तळेगाव शिवारातील बंगल्यावर पोलिसांचा छापा; तेलंगणासह नाशिकमधील पाच संशयित अटकेत
नाशिक : १० लाख रुपयांच्या खऱ्या चलनी नोटांच्या बदल्यात तब्बल ३० लाख रुपयांच्या बनावट नोटा देण्याचे आमिष दाखविणाऱ्या टोळीचा नाशिक ग्रामीण आणि नाशिक शहर पोलिसांनी संयुक्त कारवाईत पर्दाफाश केला आहे. नाशिक-त्र्यंबकेश्वर रोडवरील तळेगाव शिवारातील एका खासगी बंगल्यात छुप्या पद्धतीने सुरू असलेल्या या कथित बनावट नोटांच्या कारखान्यावर पोलिसांनी छापा टाकून लाखो रुपयांच्या संशयित बनावट नोटांसह विविध साहित्य जप्त केले आहे.
या प्रकरणात तेलंगणातील दोघांसह नाशिक परिसरातील एकूण पाच संशयित आरोपींना अटक करण्यात आली आहे. या टोळीचे जाळे नाशिकपुरते मर्यादित नसून त्याचे धागेदोरे तेलंगणापर्यंत पोहोचत असल्याचा प्राथमिक संशय पोलिसांना आहे.
‘१० लाख द्या, ३० लाख घ्या’ असे आमिष
पोलिसांच्या माहितीनुसार, आरोपी मोठ्या परताव्याचे आमिष दाखवत नागरिकांना जाळ्यात ओढत होते. १० लाख रुपयांच्या खऱ्या नोटांच्या बदल्यात ३० लाख रुपयांच्या बनावट नोटा देण्याचा व्यवहार होणार असल्याची माहिती पोलिसांना मिळाल्यानंतर सापळा रचण्यात आला.
व्यवहाराच्या ठिकाणी काही संशयितांना ताब्यात घेतल्यानंतर तपासाचा धागा तळेगाव शिवारातील एका खासगी बंगल्यापर्यंत पोहोचला. पोलिसांनी त्या ठिकाणी छापा टाकल्यानंतर बनावट चलनी नोटा तयार करण्यासाठी वापरले जात असल्याचा संशय असलेले साहित्य, रसायने आणि इतर मुद्देमाल आढळून आला.
जप्त करण्यात आलेल्या नोटा आणि साहित्याची पुढील तांत्रिक व फॉरेन्सिक तपासणी करण्यात येत आहे.
पाच जण पोलिसांच्या ताब्यात
या प्रकरणात पोलिसांनी अमरेश्वर आईथा आणि दासरी सत्यइ (दोघे तेलंगणा), गोकुळ दाते व हिरामण दाते (तळेगाव, नाशिक) तसेच मच्छिंद्र घनदाट (सातपूर, नाशिक) यांना अटक केल्याची माहिती देण्यात आली आहे.
आरोपी एकमेकांच्या संपर्कात कसे आले, हा कथित कारखाना किती काळापासून सुरू होता, त्यासाठी साहित्य व आर्थिक मदत कोण पुरवत होते आणि तयार केलेल्या बनावट नोटांचा पुरवठा कुठे करण्यात आला, याबाबत पोलिस तपास करत आहेत.
तेलंगणापर्यंत धागेदोरे
अटक करण्यात आलेल्या संशयितांमध्ये तेलंगणातील दोघांचा समावेश असल्यामुळे या रॅकेटचा विस्तार अन्य राज्यांपर्यंत असण्याची शक्यता पोलिस तपासत आहेत.
आरोपींनी आतापर्यंत किती व्यक्तींना अशा प्रकारचे आमिष दाखविले, किती बनावट नोटा तयार केल्या आणि त्यापैकी किती नोटा प्रत्यक्ष चलनात आल्या, याचाही शोध घेतला जात आहे.
ही कारवाई नाशिक ग्रामीणचे पोलीस अधीक्षक डॉ. डी. एस. स्वामी यांच्या मार्गदर्शनाखाली करण्यात आली. अटक आरोपींच्या चौकशीतून या रॅकेटशी संबंधित आणखी व्यक्ती किंवा व्यवहार समोर येण्याची शक्यता असून पुढील तपास सुरू आहे.
