पुणे-पुणे महानगर प्रदेश विकास प्राधिकरणाच्या (पीएमआरडीए) हद्दीतील बहुप्रतिक्षित पुणे मेट्रो लाईन ३ अंतर्गत माण-हिंजवडी ते बाणेर (रामनगर) या १२ स्थानकांचा पहिला टप्पा १५ जुलैपर्यंत प्रवाशांसाठी खुला केला जाईल, अशी घोषणा ‘पीएमआरडीए’चे महानगर आयुक्त डॉ. अभिजित चौधरी यांनी केली आहे. ही मेट्रो ऑगस्टअखेरपर्यंत शिवाजीनगरपर्यंत पोहोचेल, असेही त्यांनी स्पष्ट केले.

डॉ. चौधरी यांनी ‘पीएमआरडीए’च्या छत्रपती शिवाजी महाराज सभागृहात पत्रकारांशी संवाद साधताना प्राधिकरणाच्या विविध महत्त्वाकांक्षी प्रकल्पांची माहिती दिली. पायाभूत सुविधांचा विकास, वाहतूक कोंडीची समस्या आणि प्रशासकीय पारदर्शकता या त्रिसूत्रीवर आगामी काळात विशेष भर दिला जाईल, असे त्यांनी सांगितले. मेट्रो, इनर रिंगरोड, पाणीपुरवठा, मान्सूनपूर्व तयारी आणि अनधिकृत बांधकांवरील कारवाई या मुद्द्यांवरही त्यांनी प्राधिकरणाची भूमिका स्पष्ट केली.

महानगर आयुक्तांनी सांगितले की, माण-हिंजवडी ते शिवाजीनगर या मेट्रो लाईन ३ चे काम वेगाने सुरू असून, डिसेंबर २०२६ पर्यंत ही मेट्रो पूर्ण क्षमतेने धावेल. पहिल्या टप्प्यातील १२ स्थानकांसाठी १५ ते २० जून दरम्यान ‘सीएमआरएस’कडून तांत्रिक पाहणी व सुरक्षा तपासणी केली जाईल. या तपासणीनंतर जूनअखेर किंवा १५ जुलैपर्यंत सेवा निश्चितपणे सुरू होईल. प्रवाशांच्या सुविधेसाठी पहिल्या ७ स्थानकांपर्यंत दर्जेदार फूटपाथ तयार केले जात आहेत.

नागरिकांची कामे वेळेत पूर्ण व्हावीत आणि फाईल्सचा प्रवास गतिमान व्हावा, यासाठी ‘पीएमआरडीए’मध्ये ‘सिंगल विंडो इनवर्ड-आउटवर्ड’ सुविधा सुरू करण्यात येत आहे. या तांत्रिक प्रणालीमुळे एखादी फाईल नेमकी कुठे थांबली आहे, हे त्वरित कळेल. प्राधिकरणातील कर्मचाऱ्यांची कमतरता दूर करण्यासाठी लवकरच ‘एमपीएससी’मार्फत लिपिक संवर्गातील ७० कर्मचारी मिळणार असून, इतरही अधिकारी प्रतिनियुक्तीवर येत आहेत. यामुळे सर्व विभागीय कार्यालये पूर्ण क्षमतेने चालवली जातील, असेही त्यांनी स्पष्ट केले.

पुणे आणि पिंपरी-चिंचवड परिसरातील वाहतूक कोंडी सोडवण्यासाठी ‘पीएमआरडीए’ने महत्त्वपूर्ण निर्णय घेतले आहेत. चाकणमधील वाहतुकीचा प्रश्न गंभीर असून, येथील कोंडी फोडण्यासाठी रोड प्लॅनिंगमधील रस्त्यांची कामे ‘पीएमआरडीए’ स्वतः पुढाकार घेऊन करणार आहे. तसेच, रिंगरोडच्या भूसंपादनाबाबत वरिष्ठ पातळीवर सविस्तर चर्चा सुरू आहे. सर्व तांत्रिक आणि कायदेशीर मुद्दे स्पष्ट झाल्यानंतरच प्रत्यक्ष प्रक्रिया सुरू होईल. कोणतीही अर्धवट भूसंपादन प्रक्रिया राबवली जाणार नाही, असे महानगर आयुक्तांनी स्पष्ट केले.

