पुणे, 2 जून 2023

यंदा पुणे शहरामध्ये जी 20 परिषदेनिमित्त विविध देशांचे पाहुणे येणार आहेत त्या दृष्टिकोनातून पुणे महानगरपालिकेने शहराच्या सौंदर्यकरणाचे विविध उपक्रम हाती घेतलेले आहेत. या परिषदेचा प्रचार आणि प्रसार करण्यासाठी पुणे महापालिकेतर्फे पर्यावरण सायकल रॅलीचे आयोजन करण्यात आले आहे. या रॅलीचा आज महापालिका भवना पासून शुभारंभ झाला .पुणे ते पंढरपूर या सुमारे 250 किलोमिटर मार्गावर ही रॅली प्रवास करणार असून जी 20 परिषदे बरोबरच पर्यावरण विषयक जन जागृती करणार आहे . मार्गावर ठिकठिकाणी वृक्षारोपण देखील केले जाणार आहे.

महापालिका आयुक्त विक्रमकुमार यांच्या हस्ते या रॅलीला हिरवा झेंडा दाखविण्यात आला.यावेळी  विविध मान्यवर उपस्थित होते. रॅलीमध्ये महापालिका कर्मचाऱ्यांसह विविध स्वयंसेवी संस्था संघटनांचे प्रतिनिधी सहभागी झाले आहेत .

पुणे, दि. २: सार्वजनिक प्रशासनात नवकल्पनांच्या अंमलबजावणीसाठी भारतीय लोक प्रशासन संस्थेच्यावतीने मानाच्या स्वर्गीय एस. एस. गडकरी पुरस्कारासाठी पुणे जिल्हा परिषदेची निवड झाली आहे. जिल्हा परिषदेच्या सर्व अधिकारी आणि कर्मचाऱ्यांची सर्जनशीलता आणि कठोर परिश्रमाचा हा सन्मान आहे, अशी भावना प्र. मुख्य कार्यकारी अधिकारी चंद्रकांत वाघमारे यांनी व्यक्त केली आहे.

पुणे जिल्हा परिषदेने मुख्य कार्यकारी अधिकारी आयुष प्रसाद यांच्या मार्गदर्शनाखाली हाती घेतलेल्या उपक्रमांमुळे सार्वजनिक सेवा प्रशासनात उल्लेखनीय प्रगती झाली आहे. याअंतर्गत सूक्ष्म आणि सर्वसमावेशक मूल्यमापन प्रक्रियेद्वारे जिल्हा परिषदेने सर्व विभागांमधील १ हजार १८३ कार्य प्रक्रिया निश्चित केल्या. आवश्यक संकलित माहिती (डेटा), निर्णय घेण्याची आवश्यकता आणि अंमलबजावणी प्रक्रिया विचारात घेऊन प्रत्येक प्रक्रियेचे काळजीपूर्वक परीक्षण करण्यात आले.

संबंधित कायदे, नियम, शासकीय ठराव, न्यायालयाचे आदेश, वरिष्ठ कार्यालयांचे स्थायी आदेश आणि निश्चित पद्धती यांचा विस्तृत संशोधनाद्वारे अभ्यास करण्यात आला. २५ जानेवारी २०२२ रोजी जारी केलेल्या आदेशानुसार हे निष्कर्ष सुसंगत प्रक्रिया तयार करण्यासाठी सात प्रकारांमध्ये वर्गीकरण आणि सेवा हक्क कायद्याअंतर्गत अधिसूचित करण्यात आले.

या प्रक्रियेअंतर्गत जिल्हा परिषदेने मुख्य कार्यकारी अधिकाऱ्यांना अनेक अधिकार प्रदान केले. सुमारे सात महिने चाललेल्या या प्रक्रियेत जिल्हा परिषदेचे सर्व अधिकारी आणि कर्मचारी सक्रिय सहभागी झाले. विस्तृत संशोधन आणि विकास प्रक्रियेद्वारे सर्वांच्या भूमिकांबद्दल अधिक माहितीपूर्ण दृष्टीकोन निश्चित करून सर्वांना प्रशिक्षण दिले. या सर्वांनी क्षमता वाढीसाठी महत्त्वपूर्ण योगदान दिले. या प्रक्रियांचे संकलन नियमावलीत करण्यात आले.

अतिरिक्त मुख्य कार्यकारी अधिकारी भारत शेंडगे, कमलाकर रणदिवे आणि राहुल काळभोर यांनी जिल्हा परिषदेत हा अभिनव उपक्रम राबविण्यात महत्त्वाची भूमिका बजावली.

