‘पर्वती संवाद’ कार्यक्रमादरम्यान मांडले विचार

पुणे-तरुणांच्या हाताला काम नसल्यामुळे म्हणजेच रोजगाराच्या संधी कमी झाल्यामुळे देखील अनेकजण व्यसनांचा आहारी जात आहेत, त्यात सरकारचा वाचक राहिलेला नाहीआनी त्यामुळे अंमली पदार्थांचा एवढा मोठा व्यापार होण्याचा कारभार घडला असल्याचे मत माजी सांडी अधिकारी महेश झगडे यांनी येथे व्यक्त केले .शाहू महाविद्यालयात हा ‘पर्वती संवाद’ कार्यक्रम पार पडला. यावेळी ते बोलत होते .विद्यार्थ्यांनीही त्यांना असंख्य प्रश्न विचारले, त्यामुळे संवादाची रंगत आणखी वाढली.

सध्या शहरात अंमली पदार्थांच्या वाढत्या सेवनाबद्दल चिंता व्यक्त केली जात असतानाच, अनेक ठिकाणी अंमली पदार्थ सेवनाच्या धोक्यांबाबत जागरूकताही केली जात आहे. अंमली पदार्थांपासून तरूणाई लांब कशी राहिल, आणि आपल्या शहराला अंमली पदार्थांच्या विळख्यातून कसं सोडवायचं यावर माजी सनदी अधिकारी महेश झगडे यांनी मार्गदर्शन केले. ‘मागील काही दिवसांपासून घडलेल्या घटनांमुळे आपली तरूणाई व्यसनांच्या आहारी गेली आहे, फक्त असं दिसत असलं तरी, दुसरीकडे मात्र प्रशासनातील अधिकारी वर्ग हा पैशांच्या आहारी गेल्याची स्थिती आहे व त्यामुळेच ड्रग्स आणि व्यसनांची संख्या समाजात वाढल्याचे चित्र आहे’ असं महत्त्वाचं वक्तव्य महेश झगडे यांनी ‘पर्वती संवाद’ या चर्चेत केले.

शहरात मागच्या काही दिवसांत मोठ्या प्रमाणात अंमली पदार्थ पकडल्याच्या घटना समोर आल्या. पण या अंमली पदार्थांचं मूळ नक्की कुठे आहे, हे शोधण्यात पोलिस प्रशासन कमी पडतंय, तसेच आपली प्रशासन यंत्रणा भुसभुशीत झाल्याचे मत महेश झगडे यांनी विद्यार्थ्यांसमोर व्यक्त केले. स्थायी समितीच्या माजी अध्यक्षा अश्विनी कदम या नेहमीच लोकोपयोगी विषय घेऊन संवाद चर्चा घडवतात, संवादाच्या विषयाप्रमाणे त्या क्षेत्रातील जाणकार आणि तज्ज्ञ पाहुण्यांना बोलवून संवाद साधण्यात येतो. ‘पर्वती संवाद’च्या या कार्यक्रमाला माजी आयुक्त महेश झगडे यांना आमंत्रित करण्यात आले होते. यावेळी त्यांनी अंमली पदार्थांच्या विळख्यात अडकत चाललेली तरूणाई, तसेच या गोष्टींवर योग्य ती कारवाई करण्यास असमर्थ ठरणारे पोलिस प्रशासन यावर भाष्य केले.

तरुणांच्या हाताला काम नसल्यामुळे म्हणजेच रोजगाराच्या संधी कमी झाल्यामुळे देखील अनेकजण व्यसनांचा आहारी जात आहेत. याव्यतिरिक्त जे व्यसनांच्या आहारी गेले आहेत त्यांना रूग्ण समजणे फार गरजेचे आहे. तर या सगळ्यात जे लोक ड्रग्स पुरवत आहेत, अशांवर कारवाई करण्याची सर्वात जास्त गरज आहे. मग जे कोणी अधिकारी असूदेत अन्यथा आणि कोणी त्यांना जबाबदार धरणे गरजेचे आहे. त्यानंतर समाजाने सरकारवर या गोष्टीचे गांभीर्य लक्षात घेऊन दबाव बनवणे अतिशय महत्वाचे आहे. शिवाय अशा गोष्टी घडूच नये म्हणून ज्या यंत्रणा होत्या त्या अपयशी ठरल्या आहेत. त्यामुळे सरकारने संबंधितांवर कारवाई करणे आवश्यक आहे, असे मत महेश झगडे यांनी व्यक्त केले.तसेच प्रशासनातील संबंधित अधिकाऱ्यांना ड्रग्सची कुठे निर्मिती होते हे सगळं माहित असत, तरीसुद्धा अशा गोष्टींकडे दुर्लक्ष करण्यात येत. त्यामुळे सरकारचा वचकच राहिला नसल्याचे मत यावेळी त्यांनी व्यक्त केले.