पुणे शहरातील दोन जोड बोगद्यांचा (ट्विन टनेल) प्रकल्प सध्या ‘पुम्टा’च्या मंजुरीच्या स्तरावर आहे. याचा व्यावहार्यता अहवाल सादर झाला असून, सुचवलेल्या बदलांना मंजुरी मिळाल्यानंतर तो वरिष्ठ स्तरावर पाठवला जाईल. हा प्रकल्प पुणे महापालिका राबवत असून ‘पीएमआरडीए’ त्यात साहाय्य करत आहे.

‘कॉकरोच जनता पार्टी’चा पुण्यातून मोठा एल्गार; NEET पेपर लीकविरोधात ११ जूनला पुणे विद्यापीठात आंदोलन

पुणे:
देशातील शिक्षण व्यवस्थेतील कथित गैरव्यवहार, NEET-UG पेपर लीक आणि परीक्षा पद्धतींमधील अनियमिततेच्या मुद्द्यावरून देशभरात चर्चेत आलेले ‘कॉकरोच जनता पार्टी’चे (CJP) संस्थापक अभिजीत दिपके यांनी पुण्यात पत्रकार परिषद घेऊन आपल्या पुढील आंदोलनाची घोषणा केली आहे. दिल्लीतील जंतर-मंतर येथील आंदोलनाच्या यशानंतर, आता हा लढा महाराष्ट्रात तीव्र करण्यात येणार असल्याचे त्यांनी स्पष्ट केले.

अभिजीत दिपके यांनी सांगितले की, दिल्लीतील आंदोलन ही केवळ एक सुरुवात होती. आता या आंदोलनाचा पुढील मुख्य टप्पा ११ जून २०२६ रोजी संध्याकाळी ४:०० वाजता ‘सावित्रीबाई फुले पुणे विद्यापीठ’ येथे पार पडणार आहे. त्यांनी पुणे आणि परिसरातील सर्व विद्यार्थी आणि तरुणांना या शांततापूर्ण आंदोलनात मोठ्या संख्येने सहभागी होण्याचे आवाहन केले आहे.

पत्रकार परिषदेत अभिजीत दिपके यांनी मांडलेले प्रमुख मुद्दे आणि मागण्या खालीलप्रमाणे आहेत:

• केंद्रीय शिक्षण मंत्र्यांच्या राजीनाम्याची मागणी: NEET परीक्षेतील घोटाळा आणि शिक्षण व्यवस्थेतील भ्रष्टाचाराची नैतिक जबाबदारी स्वीकारून केंद्रीय शिक्षण मंत्री धर्मेंद्र प्रधान यांनी तातडीने राजीनामा द्यावा, ही त्यांची प्रमुख मागणी आहे. जोपर्यंत राजीनामा दिला जात नाही, तोपर्यंत हे आंदोलन देशभरात वेगवेगळ्या ठिकाणी सुरूच राहील.
• तरुणांच्या भविष्याशी खेळ: केंद्र सरकारवर घणाघाती टीका करताना त्यांनी म्हटले की, सध्याच्या सरकारने देशातील कोट्यवधी विद्यार्थ्यांचे भविष्य अंधारात ढकलले आहे. ‘सबका साथ, सबका विकास’ म्हणणारे सरकार केवळ निवडक लोकांसाठी काम करत असून सर्वसामान्य विद्यार्थ्यांचा आवाज दाबण्याचा प्रयत्न केला जात आहे.
• २० जूनला पुन्हा दिल्लीत आंदोलन: पुण्याच्या आंदोलनानंतर, कॉकरोच जनता पार्टी आपली पुढील रणनीती म्हणून २० जून रोजी पुन्हा एकदा दिल्लीतील जंतर-मंतरवर भव्य आंदोलन करणार आहे, जेणेकरून सरकारवर दबाव वाढवता येईल.
• विरोधक आणि ट्रोलर्सना चोख उत्तर: सोशल मीडिया आणि आंदोलनावरून होणाऱ्या टीकेला उत्तर देताना ते म्हणाले की, मूळ मुद्द्यांवरून लक्ष भरकटवण्यासाठी जे लोक विद्यार्थ्यांवर टीका करत आहेत, ते प्रत्यक्षात तरुणांच्या या वाढत्या रोषाला घाबरले आहेत.

