पं. रोहिणी भाटे यांच्या जन्मशताब्दीनिमित्त रंगला हृद्य सोहळा

पुणे ता.१७: एकूणच शास्त्रीय नृत्यकलेस समाज मान्यता नसताना ज्यांनी आपल्या परिश्रमातून, दूरदृष्टीतून कथक क्षेत्रास मर्यादेतून मुक्त केले असे बहुआयामी, व्यासंगी व्यक्तीमत्व म्हणजे बेबीताई अर्थात रोहिणीताई. 
त्यांच्या स्मृतीप्रित्यर्थ नृत्यभारती कथक डान्स अकॅडमीतर्फे ‘रोहिणीद्युति’ हा कार्यक्रम घेण्यात आला. भाटे यांच्या ज्येष्ठ शिष्या व संस्थेच्या संचालिका नीलिमा अध्ये यांच्या संकल्पनेतून रंगलेला हा दोनदिवसीय सोहळा रसिकांच्या पसंतीस उतरला. यावेळी ‘रोहिणीद्युति ‘ या नृत्यमैफलीतून आणि ‘सुहृदयसभा ‘ या वैचारिक मंथनातून समग्र रोहिणीताई रसिकांना उलगडल्या. 
‘रोहिणीद्युति ‘ या मैफिलीची सुरुवात शिवस्तुतीने झाली. त्यानंतर कथक परंपरेनुसार तीन तालातील परण, आमद, परणामद, कालीपरण, यतीपरण, तुकडे, विलांबित लय, गत सादर करत कुशल नृत्यकलेचे दर्शन घडविले. रोहिणी ताईंकडून आत्मसात केलेल्या परंपरेची दृश्य झलक अध्ये यांच्या ‘घट घट मे पंछी बोलता..’ या एकल सादरीकरणातून पहावयास मिळाली. यांस रसिकांनी विशेष दाद दिली. नायिकेच्या नयनांचे काव्यात्मक वर्णन करणाऱ्या दोह्यास तसेच पर्जन्य सुक्त रचनेस देखील उपस्थितांची वाहवा लाभली. गणेश स्तुतीने मैफलीची सांगता झाली. अजय पराड (संवादिनी), माधुरी जोशी (गायन), कार्तिकस्वामी दहिफळे (तबला), आकाश तुपे (पखवाज), अर्पिता वैशांपायन (गायन), सुनील अवचट (बासरी), ऋजुता सोमण (पढंत) यांनी त्यांना समर्पक साथ दिली. यावेळी चेतना ज्योतिषी, सुषमिता घोष, डॉ. मोहन आगाशे यांच्या हस्ते उद्गारने प्रकाशित केलेल्या ‘कथक दर्पण दीपिका’ या अनुवादित पुस्तकाचे प्रकाशन करण्यात आले.
यावेळी ज्योतिषी, घोष यांनी पं. भाटे यांच्या स्मृतीस उजाळा दिला. ‘बेबीताई साक्षात सरस्वती पुत्री होत्या. कलाकार म्हणून त्या प्रतिभावंत होत्याच परंतु अभिनय, गायन, साहित्य अशा कलाविष्कारांची देखील त्यांना सूक्ष्म जाण होती. ती प्रगल्भता त्यांच्या नृत्य आविष्कारातून रंगमंचावर उमटायची.’ अशा शब्दांत त्यांनी आपल्या भावना व्यक्त केल्या. यावेळी डॉ. आगाशे यांनी देखील मनोगत व्यक्त केले. संस्थेच्या निपुण नृत्यांगनांनी केलेले निपुण सादरीकरण, ७५ वर्षे इतका मोठा काळ लोटूनही संस्थेच्या चार पिढ्यातील गुरू शिष्यांनी जपलेली परंपरा याबाबत त्यांनी विशेष कौतुक केले. 
कार्यक्रमाच्या दुसऱ्या दिवशी ‘सुहृदयसभा’ यातून वैचारिक मंथन झाले. चंद्रमोहन कुलकर्णी (चित्रकला), सुषमा देशपांडे (नाट्य), सदानंद मेनन (छायाचित्रण), चैतन्य कुंटे (गायन), रोशन दाते (संस्कृती), शैलेश कुलकर्णी (साहित्य), सुहास किर्लोस्कर(चित्रपट), हेमंत महाजन (वास्तू विशारद) अशा विविध क्षेत्रातील मान्यवरांचे मार्गदर्शनपर विचार ऐकण्याची संधी नवोदित कलाकारांना यातून लाभली. ‘ नृत्य ही एकमेव कला आहे, ज्यामध्ये शिल्प, चित्र, नाट्य, साहित्य आणि गायन या ललितकला वेगवेगळ्या स्तरांवर वेगवेगळी तत्त्वे घेऊन प्रत्यक्ष आणि अप्रत्यक्षपणे नृत्यकलेतून प्रतिबिंबित होतात. त्यामुळे नृत्य म्हणजे सादरीकरण असा समज झाल्यास ती संकोचित मानसिकता ठरेल. नृत्याची अभिव्यक्ती समृद्ध तेव्हाच ठरेल, जेव्हा नृत्यासह इतर ललितकलांची देखील सूक्ष्म ज्ञान संपादित करण्याची क्षमता कलाकारांमध्ये दिसेल. असा सूर या सभेतून उमटला. ‘बेबीताईंनी सर्वज्ञ हे तत्व आत्मसात केल्यानेच त्या कलाकार म्हणून महान ठरल्या.आजच्या काळात ही तळमळ अभावानेच दिसते, अशी खंतही मान्यवरांनी यावेळी व्यक्त केली.
नीलिमा अध्ये यांनी या कार्यक्रमाचे निवेदन तर अशोक वाजपेयी यांनी सांगतापर मनोगत व्यक्त केले. शास्त्रीय मैफल आणि वैचारिक मंथन यांचा सुंदर मिलाफ ‘रोहिणीद्युति’ या कार्यक्रमातून रसिकप्रेमींनी अनुभवला.…………………………चौकट
शिष्यांकडून मानवंदना..मैफिलीतील सादरीकरणाने रसिकांना अक्षरश: खिळवून ठेवले असतानाच कार्यक्रमाच्या सांगतेची वेळ आली. यावेळी एकीकडे सादरीकरण सुरू असतानाच एक पेटती द्युती रंगमंचाच्या मधोमध ठेवण्यात आली. ‘या देवी सर्व शिष्येषु नृत्यरुपेण संस्थिता। या देवी रोहिणी तस्यै नमस्तस्यै नमो नमः॥’ म्हणत रोहिणी ताईंच्या फोटोसमोर सर्व शिष्या नतमस्तक झाल्या. जाणिजे यज्ञ कर्म ..हे ब्रीद ठेवून संस्थेचा वारसा पुढे नेणे ही मोठी जबाबदारी आमच्यावर असल्याचा संदेश कृतीतून दिला. हे पाहून उपस्थित भारावले. 

