पुणे : सातव्या वेतन आयोगाचा फरक पुणे कॅन्टोन्मेंट बोर्डाच्या कर्मचाऱ्यांना मिळावा, वारसा हक्काने नोकऱ्या मिळाव्यात आदी मागण्यांचे निवेदन महाराष्ट्र प्रदेश काँग्रेसचे उपाध्यक्ष, माजी आमदार मोहन जोशी यांच्या नेतृत्वाखालील शिष्टमंडळाने बोर्डाचे मुख्य कार्यकारी अधिकारी सुब्रितो पाल यांना दिले.

काँग्रेस पक्षाच्या या शिष्टमंडळात माजी नगरसेवक अविनाश बागवे, अनिता मकवाना, चंद्रकांत चव्हाण, प्रविण करपे, सुरेश कांबळे यांचा समावेश होता.

कॅन्टोन्मेंट बोर्डात कायमस्वरूपी सेवेत ३५० आणि कंत्राटी पद्धतीने नेमलेले २०० कर्मचारी सेवेत आहेत. यातील कायमस्वरूपी सेवेतील काही कर्मचाऱ्यांचे निधन झाले असून, काहीजण सेविनिवृत्त झाले आहेत. अशा कर्मचाऱ्यांच्या ७२ वारसांनी वारसा हक्काने बोर्डात नोकरी मिळावी यासाठी आवश्यक ती वैद्यकीय प्रमाणपत्रे, कागदपत्रे बोर्डाकडे सादर केली आहेत. पण, अद्याप त्यावर निर्णय झालेला नाही. तरी वारसाहक्काने त्या ७२ जणांना बोर्डाच्या सेवेत सामावून घ्यावे, अशी मागणी मोहन जोशी यांनी निवेदनात केली आहे.

कंत्राटी पद्धतीच्या सेवकांना नियमित मासिक वेतन मिळत नाही, अशा तक्रारी आहेत. त्या तक्रारी दूर व्हाव्यात, सात, आठ वर्षे कंत्राटी पद्धतीने काम करणाऱ्या सेवकांची नेमणूक कायमस्वरूपी करण्यात यावी, असे निवेदनात म्हटले आहे.

खडकी कॅन्टोन्मेंट बोर्डाच्या कर्मचाऱ्यांना सातव्या वेतन आयोगाप्रमाणे वेतन दिले जाते. मात्र, पुणे कॅन्टोन्मेंट बोर्डाच्या कर्मचाऱ्यांना हा वेतन आयोग लागू केला जात नाही. ही तफावत दूर केली जावी. याबाबतचा निर्णय तातडीने व्हावा. त्यामुळे आपल्याला न्याय मिळावा अशी भावना कर्मचाऱ्यांमध्ये निर्माण होईल, असे निवेदनात म्हटले आहे.

कामगारांना न्याय देऊ अधिकाऱ्यांचे आश्वासन

शिष्टमंडळाने सुचविलेल्या मागण्यांंनुसार कर्मचाऱ्यांना योग्य तो न्याय देऊ, असे आश्वासन मुख्य कार्यकारी अधिकारी पाल यांनी दिले.

• तक्रारींचे प्रशासनामार्फत तात्काळ निवारण
• कल्याणकारी सर्व योजनांची एकाच ठिकाणी महिती

पुणे – लोकप्रतिनिधी हा नागरिकांच्या तक्रारी सोडवणे इतक्यापुरता मर्यादित नसतो. त्याने नागरिकांना भेटून त्यांची मत जाणून घ्यावीत अणि यातून नागरिकांशी संवाद कायम ठेवावा ही सर्वसामान्यांची अपक्षा असते. हीच अपेक्षा पूर्ण करण्यासाठीच पुण्यात दर महिन्याला “खासदार जनसंपर्क सेवा अभियान राबवण्यात येत आहे. पुण्याचे खासदार मुरलीधर मोहोळ यांच्या या अभियाना पुणेकरांचा वाढता उत्स्फूर्त प्रतिसाद मिळत असल्याचे शिवाजीनगर मतदारसंघात झालेल्या खासदार जनसंपर्क सेवा अभियानात अधोरेखीत झाले.

