नागपूर– महाराष्ट्राच्या समतोल औद्योगिक विकासासाठी कटिबद्ध होऊन ज्या भागात आजवर उद्योगाची बीजे रुजली नव्हती त्या भागात आम्ही लक्ष केंद्रीत केले. गत दोन वर्षात विदेशी गुंतवणुकीत महाराष्ट्राला संपूर्ण भारतात अव्वल आणण्यासाठी केलेल्या प्रयत्नांना यश मिळाले असून जागतिक गुंतवणूकदारांचे लक्ष आता महाराष्ट्राकडे वेधून घेतले आहे. नक्षल भागात विकासात्मक जडणघडणीतून गडचिरोली जिल्ह्याचे स्वरूप आता पूर्णतः बदलून दाखविले आहे. आजवर नक्षलवादी जिल्हा म्हणून जी ओळख होती ती मिटविण्यात आपले शासन यशस्वी ठरल्याचे गौरवोद्गार उद्योगमंत्री उदय सामंत यांनी काढले.

हॉटेल सेंटर पॅाईंट येथे महाराष्ट्राच्या औद्योगिक यशाला अधोरेखित करणाऱ्या ‘महाराष्ट्राची औद्योगिक भरारी’ या विशेष समारंभात ते बोलत होते. यावेळी आ. आशीष जायस्वाल, अतिरिक्त विकास आयुक्त (उद्योग) तथा समन्वयक महाराष्ट्राची उद्योग भरारी प्रदीप चंद्रन, एमआयडीसीचे उपमुख्य कार्यकारी अधिकारी उपेंद्र तामोरे, मुख्य अभियंता राजेश झंझाळ, उद्योग सहसंचालक गजेंद्र भारती, जिल्हा उद्योग केंद्राचे महाव्यवस्थापक शिवकुमार मुद्दमवार, विदर्भ इंडस्ट्रीज असोसिएशनचे अध्यक्ष विशाल अग्रवाल, वर्धा इंडस्ट्रीज असोसिएशनचे अध्यक्ष प्रवीण हिवरे, हिंगणा इंडस्ट्रीज  असोसिएशनचे पी. मोहन, लॉयड ग्रूपचे संचालक तथा प्रकल्प  प्रमुख व्यंकटेशन, आवादा ग्रूपचे व्यवस्थापकीय संचालक मुर्तुझा, बुटीबोरी इंडस्ट्रीज असोसिएशनचे घिमे, परनार्ड रिकार्ड इंडियाचे संचालक राजेंद्र देशमुख यांच्यासह पूर्व विदर्भातील विविध औद्योगिक संघटनांचे पदाधिकारी, उद्योजक यावेळी मोठ्या संख्येने उपस्थित होते.

महाराष्ट्राची उद्योग भरारी या कार्यक्रमाचा शुभारंभ नागपूरपासून होत असल्याचा विशेष उल्लेख उद्योगमंत्री सामंत  यांनी करून विदर्भातील औद्योगिक क्षेत्राच्या विकासाचा आढावा आपल्या भाषणातून मांडला. एमआयडीने उद्योजकांना केवळ जागा उपलब्ध करून देणे या उद्देशापर्यंतच सीमित असलेल्या महामंडळाचे स्वरूप आता आपण पूर्णपणे बदललेले आहे. चांगल्या उद्योजकांना, विदेशी गुंतवणूकदारांना, विदेशातील उद्योजकांना जर राज्यात निमंत्रित करायचे असेल तर त्यासाठी औद्योगिक क्षेत्राला अत्यावश्यक असणारी पायाभूत सेवा सुविधा, स्वच्छता, सुरक्षितता आणि काम करणाऱ्या कामगारांच्या आरोग्याची शाश्वतता जपणे याला आम्ही प्राधान्य दिले. या प्रयत्नांमुळे राज्याच्या औद्योगिक विकासाला गती मिळाल्याचे उद्योगमंत्री सामंत यांनी सांगितले.

विदर्भातील औद्योगिक क्षेत्राच्या पायाभूत सोईसुविधांसाठी आम्ही प्राधान्याने लक्ष दिले आहे. यात पूर्व विदर्भातील 400 कोटी रुपयांची तरतूद करण्यात आली आहे. रस्ते, वीज, मलनिःसारण व्यवस्था, पोलिस स्थानक या सुविधांचा अंतर्भाव करण्यात आला आहे. उद्योजकांबरोबर कामगारांनाही सुविधा देण्याचा प्रयत्न आहे. त्यांचेही आरोग्य सुदृढ राहण्याची गरज आहे. एमआयडीसीच्या क्षेत्रात केंद्र सरकारची रुग्णालये साकारावीत यासाठी कोणताही मोबदला न घेता त्यांना रुग्णालयासाठी जागा उपलब्ध करून दिली जात  असल्याचे उद्योगमंत्री सामंत यावेळी म्हणाले.

