पुणे-मोरवाडी परिसरातील करिष्मा ग्लोरी सोसायटीमध्ये एकाच कुटुंबातील तिघांचा विषारी पदार्थामुळे मृत्यू झाल्याची हृदयद्रावक घटना समोर आली आहे. आर्थिक विवंचनेतून कुटुंबाने टोकाचे पाऊल उचलल्याचा प्राथमिक अंदाज पोलिसांनी व्यक्त केला आहे.
विनोद पिल्ले (वय ५०), त्यांची पत्नी सिरजा पिल्ले (वय ४५) आणि मुलगी पौर्णिमा पिल्ले (वय १९) अशी मृतांची नावे आहेत. विनोद पिल्ले यांचा घटनास्थळीच मृत्यू झाला होता. गंभीर अवस्थेत आढळलेल्या सिरजा आणि पौर्णिमा यांना तातडीने पिंपरीतील वायसीएम रुग्णालयात दाखल करण्यात आले. मात्र, उपचार सुरू असताना रविवारी माय-लेकीचाही मृत्यू झाला.
पोलिसांच्या प्राथमिक तपासानुसार, पिल्ले कुटुंब आर्थिक अडचणींचा सामना करत होते. त्यांनी सुमारे तीन वर्षांपूर्वी नेहरूनगर परिसरातील स्वतःचे घर विकले होते. त्यानंतर ते मोरवाडीतील करिष्मा ग्लोरी सोसायटीमध्ये भाड्याने राहत होते.
सिरजा पिल्ले या परिसरातील एका इंग्रजी माध्यमाच्या शाळेत समन्वयक म्हणून कार्यरत होत्या. त्या शाळेत न आल्याने सहकाऱ्यांनी नातेवाईकांशी संपर्क साधला. नातेवाईक घरी पोहोचले असता दरवाजा आतून बंद असल्याचे आढळले. घरात प्रवेश केल्यानंतर तिघेही बेशुद्ध अवस्थेत आढळले.
उच्चशिक्षित कुटुंबाच्या निर्णयाने धक्का
पिल्ले कुटुंब उच्चशिक्षित असल्याची माहिती समोर आली आहे. विनोद पिल्ले हे एका खासगी कंपनीत कार्यरत होते. सिरजा या शाळेत नोकरी करत होत्या, तर पौर्णिमा पिंपरी-चिंचवडमधील एका महाविद्यालयात संगणकशास्त्राचे शिक्षण घेत होती. त्यामुळे कुटुंबाने उचललेल्या टोकाच्या पावलाने नातेवाईक, मित्र आणि परिसरातील नागरिकांना मोठा धक्का बसला आहे.
घटनास्थळी चिठ्ठी आढळली
संत तुकारामनगर पोलिसांना घरातून एक चिठ्ठी आढळली आहे. त्यामध्ये आर्थिक विवंचना आणि कर्जाचा उल्लेख करण्यात आला असून, या घटनेसाठी अन्य कोणालाही जबाबदार धरू नये, असे नमूद असल्याची प्राथमिक माहिती आहे.
घटनास्थळावरून काही वस्तू आणि नमुने तपासणीसाठी ताब्यात घेण्यात आले आहेत. शवविच्छेदन अहवाल आणि न्यायवैद्यक तपासणीनंतर मृत्यूचे निश्चित कारण स्पष्ट होणार आहे. संत तुकारामनगर पोलिसांकडून या प्रकरणाचा अधिक तपास सुरू आहे.
