मुंबई, दि.१२ नोव्हेंबर- डोंबिवलीकर बाल दोस्तांच्या आवडीचा किलबिल महोत्सव उद्या रविवारी १३ नोव्हेंबर रोजी पुन्हा एकदा धमाल मजा मस्तीची संध्याकाळ घेऊन येणार आहे. डोंबिवलीच्या सांस्कृतिक कार्यक्रमांच्या वर्दळीत डोंबिवलीकर किलबिल महोत्सव म्हणजे बाळगोपाळांसाठी हक्काचा असतो. लहान मुलांना खेळा-शिका-स्वतः बनवा या संकल्पनेवर आधारित या धमाल कार्यक्रमाचे यंदाचे १० वे वर्ष आहे. सार्वजनिक बांधकाम मंत्री रविंद्र चव्हाण यांच्या संकल्पनेतील किलबिल महोत्सव म्हणजे बालगोपाळांचा कॅलेंडरमधील मौज मजा धमाल मस्तीचा दिवस असतो. या अविस्मरणीय महोत्सवात धाडसी खेळांचे साहस रंगत आणतात.

केवळ लहान मुलांच्या मनोरंजनासाठी मंत्री रविंद्र चव्हाण यांनी दहा वर्षांपूर्वी डोंबिवलीकर किलबिल महोत्सवाची संकल्पना सुरू केली. मुलांना चित्रकला, टॅटू, कॅरिकेचर यासोबत कुंभाराच्या चाकावर मातीची भांडी, वायरची खेळणी स्वतः बनवता येणार आहेत तसेच बालनाट्य, जादूचे प्रयोग यासारखे कार्यक्रमही पाहायला मिळणार आहेत.  तनुरा ऍक्ट हा अद्भुत कलाप्रकार बाळगोपाळांना आकर्षित करेल अशी खात्री आहे. मिकी माउस, टेडी बेअर छोट्या दोस्तांच्या चेहेरीवर हास्य खुलवतील.
तर साहसी खेळांमध्ये कमांडो ब्रिज, रिव्हर क्रॉसिंग, वॉल क्लायंबिंग असे थरारक प्रकार अनुभवायला मिळणार आहेत. यंदा दोन सेगवे व्हेइकल्सचा थरार पण मुलांना अनुभवायला मिळणार आहे. तांदुळावर नाव कोरणे, मेंदी, लाखेच्या बांगड्या बनवून मिळणार आहेत. विशेष म्हणजे सर्व खेळ आणि सुविधा डोंबिवलीकर बाळ गोपाळांसाठी मोफत आहेत.
डोंबिवलीकर किलबिल महोत्सव रविवार दि १३ नोव्हेंबर रोजी सायंकाळी ४ ते १० दरम्यान डोंबिवली पश्चिमेतील बावन चाळ परिसरातील रेल्वे मैदानावर आयोजित करण्यात येणार असल्याचे मंत्री रविंद्र चव्हाण यांनी सांगितले

नवी दिल्ली-भारत सरकारच्या कार्मिक, सार्वजनिक तक्रार आणि निवृत्तीवेतन मंत्रालयाच्या निवृत्ती वेतन आणि निवृत्तीवेतनधारक कल्याण विभागाने, केंद्र सरकारच्या निवृत्तीवेतनधारकांसाठी डिजिटल जीवन प्रमाणपत्राच्या प्रचारासाठी देशव्यापी मोहीम सुरू केली आहे. गेल्या वर्षी नोव्हेंबर महिन्यात या मंत्रालयाचे केंद्रीय राज्यमंत्री डॉ. जितेंद्र सिंह यांनी कोणत्याही ऍन्ड्रॉईड मोबाईल फोनद्वारे फेस ऑथेंटिकेशन टेक्नॉलॉजी अर्थात चेहऱ्याचे प्रमाणीकरण करण्याच्या तंत्रज्ञानाचा वापर करण्याच्या अतिशय महत्त्वाच्या योजनेचा शुभारंभ केला होता. आता या विभागाने जीवन प्रमाणपत्र डिजिटल माध्यमातून उपलब्ध करण्याच्या योजनेचा प्रचार करण्यासाठी आणि फेस ऑथेंटिकेशन तंत्रज्ञान योजनेची लोकप्रियता वाढवण्यासाठी एक देशव्यापी मोहीम हाती घेतली आहे. निवृत्तीवेतनधारकांच्या सोयीसाठी सर्व नोंदणीकृत निवृत्तीवेतनधारक संघटना, निवृत्तीवेतन वितरण बँका, भारत सरकारची मंत्रालये आणि केंद्र सरकारच्या आरोग्य विषयक केंद्रांना विशेष शिबिरे आयोजित करून जीवन प्रमाणपत्र देण्यासाठी डिजिटल जीवन प्रमाणपत्र / फेस ऑथेंटिकेशन तंत्राचा प्रचार करण्याचे निर्देश देण्यात आले आहेत. याच मालिकेंतर्गत निवृत्तीवेतन आणि निवृत्तीवेतनधारक कल्याण विभागाच्या केंद्र सरकारी कर्मचाऱ्यांचे एक पथक पुण्याला भेट देणार आहे. त्याअंतर्गत 13 नोव्हेंबर 2022 रोजी केंद्र सरकारी निवृत्तीवेतन धारकांसाठी एसबीआय, पुणे मुख्य शाखा, डॉ. आंबेडकर रोड, कलेक्टर ऑफिस कंपाऊंड, पुणे-411001 या ठिकाणी या शिबिराचे आयोजन होणार आहे. आपली जीवन प्रमाणपत्रे डिजिटल साधनांच्या माध्यमातून जमा करण्यासाठी सर्व निवृत्तीधारकांसाठी येथे सोय करण्यात आली आहे.