विदर्भातील कापूस उत्पादक शेतक-यांना औद्योगिक क्षेत्राची जोड मिळावी यासाठी अमरावतीमध्ये पीएम टेक्सटाईल्स पार्कची निर्मिती करण्यात येत आहे. यासाठी सुमारे 15 हजार कोटी रुपयांची गुंतवणूक यामाध्यमातून होणार आहे. भंडारा,  गोंदिया,  चंद्रपूर, गडचिरोली,  वर्धा या जिल्ह्यात औद्योगिक क्षेत्राला एक वेगळी दिशा आपण देत आहोत. नागपूर विभागात सुमारे 1 हजारापेक्षा अधिक हेक्टर भूखंड वाटप करून यातून 42 हजार 937.43 कोटी रुपये गुंतवणूक आली असल्याचे त्यांनी सांगितले. यातून 29 हजार 927 रोजगार निर्मिती झाली आहे. उद्योगवाढीला चालना मिळून 80 हजार रोजगार निर्मिती यामाध्यमातून झाली आहे. मुख्यमंत्री रोजगारनिर्मिती उपक्रमाद्वारे 35 हजार जणांना रोजगार मिळाला आहे. हे उद्योग विभागाचे यश आहे. विदर्भातून कोणताही प्रकल्प स्थलांतरित होत नसून उलट परकीय गुंतवणूक वाढत असल्याचे ते म्हणाले.

याच उपक्रमात आपण लाडक्या बहिणींचा प्रातिनिधीक गौरव केला. तो गौरव योजनांसाठी नसून राज्याच्या औद्योगिक धोरणामध्ये, राज्याच्या औद्योगिक उभारणीमध्ये त्यांनाही प्राधान्य मिळावे, हक्काची जागा मिळावी, उद्योजक म्हणून त्यांनाही आपली ओळख निर्माण करता यावी यासाठी लवकरच विदर्भात महिलांसाठी स्वतंत्र औद्योगिक वसाहत निर्माण करण्याचा निर्णय घेतल्याचे सूतोवाच त्यांनी केले.

गेल्या तीन महिन्यात महाराष्ट्रात परकीय गुंतवणूक 75 हजार कोटी रुपये झाली असून महाराष्ट्र पहिल्या क्रमांकावर आला आहे. राज्यातील युवकांच्या कौशल्य रुजावीत यासाठी सुरू करण्यात आलेल्या कौशल्य विकास केंद्रांना स्थानिक पातळीवरील उद्योजकांनी पुढे येऊन त्यात सहभाग घ्यावा असे आवाहनही त्यांनी केले.

कार्यक्रमादरम्यान एमआयडीसी, डायरेक्टोरेट आफ इंडस्ट्रीज, प्रधानमंत्री विश्वकर्मा योजना, मुख्यमंत्री लाडकी बहिण योजना यासंदर्भातील सादरीकरण करण्यात आले. उद्योग विभागातर्फे व्यवसायासाठी देण्यात येणारे अनुदान, पीएम विश्वकर्मा योजना, मुख्यमंत्री लाडकी बहिण योजना, युवा कार्यप्रशिक्षण योजना तसेच मुख्यमंत्री तीर्थदर्शन योजनांच्या लाभार्थ्यांना लाभाचे वाटप करण्यात आले.

• गृहमंत्रीच सुरक्षित नाही तर राज्यातील जनता कशी सुरक्षित असेल? कायदा सुव्यवस्थेचा बोजवारा उडला: नाना पटोले

• नुकसानग्रस्त शेतकऱ्यांना सरकारची अद्याप मदत नाही, अवकाळी पावसासारखेच अवकाळी सरकार.

