स्वर्णाक्ष ढोल-ताशा ध्वज पथकाचा सराव शुभारंभ उत्साहात; मुरलीधर मोहोळ यांच्या हस्ते कार्यअहवालाचे अनावरण

पुणे : सिंहगड रस्ता परिसरातील स्वर्णाक्ष ढोल-ताशा ध्वज पथकाच्या गणेशोत्सव २०२६ निमित्त आयोजित सराव शुभारंभ आणि वाद्यपूजन सोहळा केंद्रीय नागरी उड्डयन राज्यमंत्री मुरलीधर (आण्णा) मोहोळ यांच्या प्रमुख उपस्थितीत उत्साहपूर्ण वातावरणात पार पडला. यावेळी पथकाच्या २०२५-२६ या वर्षाच्या कार्यअहवालाचेही मोहोळ यांच्या हस्ते अनावरण करण्यात आले.
यावेळी उपस्थित मान्यवरांनी गणेशोत्सव हा केवळ धार्मिक उत्सव नसून पुण्याच्या सांस्कृतिक अस्मितेचा, शिस्तीचा, परंपरेचा आणि सामाजिक ऐक्याचा उत्सव असल्याचे सांगितले. ढोल-ताशा ही पुण्याची सांस्कृतिक ओळख असून, त्यातून युवकांमध्ये शिस्त, समर्पण, संघभावना आणि संस्कृतीप्रती निष्ठा निर्माण होत असल्याचे त्यांनी नमूद केले.
कार्यक्रमास आमदार हेमंतभाऊ रासने, आमदार भीमरावअप्पा तापकीर, महापौर मंजुषा (ताई) नागपुरे, नगरसेवक सचिन मोरे, प्रसन्नदादा जगताप, सुनीलजी पांडे, नातूबाग मंडळाचे अमित कंक, ढोल-ताशा महासंघाचे उपाध्यक्ष शिरीषजी थिटे, मानाच्या पहिल्या कसबा गणपती मंडळाचे निलेश वकील, अभिनेते रमेशजी परदेशी तसेच अमय खाडीलकर यांची प्रमुख उपस्थिती होती.
सोहळ्यात पथकाचे सचिव प्रणव गंजीवाले यांनी उपस्थितांचे स्वागत करून पथकाच्या वर्षभरातील उपक्रमांचा आणि आगामी नियोजनाचा आढावा दिला. त्यानंतर पथकाचे अध्यक्ष मयुरेश कोद्रे यांच्या नेतृत्वाखाली वादकांनी शिस्तबद्ध आणि दमदार ढोल-ताशा वादन सादर करत उपस्थितांची दाद मिळवली.
कार्यक्रमाचे विशेष आकर्षण म्हणजे महापौर मंजुषा (ताई) नागपुरे यांनी स्वतः ढोल वादन करत पथकातील वादकांसोबत ताल धरला. त्यांच्या या सहभागामुळे उपस्थितांमध्ये उत्साहाचे वातावरण निर्माण झाले.
यावेळी पथकाच्या २०२५-२६ वर्षातील सामाजिक, सांस्कृतिक आणि संघटनात्मक कार्याचा आढावा देणाऱ्या कार्यअहवालाचे प्रकाशन करण्यात आले. आगामी गणेशोत्सवासाठी स्वर्णाक्ष ढोल-ताशा ध्वज पथक पूर्ण तयारीत असून, शिस्त, संस्कार, परंपरा आणि उत्कृष्ट वादनाच्या बळावर यंदाही पुणेकरांसमोर दिमाखदार सादरीकरण करण्याचा निर्धार पथकाने व्यक्त केला.