जिल्हा परिषदेने महाराष्ट्र ज्ञान महामंडळासह (एमकेसीएल) ‘महालाभार्थी’ या नावाने सहयोगी प्रकल्प राबविण्याची आणखी एक उल्लेखनीय कामगिरी केली आहे. हा उपक्रम दोन टप्प्यात राबविण्यात आला, पहिला टप्पा जुन्नर आणि आंबेगाव येथे आदिवासी समुदायांमध्ये प्रकल्प राबविण्यात आला. आंतरजालावरील सर्च इंजिनच्या वापराद्वारे, नागरिकांनी सादर केलेल्या वैयक्तिक माहितीच्या आधारे योजनांची यादी तयार केली गेली. या प्रकल्पाने जनतेत जागरुकता वाढवली आणि मोठ्या संख्येने नागरिकांना विविध योजनांपर्यंत पोहोचण्यास सक्षम केले.

पुणे जिल्हा परिषदेत राबविण्यात आलेल्या दुसऱ्या टप्प्यात, नागरीक आणि कुटुंबांना पुणे जिल्हा परिषदेद्वारे राबविण्यात येणाऱ्या सर्व योजनांमध्ये सहज प्रवेश मिळवून देणारा ‘सिंगल मास्टर फॉर्म’ विकसित करण्यासोबतच नाविन्यपूर्ण ‘फॅमिली फोल्डर’ संकल्पना तयार करण्यात आली. या वैशिष्ट्यपूर्ण प्रणालीद्वारे लाभार्थ्यांची ओळख पटविण्यासह अर्जांवर प्रक्रियादेखील सोपी झाली. ‘केस मॅनेजमेंट सॉफ्टवेअर’च्या अंमलबजावणीमुळे नागरिकांना सुलभ हाताळणी, कमी वेळेत लाभ आणि नियमांचे पालन करण्यास प्रोत्साहन मिळाले. परिणामी, पुणे जिल्हा परिषद १५ दिवसांच्या उल्लेखनीय कालावधीत मोठ्या संख्येने अर्जांवर प्रक्रिया करण्यात सक्षम झाली आहे. याचा सुमारे एक लाख लोकांना फायदा झाला आहे.

एमकेसीएलचे सहव्यवस्थापकीय संचालक समीर पांडे, व्यवसाय विकास व्यवस्थापक विनायक कदम, जिल्हा परिषदेचे कृषि विकास अधिकारी अनिल देशमुख आणि जिल्हा पशुसंवर्धन अधिकारी डॉ. शिवाजी विधाते यांनी हे सॉफ्टवेअर विकसित केले आहे.

भारतीय लोकप्रशासन संस्थेच्या महाराष्ट्र विभागीय शाखेचे मानद अध्यक्ष आणि माजी मुख्य सचिव स्वाधीन क्षत्रिय यांनी हा पुरस्कार जाहीर करून पुणे जिल्हा परिषदेच्या या कामगिरीचा गौरव केला आहे.

पुणे : कलामहर्षी बाबूराव पेंटर यांची यंदा 133 वी जयंती आहे. या निमित्ताने कलामहर्षी बाबूराव पेंटर आर्ट फाउंडेशनच्या वतीने ‘नॅशनल लेवल आर्टवर्क एक्झिबिशन अँड कॉम्पिटिशन 2023” या चित्रप्रदर्शनाचे आयोजन करण्यात आले आहे.  या चित्रप्रदर्शनाचे उद्घाटन यशवंतराव चव्हाण नाट्यगृह कलादालन  येथे बाबूराव पेंटर यांच्या कन्या विजायमाला बाबूराव पेंटर यांच्या हस्ते शुक्रवारी करण्यात आले. 

याप्रसंगी कलामहर्षी बाबूराव पेंटर यांची सून अनुराधा अरविंद मेस्त्री , नातू अर्जून अरविंद मेस्त्री, नात प्रिया रणजीत बॅनर्जी, चित्रप्रदर्शन स्पर्धेचे परीक्षक ज्येष्ठ चित्रकार दत्तात्रय पाडेकर ( मुंबई), संजय शेलार ( कोल्हापूर) आदी उपस्थित होते.