नागरिकांना उपक्रमात सहभागी होण्याचे आवाहन

पुणे दि.१३: स्वातंत्र्याच्या अमृतमहोत्सवी वर्षाच्या सांगता सोहळ्याच्या निमित्ताने १३ ते १५ ऑगस्ट या कालावधीत आयोजित करण्यात येणाऱ्या ‘हर घर तिरंगा’ (घरोघरी तिरंगा) उपक्रमांतर्गत जिल्ह्यातील नागरिकांनी आपल्या घरी राष्ट्रध्वज उभारुन मानवंदना द्यावी, असे आवाहन पालकमंत्री चंद्रकांतदादा पाटील यांनी केले. पालकमंत्री श्री.पाटील यांनी स्वतः उपक्रमाचा शुभारंभ कोथरुडमधील आपल्या निवासस्थानी राष्ट्रध्वज उभारुन केला आणि राष्ट्रध्वजाला मानवंदना दिली.

स्वातंत्र्याच्या अमृतमहोत्सवाची सांगता ‘माझी माती माझा देश’ या उपक्रमाने होत असून त्याचाच एक भाग म्हणून १३ ते १५ ऑगस्ट या कालावधीत ‘घरोघरी तिरंगा’ उपक्रम गतवर्षीप्रमाणे राबविण्यात येत आहे. गतवर्षी या उपक्रमात जिल्ह्यातील नागरिक उत्स्फूर्तपणे सहभागी झाले होते. प्रत्येक देशवासीयांनी आपल्या घरी राष्ट्रध्वज उभारुन आपला देशाभिमान व्यक्त करण्यासह स्वातंत्र्य लढ्यात योगदान देणाऱ्या सर्व स्वातंत्र्यवीरांचे स्मरण करावे, असे आवाहन केंद्र सरकारच्यावतीने करण्यात आले आहे.

