ऋत्विक फाऊंडेशन फॉर परफॉर्मिंग आर्टस्‌‍ आयोजित कार्यक्रमात कलाकारांचे बहारदार सादरीकरण

पुणे : सतारीचे सुमधुर झंकार, मैहर घराण्याचे वैशिष्ट्य दर्शविणारे सुरेल सरोद वादन आणि गायकी अंगाने सादर झालेल्या व्हायोलीनच्या आर्त स्वरातून भारतीय शास्त्रीय संगीताची समृद्ध परंपरा पुणेकर रसिकांना अनुभवायला मिळाली. सतार, सरोद आणि व्हायोलीन या तिन्ही वाद्यांच्या वादनातून त्रिवेणी संगम साधला गेला.
ऋत्विक फाऊंडेशन फॉर परफॉर्मिंग आर्टस्‌‍तर्फे कोथरूड येथील ऋत्विक फाऊंडेशनच्या स्वरदालनात ‌‘त्रिवेणी‌’ या विशेष सांगीतिक मैफलीचे आयोजन करण्यात आले होते. यात नेहा महाजन यांचे सतार, अनुपम जोशी यांचे सरोद तर पंडित मिलिंद रायकर यांचे व्हायोलीन वादन झाले. रसिकांनी मैफलीस मोठ्या संख्येने उपस्थित राहून कलाकारांच्या सादरीकणाला भरभरून दाद दिली.
नेहा महाजन यांनी भीमपलास रागातील दोन बंदिशी सादर केल्या. आपले गुरू सतार वादक उस्ताद जुनैद खान यांच्याकडून मार्गदर्शन मिळालेल्या या बंदिशी बिनकर घराण्याचे उस्ताद अब्दुल हलिम जाफर खान यांनी रचलेल्या होत्या. सुरेल धून ऐकवून नेहा महाजन यांनी मैफलीची सांगता केली. अनिरुद्ध शंकर यांनी तबला तर मानसी पोतदार यांनी तानपुरा साथ केली.
अनुपम जोशी यांनी सरोद वादनाची सुरुवात हेमंत रागात आलाप, जोड, झाला सादर करून केली. अतिशय सुमधुर समजला जाणारा हेमंत राग उलगडून मांडताना अनुपम जोशी सरोद मैहर घराण्याचय्ा सरोद वादनातील बारकावे, वैशिष्ट्ये दर्शविल्याने रसिक मोहित झाले. त्यानंतर पुरिया कल्याण रागातील विलंबित तीन व द्रुत तीनताल अतिशय प्रभावीपणे सादर केला. पंडित राजीव तारानाथ आणि पंडित तेजेंद्र नारायण मजुमदार यांचे मार्गदर्शन लाभलेल्या अनुपम जोशी यांच्याकडे आजच्या पिढीतील आश्वासक सरोद वादक म्हणून पाहिले जाते. महेशराज साळुंखे यांनी समर्पक तबला तर वैष्णवी सोनार यांनी तानपुरा साथ केली.
पंडित मिलिंद रायकर यांच्या आत्मभान विसरायला लावणाऱ्या व्हायोलीनच्या सुरांनी त्रिवेणी मैफलीचा कळसाध्याय गाठला. पंडित रायकर यांनी रागांचा राजा समजल्या जाणाऱ्या आणि गंभीर प्रकृतीच्या राग मालकंसचे ऐकवलेले स्वर रसिकांच्या काळजाला भिडले. अनेक दिग्गज कलाकारांसह गानसरस्वती पद्मभूषण किशोरी आमोणकर यांचे मार्गदर्शन लाभलेल्या पंडित रायकर यांच्या व्हायोलीन वादनातील आर्त सुरांनी रसिकजन मंत्रमुग्ध झाले. पंडित विश्वनाथ शिरोडकर यांनी बहारदार तबला साथ केली तर नुपूरा जोशी-भिडे यांनी स्वरमंडल आणि मानसी पोतदार यांनी तानपुरा साथ केली.
कार्यक्रमाच्या सुरुवातीस ऋत्विक फाऊंडेशन फॉर परफॉर्मिंग आर्टस्‌‍च्या संस्थापक संचालिका चेतना कडले, विनता गांगुली, विदुर महाजन यांच्या प्रमुख उपस्थितीत दीप प्रज्वलन झाले. कलाकारांचा सत्कार चेतना कडले, विनता गांगुली, प्रकाश गुरव यांच्या हस्ते करण्यात आला. सूत्रसंचालन नमिता राऊत यांनी केले.

