50 हजारांची लाच घेताना पकडले :१ वर्षात रिटायर होणार होत्या …. 85 लाख रुपयांची रोकड ,32 तोळे सोने,उच्चभ्रू वस्तीत दोन प्लॅट ,आणि प्लॉट ..आणखीही शोध सुरूच

पुण्याप्रमाणे नाशिकच्या महापालिकेत होता बोगस कर्मचारी -त्याच्याकरवी गेला तपास पुढे ..

नाशिक- महापालिकेच्या लाचखोर शिक्षणाधिकारी सुनीता धनगर यांच्याकडे कोट्यवधींचे घबाड सापडल्याने खळबळ उडाली आहे. लाचलुचपत प्रतिबंधक विभागाच्या अधीक्षक शर्मिष्ठा वालावलकर यांच्या मार्गदर्शनाखाली ही कारवाई करण्यात आली.

निवृत्तीसाठी अवघा एक वर्षांचा कालावधी बाकी असताना सुनीता धनगर यांना 50 हजारांची लाच घेताना लाचलुचपत प्रतिबंधक विभागाने बेड्या ठोकल्यात. त्यानंतर त्यांची घरझडती घेण्यात आली. तेव्हा त्यांच्या नावावर कोट्यवधींची संपत्ती असल्याचे समोर येत आहे.लाचलुचपत प्रतिबंधक विभागाने सुनीता धनगर यांच्या घराची झडती घेतली. तेव्हा त्यांच्या घरात 85 लाख रुपयांची रोकड सापडली. सोबतच 32 तोळे सोने मिळाले. धनगर यांच्या नावावर नाशिकमधील उच्चभ्रू वस्तीत दोन प्लॅट आहेत. उंटवाडी परिसरात असलेल्या एका प्लॅटची किंमत दीड कोटी असल्याचे समजते. तसेच त्यांचा प्लॉटही असल्याचे समोर आले आहे. धनगर यांची बँक खाती, लॉकर्सचा तपास सुरू आहे. त्यातूनही मोठे घबाड सापडण्याची शक्यता वर्तवण्यात येत आहे.

एका खासगी शैक्षणिक संस्थेतून बडतर्फ करण्यात आलेल्या मुख्याध्यापकाला सेवेत न घेणाऱ्या संस्थेविरोधात कारवाई करण्यासाठी पत्र देण्याच्या मोबदल्यात धनगर यांनी हे पैसे स्वीकारलेत. याप्रकरणी सरकारवाडा पोलिस सुनीता सुभाष धनगर व त्यांच्या कार्यालयातील वरिष्ठ लिपिक नितीन अनिल जोशी यांच्याविरोधात लाच घेतल्याप्रकरणी गुन्हा दाखल करून अटक करण्यात आली आहे.तक्रारदार हे बाविस्कर नाशिकमधील एका खासगी शैक्षणिक संस्थेत मुख्याध्यापकपदावर कार्यरत होते. मात्र, त्याना संस्थेने गैरवर्तनाचा – उपका ठेवत मुख्याध्यापक पदावरून बडतर्फ केले होते. या बडतर्फीविरोधात मुख्याध्यापकाने शैक्षणिक न्यायाधीकरणाकडे दाद मागितली असता त्यांच्या बडतर्फीला स्थगिती देण्यात आली. दरम्यान, न्यायाधीकरणाच्या निकालानुसार मुख्याध्यापकाने संस्थेकडे सेवेत दाखल करून घेण्यासाठी पाठपुरावा केला असता त्यांनी टाळाटाळ केली. या संस्थेविरोधात कारवाई करण्यासाठी तक्रारदाराने शिक्षणाधिकान्यांकडे अर्ज केला असता त्यावर पत्र देण्यासाठी मुख्याधापकाकडे 50 हजारांची मागणी केली.

लाच देण्याची इच्छा नसल्याने मुख्याध्यापकाने लाचलुचपत प्रतिबंधित विभागाकडे तक्रार केली. तेव्हा शुक्रवारी धनगर यांच्या कार्यालयातच सापळा रचण्यात आला. तक्रारदाराकडून धनगर यांना 50 हजारांची रक्कम स्वीकारताच रंगेहाथ पकडण्यात आले. तर त्याचवेळी धनगर यांच्या कार्यालयातील वरिष्ठ लिपिक नितीन जोशी याने हे पत्र बनवून देण्याच्या मोबदल्यात पाच हजारांची लाच घेतल्याने त्यालाही ताब्यात घेण्यात आले.धक्कादायक बाब म्हणजे या कारवाईत पकडलेला लिपिक जोशी हा महापालिकेच्या शिक्षण मंडळाचा कर्मचारीच नाही. तो नाशिकरोडच्या खासगी शैक्षणिक संस्थेतील कर्मचारी आहे. प्रतिनियुक्तीवर त्याची शिक्षणाधिकारी कार्यालयात नियुक्ती करण्यात आली होती. ती नियुक्तीदेखील नियमानुसार आहे की नाही? हा मुद्दादेखील चर्चेत आहे.