पुणेकरांनी आपला खासदार म्हणून मोहोळ यांची भरघोस मताधिक्याने निवड केली. त्याचा योग्य सन्मान राखण्यासाठी खासदार जनसंपर्क सेवा अभियान सुरू करण्यात आले. यात खासदार मोहोळ यांच्यासह मतदारसंघाचे आमदार, माजी नगरसेवक असे स्व लोकप्रतिनिधी उपस्थित असतात.याची सुरूवात कोथरूड मतदारसंघातून झाली. आतापर्यंत कोथरूडसह कसबा, कॅन्टोन्मेंट आणि शिवाजीनगर मतदारसंघात हा कार्यक्रम झाला. हा कार्यालय तास-दोनतासांचा कार्यक्रम असणार या समजुतीला सुरूवातीपासून छेद दिला गेला. प्रत्येक मतदारसंघात किमान पाच ते सहा तास म्हणजे अखेरच्या व्यक्तीचे म्हणणे ऐकून त्याचे समाधान करूनच कार्यक्रमाची सांगता प्रत्येक मतदार संघात झाली.

या ठिकाणी महानगरपालिका, राज्य शासनाचे अधिकारी, पोलीस अधिकारी उपस्थित असतात. नागरिकांच्या तक्रारी किंवा सूचना खासदार पहिल्यांदा ऐकून, त्यावर त्यांना योग्य अधिकाऱ्याकडे पाठवतात. तक्रारीचा निपटारा जागेवरच करण्यावर त्यांचा भर असतो. केंद्र, राज्य सरकार, महानगरपालिकेच्या कल्याणकारी योजनांची महिती तेथे उपस्थित राहणार असलेले भाजपचे कार्यकर्ते करून देत नागरिकांकडून अर्ज भरून घेतात. सर्व प्रकारचे सहाय्य नागरिकांना करण्यासाठी कार्यकर्ते राबत असतात.

नागरिकांच्या चहा, पाणी, नाष्टा किंवा जेवण याचीही काळजी अभियानस्थळी घेतलेली असते. या अभियानात केवळ तक्रारी सोडवल्या जात नाहीत तर नागरिकांचे कोणत्याही सार्वजनिक हिताच्या सूचना, संकल्पना ऐकून घेतल्या जातात. त्याची लिखीत नोंद घेतली जाते. चांगल्या संकल्पना लेखी स्वरूपात मांडण्याची संधी नागरिकां इथे दिली जाते. तसेच प्रशासनाशी संवाद साधण्याची संधी दिली जाते. शासनाच्या कामाचीही महिती देण्याचा संधी या अभियानात मिळते. त्यातून नागरिकांचे गैरसमज दूर केले जातात.

खासदार जनसंपर्क सेवा अभियानाबद्दल खासदार मोहोळ म्हणाले की, ‘हे अभियान प्रामुख्याने मतदारांशी संवाद साधण्यासाठीचे अभियान आहे. प्रत्यक्ष अभियानावेळी जे करता ते कार्यालयात बसूनही करणे शक्य होते. पण एकाच वेळी संपूर्ण मतदार संघातून नागरिक आले तर प्रत्येकाला फार वेळ देता येत नाही. म्हणून प्रत्येक विधानसभा मतदारसंघात जाऊन तेथे नागरिकांशी संवाद साधण्याला आम्ही प्राधान्य दिले आहे. त्यामुळे नागरिकांची संख्या मर्यादित राहते आणि आलेल्या प्रत्येकाशी बोलताही येते.

‘प्रशासन व नागरिक आमनेसामने असल्याने तक्रारींचा लवकर निपटारा जागीच करता येतो. यातून नागरिकांना मिळणारे समाधान आमच्यासारख्या लोकप्रतिनिधींसाठी जास्त महत्वाचे आहे. आमचे लोकप्रतिनिधी भेटतच नाहीत या तक्रारीची संधी देऊ इच्छित नाही. या निमित्ताने कार्यकर्त्याशीही बोलता येते. शासन व प्रशासनाबद्दल नागरिकांच्या भावना समजतात. त्याचा उपयोग पक्षसंघटनेलाही होतो असा अनुभव आहे’, असेही मोहोळ म्हणाले

-सदगुरु माता सुदीक्षा जी महाराज यांच्या छत्रछायेखाली जमणार लाखो भाविक

पिंपरी, पुणे २३ जानेवारी २०२४:आज जिथे एकीकडे देश आणि समाज संकीर्णता आणि संकुचित वृत्तीच्या भिंतींमध्ये अडकला आहे, तिथे दुसरीकडे संत निरंकारी मिशन या भिंती तोडून अमर्याद विस्ताराच्या दिशेने प्रेरित करण्याचा प्रयत्न करत आहे. सदगुरू माता सुदीक्षा जी महाराज यांच्या पवित्र सान्निध्यात महाराष्ट्राचा ५८ वा वार्षिक निरंकारी संत समागम २४ ते २६ जानेवारी २०२५ दरम्यान आयोजित केला आहे. यामध्ये “विस्तार – अनंताच्या दिशेने” या विषयावर आध्यात्मिक विचारधारेचे दिव्य रूप सजणार आहे.