पुणे, दि.२५: अनुसूचित जाती, विमुक्त जाती, भटक्या जमाती, इतर मागासवर्ग व विशेष मागासवर्गीय व सामाजिक आणि शैक्षणिकदृष्ट्या मागासवर्गीय आदी प्रवर्गातील विद्यार्थ्यांचे अर्ज निकाली काढण्यासाठी जिल्हा जात प्रमाणपत्र पडताळणी समितीमार्फत २७ ते २९ नोव्हेंबर २०२४ या कालावधीत विशेष मोहिमेचे आयोजन करण्यात येणार आहे.

यावेळी सन २०२४-२५ या शैक्षणिक वर्षात अभियांत्रिकी, वैद्यकीय, व्यवसायिक अभ्यासक्रमास प्रवेश घेतलेल्या परंतु जात प्रमाणपत्र पडताळणीचा अर्ज करूनही अद्याप जात वैधता प्रमाणपत्र न मिळालेल्या विद्यार्थ्यांचे अर्ज निकाली काढण्यात येणार आहे.

अर्जात त्रुटी असलेल्या विद्यार्थ्यांना लेखी सूचना पत्र किंवा ई-मेल पत्त्याद्वारे कळविण्यात आले असून असे विद्यार्थी किंवा पालकांनी सकाळी १० ते सायंकाळी ६ या कालावधीत जिल्हा जात प्रमाणपत्र पडताळणी समिती कार्यालय, डॉ. बाबासाहेब आंबेडकर सामाजिक न्याय भवन, पुणे-आळंदी रोड, विश्रांतवाडी पोलीस स्टेशन समोर, पुणे येथे उपस्थित राहावे, असे आवाहन समितीचे सचिव एस. आर. दाणे यांनी केले आहे.

पुणे, दि.२५: भारत सरकार मॅट्रिकोत्तर शिष्यवृत्ती योजना व शिक्षण शुल्क, परीक्षा शुल्क प्रतिपूर्ती योजनेअंतर्गत स्वयंचलितरित्या नामंजूर (ऑटो रिजेक्ट) झालेले प्रलंबित शिष्यवृत्ती अर्ज निकाली काढण्यास शासनाची मंजूरी देण्यात आली असून जिल्ह्यातील महाविद्यालयांनी विहीत प्रक्रियेचा अवलंब करून ३० नोव्हेंबर २०२४ पर्यंत ऑफलाईन अर्ज व प्रस्ताव सहायक आयुक्त, समाज कल्याण कार्यालयाकडे सादर करावेत, असे आवाहन करण्यात आले आहे.

सामाजिक न्याय व विशेष सहाय्य विभागामार्फत राबविण्यात येत असलेल्या विविध शिष्यवृत्ती योजनेअंतर्गत सन २०१८-१९ ते २०२३-२४ या कालावधीत महाडीबीटी प्रणालीमार्फत अर्ज करताना आलेल्या विविध अडचणीमुळे अनेक विद्यार्थ्यांचे अर्ज विहित मुदतीत भरुनही ऑटो रिजेक्ट झाले आहेत. एखाद्या वर्षी विद्यार्थ्यांच्या नियमित परीक्षा अथवा पुरवणी परीक्षेचा निकाल विहित वेळेत न लागल्याने अर्ज भरता न येणे अथवा अर्ज भरुनही पुढच्या वर्षीचा अर्ज नुतनीकरण करण्यास अडचण आल्या. अशा अडचणींमुळे पात्र विद्यार्थ्यांना शिष्यवृत्तीचा लाभ देता येत नसल्याची बाब विचारात घेऊन, अनुसूचित जाती प्रवर्गातील विद्यार्थ्यांचे या योजनेंतर्गत प्रलंबित अर्ज निकाली काढण्याबाबत कार्यपद्धती लागू करण्यात आली आहे.

