सेंट मेरी चर्चवर हल्ला

आग्रा-
हरियाणा, पश्चिम बंगाल, जबलपूरमध्ये चर्चवर झालेल्या हल्ल्याच्या घटना ताज्या असतानाच, आज आग्रा येथील चर्चला काही समाजकंटकांनी लक्ष्य केलं आहे. आग्र्याच्या कँटॉन्मेंट परिसरातील सेंट मेरी चर्चवर पहाटे झालेल्या हल्ल्यात मदर मेरीचा पुतळा फोडण्यात आला असून येशूच्या गळ्यात साखळी अडकवली आहे. या प्रकारानं ख्रिश्चनांच्या भावना दुखावल्यात.
सेंट मेरी चर्चच्या पार्किंगमधून पहाटे साडेतीनच्या सुमारास अलार्मचा आवाज आल्यानं एकच खळबळ उडाली. सगळ्यांनीच पार्किंगमध्ये धाव घेतली, तेव्हा तिथे काही गाड्यांच्या काचा फोडण्यात आल्या होत्या. त्यानंतर, चर्चमध्ये जाऊन पाहणी केली असता, मदर मेरीच्या पुतळ्यासह चार पुतळे फोडल्याचं फादर मून यांच्या निदर्शनास आलं. त्यांनी हा प्रकार कळवताच पोलीस घटनास्थळी दाखल झाले. ख्रिस्ती धर्मियांच्या भावना दुखावण्यासाठी लहान येशूचे डोके मदर मेरीच्या हातात ठेवण्यात आल्याची माहिती फादर मून यांनी दिली. येशूच्या गळ्यात कुत्र्याची साखळी अडवण्यात आल्याचंही त्यांनी सांगितलं. या हल्ल्याच्या निषेधार्थ मोर्चा काढणार असल्याचं चर्चच्या व्यवस्थापनानं जाहीर केलं आहे.–गेल्या महिन्यात पश्चिम बंगालमधील एका कॉन्व्हेंट शाळेत ७१ वर्षीय ननवर बलात्कार करून चर्चवर हल्ला केल्याचं धक्कादायक प्रकरण उघडकीस आलं होतं. दोन बांगलादेशी नागरिकांनी हा प्रकार केला होता. त्यानंतर, २० मार्चला मध्य प्रदेशात जबलपूरमध्ये काही हिंदुत्ववादी कार्यकर्त्यांनी चर्चमधील धार्मिक कार्यक्रम उधळण्याचा प्रयत्न केला होता. या घटनांमुळे समाजात तणावाचं वातावरण असतानाच, आज आग्र्यात सेंट मेरी चर्चवर अज्ञात व्यक्तींनी हल्ला केला आहे. त्याची तक्रार रकाबगंज पोलीस स्टेशनात दाखल करण्यात आली आहे. २४ तासांत हल्लेखोरांना अटक करा, अशी मागणी संतप्त ख्रिस्ती नेत्यांनी केली आहे.