पुणे-सिंहगड रोड पोलीस स्टेशन हद्दीतील भूमकर चौक येथील डी.के.डी. पेट्रोल पंपावरील कर्मचाऱ्यांना कुऱ्हाडीचे वार करत गंभीर जखमी करून जबरी चोरी करणाऱ्या आरोपीच्या सिंहगड रोड पोलिसांनी मुसक्या आवळल्या. दहा महिन्यांपूर्वी हा गुन्हा घडला होता.ऋषिकेश रमेश कदम (वय २३ वर्षे रामाऊली कृपा बिल्डींग,चरवड वस्ती, वडगाव) असे आरोपीचे नाव आहे. त्याने सांगितलेल्या माहितीनुसार मानस सिताराम पिसे (वय २३, पठार वस्ती, वडगाव) याला भूम (जि. उस्मानाबाद ) येथे जाऊन पकडण्यात आले.येत्या १९ मेपर्यंत न्यायालयाने त्यास पोलीस कोठडी दिली आहे.

गेल्या वर्षी २३ आॅगस्ट या पहाटे दीड ते पावणेदोनच्या दरम्यान दोन जणांनी पेट्रोल पंपावरील कामगारांना गंभीर जखमी करून २०,४०० रुपये चोरी करून नेले होते. या गुन्हयातील दोन आरोपींचा सिंहगड रोड पोलीस स्टेशन पोलीस अधिकारी व अंमलदार शोध घेत होते.परिसरामधील सीसीटीव्ही फुटेजची पाहणी करूनही आरोपींचा काही धागादोरा हाती येत नव्हता. तब्बल १० महिन्या नंतर सहाय्यक पोलीस उपनिरीक्षक आबा उतेकर व क्षीरसागर, ओलेकर या पोलीस कर्मचाऱ्यांना १४ मे रोजी माहिती मिळाली की पेट्रोल पंपावर रात्रीच्या वेळी जबरदस्तीने घुसून मारहाण करुन चोरी करणाऱ्या दोघांपैकी एक हिंगणे चौक येथे आला असून हिरव्या रंगाचा फुल शर्ट व चॉकलेटी रंगाची पॅन्ट घातलेली आहे.

सहाय्यक पोलीस निरीक्षक सचिन निकम यांना ही माहिती कळविली असता त्यांनी वरिष्ठांना सांगितली. पोलिसांना पाहून संशयित गडबडीत पळून जावू लागला. त्यास पकडून चौकशी करण्यात आली व अटक करून साथीदाराचा माग काढण्यात आला. दोघांना अटक करुन न्यायालयात हजर केले असता १९ मे पर्यंत पोलीस कोठडीत ठेवण्याचे आदेश देण्यात आले.

पोलीस आयुक्त रितेश कुमार, पोलीस सह आयुक्त संदिप कर्णिक, पश्चिम प्रादेशिक विभाग सह आयुक्त प्रविणकुमार पाटील, पोलीस उपआयुक्त परीमंडळ -३ सुहेल शर्मा, सहाय्यक पोलीस आयुक्त राजेंद्र गलांडे, वरीष्ठ पोलीस निरीक्षक अभय महाजन , पोलीस निरीक्षक (गुन्हे) जयंत राजुरकर यांच्या मार्गदर्शनाखाली ही कारवाई करण्यात आली. सहायक पोलीस निरीक्षक सचिन निकम, पोलीस अंमलदार, आबा उत्तेकर, संजय शिंदे, शिवाजी क्षिरसागर, राहुल ओलेकर, अमित बोडरे, राजाभाऊ वेगरे, विकास बांदल, विकास पांडुळे, अमोल पाटील, सागर शेंडगे, देवा चव्हाण, स्वप्नील मगर, अविनाश कोंडे, दक्ष पाटील यांच्या पथकाचा त्यात समावेश होता.

पुणे : मॉडेलिंग क्षेत्रात कामाची संधी तसेच दररोज पाच ते सात हजार रुपये कमवा, अशी जाहिरात समाजमाध्यमात प्रसारित करून युवक-युवतींची फसवणूक केल्याचा प्रकार केल्याचा प्रकार उघडकीस आला आहे. या प्रकरणी कोथरुड पोलीस ठाण्यात गुन्हा दाखल करण्यात आला आहे. प्राथमिक चौकशीत आरोपींनी २३ जणांकडून पैसे घेऊन त्यांची ४३ लाख ९३ हजार रूपयांची फसवणूक केल्याचे उघडकीस आले आहे.