अंमली पदार्थांच्या जनजागृती संबंधित घेण्यात आलेल्या या कार्यक्रमाला माजी नगरसेविका अश्विनी कदम, सामाजिक कार्यकर्ते नितीन कदम, अखिल भारतीय मराठा शिक्षण परिषदेच्या सरचिटणीस प्रमिला गायकवाड, तसेच श्री शाहू मंदिर महाविद्यालयाचे प्राचार्य विलास पाटील, प्राध्यापक किशोर नवले आणि राणी शितोळे या उपस्थित होते. यावेळेस प्राध्यापक दीपक जाधव यांनी सर्वांचे स्वागत केले.

कोंढव्यातील कत्तलखान्याचे खासगीकरण रद्द करण्यासाठी पुणे महापालिकेसमोर विविध संस्था, संघटनांचे आंदोलन

पुणे : “पाणी टंचाईची समस्या, पर्यावरणाचा ऱ्हास आणि गोवंशाची हत्या व अहिंसेला मारक ठरणारे कत्तलखाने बंद करा, अशी आग्रही मागणी शाकाहार कार्यकर्ते व सर्वजीव मंगल प्रतिष्ठानचे संस्थापक अध्यक्ष डॉ. कल्याण गंगवाल यांनी सोमवारी केली.
कोंढवा येथील कत्तलखान्याचे खासगीकरण रद्द करण्याच्या मागणीसाठी विविध हिंदू, अहिंसा व प्राणीप्रेमी संस्था, संघटनांच्या वतीने पुणे महानगरपालिकेसमोर आंदोलन करण्यात आले. डॉ. कल्याण गंगवाल यांच्यासह जैन साधू परमपूज्य विरागसागरजी महाराज, प्रीतीसुधाजी महाराज, सकल हिंदू समाज संस्थेचे मिलिंद एकबोटे, माजी नगरसेवक प्रवीण चोरबेले, सकल जैन संघाचे डॉ. अशोक कुमार पगारिया, समस्त महाजनचे महाराष्ट्र समन्वयक रमेश ओसवाल, हिंदू रक्षक उज्ज्वला गौड यांच्यासह जैन, हिंदू समाजातील शेकडो कार्यकर्ते आंदोलनात सहभागी झाले होते. गोमाता की जय, जय श्रीराम, बंद करा बंद करा कत्तलखाना बंद करा अशा घोषणांनी परिसर दणाणून गेला होता.
डॉ. कल्याण गंगवाल म्हणाले, “कत्तलखान्यामुळे मोठ्या प्रमाणात प्रदूषण होते. परिसरात दुर्गंधी व रोगराई पसरते. रोगी प्राण्यांना कापल्याने खाणाऱ्यांची प्रकृती बिघडते. तेथील रक्त, मांस व चामड्यामुळे वातावरण दूषित होते. तसेच असे कत्तलखाने खासगी लोकांच्या हातात गेले, तर त्यातून मिळणाऱ्या पैशांचा गैरवापर होऊन दहशतवादी लोकांना बळ मिळेल. ही परिस्थिती धोकादायक आहे. परदेशांत कत्तलखान्यांवर बंदी घातली जात असताना, आपल्याकडे हिंदुबहुल भागात असे कत्तलखाने सुरु होणे ही दुर्दैवाची व संतापाची गोष्ट आहे. गोहत्या व गोवंशाची हत्या करून दूध व अन्य पदार्थांची टंचाई निर्माण करण्यासह भारतीय संस्कृती व परंपरेचे हनन करत आहोत. हे वेळीच थांबायला हवे.”
मिलिंद एकबोटे म्हणाले, “पालिकेच्या वतीने कत्तलखान्यांच्या खासगीकरणाचा निर्णय घातक आहे. मात्र, पैशाच्या हव्यासापायी अशा स्वरूपाचे निर्णय घेतले जात आहे. पालिका आयुक्त विक्रम कुमार यांच्या मनात काही काळेबेरे आहे. कारण कत्तलखाना चालवणाऱ्यांकडून मोठ्या प्रमाणात पैशांची देवाणघेवाण होत असल्याचा आम्हाला संशय आहे. हिंदू संस्कृती, गोमाता व गोवंश रक्षणासाठी कत्तलखाना व त्याचे खासगीकरण आम्ही कधीही होऊ देणार नाही.”
विराग सागरजी महाराज म्हणाले, “आपला देश कृषिप्रधान, दुधाची नदी वाहणारा होता. मात्र, आज येथे रक्ताचे पाट वाहताहेत. मुक्या प्राण्यांची निर्घृण हत्या केली जात आहे. अहिंसावादी आपल्या देशात प्राण्यांची होणारी हिंसा दुर्दैवी आहे. हे रोखण्यासाठी आणि संपूर्ण देश अहिंसेच्या मार्गावर चालावा, यासाठी प्रयत्न करत असताना आपण जिथे राहतो आहोत, त्या पुणे शहरात कत्तलखान्यांना प्रोत्साहन देण्याचे महापालिकेचे धोरण संतापजनक आहे. हा डाव आपणहाणून पडला पाहिजे.”
इतर अनेक हिंदू रक्षक व गोरक्षक संस्थांच्या प्रतिनिधीनी आपल्या भावना व्यक्त करत पुणे महानगर पालिकेने कत्तलखान्याच्या खासगीकरणाचा निर्णय तातडीने रद्द करण्याची मागणी केली. तसेच हा प्रस्ताव मागे घेऊन कत्तलखान्याचे खासगीकरण रद्द केले नाही, तर भविष्यात तीव्र स्वरूपाचे आंदोलन करण्याचा इशारा यावेळी आंदोलकांनी दिला.