या ‘नॅशनल लेवल आर्टवर्क एक्झिबिशन अँड कॉम्पिटिशन 2023’ मध्ये शनिवार (दि. 3 जून ) सकाळी 9 वा. कलामहर्षी बाबूराव पेंटर यांचा 133 वा जयंती सोहळा व स्पर्धेचा  पुरस्कार वितरण समारंभ मान्यवरांच्या उपस्थितीत संपन्न होणार आहे.  या आर्टवर्क एक्झिबिशन अँड कॉम्पिटिशन मध्ये संपूर्ण भारतातून 500 हुन अधिक व्यावसायिक कलाकार व कला शाखेचे विद्यार्थी सहभागी झाले असून हे  प्रदर्शन 4 जून पर्यंत यशवंतराव चव्हाण नाट्यगृह कलादालन येथे सकाळी 10 ते रात्री 8 यावेळेत नागरिकांना विनामूल्य पाहता येणार आहे.

पुणे, ०२ जून २०२३: पश्चिम भारतातील रुग्णालयांची सर्वात मोठी शृंखला असलेल्या सह्याद्रि हॉस्पिटल्सने डेक्कन जिमखाना येथील सह्याद्रि सुपर स्पेशालिटी हॉस्पिटलमध्ये यकृत आणि मूत्रपिंड प्रत्यारोपण यशस्वीपणे पूर्ण करून आणखी एक उल्लेखनीय टप्पा गाठला आहे. यकृत आणि बहु-अवयव प्रत्यारोपण विभागाचे प्रमुख डॉ. बिपीन विभूते आणि सिनियर कन्सल्टंट नेफ्रोलॉजिस्ट आणि ट्रान्सप्लांट फिजिशियन डॉ. अतुल सजगुरे यांच्या नेतृत्वाखालील या अवयवदानाद्वारे केल्या जाणाऱ्या गुंतागुंतीच्या शस्त्रक्रिया तज्ञ वैद्यकीय पथकांनी केल्या.

यकृत प्रत्यारोपणात ५७ वर्षीय प्राप्तकर्त्याचा समावेश होता, जो लिव्हर सिरोसिसने ग्रस्त होता. तर सबड्युरल हिमॅटोमामुळे दुर्दैवाने ब्रेन डेथ (Brain Death) झालेला एक ४९ वर्षीय मृत हा अवयव दाता होता. मात्र ही एक अतिशय आव्हानात्मक अशी शस्त्रक्रिया ठरली कारण एक धातूचा स्टेंट यकृताच्या मुख्य रक्तवाहिनीमध्ये होता आणि थेट हृदयापर्यंत पोहोचला होता. डॉ. बिपिन विभूते यांच्या नेतृत्वाखालील वैद्यकीय पथकाने १० तासांच्या शस्त्रक्रियेत या आव्हानांवर यशस्वीपणे मात केली. कोणत्याही संभाव्य रक्तस्त्राव समस्यांचे निराकरण करण्यासाठी आणि सुयोग्य पोस्ट-ऑपरेटिव्ह काळजी घेण्यासाठी अवयव प्राप्तकर्ता हा सध्या निरीक्षणाखाली आहे.

अवयवदानाच्या निःस्वार्थी कृत्यामुळे असंख्य जीवनात आशा निर्माण झाली आहे. मूत्रपिंड प्रत्यारोपणात, गेल्या ५ वर्षांपासून डायलिसीस घेत असलेल्या ५७ वर्षीय प्राप्तकर्त्याला एक नवे आयुष्य मिळाले आहे. डॉ. अतुल सजगुरे आणि त्यांच्या टीमने मूत्रपिंड प्रत्यारोपण केले. प्राप्तकर्ता आता दर तासाला 800-900 मिली लघवी पास करून मूत्रपिंडाच्या कार्याची सकारात्मक चिन्हे दर्शवित आहे. प्राप्तकर्त्याच्या आरोग्यातील ही लक्षणीय सुधारणा अवयवदानाचे महत्त्व आणि मूत्रपिंड च्या आजारांनी ग्रस्त असलेल्या व्यक्तींच्या जीवनाचा दर्जा उंचावण्यासाठी त्याचा काय परिणाम होऊ शकतो यावर प्रकाश टाकते.