यापूर्वी जीवन प्रमाणपत्र मिळवण्यासाठी वयोवृद्ध निवृतीवेतनधारकांना तासनतास बँकेच्या बाहेर रांग लावून ताटकळत उभे राहावे लागत होते. आता आपल्या घरीच केवळ एक बटण क्लिक करून ही सोय उपलब्ध झाली आहे. मोबाईलद्वारे फेस ऑथेंटिकेशनद्वारे जीवन प्रमाणपत्र सादर करण्याच्या प्रक्रियेत आधार क्रमांक, ओटीपीसाठी मोबाइल क्रमांक, पीपीओ क्रमांक, बँक किंवा पोस्ट ऑफिसमधील खाते क्रमांक इत्यादी संबंधित तपशील केवळ सुरुवातीला एकदाच देणे आवश्यक आहे. ही सुविधा राज्य सरकारी कर्मचारी आणि राज्याच्या कोषागार कार्यालयाच्या स्वरुपात वितरण अधिकाऱ्यांमार्फत देखील उपलब्ध आहे.

केंद्रीय पथकाने सर्व निवृत्तीवेतनधारकांना या केंद्राला भेट देऊन आपली जीवन प्रमाणपत्रे डिजिटल माध्यमातून सादर करण्याचे आवाहन केले आहे.

नवी दिल्ली-भारत सरकारच्या गृह मंत्रालयाने 18 आणि 19 नोव्हेंबर रोजी नवी दिल्ली येथे ‘ नो मनी फॉर टेरर’ या तिसऱ्या मंत्रिस्तरीय परिषदेचे आयोजन केले आहे.

या परिषदेच्या आयोजनाद्वारे मोदी सरकार आंतरराष्ट्रीय दहशतवादाच्या मुद्याला देत असलेले महत्त्व आणि या समस्येच्या विरोधातील शून्य सहनशीलतेचे धोरण तसेच या मुद्यावर आंतरराष्ट्रीय समुदायासोबत चर्चा करण्याच्या आवश्यकतेबाबतचे सरकारचे गांभीर्य दिसून येत आहे.

केंद्रीय गृह व्यवहार आणि सहकार मंत्री अमित शाह या परिषदेत सहभागी होणार असून दहशतवादाविरोधात आणि त्याला पाठबळ देणाऱ्या यंत्रणां विरोधातील लढ्यामध्ये भारताचा निर्धार ते प्रदर्शित करतील.

दहशतवादाला होणारा अर्थपुरवठा रोखण्यासाठी यापूर्वी पॅरिसमध्ये (2018) आणि मेलबर्नमध्ये (2019) झालेल्या परिषदेमध्ये झालेल्या चर्चा आणखी पुढे नेण्याचा या परिषदेचा उद्देश आहे. त्याचबरोबर दहशतवादाला होणाऱ्या अर्थपुरवठ्याच्या तांत्रिक, कायदेशीर, नियामक आणि सहकार्यविषयक सर्व पैलूंबाबतच्या चर्चांचा यात समावेश करण्याचा उद्देश आहे. दहशतवादाच्या अर्थपुरवठ्याला आळा घालण्यावर भर देणाऱ्या उच्चस्तरीय अधिकृत आणि राजकीय विचारमंथनाला गती देण्याचा देखील या परिषदेचा उद्देश आहे.