थकबाकीमुळे वीजपुरवठा खंडित केल्यास पुनर्जोडणीसाठी शुल्क भरणे आवश्यक

पुणे, दि. ११ मार्च २०२४: थकीत वीजबिलांचा भरणा न केल्यामुळे महावितरणकडून थकबाकीदारांचा वीजपुरवठा खंडित करण्याची मोहीम तीव्र करण्यात आली आहे. वीजपुरवठा खंडित करण्यात आल्यानंतर थकबाकीची रक्कम व नियमानुसार पुनर्जोडणी शुल्क अधिक जीएसटी घेतल्याशिवाय वीजपुरवठा सुरू करण्यात येणार नसल्याचे महावितरणकडून स्पष्ट करण्यात आले आहे. गेल्या महिन्याभरात पश्चिम महाराष्ट्रामध्ये तब्बल ४४ हजार ९७२ थकबाकीदारांचा वीजपुरवठा खंडित करण्यात आला आहे.

दैनंदिन आयुष्यात वीज ही अत्यंत आवश्यक झालेली आहे. मात्र वीज वापरल्यानंतर बिलांचा नियमित भरणा होत नसल्याने पश्चिम महाराष्ट्रातील प्रामुख्याने घरगुती, वाणिज्यिक व औद्योगिक १४ लाख १६ हजार ३०० ग्राहकांकडे २५४ कोटी २० लाख रुपयांची थकबाकी आहे. यामध्ये (कंसात ग्राहक) पुणे जिल्हा- १६५ कोटी १४ लाख रुपये (७,३०,८५०), सातारा- १५ कोटी ३४ लाख (१,४२,९००), सोलापूर- ३१ कोटी ९४ लाख (१,९६,९१५), कोल्हापूर- २३ कोटी ९२ लाख (१,८२,५२०) आणि सांगली जिल्ह्यात १७ कोटी ८५ लाख रुपयांची (१,६३,०५०) थकबाकी आहे.

थकबाकीमुळे वीजपुरवठा खंडित केल्यानंतर वीजपुरवठा पुन्हा जोडून घेण्यासाठी थकबाकीच्या रकमेसोबतच नियमानुसार ग्राहकांनी पुनर्जोडणी शुल्क अधिक जीएसटी भरणे आवश्यक आहे. यासाठी मा. महाराष्ट्र विद्युत नियामक आयोगाने पुनर्जोडणी शुल्क निश्चित केले आहे. यामध्ये लघुदाब वर्गवारीतील सिंगल फेजसाठी २१० रूपये व थ्री फेजसाठी ४२० रुपये तसेच उपरी व भूमिगत वीजवाहिन्यांद्वारे दिलेल्या वीजजोडण्यांच्या पुनर्जोडणीसाठी सिंगल फेजसाठी प्रत्येकी ३१० रुपये व थ्री फेजसाठी प्रत्येकी ५२० रुपये शुल्क आहे. तर उच्चदाब वर्गवारीसाठी ३१५० रुपये शुल्क लागू आहे. या शुल्कांवर १८ टक्के जीएसटी कर लागू आहेत. थकबाकीमुळे वीजपुरवठा खंडित केल्यानंतर थकीत रक्कम आणि नियमानुसार पुनर्जोडणी शुल्क अधिक जीएसटीचा भरणा केल्यानंतरच वीजपुरवठा पूर्ववत करावा असे निर्देश पुणे प्रादेशिक संचालक श्री. अंकुश नाळे यांनी दिले आहेत.