मुंबई, विधानसभेच्या निवडणुका निष्पक्षपातीपणे पार पाडण्यासाठी वादग्रस्त व सरकारी पक्षाला मदत करणारे अधिकारी हटवले पाहिजेत. राज्याच्या पोलीस महासंचालक रश्मी शुल्का यांची कारकिर्द संशयास्पद व वादग्रस्त आहे. विरोधी पक्षांच्या नेत्यांना धमकावणे, विरोधी पक्षांच्या नेत्यांचे फोन टॅपिंग करणे यासारखे प्रकार त्यांनी केले असून त्यांच्यावर गुन्हेही दाखल झालेले आहेत. निवडणुका पारदर्शक व निष्पक्षपातीपणे पार पडण्यासाठी रश्मी शुक्ला यांच्यासह वादग्रस्त व सत्ताधारी पक्षाला मदत करणाऱ्या अधिकाऱ्यांना हटवावे, अशी मागणी काँग्रेस पक्षाने निवडणूक आयोगाकडे केली असल्याचे काँग्रेस प्रदेशाध्यक्ष नाना पटोले यांनी सांगितले.
महाराष्ट्र दौ-यावर असलेल्या देशाच्या मुख्य निवडणूक आयुक्तांची काँग्रेस पक्षाच्या शिष्टमंडळाने भेट घेतली या शिष्टमंडळात प्रदेश काँग्रेसचे सरचिटणीस मुनाफ हकीम आणि डॉ. गजानन देसाई यांचा समावेश होता. त्यांनी काँग्रेस प्रदेशाध्यक्ष नाना पटोले यांनी २४ सप्टेंबर रोजी मुख्य निवडणूक आयुक्तांना पाठवलेल्या पत्राची प्रत आज पुन्हा मुख्य निवडणूक आयुक्त राजीव कुमार यांच्याकडे सुपूर्द केली व पोलीस महासंचालक रश्मी शुक्ला यांना हटवण्याची मागणी केली.
यासंदर्भात टिळक भवन मध्ये पत्रकारांशी बोलताना नाना पटोले म्हणाले की, रश्मी शुक्ला यांची सेवा समाप्त झाली असतानाही भाजपा युती सरकारने त्यांना दोन वर्षांची मुदतवाढ दिली आहे. त्या भाजपा युती सरकारला अनुकुल अशी भूमिका घेऊन मदत करत असतात, असे वादग्रस्त व संशयास्पद अधिकारी निवडणूक काळात नसावेत, अन्यथा निवडणूक निष्पक्ष होणार नाही. अशी मागणी काँग्रेसने केली असून निवडणूक अधिकाऱ्यांनी कारवाई करण्याचे आश्वासन दिले आहे.
महाराष्ट्रात कायदा व सुव्यवस्थेचा बोजवारा उडाला आहे. मंत्रालयातील गृहमंत्र्यांच्या कार्यालयाची एका महिलेने तोडफोड केली व गृहमंत्र्यांच्या नावाच्या पाटीची तोडफोडही केली. राज्याचा गृहमंत्रीच सुरक्षित नाही तर राज्यातील जनता कशी सुरक्षित असेल असा प्रश्न नाना पटोले यांनी उपस्थित केला.
भाजपा युती सरकारने विकासाच्या नावावर कोट्यवधी रुपयांची उधळपट्टी केली आहे, विकास कुठेच दिसत नाही पण निवडणुकीच्या तोंडावर जनतेमध्ये सरकारची स्वच्छ व विकास केल्याची प्रतिमा मीडियातून दाखवण्यासाठी एका आयएएस अधिकाऱ्यामार्फत मीडियाच्या प्रमुख व्यक्तींना बोलावून टार्गेट दिले जात आहे. यासाठी एमएसआरडीसी, एमएमआरडीए, म्हाडा, सीडको, प्रदुषण महामंडळ, एसआरए यांचा पैसा वापरला जात आहे. राज्य सरकारच्या विविध महामंडळावर हजारो कोटींचे कर्ज आहे. महामंडळे ५० हजार कोटी रुपये तोट्यात आहेत हे कॅगच्या अहवालातून समोर आले आहे. सरकारकडे पैसे नसताना या महामंडळाचा पैसा वापरून कोट्यवधींची उधळपट्टी सुरु आहे, असेही नाना पटोले म्हणाले.

पावसामुळे राज्यातील शेतीचे प्रचंड नुकसान झाले असून ७३ टक्के ओला भागात दुष्काळ आहे. गेल्या तीन चार दिवसांत ३३ हजार हेक्टरवरील पिके पाण्यात गेली आहेत. शेतकरी संकटात आहे पण सरकारने अद्याप मदत दिलेली नाही. मुंबईतील नालेसफाईच्या कामात जातीने लक्ष घातल्याने मुंबई तुंबणार नाही असा दावा मुख्यमंत्री एकनाथ शिंदे यांनी सकाळी एका कार्यक्रमात केला आणि संध्याकाळी झालेल्या पावसात मुंबई तुंबली, मुंबईचे जनजीवन ठप्प झाले. अवकाळी पावसासारखे भाजपा युती सरकारही अवकाळीच आहे, असेही पटोले म्हणाले.

