पुणे-दरोड्याच्या तयारीत असलेल्या चोरट्यांच्या टोळीला गुन्हे शाखेने अटक केली आहे. मांजरीतील भापकर वस्ती परिसरात ही कारवाई करण्यात आली. त्यांच्याकडून देशी बनावटीचे पिस्तूल, चार काडतुसे, सहा तीक्ष्ण शस्त्रे आणि मिरची पूड असा मुद्देमाल जप्त करण्यात आला.

या प्रकरणी अजयसिंग अर्जुनसिंग दुधानी (वय 26, रा. भापकर वस्ती, मांजरी, हडपसर), रामजीतसिंग रणजीतसिंग टाक (वय 27,रा. तुळजाभवानी वसाहत, हडपसर) आणि अभयसिंग सिंकदसिंग जुनी (वय 21,रा. सुखकर्ता कॉलनी, गंगानगर, फुरसुंगी) यांना अटक करण्यात आली आहे. त्यांच्यासोबत असलेल्या तीन साथीदारांविरुद्धही गुन्हा दाखल करण्यात आला आहे. गुन्हे शाखेच्या युनिट सहामधील पोलिस हवालदार अमित कांबळे यांनी मांजरी पोलिस ठाण्यात फिर्याद दिली आहे.

पोलिसांनी दिलेल्या माहितीनुसार, 10 जून रोजी मध्यरात्री पावणेदोनच्या सुमारास मांजरीतील भापकर वस्ती भागातील रेल्वे पुलाजवळ चोरट्यांची टोळी थांबल्याची माहिती गुन्हे शाखेच्या पथकाला मिळाली होती. हे चोरटे वाहन चालकांना लुटण्याच्या तयारीत होते. या माहितीच्या आधारे गुन्हे शाखेच्या पथकाने सापळा रचून दुधानी, टाक आणि जुनी यांना पकडले. झटापटीदरम्यान त्यांचे तीन साथीदार अंधाराचा फायदा घेऊन पसार झाले.

अटक करण्यात आलेले चोरटे सराईत गुन्हेगार आहेत. त्यांच्याकडून देशी बनावटीचे पिस्तूल, चार काडतुसे, सहा कोयते, मिरची पूड आणि दोरी असा मुद्देमाल जप्त करण्यात आला आहे. या प्रकरणाचा पुढील तपास पोलिस उपनिरीक्षक एन. डिगोळे करत आहेत.

कार्यकर्त्यांकडून सेवा कार्य आणि सामाजिक उपक्रमाचे आयोजन

कोथरुड मधील सेवा उपक्रमांसाठी सढळ हाताने आर्थिक योगदान

पुणे – राज्याचे उच्च व तंत्रशिक्षण मंत्री चंद्रकांतदादा पाटील यांच्या ६७ व्या वाढदिवसानिमित्त आज राज्यभरात त्यांच्यावर शुभेच्छांचा वर्षाव होत आहे. त्यांच्या वाढदिवसाचे औचित्य साधून पुणे आणि कोथरुड मध्ये अनेक कार्यकर्त्यांनी विविध सेवा कार्ये आणि सामाजिक उपक्रमांचे आयोजन केले होते.

ना. चंद्रकांतदादा पाटील यांच्या वाढदिवसानिमित्त त्यांच्या कार्यकर्त्यांनी व समर्थकांनी सामाजिक भान जपले आहे. ठिकठिकाणी आरोग्य तपासणी शिबिर, महिला स्वच्छता कर्मचाऱ्यांना साडी वाटप, वृक्षारोपण, गोसेवा, नोकरी मेळावा अशा विविध कल्याणकारी उपक्रमांचे आयोजन करण्यात आले होते. ‘वाढदिवस सेवा दिन’ म्हणून साजरा करत कार्यकर्त्यांनी समाजातील वंचित घटकांना मदत पोहचवली.

