पुणे : पुणे महानगरपालिकेचे आयुक्त नवल किशोर राम यांनी अतिरिक्त महापालिका आयुक्त प्रजित नायर यांच्यासमवेत वारजे आणि सिंहगड रोड क्षेत्रीय कार्यालयांच्या हद्दीतील विविध नागरी कामांची पाहणी केली. शिवणे, कोंढवे-धावडे, उत्तमनगर तसेच सिंहगड परिसरातील प्रलंबित कामे, रस्ते, पूल, कचरा व्यवस्थापन आणि पूरस्थितीच्या समस्यांचा त्यांनी आढावा घेत संबंधित विभागांना तातडीने कार्यवाही करण्याचे निर्देश दिले.
महापालिका प्रशासनाने दिलेल्या माहितीनुसार, शिवणे ते नांदेड सिटी दरम्यान मुठा नदीवरील प्रस्तावित पुलाची आयुक्तांनी पाहणी केली. या पुलाची प्रस्तावित रुंदी २४ मीटर, लांबी सुमारे २७० मीटर असून प्रकल्पाची अंदाजित किंमत सुमारे ६० कोटी रुपये आहे. नांदेड सिटीच्या बाजूने २४ मीटर रुंदीचा रस्ता विकसित झाला असून शिवणेच्या बाजूला सध्या १२ मीटर रुंदीचा रस्ता अस्तित्वात आहे.
राष्ट्रीय महामार्गावरील पुलानंतर खडकवासला धरणापर्यंत मुठा नदीवर पुरेशा रुंदीचा पूल उपलब्ध नसल्याने परिसरातील दळणवळणाच्या दृष्टीने या प्रस्तावित पुलाचे महत्त्व मोठे असल्याचे प्रशासनाने नमूद केले आहे. त्यामुळे या प्रकल्पाची कार्यवाही तातडीने सुरू करण्याचे निर्देश आयुक्त नवल किशोर राम यांनी संबंधित विभागाला दिले.
यावेळी गणपती माथा, बराटे इंडस्ट्रियल इस्टेट परिसरातील नवीन पुलाचे काम तसेच विविध ठिकाणी साचलेल्या कचऱ्याचीही पाहणी करण्यात आली. नियमित कचरा संकलन आणि उचल करण्यासाठी किती वाहनांची आवश्यकता आहे, याचा आढावा घेऊन आवश्यक वाहनांची संख्या निश्चित करण्याचे निर्देश वारजे आरोग्य निरीक्षकांना देण्यात आले. त्यानुसार पुरेशी वाहने उपलब्ध करून देण्याच्या सूचना घनकचरा व्यवस्थापन विभागालाही करण्यात आल्या.
सिंहगड वॉर्डाच्या हद्दीतील देशमुखवाडी रस्ता तयार करणे तसेच रस्त्यावरील चेंबर समपातळीत आणण्याच्या कामांचीही पाहणी करण्यात आली. ही कामे तातडीने पूर्ण करण्याचे निर्देश पथ विभागाला देण्यात आले.
दरम्यान, NDA च्या वॉटर कॅचमेंट एरियातून मोठ्या प्रमाणात पाणी वसाहतीमध्ये शिरत असल्याने दरवर्षी निर्माण होणाऱ्या पूरस्थितीवर कायमस्वरूपी उपाययोजना करण्याचे आदेश आयुक्तांनी दिले. NDA परिसराशी संबंधित अन्य नागरी समस्यांवरही कायमस्वरूपी तोडगा काढण्यासाठी स्थानिक लोकप्रतिनिधी आणि NDA च्या वरिष्ठ अधिकाऱ्यांसमवेत तातडीने बैठक आयोजित करण्याच्या सूचना देण्यात आल्या.
नव्याने समाविष्ट गावांमधील डोअर-टू-डोअर कचरा संकलन आणि सेकंडरी वाहतुकीसाठी आवश्यक वाहनांची उपलब्धता सुनिश्चित करण्याचे निर्देशही संबंधित अधिकाऱ्यांना देण्यात आले. समाविष्ट गावांमधील नागरी समस्यांना प्राधान्य देतानाच रस्ते आणि फुटपाथ अतिक्रमणमुक्त करण्याची कार्यवाही करण्याच्या सूचनाही आयुक्तांनी दिल्या.
या पाहणीवेळी सभासद अनिता इंगळे, सुभाष नाणेकर, उपायुक्त (घनकचरा व्यवस्थापन) संतोष वारुळे, उपायुक्त (परिमंडळ क्र. ३) विजयकुमार थोरात, मुख्य अभियंता (पथ) राजेश बनकर, मुख्य अभियंता (प्रकल्प) दिनकर गोजारे, मुख्य अभियंता (पाणीपुरवठा) नंदकिशोर जगताप, महापालिका सहाय्यक आयुक्त प्रज्ञा पोतदार तसेच संबंधित विभागांचे अधिकारी उपस्थित होते.