यकृत प्रत्यारोपणात महत्त्वपूर्ण भूमिका बजावणारे सह्याद्रि रुग्णालयातील यकृत आणि बहु-अवयव प्रत्यारोपण विभागाचे प्रमुख डॉ. बिपीन विभुते यांनी यशस्वी प्रक्रियेबद्दल समाधान व्यक्त करताना सांगितले की, “आमचे प्राथमिक लक्ष हे कायमच आमच्या रुग्णांना सर्वोत्तम काळजी देण्यावर असते. आजच्या या यकृत आणि मूत्रपिंड प्रत्यारोपणाच्या शस्त्रक्रियेने एक अनोखे आव्हान सादर केले, ज्यासाठी सूक्ष्म नियोजन आणि अंमलबजावणीची आवश्यकता होती. १० तासां इतका विस्तृत कालावधी लागणाऱ्या बहु-अवयव प्रत्यारोपण शस्त्रक्रिया यात गुंतलेली जटिलता आणि अचूकता अधोरेखित करतात. या शस्त्रक्रिया करताना आमच्या टीमने दाखवलेले अपवादात्मक वैद्यकीय कौशल्य आणि अतूट समर्पण याबद्दल मी खरोखरच कृतज्ञ आहे. अशा प्रकारच्या शस्त्रक्रिया यशस्वी होण्यासाठी ते फार महत्त्वपूर्ण असते.” 

सह्याद्रि हॉस्पिटल्सचे सिनियर कन्सल्टंट नेफ्रोलॉजिस्ट आणि ट्रान्सप्लांट फिजिशियन डॉ. अतुल सजगुरे, ज्यांनी मूत्रपिंड प्रत्यारोपणाचे नेतृत्व केले, त्यांनी अवयव दानाची अत्यंत महत्त्वाची गरज अधोरेखित केली. ते म्हणाले, “हे मूत्रपिंड प्रत्यारोपण केवळ प्राप्तकर्त्याला दुसरी संधीच देत नाही तर जगभरात अवयव दान करण्याच्या गरजेचे महत्व सांगते. जनजागृती करणे आणि अधिकाधिक व्यक्तींना अवयव दाता होण्यासाठी प्रोत्साहित करणे ही आपली सामूहिक जबाबदारी आहे. ऐच्छिक अवयव दान करण्याच्या फॉर्मवर स्वाक्षरी करून, आपण खूप मोठा बदल घडवू शकतो आणि असंख्य जीव वाचवू शकतो.”

सह्याद्रि हॉस्पिटल हे उत्तम नगर, शिवणे, पुणे येथे राहणाऱ्या ४९ वर्षीय उदार अवयवदात्याचे आभार मानते. त्यांच्या निःस्वार्थ कृत्याने प्राप्तकर्त्यांच्या आणि त्यांच्या कुटुंबियांच्या जीवनामध्ये कायमस्वरूपी अनुकूल बदल झाला आहे. या अवयवदात्याचे एक मूत्रपिंड आणि यकृत सह्याद्रि रुग्णालयात प्रत्यारोपण करण्यात आले, तर दुसरे मूत्रपिंड शहरातील दुसऱ्या एका रुग्णालयात पाठवण्यात आले.

सह्याद्रि हॉस्पिटल अपवादात्मक वैद्यकीय सेवा देण्यासाठी, अवयवदानाविषयी जागरूकता वाढवण्यासाठी आणि नाविन्यपूर्ण उपचारांद्वारे रुग्णांचे जीवन सुधारण्यासाठी सतत प्रयत्नशील राहण्यासाठी नेहमीच वचनबद्ध राहील.

अवयव दाता डॉ वैशाली पाठक, फिझिशियन इंटर्नल मेडिसीन यांच्या अंतर्गत उपचार घेत होते. प्रत्यारोपणाच्या टीममध्ये ट्रान्सप्लांट सर्जन – यकृत आणि बहु-अवयव प्रत्यारोपण विभागाचे प्रमुख डॉ. बिपीन विभुते, डॉ. शीतल महाजनी, डॉ. अपूर्वा देशपांडे, डॉ. अनिरुद्ध भोसले, डॉ. अभिजित माने, वरिष्ठ कन्सल्टंट नेफ्रोलॉजिस्ट आणि प्रत्यारोपण फिजिशियन डॉ. अतुल सजगुरे, डॉ. केतन पै, डॉ. संजय कोलते, प्रत्यारोपण भूलतज्ज्ञ- डॉ. मनीष पाठक, डॉ. मनोज राऊत आणि डॉ. बालाजी मोमाले यांचा समावेश होता. तर प्रत्यारोपण समन्वयक- म्हणून राहुल तांबे, अरुण अशोकन आणि अमन बेले, वैद्यकीय सामाजिक कार्यकर्ते- शर्मिला पाध्ये आणि अजिंक्य बोराटे यांचे मोलाचे सहकार्य मिळाले.