९ ऑगस्ट रोजी ‘माझी माती माझा देश’ अंतर्गत संपूर्ण देशात स्वातंत्र्य लढ्यातील योद्ध्यांना स्मरण करून पंचप्रण शपथ घेण्यात आली. गावपातळीवर यानिमित्ताने विविध उपक्रमांचे आयोजन करण्यात येत आहे. जिल्ह्याचा पालकमंत्री म्हणून यात सहभागी होताना पालकमंत्री श्री. पाटील यांनी आज आपल्या कोथरुडमधील निवासस्थानी राष्ट्रध्वज उभारुन मानवंदना दिली.

स्वातंत्र्याचा अमृतमहोत्सव हा प्रत्येक भारतीयांसाठी आनंदाचा आणि अभिमानाचा क्षण आहे. हजारो स्वातंत्र्य योद्ध्यांच्या बलिदानामुळे आपल्याला स्वातंत्र्य प्राप्त झाले आहे. त्यामुळे या अमृतमहोत्सवी वर्षात सर्व स्वातंत्र्यवीरांचे स्मरण केले जात आहे. त्यासाठी देशभरात विविध कार्यक्रमांचे आयोजन केले जात आहे. प्रत्येकांनी यात सहभागी व्हावे, आणि आपला हा उत्सव आनंदाने उत्साहाने साजरा करावा. तसेच स्वातंत्र्यासाठी बलिदान देणाऱ्या योद्ध्यांचे स्मरण करावे. राष्ट्रध्वज फडकवताना त्याचा सन्मान राखला जाईल याची दक्षता घ्यावी, असे आवाहन त्यांनी यावेळी केले.
0000

पुणे :
महाराष्ट्र गांधी स्मारक निधी आणि युवक क्रांती दलातर्फे पुण्यात   एकदिवसीय ‘ गांधी  दर्शन   शिबिराला रविवारी चांगला प्रतिसाद मिळाला.  रविवार, दि. १३ ऑगस्ट  २०२३ रोजी सकाळी १० ते ६ या वेळात हे शिबीर  गांधी भवन, कोथरूड, पुणे येथे पार पडले. ‘ गांधी  दर्शन   शिबिर ‘ मालिकेतील हे पाचवे शिबीर होते.
गांधी अभ्यास केंद्र(कोल्हापूर)च्या माजी समन्वयक डॉ.भारती पाटील यांनी ‘समग्र गांधी दर्शन’ या विषयावर ,ज्येष्ठ पत्रकार निरंजन टकले यांनी  ‘गांधी सावरकर तुलना’ या विषयावर  मार्गदर्शन केले. महाराष्ट्र गांधी स्मारक निधीचे अध्यक्ष  आणि युवक क्रांती दलाचे  संस्थापक डॉ. कुमार सप्तर्षी यांनी ‘सत्याग्रह शास्त्र’ विषयावर मार्गदर्शन केले.

डॉ. भारती पाटील म्हणाल्या, ‘पाश्चात्य विचारांकडे पाहिले की सर्वोदय, सत्याग्रह ही जगाला मिळालेली देणगी आहे, असे लक्षात येते.तळातल्या माणसाचा विचार करणारा विचार हा गांधीजींचा विचार आहे. हाच विचार घेऊन भारताला पुढे जावे लागेलगांधीजींनी एकाच आयुष्यात अनेक विस्मयकारक कामे केली. लेखन, संपादन, आंदोलन, स्वच्छताग्रह, समतेचा आग्रह अशा अनेक अलौकिक कामांना त्यांनी स्पर्श केला.

‘गांधीजी हे जातीव्यवस्था मोडून काढणारे दार्शनिक होते.समतेचा आग्रह त्यांनी धरला.हे भेद नष्ट करण्यासाठी गांधीजींनी काम केल्याने ते सनातन्यांना नकोसे झाले. गांधीजींचा प्रवास हा समताधिष्ठीत समाजासाठीचा प्रवास आहे. वर्चस्ववाद त्यांना नष्ट करायचा होता. त्यामुळे हयातीत त्यांना गोळया झेलाव्या लागल्या, आणि मरणानंतरही अनेक दशकांनी त्यांना गोळया झेलाव्या लागत आहेत.गांधीजींची पर्यावरणाला, परिसृष्टीवादाला जी देणगी आहे, ती अतुलनीय आहे. दुर्देवाने आपण सर्वानी भांडवलशाहीचा मार्ग स्वीकारला आहे.व्यक्तिगत स्वार्थाचा मार्ग आपण स्वीकारल्याने गांधीजींच्या व्यापक लोकशाहीचा आपणच पराभव केला’, असेही त्यांनी सांगीतले’

