तिरंगा रॅलीला विरोध नाही; पण खड्डे, वाहतूक कोंडी आणि पुणेकरांच्या मूलभूत प्रश्नांकडेही लक्ष द्या, काँग्रेसची टीका
पुणे : पुणे शहरातील रस्त्यांवरील खड्डे आणि वाहतूक कोंडीच्या प्रश्नावरून पुणे शहर जिल्हा काँग्रेस कमिटीच्या पश्चिम विभागाच्या अध्यक्षा दीप्ती चवधरी यांनी मुख्यमंत्री देवेंद्र फडणवीस आणि भाजपवर जोरदार टीका केली आहे. “पुण्यातील खड्ड्यांच्या पाहणीसाठी मुख्यमंत्री पुण्यात कधी रॅली काढणार?” असा सवाल त्यांनी उपस्थित केला आहे.
कोणत्याही तिरंगा रॅलीला विरोध असण्याचे कारण नाही. मात्र मुख्यमंत्र्यांनी पुण्यातील रस्त्यांवर पडलेल्या प्रचंड खड्ड्यांची पाहणी करण्यासाठी दौरा केला असता आणि खड्डेमुक्त पुणे करण्यासाठी प्रयत्न केले असते, तर पुणेकरांनी त्यांचे स्वागतच केले असते, असे चवधरी यांनी प्रसिद्धीस दिलेल्या निवेदनात म्हटले आहे.
‘खड्डे आणि वाहतूक कोंडीने पुणेकर त्रस्त’
पुण्यातील रस्त्यांवरील खड्डे आणि वाहतूक कोंडीमुळे नागरिकांच्या मनस्तापात दिवसेंदिवस भर पडत असल्याचा आरोप चवधरी यांनी केला. मुख्यमंत्री, भाजपचे केंद्र आणि राज्यातील मंत्री, पुण्यातील आमदार तसेच पुणे महानगरपालिकेतील भाजपच्या लोकप्रतिनिधींनी पुणेकरांच्या मूलभूत अडचणींकडे लक्ष द्यावे, अशी मागणी त्यांनी केली.
जनतेच्या खऱ्या प्रश्नांकडे लक्ष देण्याऐवजी दिखाऊ कार्यक्रमांवर भर दिला जात असल्याचा आरोप करत चवधरी यांनी भाजपवर निशाणा साधला.
महागाई, बेरोजगारी, पेपरफुटीवरूनही टीका
केंद्रातील भाजप सरकारवर टीका करताना चवधरी यांनी बेरोजगारी, महागाई, पेपरफुटी आणि भ्रष्टाचार या मुद्द्यांचाही उल्लेख केला. या प्रश्नांमुळे सर्वसामान्य नागरिक त्रस्त असताना त्यांच्या अडचणी वाढवणारे कार्यक्रम करण्याऐवजी प्रत्यक्ष प्रश्न सोडविण्यास प्राधान्य द्यावे, असे त्यांनी म्हटले आहे.
तरुण आणि सर्वसामान्य नागरिकांच्या प्रश्नांकडे गांभीर्याने पाहून त्यांच्याशी संवाद साधण्याची गरज असल्याचेही त्यांनी नमूद केले.
‘दिखाऊ कार्यक्रमांपेक्षा नागरिकांचे प्रश्न सोडवा’
पुण्यातील खड्डे, वाहतूक कोंडी आणि इतर नागरी समस्यांकडे सरकारने गांभीर्याने लक्ष द्यावे. तिरंगा रॅलीसारख्या कार्यक्रमांपेक्षा नागरिकांना दैनंदिन जीवनात भेडसावणारे प्रश्न सोडविण्यास प्राधान्य द्यावे, अशी मागणी दीप्ती चवधरी यांनी केली आहे.
