अंधेरी पश्चिममधील ‘सिग्नेचर’ इमारतीतील ८,४२८ चौ. फुटांची जागा ट्रूनॅटिव्हला; दरमहा ३३ लाख रुपये भाडे, दरवर्षी ५ टक्के वाढ
मुंबई : बॉलिवूडचे महानायक अमिताभ बच्चन यांनी मुंबईच्या रिअल इस्टेट क्षेत्रात आणखी एक मोठा व्यवहार केला आहे. अंधेरी पश्चिम येथील ‘सिग्नेचर’ इमारतीमधील तीन मजले त्यांनी पाच वर्षांसाठी भाड्याने दिले असून, या व्यवहारातून त्यांना संपूर्ण कालावधीत सुमारे २१.८८ कोटी रुपयांचे भाडे उत्पन्न मिळणार असल्याची माहिती समोर आली आहे.
उपलब्ध मालमत्ता कागदपत्रांनुसार, ही जागा ‘ट्रूनॅटिव्ह’ या पोषण क्षेत्रातील कंपनीला देण्यात आली आहे. कंपनीला सुमारे ८,४२८ चौरस फूट जागा वापरासाठी मिळणार असून, त्यासोबत नऊ वाहनांसाठी स्वतंत्र पार्किंग उपलब्ध करून देण्यात आले आहे.
या मालमत्तेसाठी सुरुवातीचे मासिक भाडे ३३ लाख रुपये निश्चित करण्यात आले आहे. करारानुसार दरवर्षी भाड्यामध्ये ५ टक्क्यांची वाढ होणार असल्याने पाच वर्षांच्या कालावधीत बच्चन यांना मिळणारे एकूण उत्पन्न सुमारे २१.८८ कोटी रुपयांपर्यंत पोहोचणार आहे.
या व्यवहाराच्या कागदपत्रांवर ७ ऑगस्ट रोजी नोंदणीची प्रक्रिया पूर्ण करण्यात आली असून, भाड्याचा कालावधी १५ ऑगस्ट २०२६ पासून लागू झाल्याचे नमूद करण्यात आले आहे.
यापूर्वीही कार्यालये भाड्याने
अमिताभ बच्चन यांच्यासाठी व्यावसायिक मालमत्ता भाड्याने देणे नवीन नाही. यापूर्वी त्यांनी याच परिसरातील लोटस सिग्नेचर इमारतीतील चार कार्यालये वॉर्नर म्युझिक प्रायव्हेट लिमिटेडला भाड्याने दिली होती. त्या व्यवहारातून त्यांना दरमहा सुमारे १७.३० लाख रुपये भाडे मिळत असल्याची माहिती आहे. त्या करारात कंपनीला १२ वाहनांसाठी पार्किंगची सुविधाही देण्यात आली होती.
अयोध्येतही मोठी गुंतवणूक
मुंबईबरोबरच अमिताभ बच्चन यांनी अयोध्येतही गेल्या काही वर्षांत मोठ्या प्रमाणावर रिअल इस्टेट गुंतवणूक केली आहे. उपलब्ध माहितीनुसार, त्यांनी अलीकडे २.६७ एकर जमीन सुमारे ३५ कोटी रुपयांना खरेदी केली आहे.
यापूर्वी जानेवारी २०२४ मध्ये तिहुरा मांझा परिसरात सुमारे दोन बिघे जमीन खरेदी केल्याचे सांगण्यात आले होते. तसेच अयोध्येतील ‘द सरयू’ प्रकल्पात १० हजार चौरस फुटांचा प्लॉट सुमारे १४.५ कोटी रुपयांना, तर मे २०२५ मध्ये याच परिसरात सुमारे २५ हजार चौरस फुटांचा आणखी एक प्लॉट सुमारे ४० कोटी रुपयांना खरेदी केल्याची माहिती आहे.
अभिनयासोबत गुंतवणुकीतही सक्रिय
चित्रपट, दूरचित्रवाणी आणि जाहिरात क्षेत्रासोबत अमिताभ बच्चन रिअल इस्टेट गुंतवणुकीतही सातत्याने सक्रिय आहेत. सध्या ते लोकप्रिय क्विझ शो ‘कौन बनेगा करोडपती’च्या १८व्या सीझनचे सूत्रसंचालन करत आहेत.