डॉ. कुमार सप्तर्षी म्हणाले, ‘ पूर्वी धर्मग्रंथाचे विवरण हाच विद्वत्ता दाखवण्याचा आधार होता. महात्मा गांधींनी स्वतः आचरणातून जीवनशैली निर्माण केली. शिवाय प्रत्येकाला तो विचार तपासून घेण्याची, विचारस्वातंत्र्याची मुभा दिली. गांधीजी कट्टरपंथीय नव्हते.विचारधारा तत्कालिन प्रश्नांना मार्गदर्शन करते. पण, विचार दर्शन हे सार्वकालिक, शाश्वत असते. गांधी विचारदर्शन हे असेच शाश्वत, सार्वकालिक आहे.’
ज्ञानेश्वर मोळक, डॉ. प्रवीण सप्तर्षी, संदीप बर्वे, जांबुवंत मनोहर, नीलम पंडित, सुदर्शन चखाले आदी मान्यवर उपस्थित होते.

पुणे-आज रविवार दिनांक 13 रोजी पुणे शहर काँग्रेस भवन येथे प्रियदर्शनी गौरी गणपती साहित्य जत्रेच्या बचत गटांची बैठक झाली या बैठकी मध्ये बचत गटांच्या उत्पादनाची पाहणी करण्यात आली. सर्व महिला आपल्या आपल्या बचत गटांमार्फत जे जे उत्पादन करतात त्याचे सॅम्पल्स घेऊन मिटींगला आल्या होत्या. यावेळीकाँग्रेस पक्षाचे पुणे शहरअध्यक्ष अरविंद शिंदे हे स्वतः उपस्थित राहून त्यांनी बचत गटांना मार्गदर्शन केले.
यावेळी प्रियदर्शनी वुमन्स फोरम च्या अध्यक्ष श्रीमती संगीता तिवारी, सुवर्णा माने, शिल्पा वैष्णवी रेड्डी ,सुंदर ओव्हाळ,राहुल राज, दिगांता ओव्हाळ, गौरी काळे, वर्षा गांधी, आणि बचत गटा च्या महिला उपस्थित होत्या .

पुणे-संरक्षण राज्य मंत्री अजय भट्ट यांनी आज संरक्षण क्षेत्रातील नवरत्न कंपनी  भारत इलेक्ट्रॉनिक्स लिमिटेडच्या पुणे स्थित कारखान्याला  भेट दिली आणि लेझर सिस्टम, इलेक्ट्रॉनिक फ्यूज आणि अॅम्युनिशन, एनर्जी स्टोरेज उत्पादने आणि लढाऊ प्रणाली या क्षेत्रातील कारखान्याचे सामर्थ्य  जाणून घेतले.

यावेळी राज्यमंत्र्यांसमोर बीईएलच्या संरक्षण आणि  बिगर -संरक्षण या दोन्ही क्षेत्रातील उत्पादने आणि क्षमतांच्या विस्तृत श्रेणीबाबत सादरीकरण झाले. अजय भट्ट यांनी संपूर्ण कारखान्याची पाहणी केली . यावेळी त्यांना आर्टिलरी गन, लेझर उत्पादने (डायरेक्टेड एनर्जी वेपन सिस्टीम, लेझर टार्गेट डिझायनेटर्स आणि रेंज फाइंडर्स, फायबर ऑप्टिक गायरो बेस्ड सेन्सर्स), लिथियम बॅटरी निर्मिती आणि केमिकल, बायोलॉजिकल, रेडिओलॉजिकल आणि न्यूक्लियर (सीबीआरएन) सिस्टम्स (ट्रॅक आणि व्हील्ड) च्या निर्मितीशी संबंधित अत्याधुनिक सुविधा दाखवण्यात आल्या.

संरक्षण राज्यमंत्र्यांच्या भेटीदरम्यान बीईएलचे मुख्य व्यवस्थापकीय संचालक भानु प्रकाश श्रीवास्तव आणि  मुख्य व्यवस्थापक  (बीईएल-पुणे) जी एस एन मूर्ती उपस्थित होते.