या योजनेच्या लाभापासून अनूसुचित जाती प्रवर्गातील एकही पात्र विद्यार्थी वंचित राहणार राहू नयेत, अशा विद्यार्थ्यांच्या ऑफलाईन अर्जावर महाविद्यालयांनी तातडीने कार्यवाही करावी, असे असे निर्देश सहायक आयुक्त, समाज कल्याण विशाल लोंढे यांनी दिले आहेत.

पुणे : वारजे पोलिसांनी दोघा सराईत गुन्हेगारांना पकडून त्यांच्याकडून एक देशी बनावटीचे पिस्टल, तीन जिवंत काडतुसे जप्त केली आहेत. ओंकार ऊर्फ टेड्या उमेश सातपुते (वय २४, रा. संघर्ष चौक, वारजे माळवाडी), सोहम अनंत सातव (वय १९, रा. यशोदिप चौक, वारजे माळवाडी) अशी अटक केलेल्यांची नावे आहेत.

वारजे माळवाडी पोलीस ठाण्यातील तपास पथक पेट्रोलिंग करत असताना पोलीस अंमलदार मनोज पवार व विकास पोकळे यांना बातमीदारांकडून माहिती मिळाली की आकाशनगरकडे जाणार्‍या रोडवर दोघे जण थांबले असून त्यांच्याकडे पिस्टल आहे. त्यानुसार पोलिसांनी रोजरी स्कुलचे विरुद्ध दिशेला आकाशनगरकडे जाणार्‍या रोडला दोघांना पकडले. त्यांच्याकडे एक देशी बनावटीचे पिस्टल,तीन जिवंत काडतुसे, दोन मोबाईल, एक मोपेड असा ६५ हजार ३०० रुपयांचा माल हस्तगत केला आहे.ओंकार ऊर्फ टेड्या सातपुते याच्याविरुद्ध खुनाचा प्रयत्न, दुखापत, राईट, जबरी चोरी, घरफोडी, अग्नीशस्त्रे बाळगणे असे विविध गंभीर गुन्हे दाखल आहेत. तसेच त्याच्यावर यापूर्वी मोक्काअंतर्गत कारवाई करण्यात आली होती.

पोलीस उपायुक्त संभाजी कदम, सहायक पोलीस आयुक्त सरदार पाटील, वरिष्ठ पोलीस निरीक्षक मनोज शेडगे गुन्हे निरीक्षक निलेश बडाख यांच्या मार्गदर्शनाखाली सहायक पोलीस निरीक्षक रणजित मोहिते, पोलीस अंमलदार प्रदीप शेलार, मनोज पवार, विजय भुरुक, दक्ष पाटील, श्रीकांत भांगरे, संभाजी दराडे, विक्रम खिलारी, विकास पोकळे, सत्यजित लोंढे यांनी ही कामगिरी केली आहे.

पुणे- मोक्का प्रकरणात न्यायालयाने २ वर्ष तडीपार केले असतानाही चुहा गँगने शहरात येऊन दरोडा टाकण्याच्या तयारीकेली आणि या तयारीत असतानाच चुहा गँगच्या चौघांना भारती विद्यापीठ पोलिसांनी पकडून आत टाकले आहे .

तौसिफ जमीर सय्यद ऊर्फ चुहा (वय २८, रा. संतोषनगर, कात्रज), सुरज राजेंद्र जाधव (वय ३५, रा. रुपचंद तालीमसमोर, मंगळवार पेठ, ता. करमाळा, जि. सोलापूर), मार्कस डेव्हिड इसार (वय २९, रा. रघुनंदन अपार्टमेंट, धानोरी), कुणाल कमलेश जाधव (वय २५, रा. प्रसाद रेसिडेन्सी, सोमनाथनगर, वडगाव शेरी) अशी अटक केलेल्यांची नावे आहेत. जनाब (रा. कॅम्प) हा पळून गेला आहे.याबाबत पोलीस अंमलदार धनाजी धोत्रे यांनी भारती विद्यापीठ पोलीस ठाण्यात फिर्याद दिली आहे. हा प्रकार कात्रजमधील संतोषनगर येथील डिलाईट बेकरीसमोर रविवारी पहाटे ४ वाजण्याच्या सुमारास घडला.