सुमारे ३०० एकर च्या विस्तीर्ण क्षेत्रावर साजरा होणाऱ्या या भक्तीमय महायज्ञात देश-विदेशातील लाखो श्रद्धाळू, भक्त आणि मान्यवर सहभागी होतील. त्याचबरोबर निरंकारी संत समागम चे थेट प्रसारण मिशनच्या वेबसाइट (www.nirankari.org/live) वर जगभरातील अनेक आध्यात्मिक प्रेमींना पाहायला मिळणार आहे. या समागमाचे सर्व व्यवस्थापन संत निरंकारी मिशनच्या सेवादलांनी अत्यंत नियोजनबद्ध पद्धतीने केले आहे.

संत निरंकारी मंडळाचे समागम चेअरमन श्री शंभूनाथ तिवारी यांनी माहिती देताना सांगितले की आरोग्य, सुरक्षा, वाहतूक, कॅन्टीन, पार्किंग, स्वच्छता आणि इतर मूलभूत सेवा सांभाळण्यासाठी संत निरंकारी सेवादलाचे सुमारे १५,००० सदस्य समर्पित भावनेने सेवा देतील.

संत समागमाच्या तीनही दिवसांमध्ये दुपारी २:०० ते रात्री ८:३० या वेळेत सत्संगाचा मुख्य कार्यक्रम आयोजित होईल. यात विविध संत महात्मा आपले विचार मांडतील आणि समर्पित संगीतकार भक्तिरसाची उधळण करतील. यात सर्वच वयोगटांतील विविध भाषा बोलणारे श्रद्धाळू सहभागी होतील. याशिवाय, दरवर्षीप्रमाणे या वर्षीदेखील एक आध्यात्मिक कवी दरबार संत निरंकारी समागम चे विशेष आकर्षण ठरेल. सत्संगाच्या शेवटी सदगुरु माता सुदीक्षा जी महाराज आणि निरंकारी राजपिता रमित जी यांचे प्रेरणादायी प्रवचन सर्वांना प्रेरणादायक ठरेल.

निरंकारी मिशनच्या कलाकारांकडून एक आगळीवेगळी प्रदर्शनी ही आयोजित करण्यात आली आहे. यात मिशनचा इतिहास, तत्त्वज्ञान, आध्यात्मिक आणि सामाजिक कार्याचे भावपूर्ण चित्रण सादर करण्यात आले आहे. तसेच मिशनद्वारे प्रकाशित सर्व मासिके आणि पुस्तकेही समागमा मधे उपलब्ध असतील.

या भव्य-दिव्य संत समागमाच्या यशस्वी आयोजनासाठी महाराष्ट्र शासनाशी संबंधित विविध यंत्रणांचेही मोलाचे योगदान मिळत आहे. मानवाच्या मनोवृत्तीला ज्ञान आणि विचारांच्या माध्यमातून अमर्याद विस्तार देणाऱ्या या संत समागमात आपले स्वागत आहे.

स्वानंद प्रतिष्ठानच्या वतीने आयोजित स्वानंद व्याख्यानमालेतील दुसरे सत्र  
पुणे : परराष्ट्र धोरण हा पहिल्यापासून आपल्याकडे दुलर्क्षित राहिलेला विषय आहे. पं. नेहरू यांचा याविषयी अभ्यास होता. परंतु त्यावेळी हे ठराविक लोकांपुरते मर्यादित राहिले. पंतप्रधान नरेंद्र मोदी यांनी जी २० संमेलन घेऊन हे धोरण घराघरात पोहोचविले. मोदींनी जनतेचा सहभाग घेतला. त्यामुळे आजच्या परराष्ट्र धोरणातून विकसित भारताला बळ मिळेल, असा विश्वास राज्याचे उच्च शिक्षण संचालक शैलेंद्र देवळणकर यांनी व्यक्त केला.  

स्वानंद प्रतिष्ठानच्यावतीने स्वानंद व्याख्यानमालेचे आयोजन सिंहगड रस्त्यावरील अभिरुची मॉल येथील संस्कार गुरुकुल येथे करण्यात आले. त्यातील दुसऱ्या सत्रात ते बोलत होते. यावेळी आमदार भीमराव तापकीर, काका चव्हाण, राजेंद्र मोरे, जगन्नाथ हेंद्रे, प्रतिष्ठानचे संस्थापक अध्यक्ष प्रकाश असलेकर आदी उपस्थित होते.

