जाहीरनाम्यात टँकरमुक्ती, सिग्नलमुक्ती, महिला सक्षमीकरणासह सर्वांगीण विकासाची ग्वाही

पुणे :
राष्ट्रवादी काँग्रेस, भाजप, शिवसेना व मित्र पक्षांचे महायुतीचे वडगाव शेरी मतदारसंघातील उमेदवार सुनील टिंगरे यांनी आपल्या जाहीरनाम्यातून वडगावशेरीचा चेहरा – मोहरा बदलण्याचा संकल्प केला आहे. त्यामध्ये टँकरमुक्त मतदारसंघ, मेट्रोचे विस्तृत जाळे, सिग्नलमुक्त नगर रस्ता, महिला सक्षमीकरण, पब – बारवर बंदी, युवक कल्याण यांसारख्या महत्त्वाच्या विषयांचा संकल्प करण्यात आला असून वडगावशेरी मतदारसंघाच्या सर्वांगीण विकासाची ग्वाही जाहीरनाम्याद्वारे आमदार टिंगरे यांनी दिली आहे.
विधानसभा निवडणुकीच्या प्रचाराचा समारोप मतदार संघात कार्यकर्त्यांनी आपआपल्या भागात प्रचारफेरीच्या माध्यमातून केला. या निवडणुकीसाठीचा जाहीरनामा आमदार टिंगरे यांनी प्रसिद्ध केला आहे. त्यात मतदार संघातील अनेक महत्वाच्या प्रश्नांना हात घालण्यात आला असून सर्व घटकांसाठी विविध प्रकल्प आणि योजना राबविण्याचे आश्वासन दिले आहे.
त्यात प्रामुख्याने छत्रपती शिवरायांचे विचार जनमाणसांपर्यंत पोहोचविण्यासाठी शिवसृष्टी पार्क, नगर रस्त्यावरील वाहतूक कोंडीचा प्रश्न सोडविण्यासाठी बीआरटी मार्ग पूर्णपणे हटवून, ग्रेड सेपरेटर, उड्डाणपूल उभारणी व मेट्रोचे विस्तारित जाळे याद्वारे नगर रस्ता सिग्नल मुक्त करणे, खराडी आयटी पार्कमध्ये ऑक्सिजन पार्कच्या धर्तीवर उद्यानाची निर्मिती, खराडी, लोहगावसारख्या भागांना टँकरमुक्त करणे, मतदार संघातील पूरस्थितीवर कायमस्वरूपी उपाय योजना, वैद्यकीय मदत केंद्र, मैदानांची उभारणी, विश्रांतवाडी चौकात डॉ. बाबासाहेब आंबेडकर यांचा पुतळा उभारणे, माजी सैनिकांसाठी सांस्कृतिक भवन, कोकण भवन, धानोरी येथे भारताच्या विविधतेचे दर्शन घडविणारे मिनी इंडिया पार्क उभारणी, झोपडपट्टीधारकांना हक्काचे घर मिळावे यासाठी झोपडपट्टी पुनर्वसन योजनेची परिणामकारक अंमलबजावणी, डिजिटल शाळा, ग्रंथालय, युवकांसाठी जीम, नाट्यगृह, वन उद्यान, ॲडव्हेंचर पार्क, स्वच्छतागृह, हॉकर्स प्लाझा, अशा विविध योजना राबविण्याचा संकल्प टिंगरे यांनी आपल्या जाहीरनाम्यातून केला आहे.
जाहीरनामा प्रसिद्ध करताना टिंगरे म्हणाले, आपल्या आमदारकीच्या पहिल्या कार्यकाळात कोरोनामध्ये दोन वर्ष वाया गेली होती. त्यानंतर काही काळ विरोधातही बसावे लागले होते. तरीही महायुती सरकारच्या माध्यमातून केवळ अडीच वर्षांमध्ये १५१० कोटींचा निधी मतदार संघामध्ये आणण्यात यश आले. लोहगाव येथील शंभर खाटांचे रुग्णालय पूर्ण झाले असून लवकरच ते नागरिकांच्या सेवेत उपलब्ध होणार आहे. लोहगाव पाणीपुरवठा योजना, नगर रस्त्यावरील व विश्रांतवाडी येथील ग्रेड सेपरेटर व उड्डाणपूल यासारखी आणखी बरीच कामे येत्या काळात पूर्ण होत आहेत, असे टिंगरे यांनी सांगितले. अनेक प्रकल्पाची कामे सुरू आहेत, काही कामे सुरु होत आहेत. हे सर्व प्रकल्प पुढील पाच वर्षात पूर्ण करून वडगाव शेरी मतदार संघातील नागरिकांचे जीवनमान सुकर करण्यासाठी आवश्यक असलेली सर्व कामे पूर्ण करण्यात येतील. त्यामुळे पुढील कार्यकाळात वडगावशेरी मतदार संघाचा चेहरा मोहरा बदलण्याचा संकल्प नक्कीच पूर्ण होणार आहे, असा विश्वास महायुतीचे उमेदवार सुनील टिंगरे यांनी व्यक्त केला.