पुणे-संरक्षण राज्य मंत्री अजय भट्ट यांनी काल दक्षिण कमांडच्या पुणे येथील मुख्यालयाला भेट दिली.

दक्षिण कमांडच्या मुख्यालयात लेफ्टनंट जनरल ए के सिंग, एव्हीएसएम, वायएसएम, एसएम, व्हीएसएम, आर्मी कमांडर, दक्षिण कमांड यांनी संरक्षण राज्य मंत्र्यांचे स्वागत केले. या वेळी संरक्षण राज्य मंत्री अजय भट्ट यांना आत्मनिर्भर भारत अभियानात योगदान  देण्यासाठी  तसेच विविध संस्थांमधील समन्वय आणि तिन्ही सेवादलांमधील एकात्मता वाढविण्यासाठी कमांडने त्याच्या कार्य क्षेत्रात केलेल्या विविध परिचालन, प्रशिक्षण आणि प्रशासन उपक्रमांबद्दल आणि उचललेल्या पावलांबद्दल माहिती देण्यात आली. यासोबतच, राष्ट्र उभारणीसाठी भारतीय लष्कर आणि दक्षिण कमांडचे विशेष योगदान देखील अधोरेखित करण्यात आले. यामध्ये नागरी – लष्करी फ्युजन , विद्यांजली योजनेअंतर्गत शाळा दत्तक घेणे आणि नागरीकांसाठी अमृत सरोवरांची निर्मिती  यावर चर्चा करण्यात आली.

संरक्षण राज्य मंत्री अजय भट्ट यांनी दक्षिण कमांडमधील लष्करी अभियांत्रिकी   सेवेने  बांधलेल्या 2.5 कोटी रुपयांहून जास्त किमतीच्या विविध पायाभूत सुविधा प्रकल्पांचे दूरदृश्य प्रणालीमार्फत उद्घाटन केले. या प्रकल्पांमध्ये लष्करी रुग्णालय, जलतरण तलाव, एक सभागृह, दोन सौर ऊर्जा संयंत्रे आणि एक दारुगोळा साठवण सुविधा यांचा समावेश आहे. या सुविधा कमांडच्या सात वेगवेगळ्या ठिकाणी उभारण्यात आल्या आहेत.

संरक्षण राज्य मंत्र्यांनी कमांडच्या विविध तुकड्यांशी संवाद साधला आणि राष्ट्राचे सार्वभौमत्व सुनिश्चित करण्यासाठी त्यांच्या व्यावसायिक दृष्टिकोन तसेच उच्च दर्जाच्या कार्यान्वयन तत्परतेबद्दल सर्व श्रेणींचे कौतुक केले. आपल्या  क्षेत्रात विविध मानवतावादी सहाय्य आणि आपत्ती निवारण (HADR) मोहिमांमध्ये उत्कृष्ट योगदान दिल्याबद्दल त्यांनी कमांडचे अभिनंदन केले. सरकारच्या आत्मनिर्भर भारत उपक्रमाला पुढे नेण्यासाठी नागरी संरक्षण उद्योग तसेच संशोधन आणि विकास संस्थांशी संलग्न राहाण्यासाठी सदर्न कमांड करत असलेल्या प्रयत्नांचेही त्यांनी कौतुक केले.

लोकशाहीच्या रक्षणासाठी बंधुतेची मशाल हाती घ्यावी : डॉ. सबनीसबंधुता परिषदेतर्फे दहाव्या विद्यार्थी व शिक्षक साहित्य संमेलनात रोहित पवार, प्रा. प्रदीप कदम यांना पुरस्कार प्रदान
पुणे : धर्मांध आणि सत्यांध असलेले सत्ताधारी वैचारिक दिवाळखोरी, महापुरुषांची बदनामी, नामांतर आणि धर्मांतर यासंबंधी उलटसुलट चर्चा करण्यात मश्गुल आहेत. अखंड भारतासाठी हे हिताचे नाही. अशावेळी बंधुतेची मशाल घेऊन लोकशाहीच्या रक्षणासाठी सर्वसामान्य नागरिकांनी उभे ठाकले पाहीजे, असे आवाहन ज्येष्ठ साहित्यिक, माजी संमेलनाध्यक्ष डॉ. श्रीपाल सबनीस यांनी केले.