तौसिफ ऊर्फ चुहा याच्याविरुद्ध दंगली, दरोडा, जबरी चोरी सारखे गुन्हे दाखल आहेत.त्याला २०२० मध्ये एमपीडीए अंतर्गत स्थानबद्ध करण्यात आले होते. तेथून सुटून आल्यानंतरही त्याची गुन्हेगारी सुरुच राहिल्याने तत्कालीन पोलीस आयुक्त अमिताभ गुप्ता यांनी त्याच्याविरुद्ध मोक्का कारवाई केली होती. या गुन्ह्यात विशेष न्यायाधीश व्ही आर कचरे यांनी ६ नोव्हेबर २०२३ पासून दोन वर्षाकरीता तडीपार केले होते. असे असतानाही या तडीपारीचा भंग करुन शहरात आला होता.

कात्रज येथे दरोडा टाकण्याच्या तयारीत आपल्या साथीदारांसह तो लपून बसला असल्याची माहिती पोलिसांना मिळाली.
त्यावरुन पोलिसांनी त्यांना घेरुन चौघांना पकडले. त्याच्या ताब्यातून एक देशी बनावटीचे पिस्टल,एक जिवंत काडतुस व मॅफेड्रॉन, कोयता, डिजिटल वजन काटा, सुतळी, स्क्रु ड्रायव्हर असे साहित्य मिळून आले.वरिष्ठ पोलीस निरीक्षक शरद झिने , पोलीस उपनिरीक्षक सुरेश शिंदे, मोहन कळमकर व त्यांच्या सहकार्‍यांनी हीकामगिरी केली. पोलीस उपनिरीक्षक मोहन कळमकर ̈मो.9881802890अधिक तपास करीत आहेत.

एमआयटी डब्ल्यूपीयूत २९वी तत्त्वज्ञ संतश्री ज्ञानेश्वर-तुकाराम स्मृती व्याख्यानमालेचे उद्घाटन

