मुंबई : मुख्य निवडणूक आयुक्त ज्ञानेश कुमार यांच्या राजीनाम्याच्या मागणीसाठी कॉकरोच जनता पार्टी (CJP) आज, २ ऑक्टोबर रोजी मुंबईतील शिवाजी पार्क येथे आंदोलन करणार आहे. पक्षाचे संस्थापक अभिजीत दिपके यांनी सायंकाळी ४ वाजता ‘जेल भरो’ आंदोलन सुरू करण्याची घोषणा केली असून, मुंबई पोलिसांनी या आंदोलनाला परवानगी दिलेली नाही. या पार्श्वभूमीवर शिवाजी पार्क परिसरात सुरक्षा व्यवस्था वाढविण्यात आली आहे. CJPने SIR प्रक्रियेवर आक्षेप घेत मुख्य निवडणूक आयुक्तांच्या कार्यपद्धतीवर गंभीर आरोप केले आहेत. ज्ञानेश कुमार यांनी पदाचा राजीनामा द्यावा, SIR प्रक्रिया थांबवावी
आणि निवडणूक आयोगाच्या निर्णयप्रक्रियेची चौकशी व्हावी, अशा प्रमुख मागण्या पक्षाने केल्या आहेत. दिपके यांनी यापूर्वी ज्ञानेश कुमार यांच्याविषयी अत्यंत कठोर शब्दांत टीका केली होती. हे आरोप CJPचे असून निवडणूक आयोगाने अशा आरोपांमध्ये राजकीय हेतू असल्याचे म्हटले आहे. निवडणूक आयोगातील अंतर्गत मतभेदांच्या मुद्द्यामुळे हा वाद आणखी तीव्र झाला आहे. ‘द इंडियन एक्सप्रेस’च्या तपास वृत्तानुसार, निवडणूक आयुक्त सुखबीर सिंह संधू आणि विवेक जोशी यांनी गेल्या दहा महिन्यांत किमान १४ वेळा काही निर्णयांवर लेखी आक्षेप नोंदवले होते. काही निर्णयांबाबत त्यांना पूर्वकल्पना देण्यात आली नसल्याचेही या वृत्तात म्हटले आहे.sSIR प्रक्रियेदरम्यान ३० राज्ये आणि केंद्रशासित प्रदेशांच्या मसुदा मतदार याद्यांमधून १३ कोटींपेक्षा अधिक नावे कमी झाल्याचेही समोर आले आहे. या प्रक्रियेमुळे पात्र मतदारांची नावे वगळली जात असल्याचा आरोप विरोधक आणि CJPकडून केला जात आहे; निवडणूक आयोगाने मात्र SIR ही मतदार यादी अद्ययावत आणि शुद्ध करण्याची प्रक्रिया असल्याची भूमिका मांडली आहे. दिपके यांनी मुंबईतील आंदोलनानंतर गोवा, बंगळुरू, कोलकाता, रांची यांसह विविध शहरांत आंदोलन नेण्याची घोषणा केली आहे. ऑक्टोबरअखेरीस दिल्लीतील जंतर-मंतर येथे मोठे आंदोलन करण्याचा CJPचा कार्यक्रम आहे. मात्र ६ ऑक्टोबर रोजी विरोधी पक्षांच्या प्रस्तावित आंदोलनात CJP सहभागी होणार नसल्याचेही त्यांनी स्पष्ट केले आहे. दरम्यान, दिल्लीतील जंतर-मंतर परिसरातही SIRविरोधी आंदोलनांच्या पार्श्वभूमीवर सुरक्षा व्यवस्था कडक करण्यात आली आहे. विद्यार्थी संघटना आणि विविध राजकीय नेत्यांनी निवडणूक आयोगाविरोधात निदर्शनांचे आवाहन केले असून दिल्ली पोलिसांनी अनेक भागांत निर्बंध लागू केले आहेत.