– बंधुतादिनी पाचव्या बंधुता काव्य महोत्सवाचे उद्घाटन

पुणे : “काव्य, गीत आणि संगीत यांना भाषा, प्रदेश किंवा विदेशाच्या सीमा रोखू शकत नाहीत. मानवतावादी भावविश्व गुंफणारे हे साहित्य सहजपणे सर्वदूर पोहोचते. कवी, गीतकार व संगीतकार यांनी आपल्या उत्कट प्रतिभेला ज्ञान, विज्ञान आणि आधुनिक तंत्रज्ञानाची जोड देऊन हे काव्य क्षितिज अधिकाधीक विस्तीर्ण करावे,” अशी अपेक्षा ज्येष्ठ कवयित्री संगीता झिंजुरके यांनी व्यक्त केली. पाचव्या बंधुता काव्य महोत्सवाच्या अध्यक्ष स्थानावरून झिंजुरके बोलत होत्या. 
नवी पेठेतील एस. एम. जोशी सभागृहात झालेल्या काव्य महोत्सवाचे उद्घाटन साहित्यिक प्रा. चंद्रकांत वानखेडे यांच्या हस्ते झाले. प्रसंगी बंधुताचार्य प्रकाश रोकडे, मंदाकिनी रोकडे, स्वागताध्यक्ष हरिश्चंद्र गडसिंग, शिवव्याख्याते प्रदिप कदम, डॉ. अशोककुमार पगारिया, प्रा. डॉ. प्रभंजन चव्हाण उपस्थित होते. यावेळी पत्रकारिता आणि जनसंपर्क क्षेत्रातील योगदानाबद्दल जीवराज चोले यांना ‘डॉ. बाबासाहेब आंबेडकर पत्रकारिता पुरस्कार’, तर काव्य निर्मितीसाठी ज्ञानेश सुर्यवंशी, नंदा कोकाटे, वीणा व्होरा, नंदकिशोर लांडगे, नितीन गायके, राजश्री मराठे, प्रिती वानखेडे, गजानन गायकवाड, महादेव सुरवसे, कल्पना देशमुख यांना ‘बंधुता काव्यप्रतिभा पुरस्कार’ प्रदान करण्यात आला.
राष्ट्रीय बंधुता साहित्य परिषद, बंधुता प्रतिष्ठान, काषाय प्रकाशन, रयत शिक्षण संस्थेचे औंध येथील डॉ. बाबासाहेब आंबेडकर महाविद्यालय, भोसरी येथील भगवान महावीर शिक्षण संस्थेचे प्रीतम प्रकाश महाविद्यालय, भारतीय जैन संघटनेचे वाघोली येथील कला, विज्ञान व वाणिज्य महाविद्यालय या संस्थांच्या संयुक्त विद्यमाने गेली पाच दशके बंधुतेचा विचार जनमानसात रुजविण्यासाठी प्रयत्नशील असलेल्या बंधुताचार्य प्रकाश रोकडे यांचा जन्मदिवस बंधुता दिन म्हणून साजरा करण्यात आला.
संगीता झिंजुरके म्हणाल्या, “कविता, संगीत आणि साहित्यावर प्रेम करणारी माणसे मानवतावादी असतात. साहित्यिकांमध्ये बंधुतेचा विचार घडवण्याची ताकद असते. जगाच्या नकाशावर बंधुतेचे स्थान अढळ करण्यासाठी बंधुतेची जाण असणारे साहित्यिक निर्माण व्हावेत. बंधुतेचा विचारातून मानवतेचे दर्शन कायम घडत आहे.”  
प्रकाश रोकडे म्हणाले, “समाजामध्ये वावरत असताना माणूस होणे गरजेचे आहे. कोणत्याही जातीचे लेबल न लावता बहुभाषीय, बहुधर्मीय होत आम्ही सारे भारतीय आहोत, हा विचार आपल्या मनात रुजला पाहिजे. ‘गर्व से कहो हम बंधू है’ हे ब्रीदवाक्य घेऊन काम सुरु आहे. समाजातील स्वातंत्र्य, समता, बंधुता, सामाजिक न्यायाची भूमिका जपण्याचे कार्य व्हावे.”
प्रा. चंद्रकांत वानखेडे म्हणाले, “समाजाला एकसंध ठेवण्यासाठी बंधुतेचा धागा महत्वाचा आहे. जाती-धर्मातील, प्रांतातील भेदाभेद बाजूला ठेवून मानवतेच्या आणि बंधुतेच्या विचारांनी एकत्र आलो, तर जगात शांतता नांदेल. बंधुतेच्या मार्गावरील आपण सर्व पांथस्थानी हा विचार पुढे घेऊन जायला हवा.”
दुपारच्या सत्रात बंधुता प्रबोधन यात्री काव्यसंमेलन झाले. नितीन वायाळ (गुजरात), मधुश्री ओव्हाळ, गुलाब राजा फुलमाळी, प्राचार्य डॉ. संजय गायकवाड यांच्यासह महाराष्ट्रातील नामवंत कवी सहभागी झाले. यावेळी प्रा. संतोष काळे (पलूस) यांना बंधुता प्रकाशपर्व साहित्य पुरस्कार, डॉ. सुशील सातपुते यांना बंधुता प्रकाशयात्री साहित्य पुरस्कार आणि गोपाळ कांबळे (पुणे) यांना बंधुता प्रकाशगाथा पुरस्काराने सन्मानित करण्यात आले.