याप्रकरणी श्रद्धा चंद्रकांत अंदुरे, योगेश मदनलाल मुंदडा (दोघे रा. छत्रपती संभाजीनगर), जय पंकज चावजी, शुभम जयप्रकाश पगारे, अनिरुद्ध बिपीन रासने (रा. कोथरुड) यांच्याविरुद्ध गुन्हा दाखल केला आहे. याबाबत एका युवतीने कोथरूड पोलीस ठाण्यात फिर्याद दिली आहे. युवती रंगभूषाकार आहे. माॅडेलिंग क्षेत्रात कामाची संधी असल्याचे आमिष दाखविणारी जाहिरात समाजमाध्यमातून प्रसारित करण्यात आली होती. रंगभूषाकार, केशरचना, छायाचित्रकारांना माॅडेलिंग क्षेत्रात कामाची संधी असल्याचे आमिष दाखविण्यात आले होते. दररोज पाच ते सात हजार रुपये मिळतील,असे त्यांना सांगण्यात आले होते. तक्रारदार युवतीने श्रद्धा अंबुरेची भेट घेतली. तेव्हा आमच्या कंपनीला काम मिळाले आहे. त्यासाठी काही पैसे भरावे लागतात. तीन महिन्यांसाठी चार हजार ४२५ रुपये आणि दोन वर्षांसाठी १७ हजार रुपये भरावे (सबक्रिप्शन) लागतील, असे तिला सांगण्यात आले होते. त्यानंतर युवक-युवतीचा समूह तयार करण्यात आला. त्यांना द पुणे स्टुडिओ येथे बोलाविण्यात आले. २१ मार्चपासून काम सुरू होणार असल्याची बतावणी त्यांच्याकडे करण्यात आली होती. त्यानंतर कंपनी आर्थिक अडचणीत असून काम मिळाले नसल्याचे सांगण्यात आले. फसवणूक झाल्याचे उघडकीस आल्यानंतर तक्रार देण्यात आली. आतापर्यंत २३ जणांची ४३ लाख ९३ हजार रुपयांची फसवणूक झाल्याचे तक्रार अर्ज पोलिसांकडे दाखल झाले आहेत. सहायक पोलीस निरीक्षक चव्हाण तपास करत आहेत.

पुणे-

शेअर मार्केटमध्ये मोठा ब्रोकर असल्याचे भासवून युट्युब चॅनेलच्या माध्यमातून गुंतवणूकदारांना आकर्षित करून ,शेअर मार्केटमध्ये त्याच्यामार्फत गुंतवणूक केल्यास अल्पावधीत मोठ्या प्रमाणात नफा मिळेल असे आमिष दाखवून पुण्यातील एका तरुणाची 25 लाख रुपयांची फसवणूक करण्यात आली होती.

याप्रकरणी पुणे सायबर पोलिसांनी राजस्थानमधील अल्वर येथील मिलन जिनेन्द्र जैन ( वय – 26) यास अटक केले आहे. बुधवारी आरोपीस न्यायालयात हजर केले असता, 22 मे पर्यंत आरोपीला पोलिस कोठडीत ठेवण्याचे आदेश न्यायालयाने दिले आहे.

याबाबत सायबर पोलीस ठाण्यात रणवीर राजेंद्र जाधव( वय -26 , रा.सिंहगड रोड, पुणे) यांनी तक्रार दाखल केलेली आहे. सदरचा प्रकार ऑक्टोबर 2019 ते फेब्रुवारी 2022 यादरम्यान घडलेला आहे. पोलिसांनी दिलेल्या माहितीनुसार, आरोपी मिलन जैन शेअर मार्केटमध्ये मोठा ब्रोकर असल्याचे सांगून त्याचे युट्युब चॅनेलच्या माध्यमातून तशा प्रकारचे व्हिडिओ प्रसारित करून लोकांना गुंतवणुकीसाठी आकर्षित करत होता.

