पुणे दि.१७: पथविक्रेत्यांच्या मुलांच्या शिक्षणासाठी एखादा ट्रस्ट स्थापन केल्यास आणि त्यामार्फत अर्ज एकत्रित केल्यास दानशूर व्यक्तींकडून मदत मिळवून देण्यात येईल, असे प्रतिपादन राज्याचे उच्च व तंत्रशिक्षण मंत्री तथा जिल्ह्याचे पालकमंत्री चंद्रकांत पाटील यांनी केले.

पुणे महानगरपालिकेच्या समाजविकास विभागातर्फे यशवंतराव चव्हाण नाट्यगृह येथे आयोजित पंतप्रधान पथविक्रेता आत्मनिर्भरता निधी अर्थात स्वनिधी महोत्सवाच्या उदघाटन प्रसंगी ते बोलत होते. कार्यक्रमाला मनपा आयुक्त विक्रमकुमार, केंद्रीय गृहनिर्माण आणि शहरी व्यवहार मंत्रालयाचे सहसचिव राहुल कपूर, मनपाचे अतिरिक्त आयुक्त डॉ. कुणाल खेमनार, उपायुक्त नितीन उदास, जिल्हा अग्रणी बँक व्यवस्थापक श्रीकांत कारेगावकर उपस्थित होते.

योजनेच्या अंमलबजावणीसाठी महानगरपालिकेचे अभिनंदन करून पालकमंत्री श्री. पाटील म्हणाले की, पथविक्रेत्यांनी एकत्रितपणे वस्तू मोठ्या प्रमाणात खरेदी केल्यास कमी किमतीत खरेदी होईल. त्यामुळे मिळणारे उत्पन्न वाढविता येईल.  सुरुवातीच्या खरेदीसाठी  निधी उभारण्यातांना लोकप्रतिनिधी मदत करतील. पुढच्या आठवड्यात प्रलंबित अर्जाबाबत बँक प्रतिनिधींसमवेत बैठक घेण्यात येईल. पथविक्रेत्यांसाठी नियुक्त शासकीय समिती आणि महानगरपालिकेने एकत्रित बसून पथविक्रेत्यांसंदर्भातील समस्या दूर करण्याचा प्रयत्न करावा.

कोविड संकटकाळात पथविक्रेत्यांना सर्वाधिक हानी सहन करावी लागली. त्यांना दिलासा देण्यासाठी पंतप्रधान नरेंद्र मोदी यांनी स्वनिधी योजना सुरू केली, असे त्यांनी सांगितले.

श्री. कपूर म्हणाले की, पाहिल्यावर्षी देशात २० लाख पथविक्रेत्यांनी स्वनिधी योजनेचा लाभ घेतला. महाराष्ट्रात ४५ टक्के आणि देशात ४१ टक्के महिलांना या योजनेचा लाभ देण्यात आला आहे. रोजगारासाठी हे महत्त्वाचे क्षेत्र आहे. योजनेत सहभागी ९० टक्के लाभार्थी प्रथमच बँकिंग क्षेत्राशी जोडले गेले. देशात ५ हजार ६०० कोटींचे कर्ज वितरित करण्यात आले असून राज्यात ४ लाख ५० हजार पथविक्रेत्यांनी योजनेचा लाभ घेतला. अधिकाधिक पथविक्रेत्यांपर्यंत योजना पोहोचावी, असे आवाहन त्यांनी केले.

आयुक्त विक्रमकुमार म्हणाले की, दोन वर्षांपूर्वी पथविक्रेत्यांना सहकार्य करण्यासाठी ही योजना सुरू करण्यात आली. विक्रेत्यांच्या बँक खात्यात रक्कम जमा करून त्यांना डिजिटल व्यवहारासाठी प्रोत्साहन देण्यात येत आहे. शहराचा विस्तार लक्षात घेता ३ हजार पथविक्रेत्यांना नव्याने परवाना देण्यात येईल. विमाननगर येथे हॉकर्स पार्क उभारण्यात येत असून शहरात १५ ठिकाणी अशी सुविधा उपलब्ध करून देण्यात येईल. बँकांनी प्रलंबित अर्जाना लवकर मान्यता द्यावी, असे आवाहन त्यांनी केले.