“वाढदिवसाला हार, तुरे, पुष्पगुच्छ आणू नका,” असे आवाहन चंद्रकांतदादांनी केले होते. त्याऐवजी कोथरुड मधील सेवा उपक्रमांना आर्थिक मदत करण्याचे आवाहन त्यांनी कार्यकर्त्यांना केले होते. या आवाहनाला कार्यकर्त्यांनी आणि समर्थकांनी अत्यंत सकारात्मक प्रतिसाद दिला.

कार्यकर्त्यांनी पुष्पगुच्छांवर होणारा विनाकारण खर्च टाळला. कार्यकर्त्यांनी कोथरुड परिसरातील विविध सामाजिक आणि सेवा उपक्रमांसाठी सढळ हाताने आर्थिक योगदान दिले.

वाढदिवसाच्या थाटामाटापेक्षा समाजोपयोगी कामांना प्राधान्य देण्याची चंद्रकांतदादांची परंपरा या निमित्ताने कार्यकर्त्यांनी पुढे चालू ठेवली आहे. यामुळे यंदाचा वाढदिवस खऱ्या अर्थाने ‘सेवा दिन’ म्हणून साजरा झाला

दरम्यान, चंद्रकांतदादा पाटील यांच्या दीर्घायुष्यासाठी आणि उत्तम आरोग्यासाठी राजकीय, सामाजिक आणि शैक्षणिक क्षेत्रातील दिग्गजांनी त्यांना प्रत्यक्ष भेटून व सोशल मीडियाच्या माध्यमातून शुभेच्छा दिल्या. दिवसभर त्यांच्या निवासस्थानी आणि शुभारंभ लॅान्स येथे कार्यकर्त्यांची शुभेच्छा देण्यासाठी मोठी गर्दी पाहायला मिळाली.

सखी-सुखदा उपक्रमाच्या आरोग्य शिबिरास उत्स्फूर्त प्रतिसाद

ना. चंद्रकांतदादा पाटील यांच्या वाढदिवसानिमित्त कोथरुडमधील सखी-सुखदा वुमन वेल्फेअर फाऊंडेशन आणि सूर्य प्रभा नर्सिंग होमच्या वतीने वस्ती भागातील नागरिकांसाठी मोफत आरोग्य तपासणी शिबीराचे आयोजन करण्यात आले होते. या शिबिराचे उद्घाटन ना. पाटील यांच्या हस्ते झाले. या उपक्रमात ४८९ जणांनी आपली वैद्यकीय तपासणी केली.

यावेळी सखी-सुखदा वुमन वेल्फेअर फाऊंडेशनच्या संचालिका स्मिता पाटील, सूर्य प्रभा नर्सिंग होमचे जितेंद्र आग्रवाल, नगरसेविका अर्चना पाटील, तनिषा पाटील, नगरसेवक पृथ्वीराज सुतार, भाजप पुणे शहर युवा मोर्चा अध्यक्ष दुष्यंत मोहोळ, माजी नगरसेविका छाया मारणे, स्वाती मोहोळ आदी उपस्थित होते.

नगरसेवक पुनीत जोशी यांच्या माध्यमातून महिला स्वच्छता कर्मचाऱ्यांना विशेष भेट

ना. चंद्रकांतदादा पाटील यांच्या वाढदिवसानिमित्त नगरसेवक पुनीत जोशी यांच्या माध्यमातून ‘महिला सफाई कर्मचाऱ्यांचा सन्मान सोहळा’ व ‘साडीरूपी भेटवस्तू देण्यात आली. यावेळी सर्व महिला स्वच्छता कर्मचाऱ्यांकडून आनंद व्यक्त करण्यात आला.

या प्रसंगी नगरसेवक सुनील पांडे, नगरसेविका सौ. मंजुश्री खर्डेकर, मिताली सावळेकर, माजी नगरसेवक दीपक पोटे, भाजप कोथरुड दक्षिण मंडल अध्यक्ष मा. गिरीश खत्री आणि प्रभाग अध्यक्ष प्राची बगाटे उपस्थित होते.