दरम्यान थकबाकीमुळे गेल्या महिन्याभरात पश्चिम महाराष्ट्रातील घरगुती, वाणिज्यिक व औद्योगिक ४३ हजार ६१५ आणि इतर अकृषक १३५७ अशा एकूण ४४ हजार ९७२ थकबाकीदारांचा वीजपुरवठा खंडित करण्यात आला आहे. यामध्ये पुणे जिल्हा- २९ हजार ४४०, सातारा- ३,२५८, सोलापूर- ६,१५४, कोल्हापूर- ३,०६२ आणि सांगली जिल्ह्यातील ३,०५८ थकबाकीदारांचा समावेश आहे.

आर्थिक अडचणीत असलेल्या महावितरणकडून थकीत रक्कम किती आहे हे न पाहता नियमानुसार वीजपुरवठा खंडित करण्याची धडक कारवाई सुरु आहे. ही कटू कारवाई तसेच नियमानुसार पुनर्जोडणी शुल्काचा भरणा, वीज नसल्याने गैरसोय होणे आदी टाळण्यासाठी थकीत वीजबिलाची रक्कम ताबडतोब भरावी. यासाठी वीजग्राहकांना केव्हाही व कुठूनही ऑनलाइनद्वारे थकीत व चालू वीजबिल भरण्याची सोय www.mahadiscom.in या वेबसाईटवर तसेच महावितरणच्या मोबाईल अॅपद्वारे उपलब्ध आहे. सोबतच ५ हजार रुपयांपेक्षा अधिक बिल असणाऱ्या सर्व लघुदाब ग्राहकांना आरटीजीएस किंवा एनईएफटीद्वारे वीजबिल भरण्याची सुविधा देखील उपलब्ध आहे. 

पुणे: कसबा पेठेतील छोटा शेख सल्लाह दर्गा परिसरात असलेल्या मस्जिदच्या अनधिकृत बांधकामाबाबत पुणे महानगरपालिका करणार असलेल्या कारवाईबाबत चुकीची माहिती देवुन (अफवा पसरवून) मुस्लिम समाजाकडून अपराध घडवा या हेतूने चिथावणी देवून दोन समाजामध्ये शत्रुत्व व तेढ निर्माण होईल अशी कृती करून गैरकायदेशीर जमाव जमविल्याप्रकरणी 21 जणांसह इतरांविरुद्ध फरासखाना पोलीस ठाण्यात  गुन्हा दाखल केला आहे.

याबाबत पोलीस हवालदार प्रमोद लालासाहेब जगताप (वय-44) यांनी फरासखाना पोलीस ठाण्यात फिर्याद दिली आहे. यावरून शाकीर शेख, मुदस्सर शेख, ताजुद्दीन शेख, इब्राहीम अतार (रा. कसबा पेठ), मुनाफ पटेल (रा. कोंढा), मोईद्दीन सय्यद (रा. पर्वती दर्शन), अस्लम पटेल (रा. कोंढवा), दाऊद शेख (रा. कसबा पेठ), रहिमुद्दीन शेख, जाकीर शेख (रा. मंगळवार पेठ), अन्वर शेख (रा. कसबा पेठ), सलीम मौला पटेल (रा. भिमपुरा कॅम्प), नदीम मुजावर, मतीन अब्दुलरहीम सय्यद (रा. कोंढवा), राहील अब्दुल रहीम सय्यद (रा. कोंढवा), तौफिक रहिमुद्दीन शेख (रा. कसबा पेठ), अहमद सय्यद (रा. भवानी पेठ), रमीज रज्जाक शेख (रा. शिवाजीनगर, जुना तोफखाना), साजीद खान पठाण (रा. लोणार आळी, रविवार पेठ), जाहिद शेख (रा. कोंढवा) यांच्यासह इतरांवर आयपीसी 143, 145, 149, 117, 153/अ, 341 सह महाराष्ट्र पोलीस कायद्यांतर्गत गुन्हा दाखल केला आहे.