क्रांतीदिनाचे औचित्य साधून राष्ट्रीय बंधुता साहित्य परिषद पुणे आणि रयत शिक्षण संस्थेचे दादा पाटील महाविद्यालय या संस्थाच्या वतीने कर्जत येथील शारदाबाई पवार सभागृहात आयोजिलेल्या दहाव्या शिक्षक आणि विद्यार्थी साहित्य संमेलनाच्या समारोपावेळी ते बोलत होते. डॉ. सबनीस यांच्या हस्ते आमदार रोहीत पवार यांना ‘राष्ट्रीय बंधुता पुरस्कार’ व प्रसिद्ध शिवव्याख्याते प्रा. प्रदीप कदम यांना ‘डॉ. बाबासाहेब आंबेडकर प्रज्ञावंत पुरस्कार’ प्रदान करण्यात आला. प्रसंगी संमेलनाध्यक्ष डॉ. संजय नगरकर, बंधुताचार्य प्रकाश रोकडे, स्वागताध्यक्ष राजेंद्र फाळके आदी मान्यवर उपस्थित होते.

तत्पूर्वी, ‘आम्ही भारतीय’ अस्मिता दर्शन यात्रेने संमेलनाची सुरुवात झाली. दोन हजार विद्यार्थी, शिक्षक आणि साहित्यिकांनी त्यात सहभाग घेतला. यात्रेच्या प्रारंभी सर्वांनी राष्ट्रीय एकात्मतेची शपथ घेतली. ज्येष्ठ साहित्यिक प्रा. शंकर आथरे यांच्या हस्ते संमेलनाचे उद्घाटन झाले.

प्रा. शंकर आथरे म्हणाले, “कारखान्यांमध्ये वस्तूंचे उत्पादन व्हावे, तसे आजच्या शिक्षण व्यवस्थेने प्राध्यापक, डॉक्टर, वकील, इंजिनिअर, विविध क्षेत्रातील अधिकारी यांचे उत्पादन केले. पण माणूसपण हरवले. त्यामुळे अडचणीच्या काळात एकमेकांच्या मदतीसाठी सक्षमपणे उभा राहणारा समाज निर्माण झाला नाही ही शोकांतिका आहे. त्यासाठी अशी संमेलने उपयुक्त ठरतात.” अशा संमेलनामुळे विद्यार्थ्यांमध्ये राष्ट्रीय एकात्मतेची भावना वाढीस लागेल. त्यांचा व्यक्तिमत्व विकास होण्यास चालना मिळेल. वाचन संस्कृती वृद्धिंगत होईल, अशी भावना संमेलनाध्यक्ष डॉ. संजय नगरकर यांनी व्यक्त केली.

यावेळी आमदार रोहित पवार, प्रा. प्रदीप कदम, बंधुताचार्य प्रकाश रोकडे, प्रा. चंद्रकांत वानखेडे, प्रकाश पाटील यांनीही मनोगत व्यक्त केले. या संमेलनात बंधुता काव्यप्रतिभा पुरस्कार, गुणवंत विद्यार्थी आणि शिक्षक पुरस्कार वितरित करण्यात आले. राजेंद्र फाळके यांनी स्वागत केले. संगीता झिंजुरके यांनी सूत्रसंचालन केले. प्रा. सुखदेव कोल्हे यांनी आभार मानले.

मुंबई, दि १३: भारतीय स्वातंत्र्याचा ७६ वा वर्धापन दिन १५ ऑगस्ट २०२३ रोजी साजरा करण्यात येणार आहे. राज्याचा मुख्य शासकीय कार्यक्रम मुख्यमंत्री एकनाथ शिंदे यांच्या हस्ते मुंबईत मंत्रालय येथे सकाळी ९.०५ वाजता ध्वजारोहण करून साजरा करण्यात येणार आहे.

सामान्य प्रशासन (राजशिष्टाचार) विभागामार्फत भारतीय स्वातंत्र्यदिनाच्या पार्श्वभूमीवर मंत्रालय येथे ध्वजारोहण समारंभाची रंगीत तालीम आज घेण्यात आली. यावेळी राजशिष्टाचार विभागाचे सहसचिव रामचंद्र धनावडे यांच्या हस्ते ध्वजारोहण करण्यात आले.

याप्रसंगी अपर पोलीस महासंचालक निखिल गुप्ता, सार्वजनिक बांधकाम विभागाचे उप अभियंता अशोक गायकवाड यांच्यासह मंत्रालयीन विभागाचे अधिकारी, सार्वजनिक बांधकाम विभागाचे अधिकारी यांच्यासह पोलीस दलाचे अधिकारी आणि कर्मचारी उपस्थित होते.