त्याच्या ट्रेडिंग विथ एप्रि या कंपनीच्या माध्यमातून, त्याच्याकडे शेअर मार्केटमध्ये गुंतवणूक केल्यास मोठ्या प्रमाणात नफा मिळवून देतो असे सांगून, त्यानी तक्रारदार यांच्याकडून 25 लाख दहा हजार रुपये घेऊन त्यांना कोणत्याही प्रकारचा नफा व त्यांची मूळ रक्कम परत न देता फसवणूक केली आहे.अशाप्रकारे आरोपीने देशभरात इतर गुंतवणूकदारांची फसवणूक केल्याचे प्रकार उघडकीस येण्याची शक्यता पोलिसांनी वर्तवली आहे. याबाबत पुढील तपास सायबर पोलिस स्टेशनचे पोलिस उपनिरीक्षक अनिल डफळ हे करत आहेत.

पुणे : नैराश्य, भावनिक तणाव आणि एकटेपणाने ग्रासलेल्यांना आधार देण्यासाठी कार्यरत असलेल्या साथी हाथ बढाना या संस्थेतर्फे ‘लिसनिंग पोस्ट’ उपक्रमाची हेल्पलाईन पुन्हा एकदा सुरु झाली आहे. विनामूल्य हेल्पलाईन क्रमांक ९३७३३३९१६२ असा असून, रोज दुपारी ४ ते रात्री ८ या वेळेत विनामूल्य कॉल करता येणार आहे. तसेच प्रत्यक्ष भेटीसाठी सोमवार, बुधवार आणि शुक्रवार या दिवशी सकाळी ११ ते १, तर शुक्रवार आणि शनिवारी सायंकाळी ५.३० ते ८ या वेळेत औंध येथील गायकवाड नगर येथे स्थलांतरित झालेल्या साथी हाथ बढाना संस्थेच्या कार्यालयात संवाद करता येईल.

साथी हाथ बढाना ही स्वयंसेवकांनी एकत्रित येऊन सुरु केलेली संस्था असून, मानसिक व भावनिक तणावाचा सामना करणाऱ्या समाजबांधवांना प्रेरणा देण्यासाठी काम करते. निराशा आणि एकाकीपणाच्या भावनांना प्रतिसाद म्हणून सुरू करण्यात आलेल्या लिसनिंग पोस्टने आतापर्यंत परीक्षेच्या त्रासापासून आणि पालकांच्या दबावापासून ते एकाकीपणा, घरगुती हिंसाचार आणि कामाच्या ठिकाणी तणाव अशा अनेक प्रकारच्या भावनिक त्रासांना समजून घेत त्यांना आधार व पाठिंबा दिला आहे. सर्व वयोगटातील व्यक्तींना निर्णयाची भीती न बाळगता त्यांच्या भावना आणि संघर्ष मोकळेपणाने मांडण्यासाठी ही एक सुरक्षित आणि आश्वासक जागा आहे. येथे होणारी संभाषणे गोपनीय आणि विशेषत: मानसिक आघातातून जात असलेल्यांसाठी खूप मदत करणारे असल्याचे सिद्ध झाले आहे. स्वयंसेवक आधारित असलेल्या या संस्थेत वेगवेगळ्या क्षेत्रातील असून, हेल्पलाईन आणि प्रत्यक्ष संभाषणातून मानसिक आधार देण्याआधी त्यांनी कठोर प्रशिक्षण घेतलेले असते. तसेच त्यांचा ऐकण्याचा सराव घेतलेला असतो. पीडितांना संयमाने ऐकून त्यांचे मन समजून घेण्यात त्यांच्यातील कौशल्य उपयुक्त ठरतात.