प्रास्ताविकात श्री.उदास म्हणाले की, पंतप्रधान स्वनिधी योजनेअंतर्गत पुणे शहरात ४६ हजार ७७ अर्ज प्राप्त झाले असून १७ हजार ७५२ पथविक्रेत्यांना २१ कोटी ८० लाखाचे कर्ज वितरित करण्यात आले आहे. विविध योजनांच्या माध्यमातून पथविक्रेत्यांचे राहणीमान उंचावण्याचा प्रयत्न असल्याचे त्यांनी सांगितले.

यावेळी पालकमंत्र्यांच्या हस्ते प्रातिनिधिक स्वरूपात पथविक्रेत्यांना धनादेश आणि परिचय फलकाचे वितरण करण्यात आले. चांगली कामगिरी करणारे अधिकारी, बँकेचे प्रतिनिधी आणि पथविक्रेत्यांचा यावेळी प्रशस्तीपत्र देऊन सत्कार करण्यात आला. डिजिटल व्यवहारासाठी प्रातिनिधिक स्वरूपात क्यूआर कोडचे वाटपही यावेळी करण्यात आले.

प्रारंभी पालकमंत्री श्री. पाटील यांनी पंतप्रधान स्वनिधी योजनेच्या लाभार्थ्यांच्या स्टॉलला भेट देऊन लाभार्थ्यांशी संवाद साधला.

जनता दरबारच्या माध्यमातून विविध सोसायटीतील नागरिकांशी संवाद

पुणे-नागरिकांशी थेट भेट व जनता दरबाराच्या माध्यमातून त्यांच्या समस्या ऐकून घेऊन त्या सोडविण्यासाठी आज ना.चंद्रकांतदादा पाटील यांनी कोथरुडमधील सहवास सोसायटी सभागृहात या भागातील नागरिकांशी संवाद साधला. कोथरूड मधील सहवास सोसायटी भागातील नागरिकांनी मांडलेल्या समस्या तातडीने सोडवून, आठ दिवसांत अहवाल सादर करावा, अशा सूचना पालकमंत्री चंद्रकांतदादा पाटील यांनी आज दिल्या.

यावेळी भाजप चे प्रदेश प्रवक्ते संदीप खर्डेकर, माजी नगरसेवक जयंत भावे, दीपक पोटे,ॲड. मिताली सावळेकर, गिरीश खत्री, नवनाथ जाधव, अनुराधा एडके, कुलदीप सावळेकर, महेश पवळे यांच्या सह भाजपाचे पदाधिकारी आणि स्थानिक नागरिक मोठ्या संख्येने उपस्थित होते.

जनता दरबारावेळी स्थानिक नागरिकांनी आपल्या काही समस्या नामदार पाटील यांच्या समोर मांडल्या. यात‌ प्रामुख्याने कमी दाबाने पाणीपुरवठा होणे, कचरा संकलन आणि विशेषत: झावळ्या आणि झाडांचा पाळा पाचोळा / पानांचा कचरा, डीपी रस्त्यावरील अतिरिक्त वाहतुकीमुळे अंतर्गत सेवा रस्त्यांवर होणारी वाहतूक, टवाळखोर तरुणांमुळे होणारा त्रास, रस्त्यावरील फुगे विक्रेत्यांमुळे महिलांना होणारा त्रास, रात्री अपरात्री वाजविले जाणारे फटाके,डी पी रस्त्यावरील मंगल कार्यालयाबाहेर होणारे अव्यवस्थित पार्किंग व तेथे होणाऱ्या कार्यक्रमांतील कर्णकर्कश्श आवाजामुळे होणारा त्रास ( स्पीकर चा आवाज मान्य डेसिबल पेक्षा जास्त असल्यामुळे ) आदी प्रमुख समस्या मांडल्या.