शाळेसाठी आणखी १० कोटींची मदत:नवीन इमारतीच्या उद्घाटनप्रसंगी डॉ. सायरस पूनावाला यांनी शाळेच्या पुढील विकासासाठी आणखी १० कोटी रुपयांची आर्थिक मदत जाहीर केली. “इमारत उभारण्याबरोबरच विद्यार्थ्यांच्या सर्वांगीण विकासासाठी आवश्यक सुविधा निर्माण करणे तितकेच महत्त्वाचे आहे. शाळेच्या गुणात्मक वाढीसाठी आणि विविध विकासकामांसाठी ही मदत देत आहे,” असे त्यांनी सांगितले. त्यांच्या या घोषणेचे उपस्थितांनी टाळ्यांच्या कडकडाटात स्वागत केले.

द बिशप स्कूलच्या नवीन शैक्षणिक इमारतीचे उद्घाटन; डॉ. सायरस पूनावाला आणि अदार पूनावाला यांचा गौरव

पुणे : “बिशप स्कूलने मला केवळ शिक्षण दिले नाही, तर माझ्या संपूर्ण आयुष्याचा भक्कम पाया घातला. आज मी जे काही आहे, त्यामागे या शाळेचे मोठे योगदान आहे. त्यामुळे बिशप स्कूलचा माजी विद्यार्थी असल्याचा मला सार्थ अभिमान आहे. शाळेच्या विकासासाठी कोणत्याही प्रकारची मदत करण्यास मी कायम तयार आहे,” असे प्रतिपादन सिरम इन्स्टिट्यूट ऑफ इंडियाचे संस्थापक व पद्मभूषण डॉ. सायरस पूनावाला यांनी केले.

कॅम्प परिसरातील द बिशप स्कूलच्या नव्या शैक्षणिक इमारतीच्या उद्घाटनप्रसंगी ते बोलत होते. यावेळी शाळेचे प्राचार्य व मानद सचिव शेन मॅकफर्सन, बिशप एज्युकेशन सोसायटीचे अध्यक्ष रुडोल्फ वूडमन, डॉ. पूनावाला यांचे नातू डेरीयस पूनावाला, मुख्याध्यापिका मयुरा बारसे तसेच शाळेचे पदाधिकारी, शिक्षक, माजी विद्यार्थी, पालक आणि मान्यवर उपस्थित होते.

शाळेच्या शैक्षणिक पायाभूत सुविधांचा विस्तार करण्याच्या उद्देशाने उभारण्यात आलेली ही नवीन इमारत प्रतिष्ठित माजी विद्यार्थी डॉ. सायरस एस. पूनावाला आणि अदार सी. पूनावाला यांच्या सहकार्याने साकारण्यात आली आहे. त्यांच्या सातत्यपूर्ण पाठिंब्यामुळे संस्थेच्या विकासाला महत्त्वपूर्ण गती मिळाली असल्याचे यावेळी नमूद करण्यात आले.

कार्यक्रमात डॉ. सायरस एस. पूनावाला आणि अदार सी. पूनावाला यांचा नवीन इमारतीच्या उभारणीत दिलेल्या योगदानाबद्दल विशेष सत्कार करण्यात आला. बिशप एज्युकेशन सोसायटीचे अध्यक्ष रुडोल्फ वूडमन आणि प्रशासकीय मंडळाच्या सदस्यांच्या हस्ते त्यांना रौप्य फलक प्रदान करून गौरविण्यात आले.