‘लिसनिंग पोस्ट’नऊ वर्षे पूर्ण करत असून, अनेक हेल्पलाईनवर तसेच प्रत्यक्ष भेटून लाभ घेतलेल्या व या चक्रातून बाहेर पडलेल्या व्यक्तींनी साथी हाथ बढाना संस्थेत येऊन, ईमेलद्वारे त्यांच्या भावना व्यक्त करत त्यांच्या कठीण काळात दिलेल्या पाठिंब्याबद्दल, आधाराबद्दल त्यांनी कृतज्ञता व्यक्त केली आहे. या सामाजिक कार्यात स्वयंसेवकांनी सातत्याने सेवा दिली आहे. लिसनिंग पोस्ट ही सेवा पूर्णतः मोफत असून, समाजातील दानशूर व स्वयंसेवकांच्या अर्थसाहाय्यावर आधारित चालते. हे एक असे शांततापूर्ण ठिकाण आहे, जिथे प्रत्येकाला आपल्या कठीण काळात आधार, दिलासा आणि आनंद जाणवतो. कोणताही निष्कर्ष न काढता सहानुभूतीपूर्वक समोरच्याचे म्हणणे ऐकून घेत त्यांच्या समस्यांचे निराकरण करण्यावर भर दिला जातो.  त्यामुळे मानसिक आरोग्याभोवती लागलेला कलंक मोडून काढणे आणि लोकांना गरज पडेल तेव्हा त्यांना मदत घेण्यास प्रोत्साहित करणे आज खूप महत्त्वाचे आहे. साथी हाथ बढाना सोशल फाउंडेशन संस्थेविषयी अधिक माहितीसाठी www.saathihaathbadhana.org या संकेतस्थळाला भेट द्यावी किंवा आपल्या शंका निरसनासाठी ८४४६१५२९६१ या नंबरवर किंवा reachus@saathihaathbadhana.org या ईमेलवर संपर्क साधावा.

लिसनिंग पोस्ट हेल्पलाईन

– ९३७३३३९१६२ या नंबरवर रोज दुपारी ४ ते ८ या वेळेत कॉल करता येईल

– सोमवार, बुधवार, शुक्रवार रोजी सकाळी ११ ते १, तर शुक्रवार व शनिवारी सायंकाळी ५.३० ते ८ या वेळेत प्रत्यक्ष भेटता येईल

– अपॉइंटमेंट साठी एसएचबी सोशल फाउंडेशन, शॉप १, सिद्धार्थ, गायकवाड नगर, औंध, पुणे-४११००७ येथे भेटावे

– संपर्क: ८४४६१५२९६१ किंवा www.saathihaathbadhana.org

पुणे, दि. १७: ‘शासन आपल्या दारी’ उपक्रमाअंतर्गत नागरिकांना विविध योजनांचे प्रत्यक्ष लाभ वाटपासाठी महसूल यंत्रणेसह ३८ विविध यंत्रणांच्या समन्वयातून येत्या ३० मे रोजी एकाच दिवशी संपूर्ण जिल्ह्यात शिबीरे घेण्यात येणार असून त्यादृष्टीने नियोजन करण्याच्या सूचना निवासी उपजिल्हाधिकारी ज्योती कदम यांनी दिल्या.

मुख्यमंत्री एकनाथ शिंदे यांच्या संकल्पनेतून १५ एप्रिल ते १५ जून या कालावधीत संपूर्ण राज्यात ‘शासन आपल्या दारी’ हा उपक्रम राबविण्यात येत आहे. त्याबाबतची आढावा बैठक दूरदृष्य प्रणालीद्वारे आयोजित करण्यात आली होती. बैठकीस उपविभागीय अधिकारी, राजेंद्र कचरे, मिनाज मुल्ला, वैभव नावडकर, स्नेहा किसवे, गोविंद शिंदे, पुणे मनपा उपायुक्त नितीन उदास यांच्यासह सर्व तहसीलदार, विविध विभागांचे अधिकारी उपस्थित होते.

श्रीमती कदम म्हणाल्या, स्वातंत्र्याच्या अमृत महोत्सवानिमित्त या अभियानातून जिल्ह्यातून किमान ७५ हजार लाभार्थ्यांना थेट लाभ देण्याचे उद्दिष्ट ठरविण्यात आले आहे. महसूल, आरोग्य, शिक्षण, समाजकल्याण, कृषि, महिला व बालविकास, जिल्हा ग्रामीण विकास यंत्रणा, रोजगार, कामगार, नगरविकास, ऊर्जा, सहकार, विविध विकास महामंडळे यांच्या योजनांचा लाभ या शिबीरातून देण्यात येणार आहे.