पुणे- पुण्यात गुन्हेगारीच्या घटनांमध्ये सातत्याने वाढ होत असून, पुन्हा एकदा गोळीबाराची थरारक घटना समोर आली आहे. नुकतीच पुणे जिल्ह्यातील शिरूरमध्ये एका सराईत गुंडाची गोळ्या झाडून हत्या करण्यात आली होती. ही घटना ताजी असतानाच आता थेट पुणे शहरात गोळीबार झाल्याने मोठी खळबळ उडाली आहे. सहकारनगर पोलिस ठाण्याच्या हद्दीत असलेल्या शिंदे हायस्कूलजवळ ही धक्कादायक घटना घडली असून, या सातत्याने घडणाऱ्या घटनांमुळे संपूर्ण शहरात पुन्हा एकदा दहशतीचे वातावरण निर्माण झाले आहे.

मिळालेल्या प्राथमिक माहितीनुसार, बुधवारी रात्री 10 वाजण्याच्या सुमारास शिंदे हायस्कूल परिसरात हा गोळीबार झाला. रात्रीची वेळ असताना अचानक बंदुकीतून गोळ्या झाडल्याचा आवाज आल्याने परिसरात मोठी खळबळ उडाली. यामुळे घाबरलेल्या आणि रस्त्यावर उभ्या असलेल्या नागरिकांची आपला जीव वाचवण्यासाठी एकच धावाधाव सुरू झाली. या घटनेमुळे स्थानिक नागरिकांमध्ये मोठी भीती पसरली असून, पोलिसांकडून या गोळीबाराचा सविस्तर तपास सुरू करण्यात आला आहे.

पुण्यातील सहकारनगर पोलिस ठाण्याच्या हद्दीत एका शाळेजवळ गोळीबाराची थरारक घटना घडली असून, यात एक जण जखमी झाला आहे. हा गोळीबार नेमका कोणी आणि कोणत्या कारणासाठी केला, याची कोणतीही अधिकृत माहिती अद्याप समोर आलेली नाही. दरम्यान, घटनेची माहिती मिळताच पोलिसांनी घटनास्थळी धाव घेतली आहे. गोळीबारात जखमी झालेल्या व्यक्तीला तातडीने रुग्णालयात दाखल करण्यात आले असून, डॉक्टरांकडून त्याच्यावर तात्काळ वैद्यकीय उपचार सुरू करण्यात आले आहेत.

या जीवघेण्या हल्ल्यामुळे परिसरात मोठी खळबळ उडाली असून, संपूर्ण शहरात दहशतीचे आणि भीतीचे वातावरण निर्माण झाले आहे. गेल्या काही दिवसांपासून पुण्यात गुन्हेगारीच्या घटनांमध्ये सातत्याने वाढ होत आहे. लागोपाठ घडणाऱ्या या गोळीबाराच्या घटनांमुळे शहरातील कायदा आणि सुव्यवस्थेवर मोठे प्रश्नचिन्ह निर्माण झाले असून, सर्वसामान्य नागरिकांच्या सुरक्षेचा प्रश्न आता ऐरणीवर आला आहे. सध्या पोलिस या प्रकरणाचा कसून तपास करत असून हल्लेखोराचा शोध घेतला जात आहे.

दरम्यान, यापूर्वी शिरूर तालुक्यातील करडे घाटात विशाल काळे या कुख्यात गुंडाची गोळ्या झाडून हत्या करण्यात आल्याची घटना ताजी असतानाच, आता थेट पुणे शहरात झालेल्या या नव्या गोळीबाराच्या घटनेमुळे नागरिकांमध्ये प्रचंड घबराट आणि भीतीचे वातावरण निर्माण झाले आहे.