खाजगी जागेतील मतदान केंद्र रद्द करा..
यावेळी बोलताना काँग्रेस सरचिटणीस मुनाफ हकीम म्हणाले की, रश्मी शुक्ला यांची कालमर्यादा संपली असतानाही सरकारने त्यांना कालमर्यादा वाढवून दिली आहे. पोलीस यंत्रणेच्या माध्यमातून सरकार दहशतीचे वातावरण निर्माण करत आहे. कालमर्यादा संपलेल्या पोलीस महासंचालक यांना पदावरून हटवावे, तसेच राज्यातील अनेक विभागात शिपाई ते अधिकारी हे ३ वर्षांपासून त्याच जागी काम करत आहेत, ते बदलले पाहिजेत अन्यथा त्याचा मतदानावर परिणाम होऊ शकतो अशी भूमिका निवडणूक आयोगाकडे मांडली. त्यावर अशा प्रकारचे वादग्रस्त अधिकारी निवडणूक काळात राहणार नाहीत, असे आश्वासन देण्यात आले आहे.
खासगी सोसायट्यांमध्येही मतदान केंद्र सुरु करण्याला काँग्रेस पक्षाचा विरोध असून मतदान हे सरकारी इमारतीतच झाले पाहिजेत. तसेच मतदानाची आकडेवारी देणारे 17 C फॉर्म मतदानानंतर लगेचच मतदान प्रतिनिधींना देण्यात यावेत अशी भूमिकाही यावेळी मांडल्याचे मुनाफ हकीम यांनी सांगितले.
या पत्रकार परिषदेच्या सुरुवातीलाच काँग्रेस प्रदेशाध्यक्ष नाना पटोले यांनी ज्येष्ठ नेते रोहिदास पाटील यांना भावपूर्ण श्रद्धांजली अर्पण केली. यावेळी राज्यसभा सदस्य चंद्रकांत हंडोरे, प्रदेश सरचिटणीस मुनाफ हकीम, डॉ. गजानन देसाई, काकासाहेब कुलकर्णी, मदन जाधव आदी उपस्थित होते.

पुणे, भारतातील सर्वात मोठा ज्वेलरी रिटेल ब्रँड आणि टाटा समूहातील एक सदस्य, तनिष्कने पुण्यामध्ये ३,५०,९९३ कुटुंबे ब्रँड वारशाचा भाग बनल्याचा आनंद साजरा केला. पुण्यामध्ये तनिष्कच्या आजवरच्या वाटचालीतील हा एक महत्त्वाचा टप्पा आहे. पुण्यनगरीमध्ये दशकांपूर्वी पदार्पण केलेल्या तनिष्कने अल्पावधीतच इथल्या चोखंदळ ग्राहकांच्या हृदयात स्थान मिळवले, लहानसा समारंभ असो किंवा मोठा सोहळा, तो साजरा करण्यात तनिष्कने ग्राहकांची मनाजोगती साथ दिली. सुरुवातीपासून तनिष्क ब्रँडने आपल्या ग्राहकांसाठी असे अनुभव निर्माण करण्यावर भर दिला जे सोनेरी आठवणी बनून कायमचे मनावर कोरले जातील.

पुणेकर ग्राहकांकडून सातत्याने मिळत असलेला स्नेह आणि पाठिंब्याबद्दल कृतज्ञता व्यक्त करण्यासाठी तनिष्क ब्रँडने एका विशेष कार्यक्रमाचे आयोजन केले होते. तनिष्कचे मौल्यवान ग्राहक आणि त्यांनी ब्रँडसोबत मिळून निर्माण केलेला वारसा यांचा सन्मान यावेळी करण्यात आला. यावेळी एक फॅशन शो करण्यात आला ज्यामध्ये तनिष्कचे शानदार दागिने परिधान करून तनिष्कच्या ग्राहकांनी रॅम्प वॉक केला. ग्लॅमर आणि शान यांनी चमचमत्या संध्याकाळी आयोजित करण्यात आलेल्या या कार्यक्रमामध्ये ग्राहकांनी त्यांच्या अनोख्या कहाण्या, अनुभव आणि विशेष क्षण यांचे प्रतीक असलेले दागिने प्रदर्शित केले. 

अतुलनीय कारीगरी, खास डिझाईन आणि गुणवत्तेप्रती बांधिलकी ही तनिष्कच्या उत्पादनांच्या सर्वोत्कृष्टतेची गुरुकिल्ली आहे. पारंपरिक कलात्मकता आणि आधुनिक शान यांचा मिलाप असलेले सर्वोत्तम दागिने तनिष्क सातत्याने प्रस्तुत केले आहेत. ग्राहकांच्या सन्मानार्थ ब्रँडने आयोजित केलेल्या विशेष कार्यक्रमामध्ये रिवाह बाय तनिष्क हा लग्नातील दागिन्यांचा खास सब-ब्रँड यावेळी पेश करण्यात आला, लग्नाचा अर्थात व्यक्तीच्या आयुष्यातील सर्वात महत्त्वाचा दिवस अधिक खास व्हावा याची पुरेपूर काळजी रिवाहमध्ये घेण्यात आली आहे. पुणेरी नवरीला आवडतील आणि साजेसे ठरतील अशा दागिन्यांची विशाल श्रेणी रिवाहमध्ये उपलब्ध आहे. हळद, मेंदी या पारंपरिक कार्यक्रमांपासून, मौजमस्तीने भरपूर संगीत आणि रिसेप्शनपर्यंत प्रत्येक प्रसंगात साजेसे ठरतील असा नववधूचा संपूर्ण साज यामध्ये आहे. मुल्लई मोतु, ठुशी, पोल्का राणी हार, कोल्हापुरी साज, मोहनमाळ आणि मराठी वज्र टीक असे दागिने नववधूचा साज परिपूर्ण करतात. 