पुणे शहर, पिंपरी चिंचवड मोठ्या कार्यक्रमाचे आयोजन करायचे आहे. लोकप्रतिनिधींना समवेत घेऊन हा कार्यक्रम यशस्वी करावयाचा आहे. उत्पन्नाचे दाखले, रहिवास, वय, अधिवास दाखले, शेतकरी दाखला, रेशनकार्ड वाटप, आधार कार्ड नोंदणी वा दुरुस्ती यासह विविध विभागांचे प्रत्यक्ष लाभ वाटप या दिवशी करायचे असल्याने त्यापूर्वी चांगली पूर्वप्रसिद्धी करावी. जनतेला माहिती द्यावी, अशा सूचना यावेळी देण्यात आल्या.
000

पुणे, दि. १७: जिल्हास्तरीय खेलो इंडिया व्हॉलीबॉल प्रशिक्षण केंद्रासाठी तात्पुरत्या स्वरुपात मानधन तत्वावर प्रशिक्षकाची नियुक्ती करण्यात येणार असून इच्छुक उमेदवारांनी २९ मे रोजी दुपारी १२ वाजेपर्यंत जिल्हा क्रीडा अधिकारी कार्यालयात अर्ज सादर करण्याचे आवाहन करण्यात येत आहे.

व्हॉलीबॉल प्रशिक्षक पदासाठी उमेदवार ४५ वर्ष वयोगटाआतील असावा. अतिउच्च कामगिरी/ गुणवत्ता असल्यास समितीच्या मान्यतेने ५० वर्ष पर्यंत उमेदवारांना संधी देण्यात येईल. ऑलिम्पिक, आशियायी स्पर्धा, जागतिक अजिंक्यपद अधिकृत स्पर्धा सहभाग किंवा पदकप्राप्त आणि प्रशिक्षणाचा अनुभव आवश्यक आहे. जागतिक करंडक स्पर्धा, एशियन चॅम्पियनशीप, साऊथ एशियन स्पर्धा संबंधित खेळाच्या आंतरराष्ट्रीय अधिकृत स्पर्धा सहभाग किंवा पदकप्राप्त आणि प्रशिक्षणाचा अनुभव असावा. राष्ट्रीय किंवा राज्य पुरस्कारार्थी -प्रशिक्षणाचा अनुभव असावा. एन.आय.एस.पदविका किंवा संबंधित खेळाचे अधिकृत पातळीचे अभ्यासक्रम किंवा बी.पी.एड. एम.पी.एड.सह राष्ट्रीय स्पर्धा पदकप्राप्त आणि प्रशिक्षणाचा अनुभव आवश्यक आहे. राज्यस्तर खेळाडू बीपीएड- एम.पी.एड.सह राष्ट्रीय स्पर्धा पदक प्राप्त किंवा राष्ट्रीय स्पर्धेतील पदकप्राप्त आणि कमीत कमी ५ वर्ष प्रशिक्षणाचा अनुभव असणे आवश्यक आहे.

अर्ज जिल्हा क्रीडा अधिकारी कार्यालय, सर्व्हे क्र. १९१, ग्यानबा मोझे हायस्कुल समोर, विभागीय क्रीडा संकुल, महाराष्ट्र हौसिंग बोर्ड, येरवडा, पुणे ४११००६ येथे सादर करायचे असून अधिक माहितीसाठी तालुका क्रीडा अधिकारी ए.जी. सोलणकर (९८२२३५६१९७) व क्रीडा अधिकारी शिल्पा चाबुकस्वार (९५५२९३१११९) यांच्याशी संपर्क साधावा, असे आवाहन जिल्हा क्रीडा अधिकारी महादेव कसगावडे यांनी केले आहे.
0000

विकासकामे जलदगतीने पूर्ण करण्याच्या अधिकाऱ्यांना सूचना

पुणे-बाणेरमध्ये महापालिकेच्या माध्यमातून सुरु असलेल्या विविध विकासकामांची पालकमंत्री नामदार चंद्रकांतदादा पाटील यांनी आज पाहाणी केली. तसेच सुरु असलेली कामे जलदगतीने पूर्ण करावित अशा सूचना नामदार पाटील यांनी यावेळी महापालिकेच्या अधिकाऱ्यांना केल्या. तसेच विकासकामांसाठी निधीची कमतरता असल्यास जिल्हा नियोजन आणि आमदार निधीतून तरतूद केली जाईल, असेही यावेळी आश्वास्त केले.