डॉ. पूनावाला म्हणाले, “जेव्हा जेव्हा मी या शाळेत येतो, तेव्हा जुन्या आठवणींमध्ये हरवून जातो. १९४९ ते १९५८ या कालावधीत मी येथे शिक्षण घेतले. त्या काळातील अनेक प्रसंग आजही माझ्या स्मरणात आहेत. एकेकाळी या शाळेत खोडकर विद्यार्थी म्हणून वावरणारा मी, आज प्रमुख पाहुणा म्हणून याच शाळेत उपस्थित आहे, यावर माझाच विश्वास बसत नाही. शाळेने उभारलेली ही नवी वास्तू केवळ इमारत नसून विद्यार्थ्यांच्या उज्ज्वल भविष्यासाठीचा पाया आहे. या उपक्रमात माझा हातभार लागला, हे माझे भाग्य समजतो.”

प्राचार्य शेन मॅकफर्सन यांनी सांगितले की, १६० वर्षांहून अधिकचा गौरवशाली इतिहास लाभलेल्या द बिशप स्कूलची परंपरा डॉ. सायरस पूनावाला यांच्यासारख्या माजी विद्यार्थ्यांमुळे अधिक समृद्ध झाली आहे. त्यांच्या उदार सहकार्यामुळे शाळेला अत्याधुनिक सुविधा असलेली नवी इमारत उभारणे शक्य झाले असून त्याचा विद्यार्थ्यांच्या सर्वांगीण विकासासाठी मोठा लाभ होणार आहे.

बिशप एज्युकेशन सोसायटीचे अध्यक्ष रुडोल्फ वूडमन यांनी शाळेच्या इतिहासाचा आढावा घेताना सांगितले की, १८६४ मध्ये कॅम्प परिसरात सुरू झालेल्या या संस्थेचा विस्तार आज कल्याणीनगर आणि उंड्रीपर्यंत झाला आहे. सध्या शाळेच्या तीनही शाखांमध्ये सहा हजारांहून अधिक विद्यार्थी शिक्षण घेत असून पुण्याच्या शैक्षणिक परंपरेत संस्थेचे महत्त्वपूर्ण योगदान आहे. यापूर्वीही शाळेने डॉ. सायरस पूनावाला यांच्या सन्मानार्थ परिसरातील पादचारी पुलाला त्यांचे नाव देऊन त्यांच्याशी असलेल्या दीर्घकालीन नात्याचा गौरव केला आहे.

क्रिएटिव्ह फाउंडेशन तर्फे नरेंद्र मोदी यांच्या पंतप्रधान पदाच्या तपपूर्ती आणि चंद्रकांतदादा पाटील यांच्या वाढदिवसानिमित्त सेवा सप्ताह.

