आव्हाळवाडी-सातववस्ती परिसरातील घटना; पाच-सहा दिवसांच्या बालिकेवर ससून रुग्णालयात उपचार, दुचाकीस्वारांचा पोलिसांकडून शोध
पुणे : वाघोली परिसरातील आव्हाळवाडी-सातववस्ती येथे रस्त्याच्या कडेला फेकून दिलेल्या काळ्या रंगाच्या बॅगेत अवघ्या पाच ते सहा दिवसांची नवजात बालिका आढळून आल्याची धक्कादायक घटना समोर आली आहे. बॅगेतून बाळाच्या रडण्याचा आवाज ऐकू आल्यानंतर रिक्षाचालक आकाश कोळी यांनी तत्काळ बॅग उघडून बालिकेला बाहेर काढले. त्यानंतर तिला वाघोली पोलिसांच्या मदतीने ससून रुग्णालयात दाखल करण्यात आले. सध्या तिच्यावर उपचार सुरू आहेत.
ही घटना २५ सप्टेंबर रोजी रात्री सुमारे आठ वाजण्याच्या सुमारास घडली. आकाश कोळी हे मांजरी येथून प्रवासी घेऊन पुणे स्टेशनच्या दिशेने जात होते. आव्हाळवाडीतील सातववस्ती परिसरात त्यांच्या रिक्षाच्या पुढे दुचाकीवरून दोन व्यक्ती जात होत्या. या दोघांनी रस्त्याच्या कडेला काळ्या रंगाची बॅग फेकली आणि वेगाने निघून गेल्याचे कोळी यांच्या निदर्शनास आले.
संशय आल्याने त्यांनी रिक्षा थांबवून बॅगेजवळ जाऊन पाहिले. बॅगेतून बाळाच्या रडण्याचा आवाज येत होता. तसेच बॅगेच्या फटीतून बालिकेचा पाय दिसत होता. त्यांनी तातडीने बॅग उघडली असता आत कपड्यात गुंडाळलेली नवजात बालिका आढळून आली.
कोळी यांनी कोणताही विलंब न करता बालिकेला आपल्या रिक्षातून वाघोली पोलीस ठाण्यात नेले. पोलिसांनी घटनेचे गांभीर्य लक्षात घेऊन तिला तत्काळ ससून रुग्णालयात उपचारासाठी दाखल केले. डॉक्टरांच्या देखरेखीखाली बालिकेवर उपचार सुरू आहेत.
नवजात बालिकेला बॅगेत टाकून रस्त्याच्या कडेला सोडून देणाऱ्या व्यक्तींचा वाघोली पोलिसांकडून शोध सुरू आहे. घटनास्थळ आणि परिसरातील सीसीटीव्ही फुटेज तपासून संबंधित दुचाकीस्वारांचा शोध घेतला जात आहे.
आकाश कोळी यांच्या तक्रारीवरून संबंधित व्यक्तींविरुद्ध गुन्हा दाखल करण्यात आला असून, या प्रकरणाचा पुढील तपास वाघोली पोलीस करत आहेत.