शैलेंद्र देवळणकर म्हणाले, भारताचे परराष्ट्र धोरण हे चीन आणि पाकिस्तान पुरते मर्यादित होते. मात्र, आज नरेंद्र मोदी यांनी ९२ देशांचे दौरे केले आहेत. आपण अमेरिका आणि युरोप सारख्या देशांसमोर डोळ्यात डोळे घालून निर्णय सांगत आहोत, हा मोठा बदल झाला आहे. पायाभूत सुविधा, परकीय गुंतवणूक आणि कौशल्य विकास या तीन स्तंभांवर देशाची प्रगती होईल.  

ते पुढे म्हणाले, उद्योगात रोजगार क्षमता आहे. त्यामुळे मेक इन इंडिया, आत्मनिर्भर भारत हे नरेंद्र मोदी यांनी आणले. आज २३ टक्के रोजगार उपलब्ध असून उद्योगवृद्धीमुळे ६३ टक्के रोजगार उपलब्ध होऊ शकेल. शिक्षण पद्धतीत बदल आणि परराष्ट्र व्यवहार याबाबत आपण अधिक सजग व्हायला हवे. भारतीयांमध्ये सकारात्मकता असेल, तर भारत विकसित राष्ट्र होईल, असेही त्यांनी सांगितले. भीमराव तापकीर याने मनोगत व्यक्त केले. प्रकाश असलेकर यांनी प्रास्ताविक केले. प्रशांत पितालीया यांनी सूत्रसंचालन केले.

महिलांवरील अत्याचारांसह फसवणूकीच्या गुन्ह्यात वाढ ,खून, खुनाचे प्रयत्न यात घट,

पुणे : ‘ पुण्यात कोयता गँग बिंग काही अस्तित्वात नाही,मात्र महिलांवरील अत्याचारांच्या गुन्ह्यांत वाढ झाली आहे. बलात्कार, विनयभंग, बालकांचे लैंगिक अत्याचारांपासून संरक्षण कायद्यान्वये (पोक्सो) गुन्हे दाखल होण्याचे प्रमाण वाढते आहे. महिलांवरील अत्याचारांचे गुन्हे प्राधान्याने नोंदवून त्यांना न्याय द्यावा, तसेच आरोपींना कठोर शिक्षा होण्यासाठी प्रयत्न करावेत, अशा सूचना शहरातील सर्व पोलीस ठाण्यांच्या प्रमुखांना देण्यात आल्या आहेत. पीडित महिलांना आधार देण्यासाठी पोलिसांकडून त्यांच्याशी सातत्याने संपर्क ठेवण्यात येत आहे’, अशी माहिती पोलीस आयुक्त अमितेश कुमार यांनी दिली.फसवणूक करणाऱ्यांविरुद्ध गुन्हे दाखल करण्याचे आदेश देण्यात आले आहेत. २०२४ मध्ये फसवणुकीचे २०२१ गुन्हे दाखल झाले. २०२३ मध्ये ११०८ गुन्हे दाखल झाले होते. फसवणूक, सायबर गुन्ह्यांच्या संख्येत वाढ झाली आहे. सामान्यांना न्याय देण्यासाठी अशा प्रकारचे गुन्हे दाखल करण्या यावे. जमीन बळकावणे, फसवणूक करणाऱ्यांविरुद्ध पोलिसांकडून कडक कारवाई करण्यात येणार आहे, अशी माहिती पोलीस आयुक्त अमितेश कुमार यांनी दिले.

पुणे शहरातील गंभीर गुन्ह्यांचा वार्षिक आढावा गुरुवारी जाहीर करण्यात आला. या वेळी पोलीस आयुक्त अमितेश कुमार बोलत होते. सहपोलीस आयुक्त रंजनकुमार शर्मा, अतिरिक्त पोलीस आयुक्त मनोज पाटील, शैलेश बलकवडे, प्रवीणकुमार पाटील, अरविंद चावरिया या वेळी उपस्थित होते. गेल्या वर्षी घडलेल्या गंभीर गुन्ह्यांची माहिती, तसेच पोलिसांकडून करण्यात येणाऱ्या उपाययोजनांची माहिती पोलीस आयुक्त अमितेश कुमार यांनी पत्रकारांशी बोलताना दिली.
शहरात महिलांवरील अत्याचारांच्या गुन्ह्यांमध्ये वाढ झाली आहे. मुळात महिलांवरील अत्याचारांचे गुन्हे प्राधान्याने नोंदवून घेण्याचे आदेश सर्व पोलीस ठाण्यांच्या प्रमुखांना देण्यात आले आहेत. शाळकरी मुलांचे योग्य आणि अयोग्य स्पर्शाबाबत समुपदेशन करण्यात येत आहे. त्यामुळे बालकांवरील अत्याचारांचे गुन्हे दाखल होण्याचे प्रमाण वाढत आहे. अत्याचार प्रकरणातील १२०० फिर्यादी पीडित महिलांना पोलिसांना आधार देण्यासाठी पोलीस त्यांच्या संपर्कात आहेत. पीडित महिलांना आरोपींकडून त्रास देण्यात येत नाही ना, त्यांच्यावर कोणताही दबाब टाकण्यात येत नाही ना, याचीही माहिती घेण्याच्या सूचना तपास अधिकाऱ्यांना देण्यात आल्या आहेत. त्यांच्या समस्या सोडविण्यास प्राधान्य देण्यात येत आहे, असे त्यांनी सांगितले.