यावेळी माजी नगरसेवक अमोल बालवडकर, नगरसेविका ज्योती कळमकर, स्वप्नाली सायकर, भाजपा नेते गणेश कळमकर, प्रल्हाद सायकर, उमाताई गाडगीळ यांच्या सह रस्ते दिनकर गोजरे, भवन हर्षदा शिंदे, स्मार्ट सिटीचे आरुण गोडबोले, औंध बाणेर क्षेत्रीय कार्यालयाचे सहाय्यक आयुक्त संदीप कलाटे आदी विभागांचे प्रमुख पदाधिकारी उपस्थित होते.

पालकमंत्री चंद्रकांतदादा पाटील यांनी सर्वप्रथम बाणेरमधील सावरकर उद्यानामध्ये महापालिकेच्या माध्यमातून उभारण्यात येणाऱ्या क्रीडा संकुलाची पाहाणी केली. सदर काम का रखडले आहे, अशी विचारणा नामदार पाटील यांनी भवन विभागाच्या हर्षदा शिंदे यांना केली‌. सदर क्रीडा संकुलासाठी महापालिकेने उपलब्ध करुन दिलेला निधी अपूरा असल्याचे शिंदे यांनी नामदार पाटील यांना सांगितले. त्यावर सदर कामासाठी जिल्हा नियोजन आणि आमदार निधीतून निधी उपलब्ध करून देण्याचे आश्वास्त केले.

यासोबतच ज्युपिटर हॉस्पिटल जवळ सुरु असलेल्या दोन पूलाच्या कामाची देखील नामदार चंद्रकांतदादा पाटील यांनी पाहाणी केली. वाहतुकीच्या दृष्टीने दोन्ही पूल महत्वाचे असल्याने सदर कामे जलदगतीने पूर्ण करण्याच्या सूचना पथ विभागाच्या अधिकाऱ्यांना दिल्या. यावेळी बाणेरमधील कलमाडी शाळेसमोर स्मार्ट सिटीने विकसित केलेल्या उद्यानाला नामदार पाटील यांनी भेट दिली. सदर उद्यानाची देखभाल दुरुस्ती योग्य प्रकारे होत नसल्याची तक्रार स्थानिक नागरिकांनी नामदार पाटील यांच्याकडे केली. त्यावर संबंधित उद्यान हे स्मार्ट सिटीकडून महापालिकेला पूर्णपणे हस्तांतरित झाले नसल्याचे अधिकाऱ्यांनी निदर्शनास आणून दिले. त्यावर नामदार पाटील यांनी अतिरिक्त आयुक्त कुणाल खेमनार यांच्याशी संपर्क साधून सदर उद्यानाची देखभाल दुरुस्तीसाठी तरतूद करावी. तसेच उद्यानासाठी दोन सुरक्षारक्षक नेमण्याची सूचना केली.

बालेवाडी-वाकडला जोडणारा सोपान बाग येथील प्रस्तावित रस्त्याची ही नामदार पाटील यांनी यावेळी पाहाणी केली. सदर प्रस्तावित रस्त्यासाठी खासगी विकासकाला टीडीआर मिळाला आहे. पण तरीही विकासकाने जागा हस्तांतरित केली नसल्याचे अधिकाऱ्यांनी निदर्शनास आणून दिले. त्यावर संबंधित विकासक आणि महापालिका आयुक्तांसोबत बैठक घेऊन हे काम मार्गी लावण्याचे आश्वास्त केले.

यानंतर नामदार चंद्रकांतदादा पाटील यांनी महापालिकेच्या माध्यमातून ६.५० कोटी रुपये खर्चून उभारण्यात येणाऱ्या मुलींच्या वसतिगृहाची पाहाणी केली. सदर वस्तीगृहाच्या कामाच्या पाहणीनंतर महापालिका आयुक्त आणि समाजकल्याण विभागाचे आयुक्त यांच्याशी बैठक घेऊन मुलींच्या वापरासाठीचे नियोजन करु, असे यावेळी स्पष्ट केले.