जागतिक स्तरावर अनेक देशांना अनेक वर्षांपासून दहशतवाद आणि हिंसाचार, घुसखोरांच्या कारवायांची झळ पोहोचली आहे. बऱ्याच भागांमध्ये दहशतवादाच्या स्वरुपामध्ये फरक दिसत असला तरी त्यामुळे प्रदीर्घ काळ चालणाऱ्या सांप्रदायिक संघर्षाला खतपाणी घालण्यासह अस्थिर भू-राजकीय वातावरण निर्माण करण्याचा प्रमुख उददेश यामागे दडलेला असतो. अशा संघर्षामुळे शासनव्यवस्था ढासळते, राजकीय अस्थिरता, आर्थिक विवंचना आणि नियंत्रण विरहित मोठा भूभाग असे परिणाम दिसू लागतात. अशा प्रकारांचे समर्थन करणाऱ्या देशाकडून या दहशतवादाला चालना दिली जाते, विशेषतः अर्थपुरवठा केला जातो.

भारताला तीन दशकांपेक्षा जास्त काळ दहशतवादाच्या विविध प्रकारांची आणि त्यासाठी होणाऱ्या अर्थपुरवठ्याची झळ पोहोचली आहे. म्हणूनच अशाच प्रकारची झळ बसलेल्या देशांची वेदना आणि हानी यांची जाणीव भारताला आहे. शांतताप्रिय देशांसोबत एकजूट प्रदर्शित करण्यासाठी आणि दहशतवादाच्या अर्थपुरवठ्याला प्रतिबंध करण्याच्या दृष्टीने शाश्वत सहकार्याचा सेतू निर्माण करण्यासाठी ऑक्टोबर महिन्यात भारताने दोन जागतिक कार्यक्रमांचे  दिल्लीत आयोजन केले. इंटरपोलची वार्षिक महासभा तसेच मुंबई आणि दिल्लीत आयोजित करण्यात आलेली संयुक्त राष्ट्रांच्या दहशतवाद प्रतिबंधक समितीची विशेष बैठक या कार्यक्रमांचा त्यात समावेश होता. आगामी एनएमएफटी परिषदेमुळे, विविध देशांमध्ये या समस्येविरोधात जागरुकता आणि सहकार्य निर्माण करण्याच्या आपल्या प्रयत्नांना पाठबळ प्राप्त होईल.

तिसऱ्या ‘ नो मनी फॉर टेरर’ परिषदेमध्ये दहशतवादाचे जागतिक कल आणि दहशतवादाला अर्थपुरवठा, दहशतवादाला अर्थपुरवठा करण्यासाठी औपचारिक आणि अनौपचारिक स्रोतांचा वापर, उदयोन्मुख तंत्रज्ञान तसेच दहशतवाद्यांना अर्थपुरवठा आणि संबंधित आव्हानांना तोंड देण्यासाठी आवश्यक आंतरराष्ट्रीय सहकार्य यावर भर दिला जाईल. 75 देश आणि आंतरराष्ट्रीय संस्थांच्या प्रतिनिधींना या दोन दिवसीय परिषदेत सविस्तर विचारविनिमयासाठी एकत्र आणण्याचा या परिषदेचा उद्देश आहे.

मुंबई, दि.12 : दैनंदिन जीवनात ग्राहकाकडून नियमितपणे उपयोगात आणल्या जाणाऱ्या विविध अन्नपदार्थासह “खाद्यतेल” व “पावडर मसाले” यांच्या गुणवत्ता व दर्जा यांची खात्री व खातरजमा करण्यासह सर्व सामान्य जनतेस सकस, निर्भेळ व सुरक्षित अन्नपदार्थ उपलब्ध व्हावेत यासाठी अन्न व औषध प्रशासनाने विशेष मोहीम हाती घेतली आहे.

मेसर्स वेदिक स्पाइसेस प्रायव्हेट लिमिटेड, प्लॉट नंबर ए- 362, महापे एमआयडीसी, टीटीसी इंडस्ट्रियल एरिया, महापे, नवी मुंबई या ,”उत्पादक” अन्न आस्थापनातून दिनांक 10 नोव्हेंबर 2022 रोजी हळद पावडर (वजन 296 किलो), धनिया पावडर (वजन 3998 किलो), मिरची पावडर (वजन 6498 किलो), जीरे पावडर (वजन 5454 किलो) तसेच करी पावडर (वजन 2498 किलो) असा एकूण रुपये 27 लाख 39 हजार एवढ्या किमतीचा अन्नपदार्थाचा साठा तो गैरछापाचा व कमी प्रतीचा असल्याचा संशयावरून जप्त करण्यात आला.

