गोंदियात ACBची कारवाई; वनपालासह तीन वन कर्मचाऱ्यांविरुद्ध गुन्हा
गोंदिया : घराच्या बांधकामासाठी आणलेल्या रेतीच्या वाहतुकीवर गुन्हा दाखल न करण्यासाठी २० हजार रुपयांची लाच स्वीकारताना वनपालाला लाचलुचपत प्रतिबंधक विभागाने रंगेहाथ पकडले. या प्रकरणात वनपालासह तीन वन कर्मचाऱ्यांविरुद्ध गुन्हा दाखल करण्यात आला आहे.
ACBच्या प्रेस नोटनुसार, तक्रारदाराच्या घराचे बांधकाम सुरू असून मार्च २०२६ मध्ये गावाजवळील नाल्यातून घरासाठी रेती आणली जात होती. त्यावेळी संबंधित वन कर्मचाऱ्यांनी ट्रॅक्टर अडवून रेती उपसा आणि वाहतुकीबाबत कारवाई न करण्यासाठी सुरुवातीला २५ हजार रुपयांची मागणी केल्याचा आरोप आहे.
त्यानंतर चर्चेदरम्यान ही मागणी २० हजार रुपयांवर निश्चित करण्यात आल्याचे ACBच्या पडताळणीत समोर आले. तक्रारदाराने लाच देण्याची इच्छा नसल्याने १० ऑगस्ट रोजी गोंदिया ACBकडे तक्रार केली.
११ ऑगस्ट रोजी केलेल्या पडताळणीत लाचेची मागणी झाल्याचे निष्पन्न झाल्यानंतर सापळा रचण्यात आला. राजुली परिसरातील कार्यालयात वनपाल रमेश सकीरामजी पवार यांनी इतर दोन कर्मचाऱ्यांच्या उपस्थितीत २० हजार रुपये स्वीकारल्याचा आरोप असून, ACBच्या पथकाने त्यांना रंगेहाथ पकडले.
या प्रकरणात वनपाल रमेश सकीरामजी पवार, वनरक्षक निहालोत्पल हिरालाल शिकारे आणि वनरक्षक बिंदू मंगलसिंग परिहार यांच्याविरुद्ध भ्रष्टाचार प्रतिबंधक कायद्यानुसार केशोरी पोलिस ठाण्यात गुन्हा नोंदविण्यात आला आहे.