त्यावर संबंधित अधिकाऱ्यांना सदर समस्या तातडीने सोडवून आठ दिवसांत अहवाल सादर करण्याच्या सूचना नामदार पाटील यांनी दिल्या. तसेच,टवाळखोर तरुणांवर चाप बसवण्यासाठी आणि महिला व तरुणींच्या सुरक्षेसाठी पोलिसांनी पेट्रोलिंग वाढवावे, भागातील अतिक्रमणे तातडीने हटवावे आदी सूचना दिल्या.‌तसेच कर्वेनगर मधील विठ्ठल मंदिर रस्ता व अलंकार पोलीस स्टेशन जवळील समर्थ पथ येथील कामं त्वरित पूर्ण करून तेथे डांबरीकरण करावे अश्या सूचना देखील केल्या.
दोन दिवसापूर्वी गिरीजाशंकर सोसायटीत घडलेल्या खड्डा पडण्याच्या घटनेची दखल घेऊन रातोरात दुरुस्तीकार्य करून दिल्याबद्दल सोसायटीचे अध्यक्ष रवी गोखले व श्री. भांड यांनी मा. चंद्रकांतदादांचा सत्कार केला. तर डॉ. महेश तुळपुळे यांनी सहवास सोसायटीच्या वतीने नामदार चंद्रकांतदादा पाटील यांचे स्वागत केले, संदीप खर्डेकर यांनी संयोजन व सूत्रसंचालन केले. यावेळी मनपा च्या विविध खात्यांचे अधिकारी व पोलीस अधिकारी उपस्थित होते. सर्व नागरिकांनी मा. चंद्रकांतदादा पाटील यांच्या कार्यतत्परतेबाबत समाधान व्यक्त केले.

पुणे–

पुणे मनपा अंर्तगत अतिक्रमण कारवाई करण्याचे काम पथकातील कर्मचारी कैलास स्मशानभूमी ते आरटीओ कार्यालय यादरम्यान करत हाेते. त्यावेळी सार्वजिनक रक्स्त्यारवरील हात गाडयांवर अतिक्रमण विराेधी पथक कारवाई करताना, सदर पथकास बेदम मारहाण करण्यात आल्याचा प्रकार घडला हाेता. याप्रकरणी बंडगार्डन पाेलिसांनी पाच जणांना अटक केली आहे.

गणेश परदेशी (वय-40), राेहित परदेशी (25), राेहन परदेशी (25), महेश परदेशी (33), सुरज परदेशी (20) या पाचजणांना अटक करण्यात आली आहे. तर त्यांच्यासह प्रती गणेश परदेशी , शामा सुपरसिंग परदेशी (50) यांच्यावर देखील गुन्हा दाखल करण्यात आला आहे.

याबाबत पुणे महानगरपालिकेचे सहाय्यक अतिक्रमण निरीक्षक प्रशांत प्रल्हाद काेळेकर यांनी बंडगार्डन पाेलिस ठाण्यात आराेपी विराेधात तक्रार दाखल केली आहे. 16 मे राेजी संबंधित ठिकाणी सार्वजनिक रस्त्यावरील हात गाडयांवर अतिक्रमण कारवाई करण्याचे तक्रारदार हे त्यांचे सरकारी काम करत हाेते.

त्यावेळी संबंधि आराेपींनी सदरची कारवाई करु नये म्हणून गैरकायद्याची मंडळी जमवुन त्यांना शिवीगाळ करुन, बघुन घेण्याची धमकी देऊन हाताने व लाथा बुक्क्यांनी मारहाण केली. तसेच तक्रारदार यांच्या साेबतचे अतिक्रमण कारवाईस हजर असलेले सुरक्षा रक्षक नितीन आकाश लाेंखडे यांनाही हाताने मारहाण करुन , धक्का बुक्की करुन डाेक्यात लाेखंडी झाऱ्या मारुन जखमी करुन त्यांचे सरकारी काम करण्यापासून परावृत्त केले आहे. याबाबत पुढील तपास ंबडगार्डन पाेलिस करत आहे.