अधिक मासाच्या शुभ काळात १००८ दांपत्यांचा सहभाग ; तब्बल ९ हवनकुंडांवर हवन
पुणे : विश्वशांती, समृद्धी आणि सर्व जीवांच्या कल्याणासाठी भगवान दत्तांना प्रार्थना करण्याच्या पवित्र संकल्पाने सिंहगड रस्त्यावरील श्री गणेश गार्डन लॉन्स अँड बॅन्क्वेट येथे भव्य आणि आध्यात्मिक उन्नती देणारा दत्तयाग संपन्न झाला. संध्या भाटे यांच्या मार्गदर्शनाखाली आणि दत्तभक्त, हितचिंतक व समर्पित स्वयंसेवकांच्या सहकार्याने आयोजित या सोहळ्यात अधिक मासाच्या शुभ काळात १००८ दांपत्यांनी सहभाग घेतला.

कार्यक्रमाची सुरुवात सहभागी दांपत्यांनी श्रद्धा आणि भक्तिभावाने एकत्रित संकल्प करून केली. पुढे ९ हवनकुंडांवर मिळून यज्ञ पार पडला, ज्यामुळे सर्व सहभागी भक्तांना शिस्तबद्ध पद्धतीने विधीमध्ये सहभागी होता आले. कार्यक्रमाची सांगता आरती आणि महाप्रसादाने झाली. पूजेत सहभागी झालेल्या तसेच फक्त दर्शनासाठी आलेल्या सर्व भक्तांना प्रेमपूर्वक प्रसाद देण्यात आला. या कार्यक्रमाला २१ गुरुजींचे आशीर्वाद लाभले. त्यांनी पारंपरिक पद्धतीने विधींचे संचालन आणि पावन संकल्पना पूर्ण केली. संध्या भाटे यांच्या मार्गदर्शनाखाली स्वयंसेवकांनी कोणत्याही वैयक्तिक अपेक्षेशिवाय निःस्वार्थ भावनेने अथक सेवा केली.

आजच्या तणावपूर्ण आणि अस्थिर जगात हा याग शांती, आरोग्य, समृद्धी आणि सौहार्दाचा विनम्र माध्यम ठरावा, हीच सर्वांची प्रार्थना आहे. पुढील अधिक मासात आणखी एक १००८ दत्तयाग करण्याचा संकल्प आहे. तसेच बहरीन येथे पुढील दत्तयागासाठी तयारी सुरू असून हे पवित्र कार्य भारताच्या सीमांपलीकडेही पुढे नेले जात आहे.

दत्त संप्रदायात भगवान दत्त हे भक्तांच्या निष्कपट प्रार्थनेला तत्काळ प्रतिसाद देणारे करुणामय दैवत मानले जातात. याग किंवा यज्ञ हा असा पवित्र आध्यात्मिक मार्ग आहे, ज्याद्वारे दैवी आशीर्वाद सूक्ष्म स्वरूपात विस्तृत परिसरात प्रसारित होतात. या मंगल स्पंदनांमुळे सर्व जीवांची उन्नती, संरक्षण आणि मुक्ती साधण्यास मदत होते, अशी श्रद्धा आहे.

ही उदात्त परंपरा दत्त संप्रदायातील दिव्य संत नरहरी प्रभू काळे, म्हणजेच प्रेमाने ओळखले जाणारे अण्णा महाराज, यांनी १९६० च्या दशकात सुरू केली आणि दृढ केली. विश्वशांती व आध्यात्मिक सौहार्द प्रसारित करण्याच्या संकल्पाने अण्णा महाराजांनी भारतभर १०८ दत्तयाग संपन्न केले. त्यांच्या कार्यातून भक्ती, सेवा आणि सामूहिक प्रार्थनेवर आधारित आध्यात्मिक चळवळीचे बीज रोवले गेले.