डॉ. अशोककुमार पगारिया, प्रदीप कदम यांनी मनोगते व्यक्त केली. हरिश्चंद्र गडसिंग यांनी स्वागत-प्रास्ताविक केले. शंकर आथरे यांनी सूत्रसंचालन केले. बंडोपंत कांबळे यांनी आभार मानले.

राज्यातील 10 वीचा 93.83 टक्के; मुलींची बाजी ;पुण्याचा निकाल ९५.६४ टक्के

यंदाच्या निकालात कोकण विभागाचा निकाल सर्वाधिक ९८.११ टक्के

पुणे-

 महाराष्ट्र राज्य माध्यमिक आणि उच्च माध्यमिक शिक्षण मंडळाच्या वतीने इयत्ता दहावीची परीक्षा २ मार्च २०२३ ते २५ मार्च २०२३ या कालावधीत घेण्यात आली होती. राज्यभरातून १५ लाख ७७ हजार २५६ विद्यार्थी बसले होते. त्यात ८ लाख ४४ हजार ११६ मुले आणि ७ हजार ३३ हजार ०६७ मुलींचा समावेश होता. ९३.८३ टक्के इतका निकाल लागला असून दहावीच्या परीक्षेत मुलींनीच बाजी मारली आहे. मुलींची उत्तीर्ण होण्याची टक्केवारी ९५.८७ टक्के तर मुलांच्या उत्तीर्णतेची टक्केवारी ९२.०५ टक्के इतकी आहे.

विभागीय निकाल

मुंबई: 93.66 टक्के

पुणे: 95.64 टक्के

नाशिक: 92.22 टक्के

छत्रपती संभाजीनगर : 93.23 टक्के

कोकण: 98.11 टक्के

लातूर: 92.67 टक्के

नागपूर: 92.05 टक्के

कोल्हापूर: 96.73 टक्के

अमरावती: 93.22 टक्के

राज्यभरातून एकूण प्रविष्ट विद्यार्थी – 15 लाख, 29 हजार, 96

मुलांचा निकाल 92.05 टक्के

मुलींचा निकाल. 95.87 टक्के

दिव्यांगांचा निकाल. 92.49 टक्के

यामध्ये राज्यभरात १०० टक्के मार्क मिळवलेल्या विद्यार्थ्याची संख्या १५१ इतकी असून त्यामध्ये पुण्यातील ५ विद्यार्थ्यांचा समावेश आहे. टिळक रोड येथील डीईएस इंग्लिश मीडियम स्कूलचा १०० टक्के निकाल लागला आहे. त्या स्कूलमधील स्वराली राजपूरकर या विद्यार्थिनीला १०० टक्के मिळाले आहेत. त्या पार्श्वभूमीवर स्वराली राजपूरकर हिच्याशी संवाद साधला असता ती म्हणाली की, मी वर्षभर दररोज दोन ते तीन तास अभ्यास करीत राहिले. त्यामुळे मला ९५ ते ९८ च्या दरम्यान मार्क मिळतील अशी अपेक्षा होती. पण आज ऑनलाईन रिजल्ट पाहिला. त्यावेळी १०० टक्के मार्क मिळाल्याचे पाहून विश्वास बसत नव्हता.