पुणे : पुणे शहरातील नागरिक भाजप आणि महायुतीच्या भ्रष्ट कारभाराला कंटाळले आहेत. भाजपमुळे तीन वर्षे महापालिकेची निवडणूक झालेली नाही. भाजपने पक्ष फोडल्यामुळे जनतेमध्ये प्रचंड रोष असून
शहरात महाविकास आघाडी आठही जागा जिंकणार आहे, असा विश्वास महाविकास आघाडीतील नेत्यांनी सोमवारी पत्रकार परिषदेत व्यक्त केला.

काँग्रेस भवन येथे सोमवारी महाविकास आघाडीची पत्रकार परिषद पार पडली. या पत्रकार परिषदेला काँग्रेसचे शहराध्यक्ष अरविंद शिंदे, राष्ट्रवादी काँग्रेस शरदचंद्र पवार पक्षाचे प्रभारी शहराध्यक्ष अंकुश काकडे, शिवसेना उद्धव बाळासाहेब ठाकरे पक्षाचे शहरप्रमुख संजय मोरे आणि काँग्रेसचे प्रदेश सरचिटणीस अॅड. अभय छाजेड यावेळी उपस्थित होते. काँग्रेस भवन येथे दररोज पत्रकार परिषदांचे आयोजन तसेच प्रचाराचे नियोजन केल्याबद्दल काँग्रेसच्या राष्ट्रीय प्रवक्त्या शमा महंमद यांचा अंकुश काकडे यांच्या हस्ते सत्कार करण्यात आला. शिंदे, काकडे आणि मोरे यांनी प्रचाराचा आढावा घेऊन महाविकास आघाडीच्या विजयाबद्दल विश्वास व्यक्त केला.

शिंदे म्हणाले, शहरात भाजपचे आमदार , मंत्री असतानाही भाजपच्या उमेदवारांना प्रचारासाठी राज्यातील आणि देशातील नेत्यांवर अवलंबून राहावे लागले. महायुती सरकारची एकही योजना पूर्ण झालेली नाही. बटेंगे तो कटेंगे , असे मुद्दे पुण्यात चालले नाहीत. भाजपचा एकही नेता महागाई, बेरोजगारविषयी बोलला नाही. भाजपकडे विकासाचा मुद्दा नव्हता. भाजपने प्रचाराची पातळी सोडली. आम्ही प्रचाराची पातळी सोडली नाही.