या कलेक्शनला अनुरूप अशा नाजूक डिझाईनच्या स्टडेड बांगड्या देखील तनिष्कमध्ये आहेत. तोडे, शिंदेशाही तोडे, पाटल्या आणि पिचोडी असे विविध प्रकार नववधूची शान वाढवतात. परंपरेच्या पलीकडे जाऊन प्रेम आणि आधुनिकतेचा अप्रतिम मिलाप दर्शवणाऱ्या आधुनिक मंगळसूत्र डिझाइन्सचे डोर कलेक्शन यावेळी प्रस्तुत करण्यात आले. पुणेकर नववधुंनी पहिल्या पसंतीचा मान दिलेले हे कलेक्शन अनेकांच्या जीवनातील खास क्षणांचे साक्षीदार ठरले आहे.

टेल्स ऑफ ट्रॅडीशनमध्ये जडाऊ डिझाइन्स तनिष्कची अनोखी कारीगरी दर्शवतात, अनकट पोल्की, राजसी राजवाडा कुंदन नेकलेस शानदार आहेत, ओपन सेटिंग्समध्ये अनकट हिरे असलेले तेजस्वी चक्री दागिने डोळे दिपवतात. या कलेक्शनमध्ये आकर्षक मीनाकारी, इन्ले काम आणि उठावदार रंगांचे कॅल्सिडोनी दागिने देखील आहेत.

तनिष्कच्या बेस्ट ऑफ नॅचरल डायमंड्स कलेक्शनमध्ये पुण्यासाठी खास म्हणून तयार करण्यात आलेल्या तीन वेगवेगळ्या श्रेणींमधील दागिने निवडून तब्बल १६३४४६ महिलांनी तनिष्कला पसंत केले आहे, याचा देखील आनंद यावेळी साजरा करण्यात आला. एथरियल वंडर्स या मनोहारी श्रेणीमध्ये ऍक्वामरीन, टांझानाईट, पेस्टल टूरमलाईन्स आणि दुर्मिळ सिट्रिन्स यासारख्या दुर्मिळ स्टोन्सचा वापर करून तनिष्कचे सर्वात खास कलेक्शन तयार करण्यात आले आहे. क्लासिक हाय ज्वेलरी श्रेणीमध्ये भव्यता दर्शवणारे दागिने आहेत. द एन्चेंटेड ट्रेल्स कलेक्शन, तनिष्कचे नवे कलेक्शन देखील या कार्यक्रमात प्रदर्शित करण्यात आले. नदीच्या प्रवाहाचे अभिजात सौंदर्य, प्रकाश आणि पाण्याचा परस्परसंवाद, बहरलेल्या फुलांची मोहकता, फांद्यांची आकर्षक हालचाल आणि हिरव्यागार  जंगलातील पानांची कुजबुज हे विविध घटक समाविष्ट करून, नैसर्गिक सौंदर्यातून प्रेरणा घेऊन हे कलेक्शन तयार करण्यात आले आहे. निसर्गाच्या शांततेची कविता, निर्मळ प्रवाहांमधून सरकणाऱ्या बोटींचे नृत्य या कलेक्शनमध्ये दाखवण्यात आले आहे. हार्ट्स अँड ऍरोज कलेक्शनमध्ये कानातले, अंगठ्या आणि सॉलिटेअर स्ट्रिंगमध्ये उत्तम प्रकारचे कट डायमंड सॉलिटेअर्स प्रस्तुत केले आहेत, ज्यांनी पुणेकर ग्राहकांना जीवनातील खास क्षण साजरे करण्यासाठी अतुलनीय तेज प्रदान केले आहे.

तनिष्कने हा महत्त्वाचा टप्पा साजरा करत असताना, पुणेकर ग्राहकांनी ब्रँडला दिलेल्या प्रेम आणि विश्वासाबद्दल कृतज्ञता व्यक्त केली. या ब्रँडचा वारसा गुणवत्ता, विश्वास आणि ग्राहकांसोबत निर्माण झालेल्या चिरस्थायी नातेसंबंधांच्या पायावर बांधला गेला आहे. ज्यांनी तनिष्कवर वर्षानुवर्षे विश्वास ठेवला आहे ते विविध वयोगटातील ग्राहक तनिष्कच्या आजवरच्या वाटचालीतील महत्त्वाचा भाग बनले आहेत.