साईड मार्जिन मधील हॉटेल्स वर कारवाई ची जोरदार मागणी

पुणे-कर्वे रस्त्यावरील नळस्टॉप चौकामध्ये रात्री १२ वाजल्यानंतर सुरू होणार्‍या खाद्यपदार्थांच्या गाड्यांवर अखेर महापालिकेच्या अतिक्रमण विरोधी पथकाने कारवाई केली. याठिकाणी पुन्हा व्यवसाय सुरू करू नये अशी तंबी संबधित व्यावसायीकांना देण्यात आली आहे. मागील काही महिन्यांपासून रात्री बारा वाजल्यानंतर याठिकाणी दहा ते बारा हातगाड्यांवर खाद्य पदार्थांची विक्री होत असून ‘नाईट लाईफ’ च्या नावाखाली मोठ्याप्रमाणावर गर्दी होत असल्याच्या नागरिकांच्या तक्रारीनंतर प्रशासनाने ही कारवाई केली. दरम्यान आता नागरिकांकडून विशेषतः वाहनचालकांकडून एरंडवना,कोथरूड आणि एकूणच महापालिकेच्या परिसरात साईड मार्जिन मध्ये सुरु असलेल्या हॉटेल्स वर अतिक्रमण विभागाने कारवाई करावी , अशा हॉटेल्स मुळे वाहतुकीला अडथळे आणि कोंडीचे प्रकार होता असल्याचे दिसते आहे.

नळ स्टॉप चौकामध्ये रात्री बारा वाजल्यानंतर चहा पोह्यांसह खाद्यपदार्थ विक्री सुरू झाली होती. सुरूवातीला एक दोन व्यावसायीकांपासून सुरू झालेल्या रात्रीच्या खाद्य अड्डयावर ग्राहकांच्या वाढत्या संख्येसोबतच विक्रेत्यांचीही संख्या वाढत होते. कोथरूडच नव्हे तर शहराच्या अन्य भागातुनही गरजूच नव्हे तर मोठ्याप्रमाणावर युवक, युवती देखिल नाईट लाईफच्या नावाखाली येथे गर्दी करत होते. यातून रात्री उशिरापर्यंत गाड्यांचे आवाज आणि वादावादी सारख्या घटनांमुळे स्थानीक नागरिक त्रासले होते.रात्री बारा वाजल्यानंतर पहाटेपर्यंत या गाड्या उभ्या केल्या जात असल्यानेही अतिक्रमण विभागावर कारवाईच्या मर्यादा येत होत्या.
अखेर काल कोथरूड क्षेत्रिय कार्यालयाच्या अतिक्रमण पथकाने येथील गाड्या, खुर्च्या आणि टेबल जप्त करून नेल्या.
याठिकाणी पुन्हा व्यवसाय करू नये,अशी ताकीद देतानाच पुन्हा व्यवसाय सुरू झाल्यास कायदेशीर गुन्हा दाखल करण्यात येईल,असा इशाराही व्यावसायीकांना देण्यात आल्याची माहिती अतिक्रमण विभागाच्या अधिकार्‍यांनी दिली.

पुणे: महापालिकेच्या सेवेत तृतीयपंथींंची कंत्राटी सेवक म्हणून नियुक्ती केली जाणार आहे. त्याबाबतच्या प्रस्तावाला महापालिका आयुक्त, प्रशासक विक्रम कुमार यांनी मंजुरी दिली असून महापालिकेच्या मिळकतींच्या संरक्षणासाठी प्रायोगिक तत्वावर २५ तृतीयपंथींची नियुक्ती ठेकेदारामार्फत करण्यात येणार आहे.

महापालिकेच्या सेवेत तृतीयपंथींची नियुक्ती करण्यासंदर्भातील प्रस्ताव सुरक्षा विभागाला देण्यात आला होता. तृतीयपंथींसाठी काम करणाऱ्या सेवाभावी संस्थांची समिती तयार करून महापालिका कर्मचारी, अधिकारी आणि तृतीयपंथी कर्मचारी यांच्यात समन्वय रहावा यासाठी विशेष अभियान राबविले जाणार आहे. सध्या पंचवीस तृतीयपंथींची नियुक्ती ठेकेदारामार्फत करण्यात येणार असून उर्वरीत नियुक्ती टप्प्याटप्प्याने करण्यात येणार आहे, अशी माहिती अतिरिक्त आयुक्त डाॅ. कुणाल खेमनार यांनी दिली.

पुणे-वाहन चोरीच्या एका गुन्हयात हडपसर पोलिसांनी अटक केलेल्या आरोपीस लॉकअप मध्ये ठेवले असताना, संबंधित आरोपीने लॉकअपच्या बाथरूममध्ये गळफास घेऊन आत्महत्या केल्याचा धक्कादायक प्रकार बुधवारी सकाळी उघडकीस आला .