काकडे म्हणाले, हडपसर आणि वडगाव शेरीमधील महायुतीच्या उमेदवाराला गद्दारीचे फळ मिळेल. महायुती सरकारने महाविकास आघाडीच्या प्रचारावर बंदी घालण्याचा प्रयत्न केला. महाविकास आघाडीच्या नेत्यांच्या हेलिकॉफ्टर उड्डाणाला अनेकवेळा परवानगी नाकारली. यामुळे अनेक ठिकाणच्या सभा रद्द झाल्या. कसबा विधानसभा पोटनिवडणुकीत भाजपने सरकारी यंत्रणेचा मोठा गैरवापर केला. भाजपने दोन पक्ष फोडले हे लोक विसरलेले नाहीत. उपमुख्यमंत्री देवेंद्र फडणवीस यांनी माजी मुख्यमंत्री पृथ्वीराज चव्हाण यांच्यावर पातळी सोडून टीका केली आहे. फडणवीस यांना ही भाषा शोभत नाही. पृथ्वीराज चव्हाण हे राज्यातील सुसंस्कृत नेतृत्व आहे. त्यांच्याबद्दल काय बोलतो याचे भान बाळगणे गरजेचे होते. भाजप आणि महायुतीच्या या घाणेरड्या राजकारणाला लोक कंटाळले आहेत. शहरातील आठ जागांवर महाविकास आघाडीचे उमेदवार विजयी होतील. राज्यात जास्तीत जास्त जागा मिळवून महाविकास आघाडीचे सरकार येईल.

मोरे म्हणाले, महायुतीच्या नेत्यांनी आणि उमेदवारांनी सतत आचारसंहितेचा भंग केला. त्यावर आम्ही निवडणूक आयोगाकडे तक्रार केली तरी कारवाई झाली नाही. आमच्याकडून थोडी कुठे चूक झाली की
लगेच कारवाई करण्यात आली.

महाविकास आघाडीच्या नेत्यांच्या हेलिकॉफ्टर उड्डाणाला अनेकवेळा परवानगी नाकारली. यामुळे अनेक ठिकाणच्या सभा रद्द झाल्या. पूर्वी काँग्रेस सरकारच्या काळात आम्ही विरोधी बाकांवर होतो. काँग्रेसने शिवसेनेला कधीही अशी वागणूक दिली नाही, असे ते म्हणाले.

पुणे –
पश्चिम महाराष्ट्रात युतीचे ४२ आमदार असून आघाडीचे १६ आमदार आहे.पश्चिम महाराष्ट्रात ४५ जागा आम्ही यंदा निवडून आणू. लोकसभा निवडणुकीत आमच्या दहा जागा कमी झाल्या पण विरोधक यांचे फेक नरेटिव्ह संभ्रम दूर करू शकलो. पश्चिम महाराष्ट्रात भाजप २६ जागा, शिवसेना १२, राष्ट्रवादी काँग्रेस पक्ष १९ जागा आणि जनसुराज्य पक्ष दोन जागा लढत आहे. आम्ही जे काम करणार आहे आणि केलेले काम जनते समोर ठेवले आहे. जनता सुज्ञ असून त्यांना काम करणारे कोण आहे हे बरोबर माहिती आहे असे मत केंद्रीय राज्यमंत्री मुरलीधर मोहोळ यांनी पत्रकार परिषदेत व्यक्त केले.
यावेळी भाजप प्रदेश महामंत्री राजेश पांडे, भाजप प्रवक्ते संदीप खर्डेकर, संजय मयेकर, पश्चिम महाराष्ट्र माध्यम प्रमुख अमोल कविटकर , उमेश चौधरी, पुष्कर तुळजापूरकर, हेमंत लेले, प्रशांत कोतवाल उपस्थित होते.
मोहोळ म्हणाले, राज्यातील प्रचारास आज विश्रांती मिळत असून २० नोव्हेंबर रोजी जनता कोणाला कौल देईल उत्सुकता सर्वांना आहे. पश्चिम महाराष्ट्रात एकूण ५८ मतदारसंघ आहे. शहर आणि ग्रामीण भागात महायुती उमेदवारांना चांगला प्रतिसाद आहे. निवडणूक जाहीर झाल्यापासून महायुती कार्यकर्ते प्रचारात सक्रिय आहे. अनेक नेत्यांच्या सभा झाल्या आहे. मागील निवडणुकीत युतीला स्पष्ट जनादेश जनतेने दिला पण उध्दव ठाकरे यांनी आघाडी सोबत जात त्यांनी जनतेचा निकालाचा अनादर करत सत्ता स्थापन केली. ठाकरे यांनी गद्दरी करत लोकशाहीचा अपमान केला. पण अडीच वर्षात जनतेच्या मनात नियतीने जे होते तेच झाले. आघाडीच्या काळात कल्याणकारी योजना आणि विकास प्रकल्प स्थगिती दिली गेली. पण युतीच्या काळात विकासाला गती मिळाली आणि विविध पायाभूत सुविधा निर्माण झाल्या. सर्वाधिक परकीय गुंतवणूक देखील आली. आघाडीचे सरकार आणि युतीचे सरकार यातील बदल लोकांसमोर आहे. जनता पुन्हा महायुतीवर विश्वास ठेवेल अशी अपेक्षा आहे. महायुती आगामी काळात देखील एकत्रित काम करेल. लोकसभा निवडणुकीत मनसे यांनी आम्हाला साथ दिली असून त्याची जाणीव आम्हाला नेहमी राहील. त्यांचा स्वतंत्र पक्ष असून ते देखील यंदा निवडणुकीच्या रिंगणात आहे त्यांनी त्यांचे उमेदवार उभे केले आहे.