जीवनावश्यक वस्तूंच्या किमतींवर कडक नियंत्रण ठेवण्यासाठी सरकारने उचललेले हे आणखी एक महत्त्वाचे पाऊल

नवी दिल्ली-

साठेबाजी आणि काळा बाजार रोखण्यासाठी तसेच तूर डाळ आणि उडीद डाळीचे दर ग्राहकांना परवडतील असे ठेवण्यासाठी भारत सरकारने एक आदेशाद्वारे या डाळींच्या साठ्यावर मर्यादा घातली आहे. हे निर्बंध घाऊक, किरकोळ विक्रेते, मोठे साखळी विक्रेते, डाळ मिलर्स आणि आयातदार यांना बंधनकारक असतील. यासंदर्भातला आदेश आजपासून  लागू करण्यात आला आहे.

या आदेशानुसार, सर्व राज्ये आणि केंद्रशासित प्रदेशांसाठी 31 ऑक्टोबर 2023 पर्यंत तूर आणि उडीद डाळ साठा मर्यादा विहित करण्यात आली आहे. घाऊक विक्रेत्यांसाठी प्रत्येक डाळीला वैयक्तिकरित्या लागू होणारी साठा मर्यादा घाऊक विक्रेत्यांसाठी 200 एमटी; किरकोळ विक्रेत्यांसाठी 5 एमटी; मोठ्या साखळी विक्रेत्यांसाठी प्रत्येक किरकोळ विक्री केंद्रावर 5 एमटी आणि गोदामामध्ये 200 एमटी; मिलर्ससाठीची मर्यादा त्यांच्या उत्पादनाचे मागचे 3 महिने किंवा वार्षिक स्थापित क्षमतेच्या 25%, यापैकी जे जास्त असेल ती. तर, आयातदारांच्या संदर्भात, आयातदारांनी सीमाशुल्क क्लीअरन्स तारखेपासून 30 दिवसांपेक्षा जास्त आयातीत  साठा ठेवू नये अशी मर्यादा घालण्यात आली आहे. संबंधित कायदेशीर संस्थांनी ग्राहक व्यवहार विभागाच्या पोर्टलवर (https://fcainfoweb.nic.in/psp)  साठ्याची स्थिती घोषित करायची आहे आणि त्यांच्याकडे असलेला साठा विहित मर्यादेपेक्षा जास्त असल्यास, त्यांनी अधिसूचना जारी केल्यापासून 30 दिवसांच्या आत विहित मर्यादेपर्यंत साठा व्यवस्थापित करावा.

तूर आणि उडदाच्या डाळ साठ्यावरची  मर्यादा लादणे हे जीवनावश्यक वस्तूंच्या किमतींवर कडक नियंत्रण ठेवण्यासाठी सरकारने केलेल्या सातत्यपूर्ण प्रयत्नांचे आणखी एक पाऊल आहे. ग्राहक व्यवहार विभाग स्टॉक डिस्क्लोजर पोर्टलद्वारे तूर आणि उडीद डाळीच्या साठ्याच्या स्थितीवर बारकाईने लक्ष ठेवून आहे. तसेच राज्य सरकारसोबत या साठ्याचा साप्ताहिक आधारावर आढावा घेण्यात आला आहे. साठा उघड करणे सुनिश्चित करण्यासाठी आयातदार, मिलर्स, किरकोळ विक्रेते यांसारख्या विविध भागधारकांशी व्यापक संवाद साधण्यात आला आहे. त्यासाठी वरिष्ठ अधिकाऱ्यांनी कर्नाटक, मध्य प्रदेश, महाराष्ट्र आणि तामिळनाडू या राज्यांना भेटी दिल्या आहेत.

ओदीशामध्ये  रेल्वे अपघातात झालेल्या जीवितहानीबद्दल पंतप्रधान नरेंद्र मोदी यांनी  तीव्र दुःख  व्यक्त केले आहे.

