बनावट वैद्यकीय पत्रे, नियुक्ती आदेश अन् ओळखपत्रेही दिली
पुणे : पुणे महापालिकेत नोकरी लावून देण्याचे आमिष दाखवून बेरोजगार तरुणांची फसवणूक केल्याचा आणखी एक प्रकार समोर आला आहे. शिपाई, पोलीस शिपाई आणि पर्यवेक्षक पदांवर नोकरी मिळवून देण्याचे सांगत पाच नोकरी इच्छुकांकडून टप्प्याटप्प्याने तब्बल ६७ लाख रुपये घेतल्याच्या आरोपावरून सिंहगड रोड पोलीस ठाण्यात पाच जणांविरुद्ध गुन्हा दाखल करण्यात आला आहे. आरोपींमध्ये पुणे महापालिकेच्या शाळेतील एका निवृत्त मुख्याध्यापकाचाही समावेश आहे.
संजय अनंता भालेराव (रा. कर्वेनगर, पुणे; निवृत्त मुख्याध्यापक, पीएमसी शाळा), शिवानंद बाळासाहेब पाटील (रा. कर्वेनगर), अमित दरवटकर, आनंद लोंढणवार आणि अमित सुहास देशपांडे अशी गुन्हा दाखल करण्यात आलेल्यांची नावे आहेत. खडकवासला परिसरातील २३ वर्षीय तरुणाने सिंहगड रोड पोलीस ठाण्यात तक्रार दिली आहे.
पोलिसांच्या माहितीनुसार, हा कथित प्रकार २०२४ ते जून २०२६ या कालावधीत घडला. वडगाव येथील आनंद देवराम डाफळ यांच्या घरी आर्थिक व्यवहार झाल्याचे तक्रारीत नमूद करण्यात आले आहे.
तक्रारदार नांदोषी, खडकवासला परिसरातील रहिवासी आहे. सुमारे दोन वर्षांपूर्वी त्याची संजय भालेराव यांच्याशी ओळख झाली. भालेराव यांनी पुणे महापालिकेत नोकरी लावून देण्याचे आश्वासन दिल्याचा आरोप तक्रारीत करण्यात आला आहे. त्यानंतर भालेराव आणि अन्य आरोपींनी तक्रारदारासह आणखी चार जणांना विविध पदांवर नोकरी मिळवून देण्याचे आमिष दाखवले. त्यासाठी पाचही जणांकडून वेळोवेळी एकूण ६७ लाख रुपये घेतल्याचा आरोप आहे.
बनावट कागदपत्रांमुळे बसला नोकरी लागल्याचा विश्वास
हा प्रकार केवळ नोकरीचे आश्वासन आणि पैसे घेण्यापुरता मर्यादित राहिला नाही. नोकरीची प्रक्रिया खरी असल्याचा विश्वास बसावा यासाठी उमेदवारांना पुणे महापालिकेचे शिक्के आणि अधिकाऱ्यांच्या बनावट स्वाक्षऱ्या असलेली वैद्यकीय तपासणीची पत्रे देण्यात आल्याचा आरोप आहे.
ही पत्रे खरी असल्याचे समजून तक्रारदार आणि अन्य उमेदवारांनी वैद्यकीय तपासणीही करून घेतली. त्यानंतर त्यांना वैद्यकीय प्रमाणपत्रे मिळाली.
पुढे महापालिकेचे शिक्के आणि अधिकाऱ्यांच्या बनावट स्वाक्षऱ्या असलेले कथित नियुक्ती आदेश आणि ओळखपत्रे उमेदवारांना देण्यात आली. त्यामुळे आपली पुणे महापालिकेत खरोखरच नोकरी लागली असल्याचा विश्वास त्यांना बसला.
मात्र, नियुक्ती आदेशांची सत्यता पडताळण्यासाठी उमेदवारांनी पुणे महापालिकेशी संपर्क साधल्यानंतर त्यांना धक्का बसला. संबंधित नियुक्ती आदेश बनावट असल्याचे त्यांच्या निदर्शनास आले.
फसवणूक झाल्याचे लक्षात आल्यानंतर उमेदवारांनी दिलेले पैसे परत मागितले. मात्र पैसे परत करण्यास टाळाटाळ करण्यात आल्याचा आरोप तक्रारीत करण्यात आला आहे. अखेर याप्रकरणी सिंहगड रोड पोलीस ठाण्यात पाच जणांविरुद्ध गुन्हा दाखल करण्यात आला असून पोलीस पुढील तपास करीत आहेत.
