बंगळुरू : पोलीस ठाण्यात केवळ CCTV कॅमेरे बसविणे पुरेसे नसून, वीजपुरवठा खंडित झाल्यानंतरही CCTV यंत्रणा अखंडपणे कार्यरत राहून रेकॉर्डिंग सुरू राहणे आवश्यक आहे, असे महत्त्वपूर्ण निरीक्षण कर्नाटक उच्च न्यायालयाने नोंदविले आहे.
V. Shailaja v. The Commissioner & Ors. या प्रकरणात W.P. No. 3931/2026 या याचिकेच्या सुनावणीदरम्यान न्यायालयाने पोलीस ठाण्यांमधील CCTV व्यवस्थेच्या कार्यक्षमतेबाबत गंभीर भूमिका घेतली.
व्हाईटफिल्ड पोलीस ठाण्यातील CCTV व्यवस्था मुख्य वीजपुरवठा सुरू असतानाच कार्यरत असल्याचे न्यायालयाच्या निदर्शनास आले. वीज गेल्यानंतर CCTV सुरू ठेवण्यासाठी UPSची व्यवस्था असली, तरी UPS दीर्घकाळ कार्यरत नसल्याचे समोर आले. याबाबत न्यायालयाने चिंता व्यक्त केली.
CCTV यंत्रणेत बिघाड झाल्याची माहिती मिळाल्यानंतर संबंधित पोलीस अधिकारी तसेच वरिष्ठ अधिकाऱ्यांनी निष्क्रिय राहणे अपेक्षित नसल्याचे न्यायालयाने स्पष्ट केले. CCTV यंत्रणा अखंड सुरू राहण्यासाठी आवश्यक ती दुरुस्ती अथवा पर्यायी व्यवस्था तातडीने करणे आवश्यक असल्याचे न्यायालयाने नमूद केले.
न्यायालयाने राज्यातील पोलीस ठाण्यांमधील CCTV कॅमेरे, रेकॉर्डिंग यंत्रणा, UPSची क्षमता, वीजपुरवठा खंडित झाल्यानंतर मिळणारा प्रत्यक्ष बॅकअप आणि संबंधित तांत्रिक व्यवस्थेची सविस्तर तपासणी करण्याचे निर्देश दिले आहेत.
CCTV व्यवस्था ही केवळ कॅमेरे लावण्यापुरती मर्यादित नसून, ती सातत्याने कार्यरत राहणे आणि आवश्यक ते रेकॉर्डिंग सुरक्षितपणे उपलब्ध राहणे हा तिच्या स्थापनेमागील मुख्य उद्देश आहे. पोलीस ठाण्यातील पारदर्शकता, नागरिकांच्या हक्कांचे संरक्षण आणि संभाव्य घटनांतील पुरावे जतन करण्याच्या दृष्टीने ही व्यवस्था अत्यंत महत्त्वाची असल्याचे या प्रकरणातून अधोरेखित झाले आहे.
या प्रकरणामुळे महाराष्ट्रातील पोलीस ठाण्यांमधील CCTV व्यवस्था, UPS वीज बॅकअप आणि रेकॉर्डिंगची प्रत्यक्ष कार्यक्षमता यांचीही तपासणी करण्याची आवश्यकता निर्माण झाली आहे.