एका ट्विटमध्ये पंतप्रधान म्हणाले;

“ओदीशात झालेल्या  रेल्वे अपघातामुळे व्यथित झालो. या दुःखद  प्रसंगी शोकाकुल कुटुंबियांबद्दल शोकसंवेदना.  जखमींच्या प्रकृतीत लवकरात लवकर सुधारणा व्हावी. रेल्वेमंत्री @AshwiniVaishnaw यांच्याशी बोलून परिस्थितीचा आढावा घेतला. दुर्घटनेच्या ठिकाणी बचावकार्य सुरू असून अपघातग्रस्तांना सर्वोतोपरी  मदत केली जात आहे.

गोव्यातील पहिल्या वंदे भारत एक्सप्रेसचे शनिवारी होणारे लॉंचिंग रद्द करण्यात आले आहे. पीएम मोदी हिरवा झेंडा दाखवणार होते. ओडिशा रेल्वे अपघातानंतर हा निर्णय घेण्यात आला आहे.

या कार्यक्रमात रेल्वेमंत्री अश्विनी वैष्णव मडगाव स्थानकावर येणार होते. मात्र त्यांनी सर्व कार्यक्रम रद्द केले आहेत. ओडिशात शनिवारी सकाळी रेल्वे मंत्री रेल्वे अपघाताच्या ठिकाणी पोहोचले.

सध्या महाराष्ट्रात 16 डब्यांच्या वंदे भारत गाड्या सीएसएमटी मुंबई-साईनगर शिर्डी, सीएसएमटी-सोलापूर आणि मुंबई सेंट्रल-अहमदाबाद मार्गावर धावत आहेत. दुसरी ट्रेन नागपूर ते बिलासपूर दरम्यान धावणार आहे. पुढील आठवड्यापासून वंदे भारत गोवा मार्गावर नियमित धावण्याची शक्यता आहे. रेल्वेच्या म्हणण्यानुसार ही ट्रेन शुक्रवार वगळता आठवड्याचे उर्वरित सहा दिवस धावणार आहे.

वंदे भारत ट्रेनला गोवा-मुंबई मार्गावर 7 थांबे देण्यात आले आहेत. सीएसएमटी, दादर, ठाणे, पनवेल, रोहा, खेड, रत्नागिरी, कणकवली, थिविम आणि मडगाव स्थानकांवर थांबे असतील. यापूर्वी 16 मे रोजी सीएसएमटी ते मडगाव दरम्यानच्या ट्रायल रनदरम्यान ट्रेनने सुमारे सात तासांत हे अंतर कापले होते.

तिकिटांची अधिकृत घोषणा अद्याप करण्यात आलेली नाही, परंतु एका तिकिटाची किंमत सुमारे 1400 रुपये असेल अशी अपेक्षा आहे. ट्रेनच्या वेगवेगळ्या श्रेणीनुसार तिकीट दरात बदल होऊ शकतो.

जगातील चौथ्या क्रमांकाचे रेल्वे नेटवर्क भारताकडे आहे. येथे 1.25 लाख किलोमीटर लांबीच्या रेल्वे ट्रॅकवर दररोज 11 हजारहून अधिक ट्रेन धावतात. या गाड्यांमधून दररोज सुमारे 3 कोटी लोक प्रवास करतात. इतका मोठा आणि लोकांशी जोडलेला असल्यामुळे भारतात रेल्वेसाठी वेगळा अर्थसंकल्प सादर करण्यात आला. 2016 मध्ये मोदी सरकारने ही 92 वर्षे जुनी प्रथा बंद केली.

भुवनेश्वर–

ओडिशातील बालासोर येथे शुक्रवारी संध्याकाळी ७ वाजता झालेला रेल्वे अपघात इतका भीषण होता की कोरोमंडल एक्सप्रेस ट्रेनचे अनेक डबे उद्ध्वस्त झाले. एक इंजिन मालगाडीच्या रॅकवरच चढले. ही टक्कर इतकी भीषण होती की खिडक्यांच्या काचा फुटल्या आणि जवळपास 50 लोक बाहेर फेकले गेले.

अंधारामुळे लोक रडत रडत आपल्या प्रियजनांना शोधत राहिले. काहींना धड मिळाले पण डोके मिळाले नाही. लोक ओरडताना आणि आपल्या प्रियजनांचे तुकडे गोळा करताना दिसले. बोगीत अडकलेल्या लहान मुलांना आणि महिलांना डब्यातून बाहेर काढण्यासाठी शिडीचा सहारा घ्यावा लागला. रेल्वेत अडकलेल्या लोकांना बाहेर काढण्यासाठी स्थानिक लोकही रात्री उशिरापर्यंत अथक परिश्रम करताना दिसले. रुग्णालयातही अनेक लोक जखमींच्या मदतीसाठी उभे राहिले.