पुढे श्रीपाद प्रभू कुलकर्णी, म्हणजेच अप्पा महाराज, यांनी ही परंपरा अधिक व्यापक केली. त्यांच्या मार्गदर्शनाखाली या धर्मकार्याची पवित्र ज्योत अधिक तेजस्वी झाली आणि समाजकल्याणासाठी सामूहिक आध्यात्मिक साधनेत अधिकाधिक भक्त सहभागी झाले. श्री विद्यासागरजींनी या परंपरेला राष्ट्रीय आणि आंतरराष्ट्रीय स्वरूप दिले.त्यांनी प्रथम अधिक मासात एकाच दिवशी एकाच ठिकाणी १०८ दत्तयागांचे आयोजन केले आणि नंतर ही संकल्पना १००८ दत्तयागांपर्यंत विस्तारली. त्यांच्या अथक प्रयत्नांमुळे दत्तयागाचा आध्यात्मिक संदेश भारताच्या सीमा ओलांडून जगभरातील भक्तांपर्यंत पोहोचला.

सन २०२१ मध्ये विद्यासागरजी आपल्या गुरूंच्या चरणी विलीन झाल्यानंतर त्यांच्या गुरुभगिनी संध्या भाटे यांनी भक्ती, शिस्त आणि नम्रतेने या धर्मकार्याची धुरा स्वीकारली. त्यांच्या मार्गदर्शनाखाली हे पवित्र कार्य भारतात आणि परदेशात अधिक प्रमाणात पुढे जात आहे. यंदाचा पुण्यातील दत्तयाग या पवित्र परंपरेचा आणि सामूहिक आध्यात्मिक ध्येयाचा प्रभावी पुढचा टप्पा ठरला.

पत्रकारितेच्या माध्यमातून राष्ट्र उभारणीस मदत करणाऱ्या बातम्या आणि दृष्टिकोन मांडण्याचा विचार व्हावा

पुणे, दि. १०: आपले सण उत्सव निर्विघ्नपणे साजरे व्हावेत म्हणून कायदा व सुव्यवस्था राखण्यासाठी सतत कर्तव्यदक्ष असलेल्या पोलिसांच्या कार्याचा सन्मान करण्याचा लेक्सिकॉन समुहाचा उपक्रम कौतुकास्पद आहे, असे प्रतिपादन राज्यपाल जिष्णू देव वर्मा यांनी केले. विकसित भारताकडे वाटचाल करत असताना राष्ट्र उभारणीस मदत करणाऱ्या बातम्या आणि दृष्टिकोन कसे मांडायचे याबाबतही पत्रकारितेमध्ये विचार झाला पाहिजे, असे मतही त्यांनी व्यक्त केले.

पुणे टाइम्स मिरर आयोजित ‘बिग सॅल्युट – ऑनरिंग हिरोज इन खाकी’ या कार्यक्रमात ते बोलत होते. वाघोली येथील लेक्सिकॉन इंटरनॅशनल शाळेमध्ये आयोजित या कार्यक्रमास पुणे शहर पोलीस आयुक्त अमितेश कुमार, पोलीस सह आयुक्त संजय दराडे, लेक्सिकॉन ग्रुपचे प्रेसिडेंट पंकज शर्मा, व्हॉईस चेअरमन नीरज शर्मा, सामाजिक कार्यकर्ते डॉ. वेदप्रकाश शर्मा, पुणे टाइम्स मिररच्या संचालक शीतल बियाणी, लेक्सिकॉन ग्रुप ऑफ इन्स्टिट्यूट्सचे चेअरमन सुखदेव शर्मा आदी उपस्थित होते.

पोलीस दलातील अधिकारी कर्मचाऱ्यांचा सन्मानाचा ‘बिग सॅल्यूट’ कार्यक्रमाच्या आयोजनाबद्दल लेक्सिकॉन समूहाचे अभिनंदन करून राज्यपाल श्री. वर्मा म्हणाले, पोलीस दल सतत कार्यरत दिसत असूनही पोलीस दलाच्या कामाची फारच क्वचित प्रशंसा होते. शहरांची लोकसंख्या लक्षात घेता भारतीय पोलिसांवर खूप ताण असतो. त्यामुळे पोलिसांच्या कार्याचा सन्मान करण्याचा कौतुकास्पद उपक्रम पुढे सुरूच रहावा.