पुणे, दि.२५ नोव्हेंबर: “धर्म आणि विज्ञान यांचा समन्वय घरा घरात झाला तर प्रत्येकाला शांतीचा अनुभव घेता येऊ शकतो. हेच सूत्र समाजासाठी लागू झाल्याने विश्वशांती निर्माण होण्यास वेळ लागणार नाही. तसेच प्रत्येकाने चेहर्‍यावर हास्य ठेवणे या क्रांतिकारी प्रयोगामुळे ही जीवनात शांतीचा अनुभव येतो. प्रत्येकाने संकल्प करावा की घरामध्ये प्रवेश करतांना चेहर्‍यावर हास्य ठेवावे.” असे विचार उज्जैन येथील आध्यात्मिक गुरू व लेखक पंडित विजयशंकर मेहता यांनी व्यक्त केले.
एमआयटी वर्ल्ड पीस युनिव्हर्सिटी, विश्वशांती केंद्र (आळंदी), माईर्स एमआयटी, पुणे, भारत आणि संतश्री ज्ञानेश्वर-संतश्री तुकाराम महाराज स्मृती व्याख्यानमाला न्यास यांच्या संयुक्त विद्यमाने युनेस्को अध्यासना अंतर्गत २४ ते ३० नोव्हेंबर या कालावधित आयोजित २९वी तत्त्वज्ञ संतश्री ज्ञानेश्वर-तुकाराम स्मृती व्याख्यानमालेचे उद्घाटन एमआयटी वर्ल्ड पीस युनिव्हर्सिटीच्या संतश्री ज्ञानेश्वर सभागृह, कोथरूड, पुणे येथे झाले. यावेळी प्रमुख पाहुणे म्हणून ते बोलत होते.
या प्रसंगी संत एकनाथ महाराजांचे १४ वे वंशज ह.भ.प.श्री. योगीराज महाराज गोसावी पैठणकर हे प्रमुख पाहुणे म्हणून होते. तसेच जगविख्यात शास्त्रज्ञ पद्मभूषण डॉ. विजय भटकर हे सन्माननीय पाहुणे होते. अध्यक्षस्थानी एमआयटी वर्ल्ड पीस युनिव्हर्सिटीचे संस्थापक अध्यक्ष व युनेस्को अध्यासनाचे प्रमुख प्रा. डॉ. विश्वनाथ दा. कराड होते.
तसेच एमआयटी वर्ल्ड पीस युनिव्हर्सिटीचे कार्यकारी अध्यक्ष राहुल विश्वनाथ कराड, एमआयटी एडीटी विद्यापीठाचे कार्यकारी अध्यक्ष प्रा.डॉ. मंगेश तु. कराड, डब्ल्यूपीयूचे कुलगुरू डॉ. आर.एम. चिटणीस व २९ व्या तत्त्वज्ञ संतश्री ज्ञानेश्वर-तुकाराम स्मृती व्याख्यानमालेचे समन्वयक व प्र कुलगुरू डॉ. मिलिंद पांडे उपस्थित होते.
पंडित विजयशंकर मेहता म्हणाले, “संतती, संपत्ती, संबंध आणि  दुर्बल आरोग्य  या चार मार्गाने जीवनात अशांती येते. अशा वेळेस शांतीसाठी जीवनाला चार टप्प्यांमध्ये विभाजीत करावे. व्यावसायिक जीवनात निष्काम राहणारे, सामाजिक जीवनात वचन बद्धतेचे पालन करणे, कुटुंबाला प्राथमिकता देणे आणि स्वतःला शांत ठेवावे. यामुळे कुटुंबात, समाजात आणि संपूर्ण विश्वात शांती नांदेल.”
ह.भ.प. योगीराज महाराज गोसावी पैठणकर म्हणाले,” भारतीय संस्कृती ही सर्वश्रेष्ठ असून जगाला वारकरी संप्रदायाने शांतीचा मार्ग दाखविला आहे. आजच्या युगामध्ये अध्यात्म आणि विज्ञानाची वेगळी परिभाषा करणे योग्य नाही. आत्म स्वरूपाचा विचार करणे हे अध्यात्म असून ते सर्व धर्मात आहे. खर पाहता विश्वाला शांतीची गरज आहे आणि ती विज्ञानातून मिळेल. मनुष्याने ज्ञानाचा योग्य वापर केल्यास ते शक्य आहे. ज्ञान हे आंतरिक विचार करतो त्यासाठी रोज संतांचे वाङ्मय वाचावे.”
डॉ. विजय भटकर म्हणाले,” वर्तमान काळात मानवाने विज्ञानाच्या आधारे सर्व गोष्टी साध्य केल्यात परंतू जीवनात सुख आणि शांती नाही. यासाठी आध्यात्मिक व आत्मज्ञान आवश्यक आहे. सत्याची परिभाषा ओळखणे गरजेचे आहे.”
प्रा.डॉ. विश्वनाथ दा. कराड म्हणाले, “तत्वज्ञ संत श्री ज्ञानेश्वर माऊली व जगदगुरू तुकाराम महाराज यांचा संदेश मानवजातीपर्यंत पोहचविण्याच्या मुख्य उद्देश्याने ही व्याख्यानमाल सुरू केली आहे. येथे सद्गुणांची पूजा हीच खरी ईश्वरसेवा पूजा आहे. मन आणि आत्मा या गोष्टींचे अधिक चिंतन व्हावे. जीवनाचा हेतू व कर्तव्य काय आहे याची जाणिव यातून होते. ”
डॉ. मंगेश तु. कराड म्हणाले,”धर्म, अर्थ, काम व मोक्ष हे जीवनात सर्वात महत्वाचे असून त्याचे पालन करावे. देशाचा विकास पाहता भारत तीसरी आर्थीक व्यवस्था म्हणून उदयास येत आहे. अशा वेळेस हा देश भविष्यात जगाचे नेतृत्व करेल आणि विश्वगुरू बनेल.”
डॉ. आर.एम.चिटणीस यांनी स्वागत पर भाषण व प्रस्तावना मांडली.
सूत्रसंचालन प्रा. डॉ. मिलिंद पात्रे यांनी केले.