नोंदणी केलेले नियमित विद्यार्थी – १५ लाख ४१ हजार ६६६
परीक्षा दिलेले नियमित विद्यार्थी – १५ लाख २९ हजार ९६
उत्तीर्ण झालेले नियमित विद्यार्थी – १४ लाख ३४ हजार ८९८

निकालाची टक्केवारी – ९३.८३

पुनर्परीक्षार्थी नोंदणी – ३७ हजार ७०४

परीक्षा दिलेले पुनर्परीक्षार्थी – ३६ हजार ६४८

उत्तीर्ण झालेले पुनर्परीक्षार्थी – २२ हजार ३२०

पुनर्परीक्षार्थींच्या उत्तीर्णतेची टक्केवारी – ६०.९०

खासगी विद्यार्थी नोंदणी – २१ हजार २१६

परीक्षा दिलेले खासगी विद्यार्थी – २० हजार ५७४

उत्तीर्ण झालेले खासगी विद्यार्थी – १५ हजार २७७

खासगी विद्यार्थ्यांच्या उत्तीर्णतेची टक्केवारी – ७४.२५

नियमित आणि पुनर्परीक्षार्थी एकत्रित निकालाची टक्केवारी – ९३.०६

महाराष्ट्र राज्य माध्यमिक व उच्च माध्यमिक शिक्षण मंडळाच्या दहावीच्या परीक्षांचे निकाल आज जाहीर झाले आहेत. राज्यात एकूण 93.83 टक्के विद्यार्थी उत्तीर्ण झाले आहे.

उत्तीर्ण विद्यार्थ्यांची संख्या

दहावीच्या परीक्षेत नऊ विभागीय मंडळांमधून एकूण 15 लाख 41 हजार 666 नियमित विद्यार्थ्यांनी नोंदणी केली होती. त्यापैकी 15 लाख 29 हजार 096 विद्यार्थी प्रविष्ट झाले असून 14 लाख 34 हजार 898 विद्यार्थी उत्तीर्ण झाले आहेत. निकालाची ही टक्केवारी 93.83 अशी आहे, तर पुनर्परीक्षार्थी विद्यार्थ्यांची उत्तीर्ण होण्याची टक्केवारी 60.90 अशी असल्याची माहिती महाराष्ट्र राज्य माध्यमिक व उच्च माध्यमिक शिक्षण मंडळामार्फत देण्यात आली आहे.

दिव्यांग विद्यार्थ्यांचे उत्तीर्णतेचे प्रमाण उल्लेखनीय

नऊ विभागीय मंडळांमधून एकूण 8,397 दिव्यांग विद्यार्थ्यांनी नोंदणी केली होती. त्यापैकी 8,312 विद्यार्थी परीक्षेस प्रविष्ठ झाले. त्यातील 7,688 विद्यार्थी उत्तीर्ण झाले असून त्यांच्या निकालाची टक्केवारी 92.49 अशी उल्लेखनीय आहे. या विद्यार्थ्यांचेही मंत्री श्री. केसरकर यांनी अभिनंदन केले आहे.

मुलींची आघाडी

सर्व विभागीय मंडळातून नियमित उत्तीर्ण मुलींची टक्केवारी 95.87 इतकी असून मुलांची टक्केवारी 92.05 इतकी आहे. मुलींच्या निकालाची टक्केवारी मुलांपेक्षा 3.82 टक्क्यांनी जास्त आहे.

दहावीच्या एकूण 25 विषयांचा निकाल 100 टक्के लागला आहे, तर 23 हजार 013 शाळांपैकी 6,844 शाळांचा निकाल 100 टक्के लागला आहे. नियमित विद्यार्थ्यांपैकी 4 लाख 89 हजार 455 विद्यार्थी प्राविण्यासह प्रथम श्रेणीत, तर 5 लाख 26 हजार 210 विद्यार्थी प्रथम श्रेणीत उत्तीर्ण झाले आहेत. या सर्व विद्यार्थ्यांचे शिक्षण मंत्र्यांनी कौतुक केले आहे.

विभागीय मंडळनिहाय उत्तीर्ण विद्यार्थी

राज्यातील सर्व विभागीय मंडळातून नियमित विद्यार्थ्यांचा कोकण विभागाचा निकाल सर्वाधिक म्हणजेच 98.11 टक्के इतका असून नागपूर विभागाचा निकाल सर्वात कमी म्हणजे 92.05 टक्के इतका आहे. या व्यतिरिक्त पुणे विभागात 95.64, औरंगाबाद विभागात 93.23, मुंबई विभागात 93.66, कोल्हापूर विभागात 96.73, अमरावती विभागात 93.22, नाशिक विभागात 92.22 आणि लातूर विभागात 92.67 टक्के विद्यार्थी उत्तीर्ण झाले असल्याची माहिती मंडळामार्फत देण्यात आली आहे.