पुणे पोलिसांचे महत्वपूर्ण तपास
सोमवार पेठेतून मेफेड्रोन जप्त, कुरकुंभमधील कंपनीवर छापा, ३६०० कोटींचे मेफेड्रोन जप्त
माजी नगरसेवक वनराज आंदेकर खून प्रकरण
शरद मोहोळ खून प्रकरण
सतीश वाघ खून प्रकरण
कल्याणीनगर अपघात प्रकरण
बोपदेव घाट सामूहिक बलात्कार प्रकरण

२०२४ मध्ये शहरात ९३ खून झाले. त्यापैकी १४ खून गेल्या वर्षी जानेवारी महिन्यात झाले होते. २०२३ मध्ये शहरात १०१ खून झाले होते. २०२३ मध्ये खूनाचा प्रयत्न केल्याप्रकरणी २४४ गु्न्हे दाखल झाले होते. २०२४ मध्ये खुनाचा प्रयत्न केल्याप्रकरणी २४४ गुन्हे दाखल झाले होते. २०२४ मध्ये गंभीर दुखापतीच्या गुन्ह्यांमध्ये वाढ झाली. गंभीर दुखापत केल्याप्रकरणी १५३५ गुन्हे दाखल झाले होते. २०२३ मध्ये १३९० गुन्हे दाखल झाले होते. दहशत निर्माण करुन दुखापत करणाऱ्या सराइतांविरुद्ध गुन्हे दाखल करण्याचे आदेश देण्यात आले आहेत. त्यामुळे दुखापतीच्या गुन्ह्यांमध्ये वाढ झाली आहे.

दागिने हिसकाविणाऱ्यांवर चोरट्यांवर मोक्का कारवाई
गेल्या काही दिवसांत शहरात पादचारी महिलाकंडील दागिने हिसकावण्याच्या घटनांमध्ये वाढ झाली आहे. दागिने हिसकाविणाऱ्या चोरट्यांना जरब बसविण्यासाठी महाराष्ट्र संघटित गुन्हेगारी नियंत्रण कायद्यान्वये (मोक्का) कारवाई करण्यात येणार आहे, असा इशारा पोलीस आयुक्त अमितेश कुमार यांनी दिला.

पुण्यातील गुन्हेगारी दृष्टीक्षेपात
२०२४ मध्ये गंभीर स्वरुपाचे १२ हजार ९५४ गु्न्हे दाखल (भाग एक ते पाच गुन्हे)
१०० गुन्हेगारांविरुद्ध झोपडपट्टी दादा प्रतिबंधक कायद्यान्वये कारवाई (एमपीडीए)
४८ गुन्हेगारी टोळ्यांविरुद्ध ‘मोक्का’कारवाई
घरफोडीच्या गुन्ह्यात घट, ५२७ घरफोडीचे गुन्हे दाखल
शिक्षेचे प्रमाण वाढीस
महिलांच्या सुरक्षेस प्राधान्य; १०९१ टोल फ्री क्रमांकावर संपर्क साधण्याचे आवाहन
महिला दक्षता समितीच्या बैठका
अल्पवयीन मुलांमधील गुन्हेगारी रोखण्यासाठी समुपदेशन, पालकांशी संंवाद
गुन्हे सांख्यिकी
गंभीर गुन्हे –

दाखल गुन्हे (२०२४) – दाखल गुन्हे (२०२३)

खून – ९३ – १०१

खुनाचा प्रयत्न – १८६ – २५५

फसवणूक – २०२१ – ११०८

दुखापत – १५३५ – १३९०

घरफोडी – ५२७ – ६०४

वाहन चोरी – १९८२ – १९८९

बलात्कार – ५०५ – ४१०

विनयभंग – ८६४ – ७७५

एकुण गंभीर गुन्हे – १२९५४ – ११९७४

पुणे-शिवसेनाप्रमुख हिंदूहृदयसम्राट बाळासाहेब ठाकरे यांनी समाजात परिवर्तन घडवण्यासाठी आणि सामान्य माणसाचा आवाज बुलंद करण्यासाठी आपले संपूर्ण जीवन समर्पित केले. त्यांच्या कार्यकर्तृत्वाने प्रेरणा घेत, समाजहिताचे अनेक उपक्रम राबवले जात आहेत असे प्रतिपादन पुणे शहरप्रमुख नाना भानगिरे यांनी केले.