टायटन कंपनी लिमिटेडचे तनिष्कचे कॅटेगरी, मार्केटिंग आणि रिटेलचे व्हीपी श्री अरुण नारायण यांनी मनःपूर्वक आभार व्यक्त करताना सांगितले, “३,५०,९९३ पुणेकर कुटुंबे आमच्या परिवाराचा भाग बनल्याचा आनंद आणि महत्त्वाचा टप्पा साजरा करताना, अभिमानाबरोबरीनेच कृतज्ञतेने आमचा ऊर भरून आला आहे. तुमच्या जीवनातील सर्वात चांगल्या क्षणांमध्ये आम्ही सहभागी होऊ शकलो, नववधूंसाठी आयुष्यभराच्या सोनेरी आठवणी निर्माण करू शकलो याचा आम्हाला आनंद आहे. आम्ही मिळवलेले यश तुमच्या विश्वासावर आधारलेले आहे. उत्कृष्टता, कारीगरी आणि तुमच्या कहाण्या सांगणारे दागिने निर्माण करण्याचा वारसा जपण्यासाठी आम्ही वचनबद्ध आहोत. अतुलनीय गुणवत्ता, सेवा आणि संस्मरणीय अनुभव सातत्याने प्रदान करत राहू हे आमचे वचन आहे. आम्हाला तुमच्या आयुष्याचा आणि कुटुंबाचा सोनेरी भाग बनवल्याबद्दल मनःपूर्वक आभार, पुणे!”

पुणे,:- केंद्र शासनाच्या सहकार विभागामार्फत राज्यातील विविध कार्यकारी सहकारी संस्थांचे बळकटीकरण आणि सक्षमीकरणासाठी राबविण्यात येत असलेल्या योजनांची प्रभावीपणे अंमलबजावणी करण्यासाठी महाराष्ट्र सहकार विकास महामंडळाची “नोडल एजन्सी” म्हणून नियुक्ती करण्यात आली असल्याची माहिती राज्याचे सहकार आयुक्त दीपक तावरे यांनी दिली.

महाराष्ट्र सहकार विकास महामंडळाच्या नूतनीकृत कार्यालयाच्या उदघाटन प्रसंगी तावरे बोलत होते. उद्घाटन कार्यक्रमास अपर निबंधक मिलींद आकरे, सहसंचालक कृषी विनय आवटे, महामंडळाचे व्यवस्थापकीय संचालक मंगेश तिटकारे, पुणे विभागीय सहनिबंधक योगीराज सुर्वे, महामंडळाचे राज्य समन्वयक रमेश शिगटे, धनंजय डोईफोडे, महाव्यवस्थापक शिल्पा कडू, ज्योती शंखपाल, व्यवस्थापक डॉ. भास्कर पाटील, श्री.दिंगबर साबळे आणि महामंडळाचे अधिकारी उपस्थित होते.

यावेळी बोलताना तावरे म्हणाले, अटल अर्थसहाय्य योजनेच्या अंमलबजावणीसाठी शासनाने ४२८ संस्थाना कर्ज आणि अनुदान वितरणासाठी रुपये ७२ कोटी ४२ रुपयांचा निधी उपलब्ध करून दिला आहे. सुमारे शंभर संस्थांना दोन कोटी रुपये कर्ज वितरित करण्यात आले आहे. राज्यातील सहकारी संस्था आणि शेतकरी उत्पादक कंपन्यांच्या सभासद शेतकऱ्यांना नियमित आणि वाजवी दाराने खत पुरवठा करणे, संस्थाना खत परवान्यासाठी मार्गदर्शन करण्यात आले असून गेल्या चार वर्षात महामंडळाने रुपये ८५ कोटी रकमेचा खत पुरवठा केला आहे.

महामंडळाने शासनाच्या विविध योजना, उच्च तंत्रज्ञानावर आधारित शेती, प्रक्रिया उद्योग, स्मार्ट प्रकल्प, मॅग्नेट प्रकल्प,पोकरा प्रकल्प, नाबार्ड,आत्मा, एन.एच.एम. तसेच पंधरा हजार शेतकऱ्यांना प्रशिक्षण देण्यात आले. नाबार्ड आणि राष्ट्रीय सहकार विकास निगम यांच्यामार्फत महामंडळाची क्लस्टर बेस्ट बिझनेस ऑर्गनायझेशन म्हणून नियुक्ती झाली असून शेतकरी उत्पादक कंपन्यांची नोंदणी, प्रशिक्षण, कृषी निविष्ठा उपलब्ध करणे, अभ्यास दौऱ्याचे आयोजन, शेतमाल विक्रीसाठी मार्गदर्शन,प्रक्रियादार, निर्यातदार, खरेदीदार जोडणी असे कामकाज करण्यात येत असल्याचे त्यांनी सांगितले.