पुणे, दि. १८ नोव्हेंबर, २०२४ : छत्रपती शिवाजीनगर विधानसभा मतदार संघात केलेली विकासकामे, ठिकठीकाणी नागरिकांचा मिळत असलेला अभूतपूर्व प्रतिसाद, राज्य सरकारच्या लाडकी बहिण योजनेची सकारात्मकता आणि महायुतीमधील तीनही प्रमुख नेत्यांनी राज्यातील जनतेचा संपादन केलेला विश्वास यांच्या जोरावर निवडणुकीत ऐतिहासिक विजय मिळेल असा विश्वास छत्रपती शिवाजीनगर मतदार संघाचे महायुतीचे अधिकृत उमेदवार सिद्धार्थ शिरोळे यांनी व्यक्त केला. आज राज्यभरात विधानसभा निवडणूकीच्या प्रचाराची सांगता होत असताना आयोजित पत्रकार परिषदेत शिरोळे बोलत होते. मतदार संघाचे प्रचारप्रमुख दत्ता खाडे, भाजपा शहर अध्यक्ष गणेश बगाडे आणि शहर सरचिटणीस रवींद्र साळेगांवकर यावेळी उपस्थित होते.

प्रचारा दरम्यान जसे जसे दिवस संपत जात होते तसतसा मतदार संघातील नागरिकांचा प्रतिसाद वाढत गेल्याचे पहायला मिळाले. त्यांच्या देहबोलीमधून त्यांची महायुतीला विजयी करून देण्याची धारण जाणवत होती. नागरिकांच्या या प्रतिसादाने मी भारावून गेलो असे सांगत सिद्धार्थ शिरोळे पुढे म्हणाले, “शिवाजीनगर मतदार संघात महायुतीसाठी पोषक वातावरण असून लोकांकडून सकारात्मक प्रतिसाद मिळत आहे. मुख्यमंत्री एकनाथ शिंदे, उपमुख्यमंत्री देवेंद्र फडणवीस आणि अजित पवार हे तिघेही ज्या उर्जेने काम करीत आहेत त्याचे प्रतिबिंब आम्ही स्थानिक पातळीवर पाहू शकतोय. या तिघांचाही संपर्क, दूरदृष्टी आणि प्रशासनावर असलेली पकड नागरिक पाहत आहेत. त्यांनी योग्य वेळी आणलेल्या योजना आणि त्या राबविण्याची केलेली व्यवस्था यामुळे महायुती सरकारचे वेगळेपण त्यांच्या कामातून जनतेला दिसत आहे. पुण्यातील आठही महायुतीच्या जागा निवडून येतीलच शिवाय राज्यातही आम्ही बहुमताचे सरकार स्थापन करू.”