या अपघातात सकाळी ६ वाजेपर्यंत २३३ जणांचा मृत्यू झाल्याची पुष्टी झाली आहे. त्याचवेळी 900 हून अधिक लोक जखमी झाले आहेत. अशा परिस्थितीत मृतांचा आकडा आणखी वाढू शकतो. अपघाताचे प्रत्यक्षदर्शींनी सांगितले त्यावरून हा अपघात किती भीषण होता हे समजू शकते.

 पंखा धरून वरच्या सीटवर बसलो, नंतर इतरांना मदत केली
एका प्रवाशाने सांगितले की आम्ही S5 बोगीत होतो आणि अपघात झाला तेव्हा मी झोपलो होतो. मोठ्या आवाजाने मला जाग आली. मी पाहिले की ट्रेन उलटली होती. माझी सीट वरच्या मजल्यावर होती, मी पंखा धरून बसलो. ट्रेनमध्ये चेंगराचेंगरी झाली. लोक आम्हाला वाचवा असे ओरडत होते.

त्यानंतर पॅन्ट्री कारने पेट घेतला. पलीकडे पळत गेलो तर तिथे हात नसलेली, पाय नसलेली मृत माणसे पडलेली दिसली. तोपर्यंत बाहेरचे कोणीही मदतीला आले नव्हते. ट्रेनमधून उतरल्यावर लोक एकमेकांना मदत करत होते. चांगली गोष्ट म्हणजे आमच्या सीटखाली एक 2 वर्षाचा मुलगा होता, जो पूर्णपणे सुरक्षित होता. आम्ही त्याच्या कुटुंबाला वाचवण्यास मदत केली.

ट्रेन उलटली, 10 लोक माझ्या अंगावर पडले, बाहेर आलो तर मृतदेह पाहिले
एक जखमी म्हणाला, मी झोपेत होतो. डबे उलटताच १०-१२ माणसे माझ्या अंगावर पडली. मी कसाबसा डब्यातून बाहेर आलो. भयंकर दृश्य होते. काहींनी हातपाय गमावले होते. मला धक्काच बसला. माझा आवाज गेला होता. एक महिला म्हणाली, सगळे सामान, प्रवासी एकमेकांवर पडले. आम्हाला श्वास घेणेही कठीण झाले होते. तरीही मी कशीबशी बाहेर पडले. माझा हात आणि मानेला दुखापत झाली आहे.

भुवनेश्वर–

ओडिशाच्या बालासोर येथे शुक्रवारी संध्याकाळी झालेल्या रेल्वे अपघातात 238 जणांचा मृत्यू झाला, तर 900 हून अधिक प्रवासी जखमी झाले. बालासोर येथील बहानागा बाजार स्थानकाजवळ सायंकाळी ७ वाजण्याच्या सुमारास हा अपघात झाला. कोलकाता-चेन्नईकडे जाणारी कोरोमंडल एक्सप्रेस आणि यशवंतपूर-हावडा एक्सप्रेस बहानागाजवळ रुळावरून घसरली. यानंतर कोरोमंडल ट्रेल मालगाडीला धडकली. या अपघाताबाबत पंतप्रधान नरेंद्र मोदी यांनी शनिवारी तातडीची बैठक बोलावली आहे.

पीटीआय या वृत्तसंस्थेनुसार, एका रेल्वे अधिकाऱ्याने सांगितले की, सर्वप्रथम यशवंतपूर-हावडा एक्सप्रेस रुळावरून घसरली. त्याचे काही डबे दुसऱ्या रुळावरून उलटले आणि दुसऱ्या बाजूने येणाऱ्या शालिमार-चेन्नई कोरोमंडल एक्सप्रेसला धडकले. यानंतर कोरोमंडल ट्रेनच्या काही बोगीही रुळावरून घसरल्या. या बोगी दुसऱ्या ट्रॅकवर असलेल्या मालगाडीला धडकल्या. काही बोगी मालगाडीच्या वर चढल्या.

