महापालिका आयुक्त नवल किशोर राम यांची पाहणी; ग्रेड सेपरेटरचे काम चार महिन्यांत पूर्ण करण्यावर भर
पुणे : नगर रोडवरील शास्त्रीनगर चौक परिसरातील वाढती वाहतूक कोंडी कमी करण्यासाठी प्रस्तावित ग्रेड सेपरेटर आणि उड्डाणपूल प्रकल्पाच्या कामाचा पुणे महापालिका आयुक्त नवल किशोर राम यांनी प्रत्यक्ष आढावा घेतला. प्रकल्पाचे काम वेगाने पूर्ण करून संपूर्ण प्रकल्प मार्च २०२७ अखेर कार्यान्वित करण्याचे निर्देश त्यांनी संबंधित अधिकारी आणि कंत्राटदारांना दिले.
सध्या नगर रोडवरून येणारी वाहतूक गोल्फ चौकमार्गे मुंबईच्या दिशेने तसेच कल्याणीनगर आणि गुंजन चौकाच्या दिशेने जाते. त्यामुळे या सर्व मार्गांचा मोठा वाहतूक भार शास्त्रीनगर चौकावर येत असून परिसरात वारंवार वाहतूक कोंडी निर्माण होत आहे.
ही कोंडी कमी करण्यासाठी आगाखान पॅलेस ते गुंजन चौक या दिशेने सुमारे ७५० मीटर लांबीचा सहा लेनचा ग्रेड सेपरेटर प्रस्तावित आहे. तसेच आगाखान पॅलेस ते गोल्फ चौक या दिशेने सुमारे ७०० मीटर लांबीचा चार लेनचा उड्डाणपूल प्रस्तावित करण्यात आला आहे.
महापालिका आयुक्तांनी सुरू असलेल्या कामाची पाहणी करून ग्रेड सेपरेटरच्या कामाला तातडीने गती देण्याच्या सूचना केल्या. ग्रेड सेपरेटरचे काम पुढील चार महिन्यांत पूर्ण करण्याचे, तर ग्रेड सेपरेटर आणि उड्डाणपूल या संपूर्ण प्रकल्पाचे काम मार्च २०२७ अखेर पूर्ण करण्याचे निर्देश देण्यात आले.
नगर रोडवरील कोंडी कमी होण्याची अपेक्षा
हा प्रकल्प पूर्ण झाल्यानंतर नगर रोड, कल्याणीनगर, गुंजन चौक, गोल्फ चौक तसेच मुंबईच्या दिशेने जाणाऱ्या वाहनचालकांना मोठा दिलासा मिळण्याची अपेक्षा आहे. शास्त्रीनगर चौकातील वाहतुकीचा थेट भार कमी होऊन या परिसरातील वाहतूक अधिक सुरळीत आणि सुरक्षित होण्यास मदत होणार आहे.
प्रकल्पाची अंमलबजावणी करताना वाहतूक पोलीस आणि इतर संबंधित विभागांशी समन्वय साधून वाहतुकीची सुरक्षितता, तांत्रिक बाबी आणि कामाचे नियोजन यांची योग्य पूर्तता करण्याच्या सूचनाही आयुक्तांनी दिल्या.
या पाहणीवेळी अतिरिक्त महापालिका आयुक्त (विशेष) ओमप्रकाश दिवटे, शहर अभियंता अनिरुद्ध पावसकर, महापालिका सदस्य अश्विनी लांडगे, अविनाश साळवे, विशाल मलके, मुख्य अभियंता (प्रकल्प) दिनकर गोजारे, मुख्य अभियंता (पथ) राजेश बनकर, उपायुक्त आशा राऊत, सोमनाथ बनकर, मुख्य अभियंता (पाणीपुरवठा) नंदकिशोर जगताप, उपायुक्त (घनकचरा व्यवस्थापन) संतोष वारुळे यांच्यासह संबंधित अधिकारी व कर्मचारी उपस्थित होते.