छोटा शेख सल्लाह दर्गा परिसरातील असलेल्या मस्जिदच्या अनधिकृत बांधकामाबाबत पुणे महानगरपालिका करणार असलेल्या कारवाईबाबत चुकीची अफवा शुक्रवारी रात्री पसरवण्यात आली. यानंतर चार ते पाच हजार मुस्लिम बांधव परिसरात जमले. समाजमाध्यमातून अफवा पसरल्यानंतर तणाव निर्माण झाला. त्यामुळे या परिसरात पोलिसांचा मोठा बंदोबस्त तैनात करण्यात आला. समाजमाध्यमातून अफवा पसरवणाऱ्यांविरुद्ध गुन्हा दाखल करण्यात आला आहे. पुढील तपास पोलीस निरीक्षक गुन्हे अजित जाधव करीत आहेत.घटनेची माहिती मिळताच पोलीस आयुक्त अमितेश कुमार, सह पोलीस आयुक्त प्रविण पवार,
अपर पोलीस आयुक्त प्रविणकुमार पाटील, पोलीस उपायुक्त स्मार्तना पाटील, पोलीस उपायुक्त संदीप सिंह गिल्ल,
विशेष शाखेचे पोलीस उपायुक्त हिम्मत जाधव, सहायक पोलीस आयुक्त फरासखाना विभाग रुक्मिणी गलांडे,
फरासखाना पोलीस ठाण्याचे वरिष्ठ पोलीस निरीक्षक प्रशांत भस्मे, पोलीस निरीक्षक (गुन्हे) अजित जाधव,
सहायक पोलीस निरीक्षक वैभव गायकवाड, सहायक पोलीस निरीक्षक प्रतिक्षा शेंडगे यांनी घटनास्थळाला भेट दिली होती.

अर्थसंकल्पात आरोग्यासाठी भरीव तरतूद-अजित पवार

पुणे, दि. १०: नागरिकांच्या आरोग्याकरीता आरोग्य विषयक पायाभूत सुविधा निर्माण करण्यावर भर देण्यात येत असून राज्याच्या अर्थसंकल्पात आरोग्य क्षेत्रासाठी भरीव तरतूद करण्यात आलेली आहे, असे प्रतिपादन उपमुख्यमंत्री तथा जिल्ह्याचे पालकमंत्री अजित पवार यांनी केले.

आंबेगाव (बु) येथे चिंतामणी ज्ञानपीठ आणि अप्पा रेणुसे मित्र परिवाराच्यावतीने आयोजित ‘आरोग्यसाथी-जपू या ऐश्वर्य आरोग्याचे’ या पुस्तकाच्या प्रकाशन सोहळ्यात ते बोलत होते. यावेळी विजय रेणुसे, माजी उपमहापौर दिपक मानकर, दत्ता धनकवडे, रमेश कोंडे देशमुख आदी उपस्थित होते.

श्री. पवार म्हणाले, सर्वसामान्य नागरिकांना आरोग्यविषयक सोई-सुविधा उपलब्ध करून देण्याचा प्रयत्न करण्यात येत आहे. आरोग्य यंत्रणा सक्षम व प्रभावी करण्यावर वैद्यकीय शिक्षण विभाग आणि सार्वजनिक आरोग्य विभाग भर देत आहे. नागपूरप्रमाणे पुण्यातील औंध येथे एम्स रुग्णालय स्थापन करण्याचा निर्णय, महात्मा फुले जन आरोग्य योजनेअंतर्गत ५ लाखापर्यंत मोफत उपचार, अंगीकृत रुग्णालयाच्या संख्येत १ हजाराहून १ हजार ९०० पर्यंत वाढ, प्रत्येक जिल्ह्यात शासकीय महाविद्यालयाची स्थापना, शववाहिका, आरोग्यवर्धिनी केंद्र, मोफत व पुरेशा आरोग्य सुविधा देण्याच्याअनुषंगाने विविध निर्णय घेण्यात आले आहेत, असे त्यांनी सांगितले.

चुकीच्या जीवनशैलीमुळे नागरिकांना आरोग्याच्या विविध समस्येला सामोरे जावे लागत आहे. नागरिकांनी आहार, विहार, आचार, विचार आणि उच्चार चांगला ठेवला पाहिजे. दररोज व्यायाम करायला हवा, निरोगी आयुष्य जगले पाहिजे. पुणे हे विद्यचे माहेरघर आहे. ते सुरक्षित राहावे, येथे निरोगी आणि सुसंस्कृत समाज निर्माण व्हावा यासाठी आवश्यक सुविधा देण्याचा प्रयत्न करण्यात येत आहे. सामाजिक स्वास्थ्यासाठी, जनतेच्या निरामयी आरोग्यासाठी सर्वांनी मिळून काम करणे गरजेचे आहे. त्यादृष्टीने सामूहिक आणि एकत्रित प्रयत्नांतून अवघा महाराष्ट्र आरोग्यसंपन्न व्हावा, सगळ्यांना निरामय आरोग्य लाभावे, अशी सदिच्छा श्री.पवार यांनी व्यक्त केली.

