- उद्योगमंत्री उदय सामंत यांच्या हस्ते निधी मंजुरीच्या पत्राचे वितरण
पुणे – खेड-आळंदी विधानसभा मतदारसंघातील विविध विकासकामांसाठी शिवसेना नेत्या, विधान परिषद सदस्या तथा माजी उपसभापती आ. डॉ. नीलम गोऱ्हे यांच्या सन २०२६-२७ च्या स्थानिक आमदार निधीतून एकूण ६० लाख रुपयांचा निधी देण्यात आला आहे. या निधी संदर्भातील पत्राचे वितरण राज्याचे उद्योगमंत्री उदय सामंत यांच्या हस्ते करण्यात आले.शिवसेना जिल्हाप्रमुख भगवान नारायण पोखरकर यांनी केलेल्या विनंतीनुसार आ. डॉ. गोऱ्हे यांनी खेड-आळंदी मतदारसंघातील कामांसाठी निधी मागितला होता. यात नागरिकांच्या मूलभूत सुविधा आणि स्थानिक विकासाच्या दृष्टीने सहा कामांसाठी प्रत्येकी १० लाख रुपयांचा निधी देण्यास मान्यता दिली आहे.यामध्ये धुवोली येथे महिला अस्मिता भवन, सांडभोरवाडी (तिन्हेवाडी) येथे महिला अस्मिता भवन, वाळद (कोयाळकर) येथे सभामंडप, रोहकल येथे महिला अस्मिता भवन, आंबोली येथील गायमाळवाडी येथे सभामंडप तसेच गोणवडी येथे सभामंडप उभारण्याच्या कामांचा समावेश आहे.या सहा विकासकामांसाठी प्रत्येकी १० लाख रुपये याप्रमाणे एकूण ६० लाख रुपयांचा निधी उपलब्ध करून देण्यात येणार असून, आवश्यक प्रशासकीय मान्यता घेऊन कामे लवकरात लवकर मार्गी लावण्याच्या सूचना आ. डॉ. गोऱ्हे यांनी केल्या आहेत.यावेळी शिवसेना संपर्कप्रमुख विकास रेपाळे, जिल्हाप्रमुख भगवान पोखरकर, अतुल देशमुख, श्रद्धा सांडभोर यांच्यासह शिवसेनेचे पदाधिकारी व कार्यकर्ते उपस्थित होते.