अन्न आस्थापनातून एकूण पाच अन्नपदार्थांचे नमुने अन्न सुरक्षा व मानके कायदा, 2006 अंतर्गत शासकीय विश्लेषणासाठी घेण्यात आलेल्या असून त्यांचा अहवाल प्राप्त होताच त्या अनुषंगाने उचित कायदेशीर कारवाई घेण्यात येईल.  सदरची कार्यवाही अन्न व औषध प्रशासन विभागाचे मंत्री संजय राठोड यांचे आदेश व अभिमन्यु  काळे, आयुक्त, अन्न व औषध प्रशासन, महाराष्ट्र राज्य, मुंबई यांच्या सूचनेनुसार श्री सुरेश देशमुख, सह आयुक्त (अन्न), कोकण विभाग, ठाणे यांच्या मार्गदर्शनाखाली घेण्यात आली. ही कार्यवाही  राहुल ताकाटे, अन्न सुरक्षा अधिकारी, ठाणे यांनी  अशोक पारधी, सहाय्यक आयुक्त (अन्न), ठाणे यांचे उपस्थितीत केलेली आहे.

खाद्यतेल उत्पादकांनी टिनांच्या डब्यांचा खाद्यतेलाच्या पॅकिंग करण्यासाठी पुनर्वापर करू नये, कोणत्याही खाद्यतेलाचे पॅकिंग करताना विहित दर्जाच्या बी. आय. एस. ग्रेडच्याच टीनाच्या डब्यांचा उपयोग करावा, खाद्यतेलाच्या सर्वांगीण व सर्वंकष तपासणी व विश्लेषणासाठी स्वतःची अद्यावत इन हाऊस (अंतर्गत) प्रयोगशाळा ठेवावी. कोणत्याही खाद्यतेलाची लूज, सुट्ट्या किंवा खुल्या स्वरूपात विक्री करू नये. अन्नपदार्थ हाताळणीशी संबंधित असणाऱ्या प्रत्येक कामगारांचे ते संसर्गजन्य रोग आणि किंवा त्वचारोग यापासून मुक्त आहेत याची खात्री व खातर जमा होण्यासाठी प्राधिकृत वैद्यकीय अधिकारी यांच्याकडून वैद्यकीय तपासणी करण्यात यावी. “मिठाई” याअन्नपदार्थाच्या किरकोळ विक्रेत्यांनी सुट्ट्या स्वरूपातील मिठाईच्या ट्रेवर सदर मिठाई कोणत्या तारखेपर्यंत वापरावी याबाबतचा स्पष्ट उल्लेख नेहमी करावा.

प्रत्येक उत्पादकाने उत्पादन प्रक्रियेवर पर्यवेक्षण ठेवण्यासाठी विहित शैक्षणिक पात्रता धारण केलेल्या व्यक्तीची नेमणूक करावी. तसेच अन्न सुरक्षा व मानके प्राधिकरण, नवी दिल्ली यांनी विहित केल्याप्रमाणे प्रत्येकी 25 कामगारामागे एका व्यक्तीला अन्न सुरक्षा व मानके कायदा, 2006 अंतर्गत फास्टट्रॅक ट्रेनिंग प्राप्त करून घ्यावे. जनतेस सकस, निर्भेळ व सुरक्षित अन्नपदार्थ उपलब्ध होण्याच्या दृष्टिकोनातून खाद्यतेला व्यतिरिक्त इतर उत्पादकांनी त्यांनी विक्रीसाठी उत्पादित केलेल्या प्रत्येक अन्न पदार्थाचे बॅच निहाय तपासणी अन्न सुरक्षा व मानके प्राधिकरण, नवी दिल्ली यांनी प्राधिकृत केलेल्या एन. ए. बी. एल. प्रयोगशाळेकडून तपासणी करून घ्यावी. प्रत्येक अन्न व्यवसाय चालकाने बिलावर अन्न भेसळ प्रतिबंधक कायदा, 2006 अंतर्गत त्याला मंजूर करण्यात आलेला परवान्याचा क्रमांक न चुकता नमूद करावा तसेच सदरचा परवाना सर्वांना दिसेल अशा ठिकाणी फोटो फ्रेम करून लावावा.