ते पुढे म्हणाले, तरुण युवा युवतींना पोलिसांचे काम समजले पाहिजे. यासाठी विशेषतः शैक्षणिक संस्थेत असे कार्यक्रम होणे महत्वाचे आहे. राष्ट्र चालवणे ही सामुहिक जबाबदारी असून समाज आणि सरकार बरोबरीने काम करतात, तेव्हा यश मिळते, असेही ते म्हणाले.

पुणे मिररच्या मुंबई आवृत्तीच्या आरंभाबद्दल अभिनंदन करून राज्यपाल म्हणाले, आज प्रत्येक क्षेत्रात बदल घडत आहेत. विज्ञान, कला, नागरी समाज, न्यायशास्त्र, पत्रकारिता, छायाचित्रण या सर्व क्षेत्रांत वेगाने बदल होत आहेत. जुन्या पिढीला बातम्या, दृष्टिकोन, मते आणि अफवा यामध्ये फरक करणे कठीण होत चालले आहे. प्रसारमाध्यमांना लोकशाहीचा चौथा स्तंभ म्हटले जाते. हा स्तंभ मजबूत असली पाहिजे. चांगल्या पत्रकारितेची परिभाषा प्रामाणिकपणातून प्रतिबिंबीत होते आणि प्रामाणिकपणासाठी भीतीपासून मुक्ती आवश्यक असते, असेही राज्यपाल म्हणाले.

आज तंत्रज्ञानाने मोठी झेप घेतली असून छापील वृत्तपत्रांपासून आज समाजमाध्यमे ऑनलाइन न्यूज पोर्टल्सकडे आलो आहोत. पत्रकारिता असो, तंत्रज्ञान असो किंवा विकास असो, चांगले आणि वाईट याचा निर्णय त्यामागील नैतिकतेवर अवलंबून असतो. पत्रकारितेचे मोजमापही त्याच निकषावर केले पाहिजे. माध्यमांनी दुर्बल घटकांचे प्रश्नही मांडले पाहिजेत, असे विचारही त्यांनी व्यक्त केले.

शैक्षणिक संस्थांमध्ये संगीतासारख्या कलागुणांनाही वाव देणे आणि पाठ्यपुस्तकाबाहेरच्या जगातील अनुभवातून शिकता येणाऱ्या गोष्टी आत्मसात करणे महत्त्वाचे असल्याचेही राज्यपाल म्हणाले.

पंकज शर्मा म्हणाले, आपण आपल्या बरोबरच्या लोकांना प्रोत्साहन देत पुढे नेण्याने खूप मोठे काम होते. आज सत्कार होत असलेल्या पोलिस अधिकारी कर्मचाऱ्यांनी असेच आपल्या सहकाऱ्यांना प्रोत्साहन दिल्यास या सहकाऱ्यांकडून अधिक चांगली कामगिरी होईल. पुणे शहराची मोठी लोकसंख्या पाहता पुणे पोलिसांकडून खूप आव्हानात्मक काम यशस्वीरित्या होत आहे, असेही ते म्हणाले.

नीरज शर्मा यांनीही आपल्या भाषणात पोलीसांच्या कार्याचा गौरव केला.

यावेळी पुणे टाइम्स मिररच्या मुंबई आवृत्तीचे प्रकाशन यावेळी करण्यात आले.

कार्यक्रमाला बिग सॅल्युट कार्यक्रमात सन्मानित केले जाणारे पोलीस अधिकारी, कर्मचारी, लेक्सिकॉन समुहाचे पदाधिकारी, लेक्सिकॉन इंटरनॅशनल शाळेचे विद्यार्थी आदी उपस्थित होते.