चाकणमध्ये होर्डिंग्जमुळे ४६ हजार ग्राहकांची वीज खंडित

पुणे, दि. ०२ जून २०२३: चाकण येथील महापारेषणच्या ४०० केव्ही अतिउच्चदाब उपकेंद्रातील ५० एमव्हीए क्षमतेचा पॉवर ट्रान्सफॉर्मर नादुरुस्त झाल्याने सुमारे १० ते १५ मेगावॅट विजेची तूट निर्माण झाली आहे. त्यासाठी महावितरणकडून भारव्यवस्थापनाचे आटोकाट प्रयत्न सुरु आहे. मात्र विजेची मागणी अधिक असल्याने गरज भासल्यास चाकण एमआयडीसीमधील काही वीजवाहिन्यांवर तात्पुरते भारनियमन करावे लागण्याची शक्यता आहे.

याबाबत माहिती अशी की, महापारेषणच्या चाकण येथील ४०० केव्ही अतिउच्चदाब उपकेंद्रामध्ये प्रत्येकी ५० एमव्हीए क्षमतेचे तीन पॉवर ट्रान्सफॉर्मर आहेत. त्यातून चाकण एमआयडीसीला ११० मेगावॅट विजेचा पुरवठा केला जातो. तीनपैकी एक पॉवर ट्रान्सफॉर्मरमध्ये गुरुवारी (दि. १) मध्यरात्रीनंतर बिघाड झाला. त्याची तपासणी केला असता तो पूर्णतः नादुरुस्त झाल्याचे आढळून आले. त्यानंतर महापारेषणकडून नवीन पॉवर ट्रान्सफॉर्मर बसविण्याचे काम सुरू झाले आहे. मात्र या कामासाठी मंगळवार (दि. ६)पर्यंत कालावधी लागण्याची शक्यता आहे.

दरम्यान महापारेषणच्या या उपकेंद्रातील उर्वरित दोन पॉवर ट्रान्सफॉर्मरवर नादुरुस्त ट्रान्सफॉर्मरचा वीजभार टाकण्यात आला आहे. सध्या विजेची मागणी वाढली आहे व उर्वरित १० ते १५ मेगावॅट विजेचे भारनियमन टाळण्यासाठी महावितरणचे आटोकाट प्रयत्न सुरु आहे. मात्र गरज भासल्यास नानेकरवाडी, कुरुळी, एमआयडीसी, सारा सिटी, फोर्स मोटर्स, चिंबळी, आळंदी फाटा व खालुंब्रे या २२ केव्ही वीजवाहिन्यांवर दिवसा चक्राकार पद्धतीने भारनियमन करावे लागणार आहे. या सर्व वीजवाहिन्यांवर उच्चदाबाचे ७४ आणि लघुदाब वर्गवारीतील घरगुती, वाणिज्यिक व औद्योगिकचे ३८५० असे एकूण ३९२४ ग्राहक आहेत. विजेच्या भारनियमनाची गरज भासल्यास संबंधित वीजग्राहकांनी सहकार्य करावे असे आवाहन महावितरणकडून करण्यात आले आहे.

चाकणमध्ये होर्डिंग्जमुळे ४६ हजार ग्राहकांची वीज खंडित – चाकण शहर व परिसरात गुरुवारी (दि. १) सायंकाळी वादळासह मुसळधार पूर्वमोसमी पाऊस झाला. या वादळात विविध ठिकाणी लावलेल्या मोठमोठ्या होर्डिंग्जचे फ्लेक्स महावितरणच्या अनेक वीजवाहिन्यांवर पडल्याने चाकण शहर व एमआयडीसी परिसरातील सुमारे ४६ हजार ग्राहकांचा वीजपुरवठा खंडित झाल्याचे दिसून आले आहे. विशेष म्हणजे यातील ९० टक्के ग्राहकांचा वीजपुरवठा केवळ होर्डिंग्जच्या फ्लेक्समुळे तर उर्वरित १० टक्के वीजपुरवठा मोठी झाडे व फांद्या यंत्रणेवर पडल्यामुळे खंडित झाल्याचे निदर्शनास आले. सायंकाळनंतर महावितरणकडून वीज यंत्रणेवरील फ्लेक्स काढणे व वीजतारांची दुरुस्ती करण्याचे काम अविश्रांत सुरू होते. शुक्रवारी (दि. २) पहाटे तीन वाजेपर्यंत टप्प्याटप्प्याने सर्वच ग्राहकांचा वीजपुरवठा सुरळीत करण्यात आला. मात्र वादळामुळे उडालेले फ्लेक्स वीजवाहिन्यांच्या तारांवर पडल्याने चाकणमधील घरगुती, वाणिज्यिक व औद्योगिक वीजग्राहकांना खंडित वीजपुरवठ्याचा फटका बसला.