पुणे -शहरातील रूफ टॉप हॉटेल विरोधात महानगरपालिका आक्रमक झाली असून महापालिकेच्या तक्रारीनंतर जिल्हाधिकारी कार्यालयाने शहरातील 26 बेकायदा ‘रूफ टॉप हॉटेल’ना नोटीस बजावली. या नोटिसला हॉटेल चालकांनी उत्तर दिल्यानंतर पुढील कारवाईचा निर्णय घेतला जाईल, असे महापालिका आयुक्त विक्रमकुमार यांनी सांगितले.शहरात सुमारे शंभर ‘रूफ टॉप हॉटेल’ आहेत. शहरात ‘रूफ टॉप हॉटेल’ ही संकल्पना एकत्रित बांधकाम नियमन आणि विकास नियमावलीत नाही. त्यामुळे ही सर्व हॉटेल बेकायदा असल्याचे महापालिकेचे म्हणणे आहे. अशा ‘रूफ टॉप हॉटेल’मध्ये आगीच्या घटना घडल्या होत्या. अशा दुर्घटनांची पुनरावृत्ती झाल्यास जीवितहानीचीही भीती आहे. त्यामुळे महापालिकेतर्फे या हॉटेलवर कारवाई केली जाते. या कारवाईत हॉटेलचा बराच भाग उतरवला जातो.
कारवाईनंतर काही दिवसांतच ही हॉटेल पुन्हा सुरू होतात. या हॉटेलना जिल्हा प्रशासनाच्या उत्पादन शुल्क विभागातर्फे मद्य परवाना दिला जातो. त्यामुळे या हॉटेलचा परवानाच रद्द करावा, अशी शिफारस महापालिकेने जिल्हाधिकारी कार्यालयाला केली होती; तसेच यापुढे हॉटेल व बारना परवाने देण्यापूर्वी महापालिकेचे ‘ना हरकत पत्र’ घ्यावे, अशी शिफारसही जिल्हाधिकाऱ्यांकडे करण्यात आली होती.
‘रूफ टॉप हॉटेल’सह, साइड आणि फ्रंट मार्जिनमध्ये उभ्या राहिलेल्या अनधिकृत बांधकामांवर कारवाई करा, पंधरा दिवसात त्याचा अहवाल सादर करा,’ असा आदेश आयुक्तांनी बांधकाम विभागाच्या सर्व कनिष्ठ अभियंत्यांना दिला होता. त्यानुसार बांधकाम विभागाने कार्यवाही सुरू केली आहे.
त्यात शहरातील सुरक्षिततेच्या दृष्टिकोनातून ‘रूफटॉप हॉटेल’ बंद करावीत, अशी सूचना पोलिसांनी केली आहे. या सर्व पार्श्वभूमीवर जिल्हाधिकाऱ्यांनी समिती नेमली आहे. ‘पालिकेच्या विनंतीनुसार मद्य परवाने देण्यात पालिकेच्या एका अधिकाऱ्यांचा समावेश केला आहे; तसेच जिल्हाधिकाऱ्यांनी 26 रूफ टॉप हॉटेल्सना नोटीस बजावली आहे,’ असे आयुक्त विक्रम कुमार यांनी स्पष्ट केले
