गर्दीचा फायदा घेत रोकड आणि सोन्याची साखळी लंपास; मांजरीत महिलेचे १.२० लाखांचे मंगळसूत्र हिसकावले
पुणे : श्रीमंत दगडूशेठ हलवाई गणपती मंदिर परिसरातील गर्दीचा फायदा घेत चोरट्यांनी दर्शनासाठी आलेल्या एका ज्येष्ठ महिलेच्या पिशवीतून रोकड आणि सोन्याची साखळी असा ८३ हजार रुपयांचा ऐवज चोरून नेला. याप्रकरणी विश्रामबाग पोलीस ठाण्यात अज्ञात चोरट्यांविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, मध्य प्रदेशातील इंदूर येथील ६३ वर्षीय महिला दगडूशेठ गणपती मंदिरात दर्शनासाठी आल्या होत्या. मंदिर परिसरात मोठी गर्दी असताना चोरट्यांनी त्याचा फायदा घेत त्यांच्या पिशवीतून तीन हजार रुपयांची रोकड आणि सोन्याची साखळी, असा एकूण ८३ हजार रुपयांचा ऐवज लंपास केला.
घटना लक्षात आल्यानंतर महिलेने विश्रामबाग पोलीस ठाण्यात फिर्याद दिली. पोलिसांनी अज्ञात चोरट्यांविरुद्ध गुन्हा दाखल केला असून मंदिर परिसरातील सीसीटीव्ही फुटेजची तपासणी करून चोरट्यांचा माग काढण्याचे प्रयत्न सुरू आहेत. पोलीस हवालदार एस. गोंजारी पुढील तपास करत आहेत.
दरम्यान, शहराच्या मध्यवर्ती भागातील लक्ष्मी रस्ता, तुळशीबाग आणि रविवार पेठ परिसरात गर्दीचा फायदा घेत महिलांच्या पिशव्यांमधून दागिने आणि रोकड चोरीला जाण्याच्या घटना अलीकडे समोर आल्या आहेत.
मांजरीत महिलेचे १.२० लाखांचे मंगळसूत्र हिसकावले
दुसऱ्या घटनेत, हडपसरमधील मांजरी परिसरात पायी जाणाऱ्या ५२ वर्षीय महिलेच्या गळ्यातील १ लाख २० हजार रुपये किमतीचे सोन्याचे मंगळसूत्र दुचाकीवरून आलेल्या चोरट्यांनी हिसकावून नेले.
ही घटना २७ ऑगस्ट रोजी दुपारी दोनच्या सुमारास मांजरीतील झेड कॉर्नर परिसरात घडली. महिला पायी जात असताना दुचाकीवरून आलेल्या चोरट्यांनी त्यांच्या गळ्यातील मंगळसूत्र हिसकावले आणि तेथून पसार झाले.
याप्रकरणी मांजरी पोलीस ठाण्यात गुन्हा दाखल करण्यात आला असून पोलीस कर्मचारी प्रदीप सोनवणे पुढील तपास करत आहेत.