उत्पादक, आयातदार, वितरक यांनी कोणत्याही अन्नपदार्थाची विनापरवाना किंवा विनानोंदणी अन्न आस्थापकडून खरेदी करू नये किंवा विनानोंदणी किंवा विनापरवाना अन्न आस्थापनांना कोणत्याही अन्नपदार्थाची कोणत्याही परिस्थितीत विक्री करू नये. प्रत्येक अन्न व्यवसायाचालकाने त्याच्या दुकानात व परिसरात अन्न सुरक्षा व मानके (अन्न व्यवसायाचा परवाना व नोंदणी) 2011 अंतर्गत नमूद केल्याप्रमाणे सर्वसाधारण स्वच्छता राखावी तसेच कोणत्याही अन्नपदार्थाच्या गुणवत्ता व दर्जा बाबत आणि किंवा अन्न आस्थापनाबाबत कोणतीही तक्रार असल्यास त्याबाबत सविस्तर माहिती प्रशासनाच्या 1800-222-365 या टोल फ्री क्रमांकावर नोंदवावी असे आवाहन ठाणे अन्न व औषध प्रशासन सह आयुक्त (अन्न), सुरेश देशमुख यांनी केलेली आहे.

मुंबई-बॉलिवूड सुपरस्टार शाहरुख खानला कस्टम अधिकाऱ्यांनी मुंबई विमानतळावर रोखल्याची बाब उजेडात आली आहे. विमानतळावर तैनात एअर इंटेलिजेंस यूनिट अर्थात AIU च्या सूत्रांनी सांगितले की, शाहरुख शुक्रवारी रात्री शारजाहून परतला होता. त्यावेळी त्याच्याकडे 18 लाख रुपयांच्या घड्याळांंचे महागडे कव्हर आढळले. त्यामुळे अधिकाऱ्यांनी त्याला काही वेळ रोखून धरले. या घड्याळांंसाठी शाहरुखला सुमारे 6.83 लाख रुपयांची कस्टम ड्यूटी मोजावी लागली.

यासंबंधीच्या वृत्तानुसार, , शाहरुख खान आपल्या टीमसोबत एका पुस्तक प्रकाशन सोहळ्यात सहभागी होण्यासाठी प्रायव्हेट चार्टर्ड प्लेनने दुबईला गेला होता.

याच विमानाने तो शुक्रवारी रात्री साडे 12 वा. मुंबईत परतला. विमानतळावरील रेड चॅनल पार करताना कस्टमने त्यांना थांबवून त्यांच्या सामानाची तपासणी केली होती.शाहरुख खान एका खासगी चार्टर्ड प्लेनहून मुंबईला पोहोचला होता. त्याला T-3 टर्मिनलवर शुक्रवारी मध्यरात्री 1 च्या सुमारास कस्टम अधिकाऱ्यांनी त्याला रोखले. यावेळी झालेल्या तपासणीत त्यांच्या बॅगेत Babun & Zurbk घड्याळ, Rolex घड्याळीचे 6 डब्बे, Spirit ब्रँडचे घड्याळ, अॅपल सीरीजची घड्याळे आढळली . तसेच त्यांचे रिकामे बॉक्सही आढळले.

एअरपोस्टवर तासभर चाललेल्या प्रक्रियेनंतर शाहरुख व त्याची मॅनेजर पूजा ददलानीला सोडण्यात आले. पण शाहरुखचा बॉडीगार्ड रवी व त्याच्या टीमच्या उर्वरित सदस्यांना थांबवून ठेवण्यात आले. यासंबंधीच्या वृत्तानुसार, शाहरुखचा बॉडीगार्ड रवीने 6 लाख 87 हजार रुपयांची कस्टम ड्यूटी भरली. ही प्रक्रिया पूर्ण होण्यासाठी सकाळचे 8 वाजले. त्यानंतर अधिकाऱ्यांनी रवीची सुटका केली.

मुंबई, दि.११ : भारतरत्न डॉ. बाबासाहेब आंबेडकर यांच्या महापरिनिर्वाण दिनानिमित्त चैत्यभूमी येथे अभिवादन करण्यासाठी येणाऱ्या लाखो अनुयायींना यंदाही सोयी-सुविधा देताना सर्व यंत्रणांनी कोणत्याही त्रुटी राहू नयेत याची खबरदारी घ्यावी. इंदू मिल येथील भारतरत्न डॉ. बाबासाहेब आंबेडकर यांच्या आंतरराष्ट्रीय स्मारकाचे काम वर्षभरात पूर्ण करावे. यासाठी सामाजिक न्याय विभागाने तातडीने कार्यवाही करावी, असे निर्देश उपमुख्यमंत्री देवेंद्र फडणवीस यांनी दिले.