प्रशासकीय सेवेत निवड झालेल्या विद्यार्थी साहाय्यक समितीमधील विद्यार्थ्यांचा माजी विद्यार्थी मंडळातर्फे सत्कार
पुणे : “आयुष्याची जडणघडण होताना कुटुंबासह विविध संस्था, व्यक्ती, समाज यांचे साहाय्य महत्वपूर्ण असते. यशाची शिखरे गाठताना वाटेवर मदतीला आलेल्यांचे ऋण विसरू नयेत. सामाजिक जाणीव ठेवून समाजाला परत देण्याची वृत्ती अंगीकारावी. संस्थेने दिलेले संस्कार, शिकवण प्रत्यक्ष कामात उतरवावी,” असे मत विद्यार्थी साहाय्यक समितीचे अध्यक्ष व ज्येष्ठ उद्योजक प्रतापराव पवार यांनी व्यक्त केले.
माजी विद्यार्थी मंडळातर्फे प्रशासकीय सेवेत निवड झालेल्या विद्यार्थी साहाय्यक समितीमधील विद्यार्थ्यांच्या सत्कारावेळी पवार बोलत होते. समितीच्या आपटे वसतिगृहात झालेल्या समारंभावेळी समितीचे कार्यकारी विश्वस्त तुषार रंजनकर, विश्वस्त तुकाराम गायकवाड, माजी विद्यार्थी मंडळाचे अध्यक्ष राजू इंगळे यांच्यासह समितीचे विश्वस्त, कार्यकर्ते, आजी-माजी विद्यार्थी, पर्यवेक्षक, देणगीदार उपस्थित होते.
पोलीस उपअधीक्षक किरण पोपळघट, सहायक संचालक (वित्त व लेखा विभाग) पूजा दाभाडे, मंत्रालय कक्ष अधिकारी विशाल ढोले, चक्रधर रासकर, सहायक सरकारी अभियोक्ता ऍड. पांडुरंग गरदरे, वनपरिक्षेत्र अधिकारी नीलम महाडिक, सोनाली इंगळे, सनदी लेखापाल भरत जाधव व आकाश पवार, विक्रीकर निरीक्षक सागर सरोदे, पोलीस उपनिरीक्षक भीमेश कोटला, ज्ञानेश्वर दुधेकर, काजल सरोदे, गोविंद बेडके, सहायक रासायनिक विश्लेषक सखी शेडगे यांना मानपत्र व पुस्तक देऊन सन्मानित करण्यात आले.
प्रतापराव पवार म्हणाले, ” चांगले लोक सगळीकडे हवे असतात. स्वतःच्या पायावर हिमतीने उभे राहताना अनेकजण मदतीला येतात. अपयशाने खचून न जाता जिद्द आणि सातत्यपूर्ण प्रयत्न केले, तर यश मिळते.  माजी विद्यार्थी हे समितीचे भांडवल आहे. आपल्या यशात योगदान देणाऱ्यांप्रती कृतज्ञ रहा. अनुभवातून शिका. चांगल्या गोष्टींचा, ज्ञानाचा सदुपयोग करा. दिलेला शब्द, वेळ पाळा. सहकार्य, सौहार्दाच्या भावनेतून समाजहिताचे प्रामाणिक काम करा.”
तुषार रंजनकर म्हणाले, “समितीमधील विद्यार्थी मोठ्या संख्यने अधिकारी होताहेत, ही आनंदाची बाब आहे. इथे मिळालेले संस्कार, शिकवण कायम स्मरणात ठेवा. कठीण परिस्थितीत समितीचा, इतरांचा जसा आधार मिळाला, तसाच आधार तुम्ही देखील अडचणीत असलेल्याना द्या.”
राजू इंगळे यांनी माजी विद्यार्थी म्हणून संस्थेच्या कामात योगदान द्यायला हवे, असे आवाहन केले. समितीतील संस्कारांची शिदोरी अधिकारी म्हणून काम करताना उपयोग येईल, असे सांगितले. तुकाराम गायकवाड यांनीही मनोगत व्यक्त केले. मंडळाचे सचिव सुनील चोरे यांनी सूत्रसंचालन केले. सहसचिव मनीषा गोसावी यांनी आभार मानले.