सीसीटीव्ही आणि तांत्रिक विश्लेषणाच्या मदतीने आरोपींचा शोध; चांदीचे दागिने व गुन्ह्यात वापरलेले चारचाकी वाहन असा २.५० लाखांचा मुद्देमाल जप्त
पुणे, दि. २१ ऑगस्ट २०२६ : ज्वेलर्स दुकानात हातचलाखी करून चांदीचे दागिने चोरणाऱ्या टोळीचा लोहेगाव पोलिसांनी पर्दाफाश केला आहे. या प्रकरणी पाच जणांना ताब्यात घेऊन त्यांच्याकडून चोरीचे चांदीचे दागिने आणि गुन्ह्यात वापरलेले चारचाकी वाहन असा एकूण २ लाख ५० हजार रुपयांचा मुद्देमाल जप्त करण्यात आला आहे.
लोहेगाव पोलीस ठाण्यात या चोरीप्रकरणी गुन्हा क्रमांक २०९/२०२६ भारतीय न्याय संहितेच्या कलम ३०५ आणि ३(५) अंतर्गत दाखल करण्यात आला आहे. चोरीला गेलेले चांदीचे दागिने आणि अज्ञात आरोपींचा शोध घेण्याचे आदेश वरिष्ठ पोलीस निरीक्षक मनीषा पाटील यांनी तपास पथकाला दिले होते.
तपासादरम्यान पोलीस अंमलदारांनी सीसीटीव्ही फुटेज आणि तांत्रिक विश्लेषणाच्या आधारे संशयितांचा माग काढला. त्यानंतर मिळालेल्या गोपनीय माहितीनुसार या गुन्ह्यात कल्पना अंकुश कांबळे आणि तिचे साथीदार सहभागी असल्याचे निष्पन्न झाल्याचे पोलिसांनी नमूद केले आहे.
या प्रकरणात कल्पना अंकुश कांबळे (वय ४७), पांडुरंग रामगायकवाड (वय ४२), दीक्षा वसंत शेलार (वय ३२), सुमन बाबासाहेब कोरके (वय ६२) आणि उत्तम बाबासाहेब कोरके (वय ४५) यांना ताब्यात घेण्यात आले. पोलिसांच्या चौकशीत त्यांनी संबंधित गुन्हा केल्याचे निष्पन्न झाल्याचे प्रेसनोटमध्ये नमूद आहे.
आरोपींकडून दाखल गुन्ह्यातील चोरीचे चांदीचे दागिने तसेच गुन्हा करण्यासाठी वापरलेले चारचाकी वाहन जप्त करण्यात आले आहे. या सर्व मुद्देमालाची एकूण किंमत २ लाख ५० हजार रुपये असल्याचे पोलिसांनी सांगितले.
ही कारवाई अपर पोलीस आयुक्त मनोज पाटील, पोलीस उपायुक्त परिमंडळ-७ अविनाशकुमार, सहायक पोलीस आयुक्त लोणीकंद विभाग अनिता मोरे यांच्या मार्गदर्शनाखाली करण्यात आली. वरिष्ठ पोलीस निरीक्षक मनीषा पाटील, पोलीस निरीक्षक (गुन्हे) राकेश कदम, सहायक पोलीस निरीक्षक संतोष शिंदे आणि त्यांच्या पथकाने ही कारवाई केली.