बहानागा येथे पोहोचण्यासाठी दोन्ही गाड्यांमध्ये ३ तासांचा फरक होता, पण त्या एकत्र आल्या

ट्रेन क्रमांक १२८६४ बेंगळुरू – हावडा सुपरफास्ट एक्स्प्रेस 1 जून रोजी सकाळी 7:30 वाजता बेंगळुरूमधील यशवंतपूर स्थानकावरून निघाली. 2 जून रोजी रात्री 8 च्या सुमारास हावडा येथे पोहोचणार होती. नियोजित वेळेपेक्षा 3.30 तासांच्या विलंबाने 06:30 वाजता भद्रक येथे पोहोचली. पुढचे स्टेशन बालासोर होते, जिथे ट्रेन 4 तासांच्या विलंबाने 7:52 वाजता पोहोचणार होती.

तर ट्रेन क्रमांक १२८४१ शालीमार-चेन्नई सेंट्रल कोरोमंडल एक्सप्रेस हावडाहून २ जून रोजी दुपारी ३.२० वाजता निघाली. 3 जून रोजी दुपारी 4:50 वाजता चेन्नई सेंट्रलला पोहोचते. ती संध्याकाळी ६.३७ वाजता बालासोरला वेळेवर पोहोचली. पुढचे स्टेशन भद्रक होते जिथे ट्रेन 7:40 ला पोहोचणार होती. पण, 7 वाजण्याच्या सुमारास बहानागा बाजार स्थानकाजवळ दोन्ही गाड्या समोरासमोर गेल्या, त्यावेळी हा अपघात झाला.

हेल्पलाइन नंबर…

आपत्कालीन नियंत्रण कक्ष: 6782262286
हावडा: ०३३-२६३८२२१७
खरगपूर: ८९७२०७३९२५, ९३३२३९२३३९
बालासोर: 8249591559, 7978418322
कोलकाता शालीमार: 9903370746

• ओडिशाचे मुख्यमंत्री नवीन पटनायक यांनी या अपघातावर शोक व्यक्त केला आहे. म्हणाले- मी नुकताच रेल्वे अपघाताच्या परिस्थितीचा आढावा घेतला. मी उद्या सकाळी घटनास्थळी भेट देईन.
• ओडिशा सरकारने एक दिवसाचा राजकीय दुखवटा जाहीर केला आहे.
• गोवा-मुंबई वंदे भारत एक्स्प्रेसचा शनिवारी होणारा उद्घाटन सोहळा रेल्वे अपघातानंतर रद्द करण्यात आला आहे.
• जिल्हाधिकारी, एसपी, रेंज आयजी पोलिसांसह 3 एनडीआरएफ टीम आणि 20 हून अधिक अग्निशमन सेवा आणि बचाव पथक घटनास्थळी मदत आणि बचाव कार्यात गुंतले आहेत.
• भुवनेश्वरमध्ये अधिकाऱ्यांनी सांगितले की घटनास्थळी 115 रुग्णवाहिका, 50 बस आणि 45 मोबाईल हेल्थ युनिट तैनात करण्यात आले होते. याशिवाय 1200 बचाव कर्मचारीही हजर आहेत.
• केंद्रीय रेल्वे मंत्री अश्विनी वैष्णव अपघातस्थळी रवाना झाले आहेत. भुवनेश्वर आणि कोलकाता येथून बचाव पथके रवाना करण्यात आल्याचे त्यांनी ट्विट केले आहे. एनडीआरएफ, राज्य सरकारची टीम आणि एअरफोर्स हेलिकॉप्टर बचावासाठी पोहोचले आहेत.
• जखमींना मदत करण्यासाठी 2000 हून अधिक लोक रात्रभर बालासोर मेडिकल कॉलेज आणि हॉस्पिटलच्या बाहेर उभे आहेत. अनेकांनी रक्तदानही केले.
• यूएस स्टेट डिपार्टमेंटच्या दक्षिण आणि मध्य आशियाई व्यवहार ब्युरो (एससीए) ने बालासोर ट्रेन दुर्घटनेबद्दल शोक व्यक्त केला आहे.
• केंद्रीय आरोग्य मंत्री मनसुख मांडविया यांनी या अपघातावर शोक व्यक्त केला आहे. एम्स भुवनेश्वरमध्ये जखमींसाठी बेड, आयसीयू आदींची व्यवस्था करण्याच्या सूचनाही त्यांनी दिल्या आहेत.
• या अपघातग्रस्त मार्गावरील 6 गाड्या रद्द करण्यात आल्या आहेत. काही गाड्यांचे मार्ग बदलण्यात आले आहेत.