आळंदी : योग शिक्षकांचा महासंमेलन आळंदी येथे नुकतेच साजरे झाले यामध्ये योगशिक्षकांच्या बौद्धिक क्षमतेमध्ये अधिक वाढ व्हावी यासाठी वेगवेगळ्या विषयांवरील व्याख्यानांचे आयोजन करण्यात आले होते . विख्यात योगाभ्यासी असे प्रिन्सिपल ऑफ योग कॉलेज कैवल्यधाम येथील डॉक्टर शरदचंद्र भालेकर, द लोणावळा इन्स्टिट्यूट चे संचालक डॉक्टर मन्मथ घरोटे, भारतीय संस्कृती दर्शन चे संचालक डॉक्टर सुश्रुत सरदेशमुख, तसेच प्रख्यात स्त्रीरोगतज्ञ व योगाभ्यासी डॉक्टर विश्वास येवले यांची दर्जेदार व्याख्यान झाले . तर अनेक योगी खेळ आणि योगी संगीत रजनी सारख्या करमणुकीच्या कार्यक्रमातून सर्वांचे मन प्रसन्न झाले, याबरोबर आपला महाराष्ट्र योग शिक्षक संघ योग शिक्षकांसाठी काय कार्य करत आहे योग विषयाला योग्य न्याय कसा मिळावा यासाठी आपले संस्थापक अध्यक्ष मनोज निलपवार यांनी मार्गदर्शन केले. हा योगशिक्षक संघ कोणी एकाचा नसून फक्त आणि फक्त योगशिक्षकांचा आहे यामध्ये कोणीही अधिकारी किंवा पद धारण करणारा असा नसून प्रत्येक जण योग्य शिक्षक आहे आणि प्रत्येकाला आपले मत आपले विचार मांडण्याचा अधिकार आहे. , असे देखील सांगण्यात आले. तसेच संमेलनाचे प्रमुख पाहुणे डॉ.श्री.शरदचंद्र भालेकर यांनी योगशिक्षक एकत्र येणे का गरजेचे आहे हे सांगितले तसेच डॉ मन्मथ घरोटे सर यांनी समाज स्वास्थ्य घडविणारा हा योगशिक्षक एकत्र आलाच पाहिजे तर डॉ.राजेंद्र खेडेकर यांनी आश्वासन दिले की योगशीक्षकांच्या 12मागण्या सरकारपुढे ठेवल्या आहेत त्या पूर्ण होण्यासाठी मी स्वतः प्रयत्न करेल. तसेच ओमानंद स्वामी आणि गेठेमहाराज यांनी आशीर्वाद दिले. संस्थेचे स्मरणिका प्रकाशन व कुणाल महाजन लिखित योग गीता या पुस्तकाचे प्रकाशन माननीय पाहुण्यांच्या हस्ते झाले.
या कार्यक्रमास माननीय श्रीमती इंद्राणी बालन फाउंडेशनचे अध्यक्ष पुनीत बालन, पद्मश्री डॉ.विजय भटकर सर बेलराईज इंडस्ट्रीजच्या डायरेक्टर सुप्रिया बडवे, यांच्या शुभेच्छा होत्या.

कार्यक्रमात प्रसाद कुलकर्णी यांची राज्य कार्यकारी अध्यक्ष म्हणून त्यांची नेमणूक करण्यात आली तसेच राज्य कोषाध्यक्ष म्हणून संतोष खरटमल यांची नेमणूक करण्यात आली.
त्याचबरोबर ऑनलाईन राज्यस्तरीय योग क्रीडा स्पर्धा आयोजित केल्या होत्या त्याचे पारितोषिक वितरण समारंभ मान्यवरांच्या हस्ते झाला. यासाठी मानली देव आणि राहुल येवला यांनी कमकाज पाहीले आपले विभागप्रमुख प्रा. श्री सदानंद वाली सर,
मी पुणे जिल्हाध्यक्ष सौ. चंद्रज्योती दळवी, उपाध्यक्ष सौ सारिका काकडे, मारिया पारतापूर्वाला, सचिव आरुषी शिंगोटे गौरी पाटील कोषाध्यक्ष आश्लेषा मोहिते कार्यकारी सचिव तानाजी पाटील उज्वला गायकवाड श्री दिगंबर काष्टे सर तसेच आपले सोशल मीडिया प्रभारी श्री राहुल सांडभोर सर अवनी शहा माहिती दिली

