दोन महिन्यांत ८ NDPS गुन्हे, २१ आरोपींना अटक; ५ लाखांहून अधिक मुद्देमाल जप्त, एकूण १०९ जणांवर कारवाई
पुणे, दि. २० : कोंढवा परिसरात अमली पदार्थांची विक्री, बाळगणे आणि सेवन याविरोधात कोंढवा पोलिसांनी आक्रमक मोहीम हाती घेतली असून, अवघ्या दोन तासांच्या विशेष मोहिमेत ६१ जणांना ताब्यात घेण्यात आले. याशिवाय मागील दोन महिन्यांत अमली पदार्थविरोधी कारवाईत एकूण १०९ जणांवर कायदेशीर कारवाई करण्यात आल्याची माहिती कोंढवा पोलिसांनी दिली आहे.
पुणे शहर पोलीस आयुक्तांच्या मार्गदर्शनाखाली कोंढवा पोलीस ठाण्याने “अमली पदार्थ विक्री होणार नाही, बाळगले जाणार नाहीत आणि सेवन केले जाणार नाही” या उद्देशाने विशेष मोहीम सुरू केली आहे. गेल्या दोन महिन्यांत पोलीस ठाणे स्तरावर विविध प्रकारच्या कारवाया करण्यात आल्या आहेत.
कोंढवा परिसरातील कमेला, शिवनेरी नगर, अश्रफनगर आणि इतर भागांतील सराईत अमली पदार्थ विक्रेत्यांच्या टोळ्यांवर मोक्का अंतर्गत कारवाई करण्यात आली असून संबंधित आरोपींना अटक करण्यात आल्याचे पोलिसांनी नमूद केले आहे.
दरम्यान, NDPS कायद्यांतर्गत एकूण ८ गुन्हे दाखल करण्यात आले आहेत. या कारवायांमध्ये सुमारे ५ लाख ६ हजार ७८५ रुपयांचा मुद्देमाल हस्तगत करण्यात आला असून, २१ जणांना अटक करण्यात आली आहे.
याशिवाय कोंढवा भागातील विविध ठिकाणी शोधमोहीम राबवून २१ अमली पदार्थ सेवन करणाऱ्यांविरुद्धही गुन्हे दाखल करण्यात आले आहेत.
१७ ऑगस्टला विशेष मोहीम; ६१ जण ताब्यात
१७ ऑगस्ट २०२६ रोजी अमली पदार्थ विक्रीच्या हॉटस्पॉट भागात कोंढवा पोलीस ठाण्याच्या अधिकारी व अंमलदारांनी विशेष गस्त घातली. या कारवाईदरम्यान गांजा खरेदीसाठी आलेल्या ६१ जणांना ताब्यात घेण्यात आले. त्यांना पोलीस ठाण्यात आणून अमली पदार्थांमुळे शरीरावर होणाऱ्या दुष्परिणामांबाबत समुपदेशन करण्यात आले आणि त्यांच्यावर कायदेशीर कारवाई करण्यात आली.
अशाप्रकारे मागील दोन महिन्यांत एकूण १०९ लोकांवर कारवाई करण्यात आल्याचे पोलिसांनी स्पष्ट केले आहे.
पुढेही कठोर कारवाईचा इशारा
कोंढवा पोलीस ठाण्याच्या हद्दीत अवैध अमली पदार्थ विक्री, अमली पदार्थ बाळगणे किंवा सेवन करणे याविरोधात पुढेही कठोर कारवाई सुरू राहणार असल्याचे पोलिसांनी सांगितले आहे. नागरिकांना आपल्या परिसरात अमली पदार्थ विक्रीबाबत कोणतीही माहिती मिळाल्यास तातडीने कोंढवा पोलीस ठाण्याशी संपर्क साधण्याचे आवाहनही करण्यात आले आहे.