मागील पाच वर्षांच्या कार्यकाळात मी केलेली विकासकामे मतदार संघातील नागरिकांना माहिती आहेत. या काळात अनेक मोठे विकासात्मक प्रकल्प मार्गी लागले आहेत. मेट्रोची तीस पैकी दहा स्थानके ही शिवाजीनगर मतदारसंघात आहेत. याच जोडीला आता शिवाजीनगर ते हिंजवडी या मेट्रोचे कामदेखील विक्रमी वेळेत पूर्ण होताना दिसत आहे. या मेट्रो मार्गामुळे शिवाजीनगर मतदारसंघातील नागरिकांना मेट्रोची आणखी तीस स्थानके उपलब्ध होणार आहेत. पुणे विद्यापीठ चौकातील उड्डाणपुलाचे काम वेगाने सुरू असून, येत्या जानेवारीत ते पूर्ण होईल. याबरोबरच जुन्या मुंबई-पुणे महामार्गाच्या रुंदीकरणाचे काम वेगात सुरू आहे. सोबतच खडकी व रेंज हिल्स येथील अंडर ब्रिजच्या विस्तारीकरणाचा विकास आराखडा तयार केला जात आहे. शिवाजीनगर एसटी स्थानकाच्या एकत्रीकरणाचे काम सुरू असून त्यालाही लवकरच गती येईल, अशी माहिती शिरोळे यांनी दिली.

माझ्या आमदार विकास निधीतील मोठा वाटा हा सेवा वस्त्यांसाठीच्या विकासकामांसाठी खर्च केला असून या भागात मूलभूत सोयी सुविधा पुरविण्यावर मी यानंतरही भर देणार आहे. पुढील २ ते तीन वर्षांत शिवाजीनगर मतदार संघाचा कायापायाल करू असेही शिरोळे यांनी नमूद केले. मागील लोकसभा निवडणुकीत कमी टक्के मतदान झाल्याची आकडा आता नागरिक स्वत:च भरून काढतील. यावेळी मतदानाचा टक्का वाढून ५१ टक्के मते मला मिळतील असेही त्यांनी सांगितले. छत्रपती शिवाजीनगर मतदार संघातील ही निवडणूक खेळीमेळीच्या वातावरणात पार पडल्याचे समाधान शिरोळे यांनी व्यक्त केले.

पुणे : सरकारने काय काम केले हे सांगण्याऐवजी भाजपकडून जात-धर्मावर समाजाची विभागणी करण्याचे काम सुरू आहे. भाजपचे नेते जाती-धर्मावरून लोकांमध्ये भांडणे लावत आहेत. भाजपने देशात द्वेष पेरण्याचे काम केले आहे. भाजपने विकासकामांचा प्रचार करून मते मागितली असती तर खेळाडू म्हणून मी देखील भाजपला दाद दिली असती , असे मत हरियाणातील काँग्रेसच्या आमदार आणि प्रसिद्ध कुस्तीपटू विनेश फोगट यांनी सोमवारी व्यक्त केले.

काँग्रेस भवन येथे विनेश फोगट यांची पत्रकार परिषद आयोजित करण्यात आली होती. त्यावेळी त्या बोलत होत्या. काँग्रेसचे शहराध्यक्ष अरविंद शिंदे, राष्ट्रीय प्रवक्त्या शमा महंमद, प्रदेश सरचिटणीस अॅड. अभय छाजेड, माजी आमदार दीप्ती चवधरी आणि शहर काँग्रेसच्या क्रीडा सेलचे अध्यक्ष आशुतोष शिंदे यावेळी उपस्थित होते.

फोगट म्हणाल्या, सर्वाधिक शेतकऱ्यांच्या आत्महत्या महाराष्ट्रात झाल्या आहेत. महाराष्ट्रात‌ शेतकरी आणि सामान्य माणूस भरडला जात आहे. महिलांवर अत्याचार वाढले आहेत. भाजप आणि महायुती सरकारच्या काळात महिला सुरक्षित नाहीत.

भाजपचे नेते एक हैं तो सेफ हैं ही घोषणा देतात. दुसरीकडे देशातील महिला सुरक्षित नाहीत. नेते महिलांचे शोषण थांबवतील तेव्हा महिला सुरक्षित होतील. या अशा नेत्यांकडून महिला खेळाडूंना शोषणाला बळी पडावे लागले आहे.

सर्वाधिक शेतकऱ्यांच्या आत्महत्या महाराष्ट्रात झाल्या आहेत.