सदृढ, सशक्त, निरोगी समाज निमिर्ती आजच्या काळाची गरज असल्याचे नमूद करून श्री.पवार म्हणाले. ‘आरोग्यसाथी-जपू या ऐश्वर्य आरोग्याचे’ पुस्तकातून समाजहित साधण्याचा प्रयत्न करण्यात आला आहे. कोरोनाच्या पार्श्वभूमीवर ‘आरोग्यसाथी’ पुस्तक उपयुक्त आहे.

राज्यातील आरोग्य क्षेत्रच्या माहितीचा आणि आरोग्य विषयक मार्गदर्शनाचा या पुस्तकात समावेश करण्यात आला आहे. नागरिकांसाठी हे पुस्तक माहिती व मार्गदर्शन देणारा एक विश्वासू साथी ठरणार आहे. यातील ज्ञानाचा समाजातील सर्व घटकांना उपयोग होईल, आरोग्य क्षेत्रातील जाणकारांनी लिहिलेल्या लेखांमुळे आरोग्याविषयी सजगता निर्माण होण्यास मदत होईल. संदर्भ व संग्राह्यमूल्य असणाऱ्या पुस्तकामुळे नागरिकांना निश्चित लाभ होईल, असा विश्वास त्यांनी व्यक्त केला.

आंबेगाव परिसरातील विकासाला गती देण्यात येईल अशी ग्वाही देऊन ते म्हणाले, आगामी काळात या परिसरात विकास आराखड्यातील रस्ते करण्यात येतील. महानगरपालिकत नव्याने समावेश झालेल्या गावांचा कराचा प्रश्न मार्गी लावण्याचा प्रयत्न करण्यात येत आहे. जांभुळवाडीचा तलाव महानगरपालिकेच्या ताब्यात देण्याचा निर्णय घेतला आहे. आंबेगाव परिसरातील कचरा प्रश्न मार्गी लावण्यासाठी प्रयत्न करण्यात येईल, असेही श्री. पवार म्हणाले.

श्री. रेणुसे म्हणाले, आजच्या स्पर्धात्मक युगात आपली जीवनशैली बदललेली असून त्याचे दुष्परिणाम समाजात दिसून येत आहे. सर्व सामान्य नागरिकांना आरोग्याबद्दलची जाणीव होण्याबरोबरच त्यांना आरोग्य विषयक मार्गदर्शन होण्यासाठी ‘आरोग्यसाथी-जपू या ऐश्वर्य आरोग्याचे’ पुस्तक उपयोगी पडणार आहे. केंद्र व राज्य शासन, पुणे महानगरपालिकेच्या योजना, ट्रस्टच्या माध्यमातून होणारी मदत, विविध आरोग्य विषयक सोई-सुविधेबाबत माहिती या पुस्तकात देण्यात आली आहे, अशी माहिती त्यांनी दिली.

विद्यार्थ्यांना गृहपाठ देण्याऐवजी सर्वांगिण प्रगतीची संधी द्या-राज्यपाल

पुणे दि.१०:.शिक्षकांनी विद्यार्थ्यांना गृहपाठ देण्याऐवजी शाळेतच अभ्यास करून घ्यावा आणि क्षेत्र भेट, ऐतिहासिक स्थळ, गडकिल्ले, नदी, वारसा स्थळ तसेच उद्यानांना भेटीचे उपमक्रम राबवून त्यांच्या सर्वांगिण प्रगतीस हातभार लावावा, असे आवाहन राज्यपाल रमेश बैस यांनी केले.

वेध प्रोफेशनल लर्निंग कम्युनिटीद्वारा लोणावळा येथे अयोजित शिक्षक संमेलनाच्या कार्यक्रमात ते बोलत होते. कार्यक्रमाला मिशन मनरेगाचे व्यवस्थापक नंद कुमार, शालेय शिक्षण विभागाचे प्रधान सचिव रणजीत सिंह देओल, वेधचे समन्वयक निलेश घुगे आदी उपस्थित होते.

राज्यपाल श्री.बैस म्हणाले, जगातील अनेक राष्ट्रात विद्यार्थ्यांना गृहपाठ दिला जात नाही, आपणही हे धोरण स्विकारण्याची गरज आहे. समूहामध्ये विद्यार्थ्याच्या विचारशक्तीचा विस्तार होतो, त्यांच्यात एकत्रितपणे पुढे जाण्याची भावना निर्माण होते. खेळात सहभाग वाढल्याने विजय आणि पराभव सहजतेने पचविण्याची क्षमता निर्माण होते. मुलांना मोबाईल आणि इलेक्ट्रॉनिक उपकरणांपासून दूर ठेवण्यासाठीदेखील प्रयत्न करावे लागतील, त्यांच्यात नव्या गोष्टींविषयी उत्सुकता निर्माण व्हावी म्हणून त्यांना प्रश्न विचारण्यासाठी प्रोत्साहित करावे लागेल.