शिवसेना प्रमुख बाळासाहेब ठाकरे यांच्या जयंतीनिमित्त पुणे शहर शिवसेनेच्या वतीने सारसबाग जवळील हिंदूह्रदयसम्राट बाळासाहेब ठाकरे येथील कलादालन येथे बाळासाहेब ठाकरे यांच्या पुतळ्यास पुष्पहार अर्पण करून अभिवादन केले. तसेच पुणे शहरात विविध ठिकाणी रक्तदान शिबिराचे देखील आयोजन करण्यात आले होते. या शिबिरामध्ये पुणेकर नागरिकांनी मोठ्या प्रमाणात सहभाग नोंदवला. या उपक्रमाद्वारे शिवसेनेच्या ८० टक्के समाजकारण आणि २० टक्के राजकारण आणि बाळासाहेब ठाकरे यांच्या विचारांचा वारसा जपण्याचा संकल्प शिवसेनेच्या वतीने करण्यात आला.

बाळासाहेब ठाकरे यांचे तेजस्वी नेतृत्व, समाजाच्या प्रत्येक घटकासाठी दिलेला आवाज, मराठी माणसांसाठी असलेला लढा महाराष्ट्राला सदैव प्रेरणा देत राहील. हिंदूहृदयसम्राट बाळासाहेब ठाकरे यांनी मराठी माणसाचा आवाज बुलंद तसेच हिंदुत्वासाठी आपले संपूर्ण जीवन समर्पित केले. त्यांच्या कार्यकर्तृत्वाने प्रेरणा घेत, समाजहिताचे अनेक उपक्रम शिवसेनेच्या वतीने राबवले जात असून त्यांच्या विचारांचा आणि कार्याचा वारसा अविरतपणे पुढे चालवत राहू असे प्रतिपादन शहरप्रमुख नाना भानगिरे यांनी केले.

याप्रसंगी महिला आघाडी सहसंपर्कप्रमुख सुदर्शनाताई त्रिगुनाईत, शहर संघटक श्रीकांत पुजारी, महिला आघाडी शहरप्रमुख श्रुतीताई नाझीरकर, सुरेखाताई पाटील, राजश्रीताई माने, उपशहर प्रमुख सचिन थोरात, संजय डोंगरे, सुधीर कुरुमकर, विकी माने, प्रमोद प्रभुणे, गौरव साईनकर, गणेश काची, शहर संघटक आकाश रेणूसे, विभाग प्रमुख नितीन लगस, निलेश जगताप, महेंद्र जोशी, मयूर पानसरे, उद्धव कांबळे, मार्तंड धंधुके, सुहास कांबळे, प्रणव थोरात, गडकरी सर यांच्यासह पुणे शहरातील सर्व शिवसैनिक उपस्थित होते.

पुणे-कोथरूड आणि कर्वेनगरमध्ये सोनसाखळी चोरीच्या घटना समोर आल्या आहेत. कोथरूडमध्ये, मॉर्निंग वॉकसाठी जात असलेल्या एका महिलेच्या गळ्यातील मंगळसूत्र चोरट्यांनी चोरले, तर कर्वेनगरमध्ये एका सोसायटीत घुसून चोरट्यांनी महिलेच्या गळ्यातील सोनसाखळी हिसकावली. या घटनांमुळे पुण्यातील महिलांमध्ये भीतीचे वातावरण पसरले असून, सोनसाखळी चोरांवर जरब बसविण्याची मागणी भाजप कोथरुड मंडलाच्या वतीने आज करण्यात आली.

भाजपा कोथरूड मंडलाच्या शिष्टमंडळाने आज कोथरूड मधील अलंकार पोलीस चौकीच्या निरिक्षक सुमिता रोकडे यांची भेट घेऊन निवेदन दिले. यावेळी कोथरूड मधील सोनसाखळी चोरीच्या घटना वाढत असून, महिलांमध्ये भितीचे वातावरण आहे. कर्वेनगर भागात बुधवारी पहाटे मॉर्निंग वॉकसाठी जात असलेल्या वृद्ध महिलेच्या गळ्यातील मंगळसूत्र चोरट्याने हिसकावले. त्याचे सीसीटीव्ही समोर आले असून, दुचाकीवरून आलेल्या चोरट्याने वृद्ध महिलेवर पाळत ठेऊन तिच्या गळ्यातील मंगळसूत्र हिसकावले. यावेळी हिसकवताना मंगळसूत्राचा एक भाग तुटला आणि खाली पडला, मात्र चोरटा परत आला आणि पडलेला भाग उचलून घेऊन गेला. या घटनेमुळे कर्वेनगर परिसरात सुरक्षा आणि पोलिसांच्या कार्यवाहीबाबत चिंता व्यक्त केली जात आहे.