महायुती सरकार सामान्यांच्या कल्याणासाठी काम करत नाही. या सरकारचे खेळाडूंना प्रोत्साहन मिळ‌त नाही. भाजप सत्तेत येण्याआधी देशातील निवडणूक चांगल्या वातावरणात व्हायच्या. भाजपने द्वेष पेरल्यामुळे राजकारणाची पातळी खालावली आहे.

त्या पुढे म्हणाल्या की, सरकारने काय काम केले हे सांगण्याऐवजी भाजपकडून जात-धर्मावर विभागणी करण्याचे काम सुरू आहे. देशामध्ये द्वेष पेरण्याचे काम भाजपने केले आहे. हिंदू-मुस्लिम भेद करून निवडणूक जिंकता येत नाही. निवडणूक विकासावर जिंकता येते. भाजपने मतांसाठी विकासाचा प्रचार केला असता तर खेळाडू म्हणून मीही दाद दिली असती.

निवडणूक जवळ आली की लाडकी बहीण आठवते. पंतप्रधानांच्या कार्यालयापासून शंभर फुटांच्या अंतरावर महिला शोषणाविरोधात आवाज उठवत होत्या तेव्हा भाजपला बहिणीची आठवण आली नाही.
मतांसाठी निवडणुकीच्या आधी तीन महिने लाडकी बहीण योजना लागू करणे , हा भाजपचा लोकांना फसविण्याचा डाव आहे.

मी राजकारणात मोठे स्वप्न घेऊन आलेले नाही. खेळाडू म्हणून लैंगिक शोषणाविरोधात संघर्ष केला. ही लढाई कोणत्याही खेळाडूला लढावी लागू नये म्हणून मी राजकारणात आले आहे. महिलांना न्याय मिळावा यासाठी आम्ही संघर्ष केला. महिलांवरील अत्याचाराच्या घटना नागरिकांनी विसरू नयेत. महाविकास आघाडी सरकार पाडण्याचे आणि शिवसेना उद्धव बाळासाहेब ठाकरे व राष्ट्रवादी काँग्रेस शरदचंद्र पवार पक्ष फोडण्याचे काम भाजपने पैशांच्या जोरावर केले. सरकारच्या विरोधात बोलले म्हणून
भाजपमुळ‌े आम्ही देशद्रोही ठरलो आहोत.

उज्ज्वल भविष्यासाठी महाविकास आघाडीला मतदान केले पाहिजे. महाविकास आघाडी सरकार येताच प्रत्येक शहरात चांगली मैदाने बांधण्यात येतील आणि खेळाडूंना दर्जेदार सोयी- सुविधा उपलब्ध करून देण्यात येतील, असे ते म्हणाल्या.

पुणे : हरियाणापेक्षा महाराष्ट्रात जास्त चांगले खेळाडू आहेत. परंतु, त्यांना सरकारकडून प्रोत्साहन मिळत नाही. ऑलिम्पिकमध्ये पदक मिळवून देशाचा गौरव वाढविणाऱ्या खेळाडूंना कसल्याही सोयी-सुविधा हे सरकार देत नाही. खेळाडूंसाठी चांगली मैदानेही नाहीत. खेळाडूंच्या विकासासाठी खेळाच्या मैदानात आम्हा खेळाडूंना आशीर्वाद देता तसा महाराष्ट्राच्या विकासासाठी महाविकास आघाडीच्या उमेदवारांना मतांमधून आशीर्वाद द्या, असे आवाहन हरियाणातील काँग्रेसच्या आमदार आणि प्रसिद्ध कुस्तीपटू विनेश फोगट यांनी सोमवारी केले.

