मुंबई,
मुंबई आयकर विभागाने, क्रीडा कोट्याअंतर्गत 97 गुणवंत खेळाडूंचा समावेश केला असून, सार्वजनिक सेवेत क्रीडा क्षेत्रातील उत्कृष्टतेला प्रोत्साहन देण्याची आणि उच्च दर्जाच्या क्रीडा प्रतिभेला वाव देण्याची त्यांची बांधिलकी यामुळे अधिक दृढ झाली आहे. आज आयकर भवन, मुंबई येथे आयोजित कार्यक्रमात आयकर मुंबईचे प्रधान मुख्य आयुक्त आलोक कुमार यांच्या हस्ते नव्याने समाविष्ट झालेल्या खेळाडूंना औपचारिकपणे नियुक्तीपत्रे प्रदान करण्यात आली.
97 रिक्त पदांसाठी 07.01.2026 रोजीच्या अधिसूचनेद्वारे अर्ज मागवण्यात आले होते. या भर्तीसाठी विविध क्रीडा प्रकारांतील खेळाडूंकडून 3,595 अर्ज प्राप्त झाले होते. विहित निकषांनुसार कठोर छाननी आणि मूल्यांकनानंतर गुणवत्तेच्या आधारावर 97 उमेदवारांची निवड करण्यात आली.
या भर्तीचे एक महत्त्वाचे वैशिष्ट्य म्हणजे निवड झालेल्या 80 टक्क्यांहून अधिक खेळाडूंनी आंतरराष्ट्रीय स्तरावर भारताचे प्रतिनिधित्व केले आहे किंवा आंतरराष्ट्रीय स्पर्धांमध्ये सहभाग घेतला आहे. यावरून विभागात दाखल होणाऱ्या खेळाडूंच्या असामान्य गुणवत्तेची प्रचिती येते.
उल्लेखनीय नवनियुक्त खेळाडूंमध्ये मुंबई रणजी क्रिकेट संघाचा अष्टपैलू खेळाडू आणि भारतीय कसोटी संघाचा भाग राहिलेला तनुष कोटियन, अहमदाबाद येथे आयोजित पहिल्या जागतिक योगासन क्रीडा अजिंक्यपद स्पर्धा-2026 मध्ये दोन सुवर्णपदके जिंकणारा अभिषेक, भारतीय महिला क्रिकेट संघातील खेळाडू तेजल हसबनीस, तसेच जागतिक नेमबाजी दिव्यांग क्रीडा विश्वचषक, नवी दिल्ली-2024 मध्ये सांघिक सुवर्णपदक आणि जागतिक नेमबाजी दिव्यांग क्रीडा विश्वचषक, अल ऐन, दुबई-2025 मध्ये सुवर्णपदक जिंकणारा दिव्यांग खेळाडू आकाश यांचा समावेश आहे.
ही भर्ती आयकर विभागात क्रीडा क्षेत्रातील उत्कृष्टतेला चालना देण्यासोबतच नामांकित खेळाडूंना देशसेवेची संधी उपलब्ध करून देण्याच्या दिशेने एक महत्त्वपूर्ण पाऊल ठरली आहे. या प्रसंगी बोलताना, आयकर मुंबईचे प्रधान मुख्य आयुक्त आलोक कुमार यांनी नव्याने समाविष्ट झालेल्या खेळाडूंना त्यांचा क्रीडा सराव आणि स्पर्धा सुरू ठेवण्यासाठी सर्व संधी मिळतील असे आश्वासन दिले. तसेच, नव्याने समाविष्ट झालेले खेळाडू आपल्या क्रीडा कारकिर्दीत ज्या शिस्त, जिद्द आणि उत्कृष्टतेचे प्रदर्शन करत आले आहेत, त्याच गुणांची प्रचिती सार्वजनिक सेवेतही देतील, अशी अपेक्षा आयकर विभाग मुंबईला आहे,” असे त्यांनी सांगितले.
प्रशिक्षण कार्यक्रमाचा भाग म्हणून, नव्याने भर्ती झालेल्या खेळाडूंना त्यांच्या भूमिका, जबाबदाऱ्या आणि लागू होणाऱ्या सरकारी नियमांची माहिती देण्यात आली.