पुणे-सेवाकार्यातून समाधान आणि मनःशांती लाभते आणि म्हणूनच माझ्या वाढदिवसाच्या निमित्ताने पुष्पगुच्छ,हारतुरे, शाल श्रीफळ,भेटवस्तू,मिठाई केक इ न देता कार्यकर्त्यांनी सेवाकार्य करावे किंवा मी करत असलेल्या सामाजिक उपक्रमांना हातभार लावावा असे मत ना. चंद्रकांतदादा पाटील यांनी व्यक्त केले. नरेंद्रभाई मोदी यांची पंतप्रधान पदाची तपपूर्ती आणि माझा वाढदिवस हा एकाच दिवशी असल्याने वाढदिवसाचा आनंद द्विगुणित होत असल्याचे मत ही चंद्रकांतदादांनी व्यक्त केले.
क्रिएटिव्ह फाउंडेशन तर्फे पंतप्रधान नरेंद्र मोदी यांची तपपूर्ती आणि ना. चंद्रकांतदादा पाटील यांच्या वाढदिवसानिमित्त सेवा सप्ताह साजरा केला जात आहे या प्रसंगी ते बोलत होते.
यावेळी क्रिएटिव्ह फाउंडेशन चे अध्यक्ष संदीप खर्डेकर, वारजे कर्वेनगर क्षेत्रीय कार्यालयाच्या अध्यक्ष नगरसेविका व क्रिएटिव्ह फाउंडेशन च्या विश्वस्त मंजुश्री खर्डेकर, विश्वस्त प्रतीक खर्डेकर, सौ. कल्याणी खर्डेकर,निसर्गछाया च्या संचालिका सौ. अमृता देवगावकर, मंदार देवगावकर,विन विन बाईट्स एल एल पी व विंग्रो फार्मर प्रोड्युसर कंपनीचे संस्थापक मयूर पवार,राम मुंडे, प्रदीप काकडे,प्रेम खाडे,गणेश खाडे,अंकुश वाघमारे,सागर पवार,दिलीप साळुंखे,सौरभ पवार, अभिषेक आटोळे व इतर मान्यवर उपस्थित होते.
क्रिएटिव्ह फाउंडेशन सामाजिक कार्यात अग्रेसर असून फाउंडेशन च्या वतीने विविध सेवाभावी संस्थांना उपयुक्त साहित्याची मदत करण्यात येते असे फाउंडेशन चे अध्यक्ष संदीप खर्डेकर म्हणाले.
यालाच अनुसरून क्रिएटिव्ह फाउंडेशन तर्फे विश्वगुरू नरेंद्रभाई मोदी यांची पंतप्रधान पदाची तपपूर्ती आणि ना. चंद्रकांतदादा पाटील यांच्या वाढदिवसानिमित्त फाउंडेशन ने सेवा सप्ताह साजरा करण्याचे नियोजन केले व आज निसर्गछाया ह्या ज्येष्ठ नागरिकांच्या जीवनात आनंद फुलविण्यासाठी काम करणाऱ्या संस्थेस वॉटर डिस्पेन्सर व स्पीकर सेट भेट देण्यात आल्याचे संदीप खर्डेकर यांनी सांगितले.
तसेच महाराष्ट्रात अनेक ठिकाणी शेतकरी ते ग्राहक असे बाजार भरविणारे आणि कृषी प्रक्रिया आणि मूल्य साखळी, विपणन व निर्यात यात प्रामुख्याने कार्य करणारे मयूर पवार व त्यांच्या टीम चा मा. चंद्रकांतदादा पाटील यांच्या हस्ते सत्कार करण्यात आला. क्रिएटिव्ह फाउंडेशन च्या वतीने सर्व शेतकरी बांधवांना टूल बॉक्स सह सोलर लाईट सेट भेट देण्यात आले.
माझ्याच प्रभागात नव्हे तर महाराष्ट्रात दर आठवड्यात विविध ठिकाणी शेतकरी ते ग्राहक हा उपक्रम समर्थपणे आणि सातत्याने राबविण्यात मयूर पवार आणि टीम चा हातखंडा असून त्यांच्या कार्याबद्दल नुकत्याच पार पडलेल्या पुणे हॅकेथॉन मध्ये त्यांना मा. मुख्यमंत्री देवेंद्र फडणवीस यांच्या हस्ते 25 लाखाचे बक्षीस मिळाले याचा अभिमान वाटतो असे क्रिएटिव्ह फाउंडेशन च्या विश्वस्त मंजुश्री खर्डेकर म्हणाल्या.
विन विन बाईट्स एलएलपी ने कमी तेलयुक्त, अधिक पौष्टिक आणि चविष्ट तळलेले खाद्यपदार्थ तयार करण्यासाठी अभिनव व्हॅक्यूम फ्रायिंग तंत्रज्ञान विकसित केले आहे. या प्रणालीमध्ये व्हॅक्यूम चेंबरमध्येच रिअल-टाइम तेल निरीक्षण आणि सेंट्रिफ्यूगल डी-ऑइलिंग यंत्रणा समाविष्ट करण्यात आली आहे, ज्यामुळे उत्पादनाची गुणवत्ता आणि प्रक्रिया कार्यक्षमता वाढते. हे तंत्रज्ञान विशेषतः मिलेट्स आणि भाजीपाला आधारित उत्पादनांना मूल्यवर्धन करण्यास मदत करते. तसेच शेतकरी, महिला उद्योजक आणि ग्रामीण उत्पादकांसाठी अधिक बाजारपेठीय संधी निर्माण करण्याचे काम करते. या नवकल्पनेद्वारे शाश्वत अन्नप्रक्रिया, निरोगी स्नॅक्स आणि कृषीआधारित उद्योजकतेला चालना देण्याचे उद्दिष्ट असल्याचे मयूर पवार यांनी स्पष्ट केले.