महाविकास आघाडी आणि इंडिया फ्रंटचे कँटोन्मेंट विधानसभा मतदारसंघातील उमेदवार रमेश बागवे, कसबा पेठ विधानसभा मतदारसंघातील उमेदवार रवींद्र धंगेकर, पर्वती विधानसभा मतादरसंघातील उमेदवार अश्विनी कदम, हडपसर विधानसभा मतदारसंघातील उमेदवार प्रशांत जगताप, शिवाजीनगर विधानसभा मतदारसंघातील उमेदवार दत्ता बहिरट, कोथरूड विधानसभा मतदारसंघातील उमेदवार चंद्रकांत मोकाटे, वडगावशेरी विधानसभा मतदारसंघातील बापू पठारे आणि खडकवासला विधानसभा मतदारसंघातील उमेदवार सचिन दोडके यांच्या प्रचारार्थ विनेश फोगट यांच्या उपस्थितीत खेळाडू मेळाव्याचे काँग्रेस भवन येथे आयोजन करण्यात आले होते. त्यावेळी विनेश फोगट यांना गदा देऊन सत्कार करण्यात आला. यावेळी काँग्रेसचे शहराध्यक्ष अरविंद शिंदे, माजी आमदार दीप्ती चवधरी, महिला काँग्रेसच्या प्रभारी शहराध्यक्ष संगीता तिवारी, शिक्षण मंडळाचे माजी अध्यक्ष विजय शिंदे, रफीक शेख, काँग्रेसच्या राष्ट्रीय प्रवक्त्या शमा महंमद तसेच मेळाव्याचे आयोजक काँग्रेसचे प्रदेश सरचिटणीस अॅड. अभय छाजेड, शहर काँग्रेसच्या क्रीडा सेलचे अध्यक्ष आशुतोष शिंदे, उपाध्यक्ष लतेंद्र भिंगारे, ओम भवर आदी उपस्थित होते.

राजकारणात येईन, असे मला कधी वाटले नव्हते. मी आता राजकारणात असले तरी आधी खेळाडू आहे. आता राजकारणातील जबाबदारी वाढली आहे. मैदानावर संघर्ष केल्यानंतर महिलांच्या शोषणाविरोधात रस्त्यावर संघर्ष करावा लागला. क्रीडा क्षेत्रात येऊ इच्छिणाऱ्या तरुणींना हा त्रास होऊ नये, यासाठी मी संघर्ष करायला तयार आहे. खेळाडूंना चांगल्या दर्जाच्या सोयी-सुविधा मिळाव्या तसेच चांगल्या वातावरणात त्यांना आपला खेळ वाढवता यावा यासाठी मी खेळाडूंबरोबर कायम मैदानात उभी असेन. चांगले शिक्षण आणि प्रशिक्षण दिले तर आंतरराष्ट्रीय दर्जाचे खेळाडू देशात घडतील, अशी भावना फोगट यांनी व्यक्त केली. भाजपने महाविकास आघाडी सरकार पाडले. शिवसेना उद्धव बाळासाहेब ठाकरे व राष्ट्रवादी काँग्रेस शरदचंद्र पवार पक्ष हे दोन पक्ष फोडले. या महायुतीला धडा शिकवण्याती वेळ आली आहे. मतदानात मोठी ताकद असते. ही ताकद महायुतीला दाखविण्याची वेळ आली आहे, अशी टीका त्यांनी केली.

उज्ज्वल भविष्यासाठी महाविकास आघाडीला मतदान करा,असे आवाहन त्यांनी केले. महाविकास आघाडी सरकार येताच प्रत्येक शहरात चांगली मैदाने बांधण्यात येतील, असे आश्वासन त्यांनी दिले. विनेश फोगट यांच्याशी संवाद साधण्यासाठी खेळाडूंची या मेळाव्याला उपस्थिती होती. विविध पदक विजेत्या दिग्गज आणि ज्येष्ठ खेळाडूंपासून लहान मुलांची यावेळी गर्दी झाली होती.