दुसऱ्या एका घटनेत दुचाकीवरून आलेल्या चोरट्यांनी एका महिलेची सोनसाखळी हिसकावली. ही घटना देखील सीसीटीव्ही मध्ये कैद झाली आहे. चोरट्यांनी थेट सोसायटीच्या पार्किंगमध्ये घुसून महिलेची सोनसाखळी लंपास केली. त्यामुळे या दोन्ही घटनांचे गांभीर्य पाहता, पोलिसांनी कठोर पावले उचलावीत, आणि चोरावर जरब बसवावी. त्यासाठी सकाळी आणि संध्याकाळच्या वेळेस गस्त वाढवावी, अशी मागणी केली.

यावेळी कोथरूड मंडळाचे अध्यक्ष डॉ संदीप बुटाला, पुणे शहरांचे सरचिटणीस पुनीत जोशी,नगरसेवक दीपक पोटे, नगरसेवक जयंत भावे,नगरसेविका मंजुश्री खर्डेकर, स्वीकृत सदस्‍य ॲड.मिताली सावळेकर, भाजपा कोथरूड दक्षिण मंडल सरचिटणीस दीपक पवार, गिरीश खत्री, प्रभाग १३ च्या अध्यक्ष ॲड. प्रचि बगाटे, युवा मोर्चा सरचिटणीस कुणाल तोंडे, असिफ तांबोळी, महिला मोर्चा उपाध्यक्ष सौ.गौरी करंजकर, जेष्ठ नागरिक आघाडीचे सरचिटणीस नितीन कंधारे आदी पदाधिकारी उपस्थित होते.

पुणे, दि.23 जानेवारी : एसएफए फुटबॉल टुर्नामेंटमध्ये नांदे येथील ध्रुव ग्लोबल स्कूलच्या फुटबॉल खेळाडूंनी विजयाने सुरुवात केली.   शिवछञपती क्रीडा संकुल बालेवाडी येथे झालेल्या एकतर्फी सामन्यात ध्रुव ग्लोबल स्कूलच्या खेळाडूंनी लॉयोला हायस्कूलवर २-० च्या विजयासह तिसर्‍या स्थानासाठी सामना जिंकला. खेळाडू आरव चौधरी व श्रीजन वर्मा यांनी गोल केला. ध्रुवच्या खेळाडूंनी प्रेक्षकांना ही विजयाची भेट देऊन टाळ्यांचा कडकडाट केला. खेळाडूंचा जोश आणि चिकाटी पाहून ध्रुव ग्लोबल स्कूलचे संचालक यशवर्धन मालपाणी व प्रिन्सिपल संगीता राऊतजी यांनी विद्यार्थ्यांना शुभेच्छा दिल्यात.
सामन्यातील पहिल्या हाफ च्या २५’ व्या मिनिटाला ध्रुव ग्लोबल स्कूलचा खेळाडू आरव चौधरी याने गोल करून संघाला १-० अशी आघाडी मिळवून दिली. पहिल्या सत्रात ध्रुव स्कूलच्या खेळाडूंनी ही आघाडी कायम ठेवली. दुसर्‍या सत्रातही ध्रुव च्या खेळाडूंनी उत्कृृष्ट कामगिरी सुरू ठेवली. २९’ व्या मिनिटाला श्रीजन वर्मा याने गोल करत संघाची आघाडी २-० अशी वाढवली व विजय निश्चित केला.  
ध्रुव ग्लोबल स्कूलच्या फुटबॉल टीम मध्ये समनमय गुप्ता, आरव चौधरी, कबीर बिजूर, आयुष गाडवे, अर्जुन विजयेंद्रन, नमिष सिंह, श्रीजन वर्मा आणि नरेन प्रसाद यांचा समावेश होता. या खेळाडूंनी आपल्या चिकाटीच्या जोरावर यश मिळविले. या खेळाडूना समर्पित प्रशिक्षक अमेय कलाटे आणि पार्थ सायकिया यांचे मार्गदर्शन लाभले.

