राहुल गांधींच्या पुणे दौऱ्यावरील अटींवर सवाल; बीड प्रकरणावरूनही सरकारवर निशाणा
पुणे : राज्यात रस्त्यांची गुणवत्ता, शिक्षण, आश्रमशाळा किंवा अंगणवाड्या—कशाचीही ‘गॅरंटी’ उरलेली नाही, अशी टीका राष्ट्रवादी काँग्रेसच्या (शरद पवार गट) खासदार सुप्रिया सुळे यांनी केली. पुण्यात कोयता गँग, खून आणि विनयभंगाच्या घटना वाढल्याचा आरोप करत, गुन्हेगारीच्या बाबतीत पुणे राज्यात एक नंबरवर गेल्याचेही त्यांनी म्हटले.
काँग्रेस नेते राहुल गांधी विद्यार्थ्यांशी संवाद साधण्यासाठी पुण्यात येत असताना त्यांच्या दौऱ्यावर प्रशासनाने घातलेल्या अटी-शर्तींवरही सुळे यांनी प्रश्न उपस्थित केला. “राहुल गांधी हे युवा नेते आहेत. ते शांततेच्या मार्गाने येणार, विद्यार्थ्यांशी संवाद साधणार, भाषण करणार आणि जाणार; मग एवढ्या अटी आणि शर्ती कशासाठी?” असा सवाल त्यांनी केला.
“पुण्यात कोयता गँग, खून-विनयभंगाच्या घटना वाढल्या”
पुण्यातील कायदा-सुव्यवस्थेच्या स्थितीवरून सरकारवर टीका करताना सुळे म्हणाल्या की, शहरात कोयता गँगची दहशत, खून आणि विनयभंगाच्या घटना वारंवार घडत आहेत. गुन्हेगारीच्या बाबतीत पुणे महाराष्ट्रात एक नंबरवर असल्याचा दावा त्यांनी केला. यासाठी त्यांनी केंद्र सरकारच्या गृह मंत्रालयाच्या आकडेवारीचा संदर्भ दिला.
पृथ्वीराज चव्हाणांच्या वक्तव्यावर सावध प्रतिक्रिया
शरद पवार आणि अजित पवार यांचे पक्ष पुन्हा एकत्र येण्याच्या चर्चेबाबत काँग्रेसचे ज्येष्ठ नेते पृथ्वीराज चव्हाण यांनी केलेल्या वक्तव्यावर प्रतिक्रिया विचारली असता सुळे यांनी संयमित भूमिका घेतली. “ते राज्याचे माजी मुख्यमंत्री आणि ज्येष्ठ नेते आहेत. त्यांना बोलण्याचा पूर्ण अधिकार आहे,” एवढेच त्यांनी म्हटले.
“खोट्या केसेस केल्या तर रस्त्यावर उतरू”
बीडमधील विलास घुले हत्या प्रकरणाच्या पार्श्वभूमीवर खासदार बजरंग सोनवणे यांना लक्ष्य केले जात असल्याच्या मुद्द्यावरही सुळे यांनी भूमिका मांडली. “बजरंग आप्पा सोनवणे यांच्या पाठीशी पक्ष पूर्ण ताकदीने उभा आहे. कोणाकडून चूक झाली असेल तर आम्ही माफी करणार नाही; पण सरकारच्या माध्यमातून जाणीवपूर्वक खोट्या केसेस केल्या गेल्या तर ते खपवून घेतले जाणार नाही,” असा इशारा त्यांनी दिला.
गरज भासल्यास या विरोधात रस्त्यावर उतरून लढा दिला जाईल, असेही सुळे यांनी स्पष्ट केले.
