अन्नसुरक्षा आणि स्वच्छतेतील गंभीर त्रुटींनंतर परवान्यावर कारवाई; तुकाराम मुंढेंच्या नेतृत्वाखाली FDAची धडक मोहीम
पुणे : पुण्यातील कॅम्प परिसरातील खवय्यांमध्ये अनेक वर्षांपासून लोकप्रिय असलेल्या ‘बर्गर किंग’वर अन्न व औषध प्रशासनाने (FDA) मोठी कारवाई केली आहे. FDAच्या तपासणीमध्ये अन्नसुरक्षा आणि स्वच्छतेसंदर्भात गंभीर त्रुटी आढळल्याने या आस्थापनाच्या अन्न व्यवसाय परवान्यावर कारवाई करण्यात आली आहे.
अन्न व औषध प्रशासनाच्या पथकाने कॅम्प परिसरातील या प्रसिद्ध बर्गर आउटलेटची अचानक तपासणी केली. तपासणीदरम्यान किचनमधील स्वच्छता, खाद्यपदार्थ तयार करण्याची पद्धत तसेच वापरण्यात येणाऱ्या खाद्यतेलासंदर्भात गंभीर बाबी अधिकाऱ्यांच्या निदर्शनास आल्याचे वृत्त आहे.
विशेषतः फ्रेंच फ्राईजसह विविध पदार्थांसाठी वापरण्यात येणाऱ्या तेलाची स्थिती आणि किचनमधील एकूण स्वच्छतेबाबत अधिकाऱ्यांनी आक्षेप नोंदविल्याचे समोर आले आहे. अन्न सुरक्षा व मानके कायद्यांतर्गत आवश्यक असलेल्या निकषांचे पालन होत आहे की नाही, याची पथकाने सविस्तर पाहणी केली.
कॅम्पमधील हे बर्गर आउटलेट जवळपास ३७ वर्षांपासून पुणेकरांमध्ये लोकप्रिय असल्याचे सांगितले जाते. दररोज मोठ्या संख्येने तरुण आणि खाद्यप्रेमी येथे येतात. त्यामुळे एवढ्या जुन्या आणि प्रसिद्ध आस्थापनावर FDAने केलेल्या कारवाईची पुण्याच्या खाद्यविश्वात मोठी चर्चा सुरू झाली आहे.
राज्यात अन्नसुरक्षा आणि स्वच्छतेच्या नियमांचे उल्लंघन करणाऱ्या हॉटेल, रेस्टॉरंट आणि खाद्यपदार्थ विक्री करणाऱ्या आस्थापनांविरोधात FDAकडून सध्या विशेष मोहीम राबविली जात आहे. अन्न व औषध प्रशासनाचे आयुक्त तुकाराम मुंढे यांच्या नेतृत्वाखाली विविध ठिकाणी अचानक तपासण्या करून नियमभंग आढळल्यास कठोर कारवाई केली जात आहे.
ग्राहकांना सुरक्षित आणि दर्जेदार अन्न मिळणे आवश्यक असून अन्नसुरक्षा व स्वच्छतेच्या नियमांकडे दुर्लक्ष करणाऱ्या आस्थापनांविरोधातील कारवाई यापुढेही सुरू राहणार असल्याचे प्रशासनाने स्पष्ट केले आहे.