भारतरत्न डॉ. बाबासाहेब आंबेडकर यांच्या ६६ व्या महापरिनिर्वाण दिनानिमित्त ६ डिसेंबर रोजी चैत्यभूमी व छत्रपती शिवाजी मैदान येथे शासनाच्या वतीने राबविण्यात येणाऱ्या सेवा सुविधांबाबत सह्याद्री अतिथीगृह येथे आयोजित बैठकीत उपमुख्यमंत्री श्री. फडणवीस बोलत होते. बैठकीस महसूल मंत्री राधाकृष्ण विखे-पाटील, मुंबई शहरचे पालकमंत्री दीपक केसरकर, मुंबई  उपनगरचे पालकमंत्री मंगल प्रभात लोढा, खासदार राहुल शेवाळे, माजी राज्यमंत्री अविनाश महातेकर यांच्यासह मुख्य सचिव मनुकुमार श्रीवास्तव, प्रधान सचिव गृह (विशेष) संजय सक्सेना, प्रधान सचिव (परिवहन) पराग जैन नानोटिया, मुंबई महानगर प्रदेश विकास प्राधिकरणचे महानगर आयुक्त एस.व्ही.आर.श्रीनिवास, मुंबई महापालिकेचे आयुक्त इक्बाल सिंह चहल, उपमुख्यमंत्री यांचे सचिव डॉ. श्रीकर परदेशी, पोलीस महासंचालक (प्रशिक्षण) संजय कुमार, मुंबई शहरचे पोलीस आयुक्त विवेक फणसळकर, मध्य रेल्वेचे अपर प्रबंधक अमरेन्द्र सिंह, अपर मंडल रेल्वे प्रबंधक मध्य रेल्वे शीत मरू, मध्य रेल्वेचे मुख्य सुरक्षा आयुक्त अमरेश कुमार, सामाजिक न्याय विभागाचे सचिव सुमंत भांगे, समाजकल्याण आयुक्त डॉ.प्रशांत नारनवरे, बार्टीचे  महासंचालक धम्मज्योती गजभिये, माहिती व जनसंपर्क महासंचालक जयश्री भोज, पोलिस सहआयुक्त (कायदा व सुव्यवस्था) विश्वास नांगरे-पाटील, डॉ.बाबासाहेब आंबेडकर महापरिनिर्वाण दिन समन्वय समितीचे मार्गदर्शक भदंत डॉ.राहुल बोधी महाथेरो, सरचिटणीस नागसेन कांबळे यांनी, रवि गरूड,महेंद्र साळवे, मयुर कांबळे, रमेश जाधव यांच्यासह विविध विभागाचे अधिकारी उपस्थित होते.

उपमुख्यमंत्री श्री. फडणवीस म्हणाले, चैत्यभूमीवर कोरोनानंतर मोठ्या प्रमाणात अनुयायी येतील. त्यामुळे  वाढणारी संख्या लक्षात घेवून मुंबई महापालिकेने चांगले नियोजन केले आहे. यापूर्वी  या विषयाच्या अनुषंगाने नियोजनाच्या बैठका घेण्यात आल्या आहेत. कोणत्याही प्रकारे कामामध्ये त्रुटी राहू नयेत यासाठी प्रशासनाने खबरदारी घेतली आहे ही चांगली गोष्ट आहे. मुंबई महापालिका, गृह, एसटी, सामाजिक न्याय विभाग या सर्व विभागांनी समन्वयाने काम करावे. राज्यात ज्या ज्या ठिकाणी  भारतरत्न डॉ. बाबासाहेब आंबेडकर यांचे पुतळे आहेत त्या त्या ठिकाणी स्थानिक प्रशासनाने स्वच्छता करावी. त्याचबरोबर या परिसरात कायदा सुव्यवस्था सुरळीत राखावी. ज्या ठिकाणाहून एसटीने अनुयायी चैत्यभूमीकडे येणार आहेत अशा एसटीमध्ये डॉ.बाबासाहेब आंबेडकर यांचा अभिवादनपर फलक लावावा. भारतरत्न डॉ. बाबासाहेब आंबेडकर यांचे  साहित्य वाजवी दरात उपलब्ध होण्यासाठी स्टॉल लावण्यात यावा जेणेकरून एक विचारांचा शिधा आपल्याला या माध्यमातून सर्वांपर्यंत पोहोचवता येईल.