पुणे –
महाराष्ट्र आणि पुणे मध्ये अनेक ऐतिहासिक ठिकाणे आहे. देश परदेशातील पर्यटक मोठ्या संख्येने याठिकाणी भेटी देतात. पुण्यातील ऐतिहासिक वारसा हा देशातील पर्यटन केंद्राशी जोडला जाईल. राज्यातील ११ किल्ले जागतिक वारसा स्थळ होण्यासाठी प्रस्ताव पाठवण्यात आला आहे. पुण्यातील शिवसृष्टी प्रकल्पास राज्य सरकारने ५० कोटी मदत केली असून केंद्रीय पर्यटन विभागाने ८० कोटी रुपये साह्य करण्यात आले आहे. पर्यटनाच्या दृष्टीने पुणे आगामी काळात अधिक वेगाने विकसित करण्यात येईल.
विविध राज्यानी आठ हजार कोटींचे पर्यटन प्रकल्प माहिती प्रस्ताव दिले आहे त्याबाबत विचार होऊन त्यावर लवकरच एकत्रित निर्णय घेण्यात येईल
असे मत केंद्रीय पर्यटन मंत्री गजेंद्रसिंग शेखावत यांनी पत्रकार परिषदेत व्यक्त केले.

यावेळी भाजप प्रदेश महामंत्री राजेश पांडे, भाजप प्रवक्ते संदीप खर्डेकर, संजय मयेकर, पश्चिम महाराष्ट्र माध्यम प्रमुख अमोल कविटकर , उमेश चौधरी, पुष्कर तुळजापूरकर, हेमंत लेले, प्रशांत कोतवाल उपस्थित होते.

शेखावत म्हणाले, सन २०१४ मध्ये लोकसभा निवडणुकीत नरेंद्र मोदी यांच्यावर देशातील जनतेने विश्वास टाकत बहुमत दिले. देशातील राजकीय नरेटीव्ह बदलला गेला आणि विकास सरकार अस्तित्वात आले. सन २०१९ मध्ये देखील जनतेने मोदी सरकारला साथ दिली आणि सरकारने वेगवेगळ्या योजना राबवत विकास तळागाळापर्यंत पोहचवला. जनतेने महाराष्ट्र मध्ये युतीला स्पष्ट बहुमत दिले पण राजकीय घडामोडी होऊन राज्याच्या विकासाला ब्रेक लागला. आघाडी सरकारने युतीच्या विविध कामे स्थगिती करणे, अडथळे निर्माण करण्याचे काम केले त्यामुळे विकास मंदावला आणि भ्रष्टाचार वाढला. आघाडी सरकारने लोकशाही विरोधी काम केले आणि १२ भाजप आमदार निलंबित केले. सर्वच्च न्यायलयाने याबाबत सदर निर्णयास रद्द केले.कोविड काळात तत्कालीन मुख्यमंत्री उध्दव ठाकरे घरात बसून राहिले आणि अनेकजण मयत झाले. याकाळात कोविड कामात देखील मोठा भ्रष्टाचार झाला. बार आणि हॉटेल मधून कोट्यवधी रुपये वसुली प्रकरण उघडकीस येऊन तत्कालीन गृहमंत्री अनिल देशमुख यांना कारागृहात जावे लागले. सरकारच्या संरक्षणात भ्रष्टाचार झाला आणि जनतेचे प्रश्न दुर्लक्षित केले गेले. महायुती सरकारच्या काळात लाडकी बहिण योजनेस आघाडी नेत्यांनी विरोध केला आणि न्यायालयात गेले. पण आता स्वतःच्या जाहीरनाम्यात ही योजना त्यांनी टाकणे हास्यास्पद आहे. महायुतीने सर्वसामान्य लोकांना दिलासा मिळेल अशाप्रकारे विविध योजना सुरू केल्या असून आणखी योजना बाबत जाहीरनाम्यात आश्वासन दिले आहे. काँग्रेसने अनेक खोटे आश्वासने जाहीरनाम्यात दिले आहे. त्यांनी इतर राज्यात ज्या ठिकाणी त्यांची सत्ता आहे तिथे जाहीरनाम्यात दिलेल्या आश्वासनांची कोणती पूर्तता केलेली नाही. शेतकरी कर्ज माफी नाही, पीक विमा नाही, वीज दर वाढ, महालक्ष्मी योजना अंमलबजावणी नाही असे प्रकार त्यांनी केले आहे. स्वातंत्र्यापासून काँग्रेसने देशात फूट पाडा आणि राज्य करा तत्त्वानुसार काम केले आहे.