“सहकार से समृद्धी” योजने अंतर्गत केंद्र सरकार विविध सहकारी संस्थांच्या बळकटीकरणासाठी कटिबद्ध असुन त्यामध्ये विविध कार्यकारी सहकारी संस्थांच्या सक्षमीकरणासाठी, त्यांना सुधारीत तंत्रज्ञान, उद्योगवाढ, उत्पन्नवाढ, विविध व्यवसाय सुरु करण्यासाठी मार्गदर्शन करीत असून यामध्ये राज्यातील सुमारे बारा हजार संस्थांचा समावेश आहे. या संस्थांच्या संगणीकरणास केंद्र शासनाने मान्यता दिली असून संस्थांना संगणकाचा पुरवठा करण्यात आला आहे अशीही माहिती श्री. तावरे यांनी यावेळी दिली.

नाबार्ड तर्फे महामंडळाची प्रोडयुसर ऑर्गनायझेशन प्रमोटींग इन्स्टिट्यूट म्हणून नियुक्ती करण्यात आली असून तीस शेतकरी उत्पादक कंपन्यांची नोंदणी, प्रशिक्षण, व्यवसाय विकास आराखडा तयार करणे, निविष्ठा व्यवसाय, इत्यादी प्लॅटफॉर्मवर कंपन्यांची नोंदणी, शेतमाल विक्रीसाठी खाजगी कंपन्या, खरेदीदार प्रक्रियादारांसोबत जोडणी, प्रकल्पांचा लाभ मिळवून देणे यासंबधी कामकाज करण्यात येत आहे असे महामंडळाचे व्यवस्थापकीय संचालक मंगेश तिटकारे यांनी सांगितले.

राज्यातील १ हजार २५२ विविध कार्यकारी सहकारी संस्थांनी राष्ट्रीय सहकारी निर्यात संस्था, १ हजार ४९ विविध कार्यकारी सहकारी संस्थांनी राष्ट्रीय सहकारी सेंद्रिय संस्था आणि ५ हजार ६०७ विविध कार्यकारी सहकारी संस्थांनी भारतीय बियाणे सहकारी समितीच्या सदस्यत्वासाठी अर्ज दाखल केले आहे. या सहकारी संस्थांना महाराष्ट्र सहकार विकास महामंडळामार्फत मार्गदर्शन, व्यवसाय वृद्धीसाठी प्रशिक्षण देण्यात येणार आहे असेही त्यांनी सांगितले.

मुंबई – माहिती तंत्रज्ञानाच्या आधारे वीज ग्राहकांना सर्वोत्तम सेवा देणे आणि दर्जेदार ग्राहक सेवेसाठी प्रभावी धोरणात्मक उपक्रम राबविल्याबद्दल महावितरणला द गव्हर्नन्स नाऊ या संस्थेतर्फे दोन प्रवर्गात राष्ट्रीय स्तरावरील पुरस्कार प्रदान करण्यात आले. २६ सप्टेंबर २०२४ रोजी हॉटेल हॉलिडे इन, एरोसिटी, नवी दिल्ली येथे हा पुरस्कार वितरण सोहळा संपन्न झाला.

उपमुख्यमंत्री तथा ऊर्जामंत्री देवेंद्र फडणवीस यांनी महावितरणच्या कामकाजात आधुनिक माहिती तंत्रज्ञानाचा जास्तीत जास्त वापर करून ग्राहकांना पारदर्शक व गतिमान सेवा देण्याचे निर्देश दिले आहेत. त्यानुसार महावितरणकडून माहिती तंत्रज्ञानाच्या आधारे विविध उपक्रम राबविण्यात येत आहेत. या अंतर्गत ग्राहक सेवेत अधिक सुलभता आणणाऱ्या ऊर्जा चॅटबॉट व ईव्ही मोबाईल ॲपसाठी महावितरणला हे पुरस्कार प्राप्त झाले आहेत.

महावितरणचे ऊर्जा चॅटबॉट २४ तास  ग्राहकांच्या सेवेत आहे. ज्यामुळे वापरकर्त्यांना नवीन जोडणी अर्ज, तक्रार नोंदणी करणे, वीजबिल भरणे इ. सेवा सुलभपणे उपलब्ध झालेल्या आहेत. इंग्रजी व मराठी या दोन्ही भाषेत ग्राहकांना तत्परतेने, सुरक्षितरितीने माहिती प्रदान करून ग्राहकांचे समाधान करण्यात येत आहे. महावितरणच्या इलेक्ट्रिक व्हेईकल उपक्रमासाठी मानव विरहित ईव्ही चार्जिंग स्टेशनच्या उभारणी व इलेक्ट्रिक व्हेईकल वापरकर्त्यांसाठी मोबाईल ॲप उपलब्ध करुन दिले आहे. हे ॲप वापरकर्त्यांस चार्जिंग स्टेशन शोधणे व ई-वाहनांच्या व्यवस्थापनात मदत करते. हे ॲप महाराष्ट्रातील इलेक्ट्रिक व्हेईकल क्षेत्रातील पायाभूत सुविधांच्या वाढीला चालना देणारे ठरले आहे.