उपमुख्यमंत्री श्री. फडणवीस म्हणाले, यावर्षी प्रमुख पाहुण्यांसाठी चैत्यभूमी येथे दर्शनासाठी  एक ठराविक वेळ ठेवण्यात यावा जेणेकरून अनुयायांना चैत्यभूमी येथे दर्शन घेताना कोणत्याही प्रकारचा त्रास होणार नाही. अनुयांयासाठी वॉटरप्रूफ मंडप, रांगेतील अनुयायांना बिस्कीटे आणि पाणी वाटपाचा निर्णय देखील चांगला आहे. अनुयायांची कोणतीही गैरसोय होवू नये यासाठी रेल्वे, मुंबई महापालिका, गृह विभाग व सामाजिक न्याय विभाग तसेच सर्व कार्यान्वयीन यंत्रणांनी पूर्वतयारी चांगल्या प्रकारे करावी. इंदू मिल येथील भारतरत्न डॉ. बाबासाहेब आंबेडकर यांच्या आंतरराष्ट्रीय स्मारकाचे काम येत्या वर्षभरात पूर्ण करावे, सामाजिक न्याय विभाग व मुंबई महानगर प्रदेश विकास प्राधिकरण यांनी सर्व मान्यता  लवकरात लवकर घ्याव्यात. पुढच्या वर्षी याच दिवशी इंदू मिल सर्वांसाठी खुली करण्यात येवू शकेल, असेही उपमुख्यमंत्री श्री.फडणवीस यावेळी म्हणाले.

डॉ.बाबासाहेब आंबेडकर महापरिनिर्वाण दिन समन्वय समितीचे सरचिटणीस नागसेन कांबळे, चैत्यभूमी व्यवस्थापक नियोजन समितीचे रमेश जाधव यांनी महापरिनिर्वाण दिनानिमित्त प्रशासनाने करावयाच्या कामाबाबत विविध सूचना बैठकीत केल्या.

चेन्नई-, खादी हा महात्मा गांधींच्या कायम जिव्हाळ्याचा विषय राहिला आहे, आजच्या घडीला खादी खूपच लोकप्रिय झाली आहे. गेल्या आठ वर्षात खादीच्या विक्रीत ३०० टक्क्यांनी वाढ झाली आहे.गांधीजींसाठी स्वच्छतेची खबरदारी घेणं हा महत्वाचा विषय होता. यालाच पाठिंबा देताना आमच्या सरकारनं ग्रामीण स्वच्छता अभियान चालवलं, ६ कोटींहून अधिक लोकांना पाण्याचं कनेक्शन दिलं. तसेच अडीच कोटींहून अधिक लोकांना वीज कनेक्शन दिलं.असे येथे पंतप्रधान नरेंद्र मोदी यांनी म्हटले आहे.

तामिळनाडूतील गांधीग्राम संस्थानच्या ३६ व्या दीक्षांत सोहळ्यात ते बोलत होते, ते म्हणाले ,’भारताचं भविष्य तरुणांच्या ‘आम्ही करु शकतो’ अशा पिढीच्या हातात आहे. आज पदवी घेणाऱ्या तरुणांना माझा हा संदेश आहे की, आपण नव्या भारताचे निर्माते आहात, अशा शब्दांत पंतप्रधान मोदींनी इथल्या विद्यार्थ्यांना प्रोत्साहित केलं.

गावे स्वावलंबी व्हावीत अशी महात्मा गांधींची इच्छा होती आणि ग्रामीण विकासाची आपली दृष्टी यातूनच प्रेरणा घेते.आत्मा गावांचा असला तरी आपण सुविधा तिथे शहरांच्या द्यायला हव्यात हे हि मोडी यांनी नमूद केले आहे. 

नवी दिल्‍ली, 11 नोव्‍हेंबर 2022

पंतप्रधान,  नरेंद्र मोदी यांनी आज बेंगळुरू येथील केएसआर  रेल्वे स्थानकावरुन  म्हैसूर आणि पुराची थलाईवार डॉ एमजीआर चेन्नई सेंट्रल दरम्यान धावणाऱ्या वंदे भारत एक्सप्रेसला हिरवा झेंडा दाखवला. देशातील ही पाचवी वंदे भारत एक्सप्रेस असून दक्षिण भारतातील अशा प्रकारची  पहिली रेल्वेगाडी  आहे. पंतप्रधानांनी आज बेंगळुरू येथील केएसआर  रेल्वे स्थानकावरुन भारत गौरव काशी दर्शन रेल्वेगाडीला देखील हिरवा झेंडा दाखवला.