देशाच्या विकासात शिक्षणाचे महत्वाचे योगदान असल्याने शिक्षकांनी आपल्या राष्ट्रीय शैक्षणिक धोरणाचा बारकाईने अभ्यास करण्याची गरज आहे. वेध परिवाराने विकसित केलेल्या प्रशिक्षण पद्धतीत शिक्षक विद्यार्थ्यांना स्वयं अध्ययनासाठी प्रोत्साहित करतात. देशाच्या आत्मनिर्भरतेसाठी विद्यार्थी सक्षम होणे गरजेचे असून २१ व्या शतकात आवश्यक कौशल्य त्यांने संपादन करावे म्हणून वर्गाच्या आत आणि बाहेरच्या शैक्षणिक प्रक्रीयेत बदल घडवून आणावे लागतील. शिक्षणात तंत्रज्ञानाच्या समावेशाने विद्यार्थ्यांचे ज्ञान अद्ययावत करून त्यांच्यात आत्मविश्वास निर्माण करावा, असे आवाहन राज्यपाल श्री.बैस यांनी केले.

शिक्षकांनी केवळ शासनातर्फे आयोजित प्रशिक्षणावर अवलंबून न राहता प्रोफेशनल कम्युनिटी लर्निंगद्वारे एकमेकांशी जोडले जावे. याद्वारे आपल्या अडचणी दूर करण्यासोबत शैक्षणिक प्रक्रीयेबाबत अद्ययावत रहाणे शक्य होईल, असे श्री.बैस म्हणाले.

आर्टीफिशल इंटेलिजन्सचा उपयोग वैयक्तिक अध्ययनासाठी करता येणे शक्य आहे. एआयद्वारे विद्यार्थ्याला शिक्षण घेण्याची त्याच्यासाठी असलेली योग्य पद्धती जाणून घेणे शक्य होते, तर दुसरीकडे विद्यार्थ्यांमध्ये कोणते कौशल्य आहेत याची माहिती शिक्षकांना मिळू शकते, असेही त्यांनी सांगितले.

श्री.देओल म्हणाले, शाळेत विद्यार्थ्यांची गुणवत्ता सुधारण्यासाठी शिक्षकांची महत्वाची भूमिका असते. शिक्षकांनी विद्यार्थांना शिक्षण देण्याबरोबरच त्यांना प्रोत्साहित करावे. सर्वेक्षणातून असे दिसून आले आहे की पट संख्या कमी असलेल्या शाळेत मुले अधिक असलेल्या शाळेपेक्षा विद्यार्थ्यांची प्रगती कमी आहे. म्हणजेच मुले समूहात राहून अधिक चांगल्याप्रकारे शिकतात. विद्यार्थ्यांनी स्वतः शिक्षण घ्यावे यासाठी शिक्षकांनी प्रयत्न करावेत, असेही त्यांनी सांगितले.

श्री. नंदकुमार यांनी सादरीकरणाद्वारे विद्यार्थ्यांच्या अडी अडचणी सोडविण्यासाठी, गुणवत्ता सुधारण्यासाठी वेध परिवार करीत असलेल्या कामाची माहिती दिली.

प्रास्ताविकात श्री. निलेश घुगे यांनी वेध परिवाराच्या कार्याची माहिती दिली.

यावेळी श्रीमती रोहिणी पिंपळखेडकर यांच्या ‘वेध कृती संकलन’ व ‘स्पोकन इंग्लिश वेध कृती’ या पुस्तिकेचे व श्रीमती केवरा सेन यांच्या ‘बेसिक जपानी भाषा’ या पुस्तकाचे प्रकाशन राज्यपाल श्री. बैस यांच्या हस्ते करण्यात आले. तसेच व्यावसायिक शिक्षण समुदायाच्या सदस्यांना प्रमाणपत्र प्रदान करण्यात आले.