राष्ट्रीय पातळीवरील हे दोन्ही पुरस्कार महावितरणतर्फे महाव्यवस्थापक (माहिती तंत्रज्ञान) एकनाथ चव्हाण यांनी स्वीकारले. या यशाबद्दल महावितरणचे अध्यक्ष व व्यवस्थापकीय संचालक लोकेश चंद्र यांनी मुख्य महाव्यवस्थापक (माहिती तंत्रज्ञान) अविनाश हावरे व माहिती तंत्रज्ञान विभागाचे अभिनंदन केले.

मुंबई : मीरा भाईंदर परिसरात सार्वजनिक शौचालयाच्या बांधकाम आणि देखभालीशी संबंधित 100 कोटी रुपयांच्या घोटाळ्यात किरीट सोमय्या आणि त्यांची पत्नी मेधा सोमय्या या सहभागी असल्याचा आरोप ठाकरे गटाचे खासदार संजय राऊत यांनी केला होता.संजय राऊतांच्या या आरोपाविरोधात मेधा किरीट सोमय्या यांनी अब्रुनुकसानीचा खटला दाखल केला होता. याप्रकरणी आता संजय राऊत दोषी आढळले असून त्यांना 15 दिवसांची कैद सुनावली आहे. 

संयज राऊत यांनी किरीट सोमय्या आणि मेधा सोमय्या यांच्यावर भ्रष्टाचाराचा आरोप केला होता. मीरा भाईंदर शहरात 154 सार्वजनिक शौचालये बांधण्यात आले आहेत. त्यातील 16 शौचालये बांधण्याचं कंत्राट मेधा सोमय्या यांच्या युवक प्रतिष्ठानला मिळालं होतं. बनावट कागदपत्रे सादर करून मीरा-भाईंदर महापालिकेच्या अधिकाऱ्यांची फसवणूक करण्यात आल्याचा आरोप सोमय्यांवर आहे. तसेच, साडेतीन कोटींपेक्षा अधिक रुपयांची शौचालयाची बिलेही घेतल्याचा आरोप त्यांच्यावर करण्यात आला आहे.

आब्रुनुकसानीच्या खटल्यात संजय राऊतांना दिलासा; कोर्टाने दिला जामीन; ३० दिवस शिक्षेवर स्थगिती

भाजपचे माजी खासदार किरीट सोमय्या यांच्या पत्नी मेधा सोमय्या यांनी खासदार संजय राऊत यांच्याविरुद्ध अब्रुनुकसानीचा खटला दाखल केला होता.या प्रकरणात शिवडी कोर्टाने त्यानं दोषी ठरवले होते. कोर्टाने संजय राऊतांना १५ दिवसांची कोठडी व २५ हजारांचा दंड देखील ठोठावला होता. शिक्षा सुनावली गेल्यानंतर संजय राऊतांनी सत्र न्यायालयात धाव घेतली. सत्र नायायालयाने संजय राऊतांना जामीन मंजूर केला आहे. मेधा सोमय्यांनी २०२२ मध्ये संजय राऊतांविरुद्ध अब्रुनुकसानीचा खटला दाखल केला होता.

शिवडी कोर्टाने राऊतांना शिक्षा सुनावल्यानंतर राऊतांनी सत्र न्यायालयात धाव घेतली व अटकपूर्व जामिनासाठी अर्ज केला होता. त्यानंतर याचिकेवर झालेल्या सुनावणीत राऊतांना जामीन मंजूर करण्यात आला आहे. १५ हजारांच्या जातमुचलक्यावर संजय राऊतांना जामीन मंजूर झाला आहे. तसेच पुढील ३० दिवसांच्या आत वरच्या कोर्टात दाद मागण्याची मुभादेखील सत्र न्यायालयाने दिली आहे.

मीरा भाईंदरमधील टॉयलेट घोटाळ्यात मेधा सोमय्या यांचा सहभाग असल्याचा संजय राऊत यांनी आरोप केला होता. याविरोधात मेधा सोमय्या यांनी शिवडी कोर्टात अब्रुनुकसानीचा खटला दाखल केला होता. याप्रकरणाची सुनावणी पूर्ण होऊन न्यायालयाने राखून ठेवला होता. या निकालाची आज (26 सप्टेंबर) सुनावणी पार पडली. त्यानंतर न्यायालयाने संजय राऊत यांना २५ हजार रुपये दंड आणि १५ दिवसांच्या कारावासाची शिक्षा सुनावली होती. हा संजय राऊत यांच्यासाठी हा मोठा धक्का मानला जात होता. मात्र आता सत्र न्यायालयाने राऊतांना जामीन दिला आहे.