पुणे-मावळत्या विधानसभेमध्ये काँग्रेसचे जिल्ह्यातून तीन आमदार होते. संग्राम थोपटे, संजय जगताप आणि रवींद्र धंगेकर या काँग्रेसच्या तीनही आमदारांना पराभव पत्करावा लागला. शिवसेना (उद्धव बाळासाहेब ठाकरे) पक्षाचा जिल्ह्यात गेल्यावेळी एकही आमदार नव्हता. यावेळी बाबाजी काळे हे शिवसेनेचे आमदार आहेत. एका अपक्षाबरबरच शिंदे गटाचा देखील पुणे जिल्ह्यात एक आमदार निवडून आला आहे.जिल्ह्यातील सात विद्यमान आमदारांना पराभव पत्करावा लागला. यामध्ये राष्ट्रवादी काॅंग्रेसचे जुन्नरचे अतुल बेनके, खेडचे दिलीप मोहिते, वडगाव शेरीचे सुनील टिंगरे, काँग्रेसचे भोरमधील संग्राम थोपटे आणि पुरंदर मधील संजय जगताप त्याचबरोबर राष्ट्रवादी काँग्रेस शरदचंद्र पवार पक्षाचे शिरूरचे अशोक पवार आणि काँग्रेसचे रवींद्र धंगेकर हे पराभूत झाले आहेत.

जिल्ह्याच्या आमदारांमध्ये चार नवीन चेहरे आले आहेत. त्‍याचप्रमाणे जिल्‍ह्यात तीन माजी आमदारांना पुन्‍हा विधानसभेची संधी मिळाली आहे. जिल्ह्यात 21 पैकी 14 विद्यमान आमदारांना पुन्हा संधी मिळाली आहे.नव्‍या पाच चेहऱ्यांमध्ये कसबा पेठ मतदारसंघात भाजपचे हेमंत रासने, चिंचवडमध्ये शंकर जगताप, खेडमध्ये शिवसेना (उद्धव बाळासाहेब ठाकरे) पक्षाचे बाबाजी काळे, शिरूरमध्ये राष्ट्रवादी काॅंग्रेसचे माउली कटके, भोरमध्ये शंकर मांडेकर यांचा समावेश आहे. माजी आमदार असलेले जुन्नरमधून अपक्ष शरद सोनवणे, पुरंदरमध्ये शिवसेनेचे विजय शिवतारे, वडगाव शेरीमधून बापूसाहेब पठारे हे या निवडणुकीत विजयी झाले आहेत.

पुणे शहर आणि जिल्ह्यामध्ये भाजप सर्वांत मोठा पक्ष ठरला आहे. पुण्यात 21 पैकी नऊ जागा त्यांनी जिंकल्या आहेत. यामध्ये चंद्रकांत पाटील (कोथरूड), माधुरी मिसाळ (पर्वती), सिद्धार्थ शिरोळे (शिवाजीनगर), सुनील कांबळे (पुणे कॅन्टोन्मेंट), भीमराव तापकीर (खडकवासला), हेमंत रासने (कसबा पेठ), राहुल कुल (दौंड), शंकर जगताप (चिंचवड )आणि महेश लांडगे (भोसरी) यांचा समावेश आहे. त्या खालोखाल राष्ट्रवादी काॅंग्रेसला आठ जागा मिळाल्या आहेत.यामध्ये स्वतः अजित पवार (बारामती), दिलीप वळसे पाटील (आंबेगाव), माउली कटके (शिरूर), अण्णा बनसोडे (पिंपरी), सुनील शेळके (मावळ), शंकर मांडेकर (भोर), चेतन तुपे (हडपसर) आणि दत्तात्रय भरणे (इंदापूर) यांचा समावशे आहे. शिवसेना (उद्धव बाळासाहेब ठाकरे) पक्षाला खेडमध्ये बाबाजी काळे यांच्या रूपाने एक जागा मिळाली आहे. राष्ट्रवादी काँग्रेस शरदचंद्र पवार पक्षाला वडगाव शेरीमध्ये बापूसाहेब पठारे, त्याचबरोबर शिवसेनेचे विजय शिवतारे हे पुरंदरमधून, तर जुन्नरमध्ये शरद सोनवणे हे अपक्ष विजयी झाले आहेत.