- पूर्वपरवानगीशिवाय उभारलेली भव्य इमारत जमीनदोस्त करण्यास सुरुवात
- संपूर्ण बांधकाम निष्कासित करण्यासाठी पुढील दोन दिवस कारवाई सुरू राहणार
पुणे : हवेली तालुक्यातील कदमवाकवस्ती येथे पूर्वपरवानगीशिवाय उभारण्यात आलेल्या सुमारे ९,५०० चौरस फुटांच्या भव्य अनधिकृत बांधकामावर पुणे महानगर प्रदेश विकास प्राधिकरणाच्या (पीएमआरडीए) अनधिकृत बांधकाम निर्मूलन विभागाने बुधवारी (दि. १९) धडक कारवाई केली. पहिल्याच दिवशी इमारतीचा बहुतांश भाग पाडण्यात आला असून, हे बांधकाम पूर्णपणे निष्कासित करण्यासाठी पुढील दोन दिवस कारवाई सुरू राहणार आहे.
कदमवाकवस्ती येथील गट क्रमांक ४७७ व ४९२ मध्ये हेमंत हडके यांनी ‘पीएमआरडीए’ची पूर्वपरवानगी न घेता हे बांधकाम केले होते. ‘पीएमआरडीए’च्या पाहणीदरम्यान ही बाब निदर्शनास आली होती. ही कारवाई महानगर आयुक्त डॉ. अभिजित चौधरी यांच्या निर्देशानुसार आणि अतिरिक्त महानगर आयुक्त के. मंजुलक्ष्मी यांच्या मार्गदर्शनाखाली पार पडली. अनधिकृत बांधकाम निर्मूलन विभागाचे सहआयुक्त हिंमत खराडे यांच्या नेतृत्वाखालील या पथकात तहसीलदार रवींद्र रांजणे व तहसीलदार आशा होळकर यांचा समावेश होता.
“नागरिकांनी ‘पीएमआरडीए’च्या मंजुरीशिवाय कोणतेही बांधकाम करू नये. विनापरवाना उभारण्यात येणाऱ्या अशा अनधिकृत बांधकामांवर प्रशासनाकडून यापुढेही कठोर व कायदेशीर कारवाई केली जाईल.”