पुण्यातील पायाभूत सुविधांच्या विकासाला शासनाचे प्राधान्य-अजित पवार

पुणे दि.१०-पुण्याच्या सर्वांगीण विकासाला चालना देण्यासाठी शहरातील पायाभूत सुविधांच्या विकासाला शासन प्राधान्य देत आहे. मेट्रो, रेल्वे, विमानसेवा आणि रस्ते विकासाच्या माध्यमातून शहरातील वाहतूक कोंडी दूर करण्याचा प्रयत्न करण्यात येत असून पुणे शहराच्या सर्वांगीण विकासासाठी शासन कटिबद्ध आहे, असे प्रतिपादन राज्याचे उपमुख्यमंत्री अजित पवार यांनी केले.

वडगाव शेरी विधानसभा मतदारसंघातील विविध विकासकामांच्या भूमिपूजन प्रसंगी ते बोलत होते. कार्यक्रमाला आमदार सुनिल टिंगरे, पुणे महानगरपालिका आयुक्त विक्रम कुमार, अतिरिक्त आयुक्त कुणाल खेमनार विकास ढाकणे, रविंद्र बिनवडे आदी उपस्थित होते.

उपमुख्यमंत्री श्री.पवार म्हणाले, पुण्यात वाहनांची संख्या अधिक असल्याने रस्ते विकासावर भर देण्यात येत आहे. पुणे विमानतळाची धावपट्टी वाढविण्याच्या प्रयत्नासोबत रिंगरोडचे कामही लवकरच सुरू करण्यात येणार आहे. रिंगरोडमुळे राज्याच्या कुठल्याही भागातून येणारी वाहने पुण्यात प्रवेश न करता इतर जिल्ह्यात जावू शकतील आणि यामुळे वाहतूक कोंडी कमी होण्यास मदत होईल. सावित्रीबाई फुले पुणे विद्यापीठ परिसरातली वाहतूक कोंडी दूर करण्यासाठी उड्डाणपूल उभारण्यात येत आहे. मेट्रो प्रकल्प पूर्ण झाल्यावर रस्ते वाहतूकीवरील ताण कमी होणार आहे.

पुणे महानगरपालिकेच्यावतीने करण्यात येणाऱ्या विकासकामांमुळे वडगाव शेरी परिसराचा वेगाने विकास होत आहे. समाजातील प्रत्येक घटकाच्या मनात आपल्या आकांक्षा पुर्ण होत असल्याची भावना निर्माण व्हायला हवी असा शासनाचा प्रयत्न आहे. विश्रांतीवाडी चौकात उड्डाणपूल आणि ग्रेड सेपरेटरसह १७२ कोटी रुपयांच्या कामांचे भूमिपूजन करण्यात आले आहे. उड्डाणपूलामुळे परिसरातील वाहतूक कोंडी दूर होण्यास मदत होणार आहे.

पुणे आणि पिंपरी चिंचवड शहरातील एक कोटी नागरिकांना पुरेसा पाणी पुरवठा करण्यासाठी विविध उपाययोजना करण्यात येत आहे. सांडपाणी व्यवस्थापन आणि नदी सुधार कार्यक्रम हाती घेण्यात आला आहे. शहरातील पायाभूत सुविधांना गती देण्यासाठी मंत्रालय स्तरावर नियमित आढावा घेण्यात येत आहे. या बैठकांच्या माध्यमातून विकासकामात येणाऱ्या अडचणी सोडविण्याचे प्रयत्न करण्यात येतात, अशी माहिती श्री. पवार यांनी दिली.

सांस्कृतिक शहर म्हणून पुण्याची ओळख आहे. अनेक महापुरुषांच्या पदस्पर्शाने पावन झालेली ही भूमी असल्याने शहराचा लौकीक कायम रहावा यासाठी गुन्हेगारांविरुद्ध कठोर कारवाई करण्यात येईल. शहरातील कायदा आणि सुव्यवस्था राखण्यासाठी आवश्यक तेथे कठोर कारवाई करण्याचे निर्देश पोलीस आयुक्तांना दिले असल्याचेही उपमुख्यमंत्री श्री.पवार यांनी सांगितले.

आमदार श्री.टिंगरे म्हणाले, वडगावशेरी विधानसभा मतदार संघात विविध विकासकामे करण्यात आली आहेत. गोरगरिबांना हक्काची घरे देण्यासोबत अण्णा भाऊ साठे स्मारकासाठी जमीन संपादित करण्यात आली आहे. विश्रांतवाडी परिसराला भेडसावणारा वाहतुकीचा प्रश्न नव्याने उभारण्यात येणाऱ्या उड्डाणपुलामुळे सुटेल, असा विश्वास त्यांनी व्यक्त केला

यावेळी उपमुख्यमंत्री श्री.पवार यांच्या हस्ते एकूण १७२ कोटी ३० लाख रुपयांच्या कामांचे भूमिपूजन करण्यात आले.

0000