पुणे -महापालिकेच्या अतिक्रमण विभागातील कर्मचाऱ्यांना फेरवाल्यांकडून मारहाण केल्याच्या निषेधार्थ गुरुवारी पुणे महापालिकेच्या समाेर . अतिक्रमण विभागाचे अधिकारी,सुरक्षा कर्मचारीयांनी माेठया संख्येने सहभागी होत निषेध सभा घेतली . अनाधिकृत फेरीवाल्यांकडून अतिक्रमण पथकास वारंवार शिवीगाळ व मारहाण करण्यात येते याचा निषेध करत, पाेलिसांनी संबंधितावर कडक कारवाई करावी अशी मागणी करण्यात आली.आम्ही कायद्याची अंमलबजावणी करतो आम्ही तेव्हा जशास तसे उत्तर हि देऊ शकतो असा निर्वाणीचा इशारा देत पोलिसांनी बंदोबस्त द्यायला हवा आणि हल्लेखोरांवर जरब बसवायला हवी तरच शहरात अतिक्रमण कारवाया यशस्वी होतील असे अतिक्रमण प्रमुख माधव जगताप यांनी म्हटले आहे.

यावेळी माध्यमांनी अतिक्रमण प्रमुख माधव जगताप यांना त्यांनी लाथेने उडविलेले एका व्यावसायिकाचे साहित्य याबाबतच्या व्हिडीओ बाबत छेडले आणि खासदार सुप्रिया सुळे यांनी यासंदर्भात जगताप यांच्यावर सोशल माध्यमांतून केलेल्या टीकेकडे लक्ष वेधले तेव्हा जगताप, आणि सभेत आलेले अधिकारी, कर्मचारी आपल्या भावना व्यक्त करताना म्हणाले ,’आमचे कोणीही वैयक्तिक दुश्मन नाही , पण आमच्यावर कायद्याने जबाबदारी काय सोपविली आहे , ती पार पडताना अनेक अडथळे येतात कधी कोणी पोलीस बंदोबस्त देत नाही , कधी कोणी ..ज्यास शक्य ते करते, या सर्वांवर मात करत आम्हाला काम तर करावेच लागते, गरिबांच्या पोटावर परिणाम होईल अशी कारवाई करताना आम्हाला काय वेदना होतात ते आम्हास ठाऊक ,पण बदनामी करायला ,ट्रोल करायला लोक लगेचच पुढे येतात ,प्रत्येकाला मत प्रदर्शित करण्यासाठी व्यासपीठ आहे. पण कुठलाही अल्पसे अपुरे, आवाज नसलेले चित्रीकरण पाहून किमान राजकीय नेत्यांनी तरी प्रतिक्रिया द्यायला नको होती .या मागची पार्श्वभूमी समजावून , किंवा माहिती करून घेऊन नंतर व्यक्त होणे ठीक झाले असते , माझी चूक झाली तर जरूर कारवाई करा , पण अतिक्रमण विभागात काम करणे कितीकाठीन असते ते समजून घ्या ,लोकांवर कितीही वेळा कारवाई करा ते पुन्हा पुन्हा अतिक्रमण करतात शिवाय कारवाई करणारांना बदनाम करतात , आम्हीही माणसे आहोत आम्हालाहि परिवार आहे , चुका करायच्या , बेकायदा काम करायचे आणि वर आमच्यावर अरेरावी करत मारहाण देखील करायची हे कुठवर आमचे लोक सहन करतील ,आम्हीही त्यांना जशास तसे उत्तर देऊ शकतो पण आम्हाला बंधने फार असतात आणि टीकेचे धनी आम्हीच होतो अशीच अवस्था राहिल्याने शहर अतिक्रमण मुक्त होण्यास अडचणी येतात असेही ते म्हणाले .

ज्ञानेश्वर मोळक,विलास कानडे यांची कमतरता भासली

दरम्यान महापालिका कर्मचाऱ्यांवर असो वा आय ए एस अधिकाऱ्यावर असो जेव्हा जेव्हा असे हल्ले लोकांनी, लोक्प्रतीनिधिनी व कार्यकर्त्यांनी केले तेव्हा तेव्हा महापालिका प्रशासनाचे मनोधैर्य खच्ची होऊ नये म्हणून मोळक ,कानडे यांनी मोलाची कामगिरी बजावली त्यांना क्लास १ /२ /३ अशा अनेक अधिकाऱ्यांनी वेळोवेळी साथ दिली . आज या सर्व अधिकाऱ्यांची कमतरता या निषेध सभेत प्रामुख्याने जाणवली . मोळक ,कानडे निवृत्त झालेले आहेत.