“महाविकास आघाडीत काँग्रेसची गळचेपी”

सपकाळांविरोधात कारवाईची मागणी

पुणे-पुणे विधान परिषद निवडणुकीच्या निकालानंतर काँग्रेसमधील अंतर्गत नाराजी आता उघडपणे समोर येऊ लागली आहे. पक्षाचे ज्येष्ठ नेते आणि माजी नगरसेवक अरविंद शिंदे यांनी थेट काँग्रेस हायकमांडकडे धाव घेत महाराष्ट्र प्रदेश काँग्रेस अध्यक्ष हर्षवर्धन सपकाळ यांच्याविरोधात तक्रार दाखल केल्याची माहिती समोर आली आहे. या घडामोडीमुळे पुणे काँग्रेसमध्ये नव्या वादाला तोंड फुटले असून महाविकास आघाडीतील अंतर्गत समन्वयावरही प्रश्नचिन्ह निर्माण झाले आहे.

असे समजते कि अरविंद शिंदे यांनी काँग्रेस अध्यक्ष मल्लिकार्जुन खरगे आणि पक्षाचे सरचिटणीस के. सी. वेणुगोपाल यांना ई-मेलद्वारे तक्रार पाठवली आहे. पुणे विधान परिषद निवडणुकीत राष्ट्रवादी काँग्रेस (शरद पवार गट) उमेदवाराला पाठिंबा देण्याचा निर्णय प्रदेश नेतृत्वाने स्थानिक काँग्रेस नेत्यांना विश्वासात न घेता घेतल्याचा आरोप त्यांनी केला आहे.शिंदे यांच्या मते, पुण्यातील काँग्रेस पदाधिकारी, कार्यकर्ते आणि स्थानिक नेतृत्वाशी कोणतीही चर्चा न करता हा निर्णय घेण्यात आला. त्यामुळे कार्यकर्त्यांमध्ये असंतोष निर्माण झाला असून पक्ष संघटनेला धक्का बसला आहे.

अरविंद शिंदे यांनी केवळ प्रदेशाध्यक्षांवरच नव्हे तर महाविकास आघाडीच्या कार्यपद्धतीवरही प्रश्न उपस्थित केले आहेत. मित्रपक्षांना पाठिंबा देताना किंवा जागावाटपाचे निर्णय घेताना काँग्रेसच्या स्थानिक नेतृत्वाला दुय्यम स्थान दिले जात असल्याचा आरोप त्यांनी केला आहे. महाविकास आघाडीत काँग्रेसची सातत्याने गळचेपी होत असल्याची भावना कार्यकर्त्यांमध्ये निर्माण झाली असल्याचेही त्यांनी म्हटले आहे.

प्रदेशाध्यक्ष हर्षवर्धन सपकाळ यांनी घेतलेल्या निर्णयामुळे पक्षाची राजकीय ताकद कमी होत असल्याचा आरोप करत शिंदे यांनी पक्षश्रेष्ठींकडे याबाबत चौकशी व कारवाईची मागणी केली आहे. स्थानिक स्तरावरील नेत्यांना डावलून घेतलेले निर्णय भविष्यात काँग्रेसला महागात पडू शकतात, असेही त्यांनी तक्रारीत नमूद केल्याचे वृत्त आहे.

