोलिस कर्मचारी जखमी झाले. हे पोलिस पाय घसरून पडले का? पोलिस तिथे मनोज जरांगे पाटील यांच्याशी चर्चा करण्यासाठी गेले होते. पण त्यांनी त्यांना थोड्या वेळाने येण्यास सांगितले. त्यानंतर पोलिस उपोषणस्थळी गेले असता त्यांच्यावर दगडांचा मारा करण्यात आला. त्यात अनेकजण जखमी झाले, असे छगन भुजबळ म्हणाले.

लाठीचार्ज झाल्यानंतर हे शूर सरदार (मनोज जरांगे) पळून जावून आपल्या घरात जाऊन झोपले. त्यांना राजेश टोपे व रोहित पवार यांनी मध्यरात्री 3 वाजता जाऊन त्यांना उठवले. त्यांना शरद पवार साहेब येणार असल्याचे सांगितले. तसेच उपोषणस्थळी जाऊन बसण्याची सूचना केली. त्यानंतर पवारांनी त्यांची भेट घेतली. पण जरांगेंनी पवारांना लाठीचार्ज का झाले हे सांगितले नाही, असे छगन भुजबळ यांनी स्पष्ट केले.पवार साहेबांना आम्ही आजसुद्धा उत्तम प्रशासक मानतो. त्यांना वस्तुस्थिती समजली असती तर एक वेगळा प्रकार झाला नसता. मराठा तरुणांना असणारी सहानुभूती गेली नसती. लाठीचार्जनंतर घडलेल्या घटनांत सर्वांचीच चूक होती. पोलिस अधीक्षकही चूकले. गृहमंत्री देवेंद्र फडणवीस यांनी पोलिसांना मारहाण झाल्याचे सांगण्याची गरज होती. त्यांनी माफी मागितली. यामुळे देशापुढे खरे चित्र आलेच नाही. आम्ही बोललो तर आमच्यावर तुफान टीका झाली, असे छगन भुजबळ म्हणाले.बीडमध्ये कोड नंबर देऊन राजकीय नेत्यांची घरे व कार्यालये जाळण्यात आल्याचा दावाही भुजबळ यांनी यावेळी केला. प्रकाश सोळंके यांचे घर जाळले. एक केवळ एक वाक्य बोलले होते. त्या ठिकाणी कोयते, चॉपर, पेट्रोल बॉम्ब सापडले. या हल्ल्यासाठी कोड नंबर देण्यात आले होते. 1 नंबर प्रकाश सोळंके, 10 नंबर सुभाष राऊत यांचं हॉटेल, 21 नंबर जयदत्तर क्षीरसागर, 25 नंबर अमरसिंह पंडीत असे कोंड नंबर ठरले होते, असे ते म्हणाले.

 जालना-अंबड इथं ओबीसी आरक्षण बचाव एल्गार सभेत बोलताना भुजबळांनी मनोज जरांगे यांच्यावर निशाणा साधला. तसेच राजकीय नेत्यांना, मंत्र्यांना गावबंदी केली त्यावर भुजबळांवर भूमिका मांडली. असं करताना महाराष्ट्र तुमच्या सातबाऱ्यावर लिहून दिला आहे का? असा सवालही त्यांनी केला.भुजबळ म्हणाले, “काय चाललंय या पोलिसांचं आमदारांना गावबंदी, मंत्र्यांना गावबंदी! काय महाराष्ट्र तुमच्या सातबाऱ्यावर लिहून दिलाय काय रे? तुम्ही मेसेज करता आमचा बोर्ड फाडला मग तुमचे हात कुठे गेले? जशास तसं उत्तर द्यावं लागेल. मी सांगितलं ‘करेंगे या मरेंगे’ हा तुमचा पाहुणा म्हणतो हा हिंसाचार आहे. पण हे तर महात्मा गांधींचं वाक्य आहे. पण जरांगे तर म्हणतात की, ‘लढेंगे और जितेंगे…’वारे वारे वा”माझं पोलिसांना आवाहन आहे की, हे गावागावात लावलेले गावबंदीचे फलक ताबडतोब हटवले पाहिजेत. हे लोकशाहीचं राज्य आहे. मुख्यमंत्री, उपमुख्यमंत्र्यांना माझं सांगण आहे. आज आमदार, राजकीय नेते गावात यायचं नाही हे दोनचार मुलं काहीतरी लावतात आणि धांदल करतात. हे असं यापुढं चालणार नाही.सरकार आहे की नाही? कायदा आहे की नाही? तुम्ही जर असा पक्षपातीपणा कराल तर ओबीसी देखील गप्प बसणार नाही. ओबीसींच्या जोडीला दलित-मुस्लीम-आदिवासी सर्व एकवटल्याशिवाय राहणार नाही. पण ही दादागिरी बंद करु, असंही यावेळी भुजबळ म्हणाले.

अरे काय चाललंय? मला तर रोज धमक्या, शिवीगाळ, उपमुख्यमंत्री देवेंद्र फडणवीसांना शिवीगाळ होतेय. पोलिसांना तक्रार केलं तरी काही होत नाही. बस येऊन जाऊन येवल्यात कसा निवडून येतो ते बघतो असं म्हणतात. काय बघतोस तू? काय चार पोरं निघतात आणि याचा राजीनामा घ्या त्याचा राजीनामा घ्या म्हणतात.

काहीजण मला म्हणतात भडकाऊ भाषण नका करु? पण मी कधी भडकाऊ भाषण केलं. मी राष्ट्रवादी काँग्रेसमध्ये ३० वर्षे मराठ्यांसोबत राहिलो कधी त्यांचा द्वेष केला. पण त्यांनी केलेलं चालतं का?, अशा शब्दांत छगन भुजबळांनी भूमिका मांडली.