सत्य निकेतन परिसरातील दुर्घटना; तिघांना वाचवले, अरुंद गल्लीमुळे बचावकार्यात अडथळे
नवी दिल्ली : राजधानी दिल्लीतील सत्य निकेतन परिसरात शनिवारी दुपारी दोन इमारती कोसळल्याची गंभीर घटना घडली. कोसळलेल्या इमारतींपैकी एका इमारतीत विद्यार्थ्यांसाठी पीजी निवास व्यवस्था होती. अपघाताच्या वेळी काही विद्यार्थी त्यांच्या खोल्यांमध्ये असल्याची माहिती प्रत्यक्षदर्शींनी दिली आहे. आतापर्यंत तिघांना सुरक्षित बाहेर काढण्यात आले असून, ढिगाऱ्याखाली आणखी किती जण अडकले आहेत याबाबत अद्याप निश्चित माहिती समोर आलेली नाही.
ही घटना दुपारी सुमारे दीड वाजण्याच्या सुमारास घडली. दुर्घटनेनंतर अग्निशमन दल, बचाव पथके आणि स्थानिक नागरिकांनी तातडीने मदतकार्य सुरू केले. परिसरातील अरुंद रस्त्यांमुळे मोठी यंत्रसामग्री घटनास्थळी पोहोचवण्यात अडचणी येत असून, काही ठिकाणी स्थानिक नागरिक हाताने आणि हातोड्यांच्या मदतीने ढिगारा हटवताना दिसत आहेत.
सुरक्षेच्या कारणास्तव शेजारील काही इमारती रिकाम्या करण्यात आल्या आहेत. दुर्घटनेत काही वाहनेही ढिगाऱ्याखाली गाडली गेल्याची माहिती आहे.
‘हॉस्टेल डेज’ पीजीची इमारत कोसळली
प्रत्यक्षदर्शींनी दिलेल्या माहितीनुसार, कोसळलेल्या इमारतींपैकी एका पीजीचे नाव ‘हॉस्टेल डेज’ आहे. येथे प्रामुख्याने विद्यार्थी राहत होते. या पीजीला लागून असलेली दुसरी इमारतही कोसळल्याचे सांगण्यात आले.
पीजीमध्ये नेमके किती विद्यार्थी राहत होते आणि दुर्घटनेच्या वेळी किती जण खोल्यांमध्ये उपस्थित होते, हे संबंधित नोंदी तपासल्यानंतरच स्पष्ट होणार आहे.
दरम्यान, इमारतीच्या मजल्यांच्या संख्येबाबत वेगवेगळी माहिती समोर येत आहे. काही वृत्तांत ती सहा मजली असल्याचे, तर प्रत्यक्षदर्शींनी पाच मजली असल्याचे म्हटले आहे. त्यामुळे अधिकृत यंत्रणेकडून अंतिम माहितीची प्रतीक्षा आहे.
अनेक विद्यार्थी अडकल्याची भीती
स्थानिक भाजप आमदार अनिल शर्मा यांनी घटनास्थळी भेट देत दुर्घटनेबद्दल चिंता व्यक्त केली. बाहेरगावाहून शिक्षणासाठी दिल्लीमध्ये आलेले अनेक विद्यार्थी या परिसरातील पीजीमध्ये राहत असल्याने ढिगाऱ्याखाली विद्यार्थी अडकले असण्याची शक्यता त्यांनी व्यक्त केली.
“आत नेमके पाच, दहा की वीस जण आहेत हे आता सांगता येणार नाही. मात्र विद्यार्थी आत अडकले असण्याची शक्यता आहे,” असे त्यांनी सांगितले.
बचाव पथकांकडून ढिगारा हटवण्याचे काम युद्धपातळीवर सुरू असून, अडकलेल्या नागरिकांना सुरक्षित बाहेर काढण्यासाठी प्रयत्न सुरू आहेत.
अरुंद गल्लीमुळे बचावकार्य कठीण
घटनास्थळाकडे जाणारा रस्ता अरुंद असल्याने अग्निशमन दल आणि इतर बचाव यंत्रणांना अडचणींचा सामना करावा लागत आहे. स्थानिक नागरिकही बचाव पथकांच्या मदतीला धावून आले असून, ढिगाऱ्यातून विटा आणि इतर अवशेष बाजूला करण्याचे काम सुरू आहे.
दुर्घटनेचे नेमके कारण अद्याप स्पष्ट झालेले नसून, इमारतींची संरचनात्मक स्थिती, बांधकामाची परवानगी आणि परिसरातील इतर बाबींची चौकशी केली जाण्याची शक्यता आहे.