केंद्रीय संरक्षण मंत्री राजनाथ सिंह यांची राज्यमंत्री मुरलीधर मोहोळ यांनी घेतली भेट

पुणे विमानतळ विस्तार, कॅन्टोन्मेंट विलीनीकरण आणि इंदिरानगरच्या जागेबाबत महत्त्वपूर्ण चर्चा

नवी दिल्ली/पुणे : देशाचे संरक्षण मंत्री राजनाथ सिंह यांची केंद्रीय नागरी हवाई वाहतूक व सहकार राज्यमंत्री मुरलीधर मोहोळ यांनी भेट घेत पुण्याच्या संरक्षण खात्याशी संबंधित विविध महत्त्वपूर्ण विषयांवर सविस्तर चर्चा केली. पुणे आंतरराष्ट्रीय विमानतळाचा विस्तार, पुणे व खडकी कॅन्टोन्मेंट बोर्डांचे पुणे महानगरपालिकेत विलीनीकरण आणि इंदिरानगर-बर्मा शेल वसाहतीतील नागरिकांना हवाई दलाने बजावलेल्या नोटीसा या प्रमुख मुद्द्यांवर या बैठकीत सकारात्मक चर्चा झाली असून विषय मार्गी लावण्यासंदर्भात पुढील कार्यवाहीचे निर्देश संरक्षण मंत्र्यांनी दिले आहे. यामुळे गेली काही महिने प्रलंबित असणाऱ्या या विषयांना गती मिळणार आहे.

नवी दिल्लीतील संरक्षण खात्याच्या कार्यालयात झालेल्या या भेटीदरम्यान केंद्रीय मंत्री मोहोळ यांनी प्रामुख्याने पुणे विमानतळाच्या विस्ताराचा मुद्दा मांडला. विमानतळाच्या पुढील विस्तारासाठी एकूण ३०० एकर जागा संपादित केली जाणार असून, ही सर्व जागा राज्य सरकार स्वतः संपादित करणार आहे. सद्यस्थितीत, भारतीय विमानतळ प्राधिकरणाच्या टर्मिनलला लागूनच हवाई दलाची ३५ एकर जागा आहे. राज्य सरकारने या ३५ एकर जागेच्या बदल्यात हवाई दलाला त्याच परिसराला लागून ६५ एकर जागा देण्याची तयारी दर्शवली आहे. संरक्षण मंत्रालयाने आपल्या स्तरावरून हवाई दलाला याबाबत आवश्यक निर्देश दिल्यास या विस्तारीकरणाचे काम अत्यंत वेगाने सुरू होऊ शकेल, अशी विनंती मोहोळ यांनी संरक्षण मंत्र्यांकडे केली.

पुणे आणि खडकी कॅन्टोन्मेंट बोर्डाचे महानगरपालिकेत विलीनीकरण करण्याबाबत बैठकीत चर्चा झाली. या दोन्ही कॅन्टोन्मेंट बोर्डांच्या जमिनी महापालिकेत समाविष्ट करण्याचा प्रस्ताव राज्य सरकारने एप्रिल २०२६ मध्ये मुख्यमंत्री देवेंद्र फडणवीस यांच्या नेतृत्वात राज्य सरकारने संरक्षण मंत्रालयाकडे पाठवला आहे. या प्रस्तावावर केंद्र सरकारकडून लवकरात लवकर सकारात्मक कार्यवाही व्हावी, अशी मागणी मोहोळ यांनी या वेळी केली.

लोहगाव येथील इंदिरानगर-बर्मा शेल वसाहतीतील नागरिकांना हवाई दलाने जागा रिकामी करण्याच्या नोटीसा बजावल्या आहेत. सुमारे पाच एकरच्या या परिसरात ११०० ते ११५० घरे असून, जवळपास ५५०० ते ६००० नागरिक १९८० पासून येथे वास्तव्यास आहेत. या भागात महानगरपालिकेच्या शाळा, रुग्णालय आणि इतर अनेक नागरी सुविधा देखील उपलब्ध आहेत. या पूर्वी नोव्हेंबर २०२५ मध्येही मंत्री मोहोळ यांनी या समस्येबाबत संरक्षण मंत्र्यांचे लक्ष वेधले होते. या प्रकरणात संरक्षण खाते आणि महापालिकेने समन्वयातून मार्ग काढण्यासंदर्भात सकारात्मक चर्चा झाली. संरक्षण मंत्री राजनाथ सिंह जी यांनी या सर्व विषयासंदर्भात संबंधित अधिकाऱ्यांना कार्यवाहीचे निर्देश दिले.