आरोग्य, पायाभूत सुविधा व बंदरांच्या सक्षमीकरणाला चालना मिळणार; अंबर आयदे यांची माहिती 
पुणे: दावोसमधील (स्वित्झर्लंड) वर्ल्ड इकॉनॉमिक फोरममध्ये मुख्यमंत्री देवेंद्र फडणवीस यांच्या नेतृत्वात महाराष्ट्र शासनाने पुण्यातील रूरल एन्हान्सर्स संस्थेशी १० हजार कोटींच्या गुंतवणुकीचा क्रेडिट लाईन सामंजस्य करार केला. आरोग्यसेवा, रुग्णालय, पायाभूत सुविधा, बंदरे व सामाजिक क्षेत्राच्या सक्षमीकरणासाठी हा सामंजस्य करार महत्वपूर्ण असून, मुख्यमंत्री फडणवीस व संस्थेचे प्रमुख अंबर आयदे यांनी करार आदानप्रदान केला. महाराष्ट्रातील स्टार्टअपसाठी, तसेच पुण्यासाठी ही अतिशय अभिमानास्पद गोष्ट असल्याचे केंद्रीय सहकार व हवाई वाहतूक राज्यमंत्री मुरलीधर मोहोळ यांनी दूरध्वनीवरून अभिनंदन करताना म्हटले आहे.
राज्य शासनाच्या वतीने परकीय गुंतवणूक विभागाचे सचिव कौस्तुभ धावसे यांच्या पुढाकारातून नेदरलँड येथील शासकीय संस्थांचा त्रिपक्षीय करार झालेला आहे. यावेळी कौस्तुभ धावसे, राज्य शासनाचे उद्योग विभागाचे प्रधान सचिव पी. अनबलगन, एमआयडीसी विभागाचे सचिव पी. वेलारसू, नेदरलँड शासनामार्फत एडविन सीएसवरदा, रुरल एन्हान्सर्स समूहाचे चेअरमन इन डेस्क सुब्रह्मण्यम येडावली, मुख्यमंत्र्यांचे सहायक जयंत येरवडेकर उपस्थित होते. अंबर आयदे यांच्या संस्थेला राज्य शासनामार्फत दावोस येथे उपस्थित राहण्याचे विशेष आमंत्रण देण्यात आलेले होते.
अंबर आयदे म्हणाले, “ही गुंतवणूक पुढच्या दोन वर्षांमध्ये राज्यातील आरोग्य व्यवस्था, राज्य शासनासाठी लागणारी ॲम्बुलन्स व्यवस्था, पुण्यातील लोहगाव येथील पोलीस बांधवांचा रखडलेला गृहप्रकल्प, पायाभूत सुविधांची उभारणी आणि महाराष्ट्र राज्य शासनाची बंदरे, शिपिंग इन्फ्रास्ट्रक्चर बळकट करण्याच्या दृष्टीने उपयोगात आणण्यात येणार आहे. यापूर्वी संस्थेच्या माध्यमातून भारतातील पहिली ईसीए आधारित गुंतवणूक पुणे महापालिकेसोबत वारजे येथे मल्टीस्पेशालिटी हॉस्पिटल उभारण्यासाठी २०२३ करण्यात आलेली आहे. हे हॉस्पिटल २०२७ मध्ये पुणेकरांच्या सेवेत येणार आहे. मार्चमध्ये मुख्यमंत्र्यांच्या उपस्थितीत मुंबई येथे ईसीए आधारित भारतातील पहिली आर्थिक परिषद घेण्यात येणार आहे.”
कौस्तुभ धावसे म्हणाले, रुरल एन्हान्सर्स संस्थेचे अंबर आयदे हे मुख्यमंत्र्यांच्या महत्त्वकांक्षी ‘कंट्री डेस्क’ या परकीय गुंतवणूक बघणाऱ्या टीमचे सदस्य आहेत. २०२१ पासून महाराष्ट्रात ईसीए गुंतवणूक कशी आणता येईल यावर ते काम करत आहेत. दावोसमध्ये झालेल्या १० हजार कोटी रुपयांच्या गुंतवणूक करारामुळे राज्याला मोठा फायदा होणार आहे.

रुग्णालय, आरोग्यसेवा व अन्य सामाजिक क्षेत्राच्या सक्षमीकरणासाठी नेदरलँड व रूरल एन्हान्सर्स संस्थेशी झालेला १० हजार कोटी गुंतवणुकीचा करार महत्वाचा ठरेल. यातून रुग्णालयांची उभारणी, ऍम्ब्युलन्स व्यवस्था, पायाभूत सुविधांची उभारणे करणे शक्य होईल.- देवेंद्र फडणवीस, मुख्यमंत्री महाराष्ट्र