मेक इन इंडियाच्या यशोगाथेतील एक उत्कृष्ट उदाहरण म्हणजे भारतीय रेल्वेने भारतातील पहिली स्वदेशी, सेमी-हाय स्पीड, नवी दिल्ली-कानपूर-अलाहाबाद-वाराणसी मार्गावर  धावणारी – वंदे भारत एक्सप्रेस सुरू केली होती जिला  15 फेब्रुवारी 2019 रोजी पंतप्रधानांनी  हिरवा झेंडा दाखवला होता.  पुढे, वंदे भारत एक्सप्रेस गाड्या नवी दिल्ली-माता वैष्णो देवी कटरा, गांधीनगर राजधानी-अहमदाबाद-मुंबई सेंट्रल आणि अंब अंदौरा-नवी दिल्ली मार्गांवर सुरू करण्यात आल्या आहेत.

या रेल्वेगाडीमुळे औद्योगिक केंद्र असलेले चेन्नई आणि तंत्रज्ञानाचे केंद्र असलेतले सॉफ्टवेअर -स्टार्ट अप संकुल बेंगळुरू तसेच जगविख्यात पर्यटन स्थळ असलेले म्हैसूर शहर एकमेकांशी जोडले जातील. म्हैसूर – बेंगळुरू – चेन्नई असा प्रवास करणार्‍या नियमित प्रवाशांव्यतिरिक्त  सॉफ्टवेअर आणि  व्यावसायिक , तंत्रज्ञ, पर्यटक, विद्यार्थी यांना या गाडीचा  लाभ  होईल. हा रेल्वेप्रवास विमान प्रवासाप्रमाणे आरामदायी असेल आणि रेल्वेमधील प्रवासाला एका वेगळ्याच अनुभूतीची जोड देईल.

वंदे भारत एक्सप्रेसची वैशिष्ट्ये

ही एक जागतिक दर्जाची अत्याधुनिक सोईसुविधा असलेली रेल्वेगाडी आहे.   चेन्नई येथे पेरांबूर येथील  एकीकृत रेल्वे कारखान्यात स्वदेशी तंत्रज्ञानाने बनवलेली वंदे भारत ट्रेन – भारतीय अभियंत्यांच्या सक्षमतेची  साक्ष आहे आणि मेक इन इंडिया उपक्रमाचा कळस  आहे. पंतप्रधानांचे आत्मनिर्भर भारताचे स्वप्न साकार करण्याच्या प्रयत्नांमध्ये हा एक मैलाचा दगड आहे.

बेंगळुरू – वाराणसी भारत गौरव काशी दर्शन

बेंगळुरू ते काशी ही भारत गौरव रेल्वेगाडी सुरू करण्यात आली आहे जी सर्वसमावेशक पॅकेजमध्ये आरामदायी आणि सोयीस्कर रेल्वे प्रवास, राहण्याची व्यवस्था , मुक्काम आणि दर्शन सुविधा यांनी युक्त आहे. ही रेल्वेगाडी हुबळी, बेळगावी, मिरज आणि पुणे या मार्गे जाणार आहे, ज्यामुळे केवळ बेंगळुरूच्या भाविकांनाच नाही तर काशीला जाण्याची इच्छा असलेल्या उत्तर कर्नाटकातील भाविकांनाही लाभ  होईल. ही ट्रेन प्रयागराज आणि अयोध्या या मार्गावरून देखील  जाणार आहे.

भारत गौरव काशी दर्शन ट्रेनचा एक डबा

या सहलीचा खर्च  20,000 रुपये इतका असून त्यातील    5000 रुपये अनुदान राज्य सरकारकडून दिले जाणार आहे  . या गाडीच्या पहिल्या रेल्वे प्रवासात सुमारे 600 यात्रेकरू असतील; हे यात्रेकरू काशीव्यतिरिक्त   अयोध्या आणि प्रयागराजलाही जातील. भारतासह जगभरातील लोकांना भारताचा वैभवशाली  सांस्कृतिक वारसा आणि भव्य ऐतिहासिक स्थळांचे  दर्शन व्हावे हे भारत गौरव रेल्वेगाडी (संकल्पनेवर आधारित टुरिस्ट सर्किट ट्रेन्स)  चालवण्याचे उद्दिष्ट आहे.