“पुण्याच्या विकासाशी आणि नागरिकांच्या हिताशी संबंधित संरक्षण खात्याचे अनेक महत्त्वाचे विषय गेल्या काही काळापासून प्रलंबित होते. संरक्षण मंत्री राजनाथ सिंह जी यांच्यासोबत सकारात्मक चर्चा झाली असून, त्यांनी संबंधित अधिकाऱ्यांना आवश्यक कार्यवाहीचे निर्देश दिले आहेत. पुणे विमानतळ विस्तार, कॅन्टोन्मेंट विलीनीकरण आणि इंदिरानगरमधील नागरिकांच्या प्रश्नांबाबत लवकरच ठोस निर्णय होऊन प्रश्न मार्गा लागतील, असा विश्वास आहे.’’

• मुरलीधर मोहोळ

पुणे-महानगरपालिका आयुक्त नवल किशोर राम, यांनी प्रभाग क्र १ व २ तसेच भामा आसखेड प्रकल्प अंतर्गत कुरुळी जलशुद्धीकरण केंद्राची दिनांक ०९/०६/२०२६ रोजी पाहणी केली.पुणे शहराच्या उत्तर पूर्व भागातील गढूळ / पिवळसर पाणी तसेच कमी दाबाने व कमी वेळेत होत असलेल्या पाणीपुरवठ्या बाबत या भागातील नागरिक व सभासद यांनी वारंवार केलेल्या तक्रारीच्या अनुषंगाने महानगरपालिका आयुक्त नवल किशोर राम यांनी नागपूरचाळ, मुंजाबा वस्ती, धानोरी या भागात व कुरुळी येथे जलशुद्धीकरण प्रकल्पास दिनांक ०९/०६/२०२६ रोजी भेट दिली. यावेळी सभासद अश्विनी भंडारे, संगीता दांगट, अनिल टिंगरे, नंदिनी धेंडे, रवी उर्फ हर्षल टिंगरे, शितल सावंत, सुहास टिंगरे, अनिल सातव, रामदास दाभाडे उपस्थित होते. सदर भेटी दरम्यान सभासदांनी त्यांचे प्रभागातील पाण्याच्या समस्या मांडल्या.महानगरपालिका आयुक्त नवल किशोर राम यांनी जलशुद्धीकरण प्रकल्पामध्ये कशा प्रकारे पाणी शुध्द केले जाते याचा पूर्णपणे आढावा घेतला. सद्यस्थितीत गढूळ / पिवळसर पाण्याबाबत तज्ञांची मदत घेऊन सदर तक्रारींचे पुढील दोन दिवसात निराकरण करणेचे आदेश याप्रसंगी दिले. त्यानुसार तज्ञ दिनांक १०/०६/२०२६ रोजी पाहणी करणार आहेत. व तज्ञांच्या पाहणी नंतर व त्यांचा निष्कर्षानंतर त्यावर योग्य त्या उपाय योजना तात्काळ करण्यात येतील. तसेच भामा आसखेड प्रकल्पाच्या वारंवार खंडीत होणाऱ्या विद्युत पुरवठ्याच्या अनुषंगाने MSEDCL कडील अधिक्षक अभियंता यांच्या समवेत बैठक आयोजित करणे बाबत महानगरपालिका आयुक्त नवल किशोर राम यांनी आदेश दिले. त्याप्रमाणे भामा आसखेड प्रकल्पातून शुध्द पाणीपुरवठा होईपर्यंत यावर अवलंबून असणाऱ्या भागात दिवसाआड पाणीपुरवठा करण्याचे नियोजन तूर्त करू नये असे महानगरपालिका आयुक्त नवल किशोर राम यांनी या प्रसंगी सांगितले. या पाहणीवेळी पाणीपुरवठा विभागाचे प्रमुख नंदकिशोर जगताप, भामा-आसखेड प्रकल्प व्यवस्थापक रामदास तारु, अविनाश सपकाळ, विजय केळकर, एकनाथ गाडेकर तसेच पाणीपुरवठा विभागातील अधिकारी आणि जलशुद्धीकरण केंद्रावरील संबंधित अधिकारी उपस्थित होते.