सुरेश उत्तम गरड ( वय -26, मूळ राहणार – वाशिम) असे आत्महत्या केलेल्या आरोपीचे नाव आहे. सुरेश गरड याच्यावर हडपसर पोलिस ठाण्यात वाहन चोरीचा गुन्हा दाखल आहे. मंगळवारी रात्री हडपसर पोलिसांनी त्याला पुणे शहराच्या मध्यवर्ती भागात असलेल्या विश्रामबाग पोलिस स्टेशनच्या लॉकअप मध्ये ठेवले होते. यावेळी त्याच्यासोबत लॉकअपमध्ये अन्य गुन्ह्यातील 20 ते 25 आरोपी ही बंदिस्त होते. बुधवारी सकाळी साडेसहा वाजण्याच्या सुमारास सुरेश गरड याने लॉकअपमध्ये बाथरूममध्ये जाऊन गळफास घेतल्याचा प्रकार उघडकीस आल्याने खळबळ उडाली.

विश्रामबाग पोलिसांनी तातडीने त्याचा मृतदेह ताब्यात घेऊन, ससून रुग्णालयात शुभविच्छेदनासाठी पाठवला आहे. याप्रकरणी विश्रामबाग पोलिस ठाण्यात आकस्मात मयतचा गुन्हा नोंद करण्यात आला आहे. विश्रामबाग पोलिस ठाण्याचे वरिष्ठ पोलिस निरीक्षक सुनील माने यांनी दिलेल्या माहितीनुसार, आरोपी सुरेश गरड हा हडपसर पोलिसांच्या चोरीच्या गुन्ह्यातील आरोपी होता. मंगळवारी रात्री त्याला लॉकअपमध्ये ठेवले असताना, त्यानी आरोपींना झोपण्यासाठी देण्यात येणाऱ्या बेडशीटच्या किनारा फाडून त्याच्या साह्याने बाथरूम मध्ये जाऊन गळफास घेतल्याचे उघडकीस आले आहे. याबाबत विश्रामबाग पोलिस पुढील तपास करत आहे.

पुणे-नऱ्हे परिसरातील एका नामांकित महाविद्यालयात काम करत असलेल्या 29 वर्षीय महिलेचा महाविद्यालयातच काॅम्प्युटर लॅबचे अस्टिटंटने विनयभंग केल्याचा धक्कादायक प्रकार उघडकीस आला आहे. याप्रकरणी 29 वर्षीय पिडित महिलेने सिंहगड राेड पोलिस ठाण्यात आराेपी विराेधात फिर्याद दाखल केली आहे.

सदर तक्रारीनुसार पोलिसांनी गणेश विठ्ठल कडू (वय-35,रा.किरकटवाडी,पुणे) या आराेपीला अटक केली आहे. सदरचा प्रकार 15 मे राेजी दुपारी तीन वाजण्याच्या सुमारास कुणाल हाईटस झी काॅलेज सी विंभ मधील अभियांत्रिकी विभागाचे एचओडी सरांचे कार्यालय जवळ, नऱ्हे,पुणे येथे घडला आहे. पोलिसांनी दिलेल्या माहितीनुसार, तक्रारदार या नाेकरीस असलेल्या झील काॅलेजच्या अभियांत्रिकी विभागातील कंप्युटर लॅबचे असिस्न्टंट म्हणून नाेकरीस असलेला आराेपी मणेश कडु त्यांचे ओळखीचा आहे. 15 मे राेजी दुपारी आराेपीने तक्रारदार यांना एचओडी सरांचे कार्यालयातील पंखा चालु करण्याचे बहाण्याने आत बाेलवून त्यांचे एकटेपणाचा गैरफायदा घेऊन पाठीमागून येवून त्यांच्या खांद्यावर हात टाकून त्यांना बळजबरीने जवळ ओढण्याचा प्रयत्न करत स्त्री मनास लज्जा उत्पन्न हाेईल असे कृत्य केले आहे. याप्रकरणी सहाय्यक पोलिस निरीक्षक एस जाधव पुढील तपास करत आहे.