मुंबई, दि. ०२ जून २०२३ : कर्मचाऱ्यांचे अपघात कमी झाल्याबद्दल तसेच कंपनीत सुरक्षिततेचे वातावरण जोपासल्याबद्दल महावितरणला ग्रीनटेक सुरक्षा पुरस्कार २०२३ मिळाला असून नवी दिल्ली येथे नुकताच महावितरणचे संचालक अरविंद भादीकर यांनी हा पुरस्कार स्वीकारला.

आसामचे माजी राज्यपाल डॉ. जगदीश मुखी यांच्या हस्ते श्री भादीकर यांनी हा पुरस्कार स्वीकारला. यावेळी महावितरणचे प्रशिक्षण व सुरक्षा विभागाचे मुख्य महाव्यवस्थापक देवेंद्र सायनेकर उपस्थित होते. पुरस्कार वितरण सोहळ्यास कॅनरा बँकेचे माजी व्यवस्थापकीय संचालक डॉ. दुबे आणि ग्रीनटेक फाऊंडेशनचे मुख्य कार्यकारी अधिकारी श्री.के. शरण उपस्थित होते.

महावितरणच्या नियमित आणि बाह्यस्त्रोत कर्मचाऱ्यांचे अपघात कमी व्हावेत यासाठी कंपनीतर्फे सातत्याने प्रयत्न केले जातात. एका वर्षात जीवघेणे अपघात ४२ टक्क्यांनी कमी झाले तर गंभीर इजा झाली असे अपघात ४३ टक्क्यांनी कमी झाले याची नोंद घेऊन महावितरणला पुरस्कार देण्यात आला.

विजेची वायर तुटणे, उपकरणात दोष, आग लागणे, वायर्स किंवा विजेच्या खांबावर झाडे कोसळणे, विजेचे खांब मोडणे अथवा विजेचा झटका बसणे अशा कारणांनी विद्युत कर्मचाऱ्यांचे अपघात होतात. तसेच नैसर्गिक आपत्तीमुळे अपघात होतात. हे अपघात टाळण्यासाठी कंपनीतर्फे सातत्याने कर्मचाऱ्यांना प्रशिक्षण देण्यात येते तसेच त्यांच्यामध्ये जागृती निर्माण केली जाते. विशेषतः पावसाळ्यापूर्वी मोठ्या प्रमाणात प्रशिक्षण शिबिराचे आयोजन केले जाते. या खेरीज सुरक्षितता प्रशिक्षण दिले जाते. कर्मचाऱ्यांमध्ये जागृती निर्माण करण्यासाठी सातत्याने व्हॉटस अपच्या माध्यमातून संदेशही पाठविले जातात

पंतप्रधान 3 जून रोजी दाखवणार हिरवा झेंडा–देशातील ही 19वी वंदे भारत रेल्वेगाडी 

नवी दिल्ली, 2 जून 2023

पंतप्रधान नरेंद्र मोदी 3 जून रोजी सकाळी 10:30 वाजता दूरदृश्य प्रणालीच्या माध्यमातून गोव्यातील पहिल्या वंदे भारत एक्सप्रेसला मडगाव रेल्वे स्थानकावरून हिरवा झेंडा दाखवतील.

पंतप्रधानांच्या ‘मेक इन इंडिया’ आणि आत्मनिर्भर भारताच्या दृष्टीकोनातून, अत्याधुनिक वंदे भारत एक्स्प्रेसमुळे मुंबई-गोवा मार्गावरील कनेक्टिव्हिटी सुधारेल आणि या भागातील लोकांना वेगवान आणि सुखकर प्रवास करण्याचे साधन उपलब्ध होईल. ही रेल्वेगाडी  देशातील 19वी वंदे भारत रेल्वे असेल.

ही रेल्वेगाडी मुंबईतील छत्रपती शिवाजी महाराज टर्मिनस ते गोव्यातील मडगाव स्थानकादरम्यान धावणार आहे. या दोन ठिकाणांना जोडणाऱ्या सध्याच्या वेगवान रेल्वेगाड्यांच्या तुलनेत वंदे भारत रेल्वेगाडी हा प्रवास सुमारे साडेसात तासांत पूर्ण करेल यामुळे प्रवासाच्या वेळेत सुमारे एका तासाची बचत होईल.

स्वदेशी बनावटीची, जागतिक दर्जाच्या सुविधांनी सुसज्ज आणि कवच तंत्रज्ञानासह अत्याधुनिक सुरक्षा वैशिष्ट्यांसह असलेली ही रेल्वेगाडी दोन्ही राज्यांमध्ये पर्यटनाला चालना देईल