१७ सप्टेंबर ते १७ ऑक्टोबरदरम्यान ‘सेवा सेतू कॅम्प’; ऑनलाइन अर्जासोबत बँक कर्जासाठीही एकाच ठिकाणी सुविधा
मुंबई : केंद्र सरकारच्या नवीन आणि नवीकरणीय ऊर्जा मंत्रालयाच्या पुढाकारातून राज्यात १७ सप्टेंबर ते १७ ऑक्टोबर २०२६ या कालावधीत ‘सेवा सेतू कॅम्प’ आयोजित करण्यात येणार आहेत. या मोहिमेअंतर्गत ‘पीएम सूर्य घर मोफत वीज योजना’ आणि ‘स्वयंपूर्ण महाराष्ट्र आवासीय रूफटॉप सोलर (स्मार्ट)’ योजनेची माहिती ग्राहकांपर्यंत पोहोचवण्यासाठी महावितरण तालुका पातळीवर विशेष ‘किओस्क’ उभारणार आहे.
महावितरणचे अध्यक्ष व व्यवस्थापकीय संचालक लोकेश चंद्र यांनी राज्यातील सर्व तालुका पातळीवर हे किओस्क उभारण्याचे निर्देश दिले आहेत. या केंद्रांमध्ये घराच्या छतावर सौर ऊर्जा प्रकल्प उभारण्यासाठी आवश्यक प्रक्रिया, अर्ज आणि उपलब्ध योजनांबाबत ग्राहकांना प्रत्यक्ष मार्गदर्शन दिले जाणार आहे.
किओस्कमध्ये महावितरणचे कर्मचारी ग्राहकांना रूफटॉप सोलरसाठी ऑनलाइन अर्ज कसा करायचा, याचे प्रात्यक्षिक दाखवणार आहेत. तसेच विविध बँकांचे प्रतिनिधीही उपस्थित राहणार असल्याने सौर प्रकल्पासाठी आवश्यक बँक कर्जाचा अर्जही त्याच ठिकाणी करता येणार आहे.
‘पीएम सूर्य घर : मोफत वीज योजना’ अंतर्गत निवासी ग्राहकांसाठी रूफटॉप सोलर प्रकल्पांना केंद्र सरकारकडून आर्थिक सहाय्याची तरतूद असून अर्ज आणि अनुदान प्रक्रियेसाठी राष्ट्रीय रूफटॉप सोलर पोर्टलची व्यवस्था उपलब्ध आहे.
महावितरणच्या या विशेष मोहिमेमुळे नागरिकांना योजनेची माहिती, ऑनलाइन अर्ज प्रक्रिया आणि वित्तपुरवठ्यासाठी मार्गदर्शन एकाच ठिकाणी मिळणार आहे. त्यामुळे रूफटॉप सोलर बसवू इच्छिणाऱ्या ग्राहकांसाठी प्रक्रिया अधिक सोपी होण्याची अपेक्षा आहे.
महावितरण प्रशासनाने नागरिकांना १७ सप्टेंबर ते १७ ऑक्टोबरदरम्यान आयोजित होणाऱ्या ‘सेवा सेतू कॅम्प’ आणि तालुकास्तरीय किओस्कचा जास्तीत जास्त लाभ घेण्याचे आवाहन केले आहे.