पुणे-पुण्यामध्ये अतिक्रमण विरोधी कारवाई (Anti-Encroachment Action) जोरदार सुरू आहे. या कारवाईमध्ये आज पालिकेच्या सुरक्षारक्षकावर हल्ला करण्यात आला आहे. कारवाई चालू असताना फेरीवाल्यांकडून पालिकेच्या सुरक्षारक्षकालाच बेदम मारहाण करण्यात आली आहे.आज दुपारी 1 ते1.30 चे दरम्यान ढोले पाटील क्षेत्रिय कार्यालय हद्दीतील कैलास स्मशानभूमी ते आरटीओ कार्यालय परिसरात G-20 निमित्त अतिक्रमण निर्मूलनाची कारवाई करत असताना तेथील व्यवसायीकानी पथकातील सेवकांवर हल्ला करून मारहाण केली. या भ्याड घटनेचा तीव्र निषेध करण्यासाठी उप आयुक्त , अतिक्रमण व म न पा सेवक युनियन यांचे नियंत्रणात सर्व क्षेत्रिय कार्यालयामधील सर्व अतिक्रमण निरीक्षक,सेवक,बिगारी ,सुरक्षा रक्षकांनी व अधिकारी यांनी उद्या सकाळी 10 वाजता महापालिकेच्या मुख्य कार्यालयासमोरील हिरवळीवर एका सभेचे आयोजन केले आहे. यावेळी महापालिका कर्मचाऱ्यांचे अशा बाबींवर पुढील धोरण ठरविण्यात येईल असे वृत्त आहे.

पुणे: महापालिकेतील अतिक्रमण आणि अनधिकृत बांधकाम निर्मुलन विभाग नाहक बदनाम करून सोडला जात असून आता राजकारण थांबवा एकच ठाम निर्णय घ्या कारवाई करायची कि नाही ? नसेल करायची तर हे दोन्ही विभागच बंद करून टाका आणि होऊ द्यात काय ते एकदाचे असा पवित्रा घेत आता मेटाकुटीला आलेले महापालिका अधिकारी आणि कर्मचारी थेट राज्य सरकारला आव्हान देण्याच्या मनस्थितीत बंद पुकारणार असल्याचे वृत्त आहे.

महिन्यापुर्वीचे व्हिडीओ आता का आणले जात आहेत , जुने व्हिडीओ दाखवून ,जुन्या कारवाया दाखवून नेमके कोण काय साधत आहे? कुठेही कारवाईला गेले कि विरोध आहेच ,वाद आहेच, राजकीय दबाव आहेच, पोलीस संरक्षणाचा प्रश्न आ वासून आहेच , अगदी मंत्र्यांपासून ते कार्यकर्त्यांपर्यंत अनेकांची बेकायदा बांधकामे आणि अतिक्रमणे आहेत . हि असताना सामान्य नागरिकांवर देखील कारवाई करायची आहे. या सर्व भावना उचंबळून येण्यास काही घटना अलीकडच्या दिवसात घडल्या आहेत .आज तर अतिक्रमण निर्मूलन कारवाई करण्यासाठी गेलेल्या अधिकारी आणि कर्मचाऱ्याला मारहाण करण्यात आली. ढोले पाटील क्षेत्रिय कार्यालय हद्दीतील कैलास स्मशाभूमीत ते आरटीओ कार्यालय परिसरात हा प्रकार घडला.अनाधिकृत फेरीवाल्यांवर कारवाई असताना मारहाण करण्यात आली. मारहाणीच्या निषेधार्थ अधिकारी आणि कर्मचाऱ्यांनी काम बंद आंदोलनाची भूमिका घेतली आहे.जी- २० परिषदेच्या निमित्ताने शहरात अतिक्रमण निर्मूलन कारवाई सुरू आहे. ढोले पाटील रस्त्यावर कारवाई सुरू असताना जमावाने कर्मचारी आणि अधिका-यांना मारहाण करण्यास सुरूवात केली. या घटनेच्या निषेधार्थ महापालिकेच्या हिरवळीवर बुधवारी निषेध सभा होणार असून काम बंद करण्याचा इशारा संघटनांनी दिला आहे. दरम्यान, याप्रकरणी गुन्हा दाखल करण्याची प्रक्रिया सुरू करण्यात आली आहे.