पुणे :

भारत जोडो अभियान आणि संविधान प्रचारक लोकचळवळ यांच्या वतीने सोमवार,दि.२३ सप्टेंबर २०२४ रोजी सायंकाळी सहा वाजता ,एस.एम.जोशी फाउंडेशनचा कॉन्फरन्स हॉल येथे संविधान अभ्यास वर्गाचे आयोजन करण्यात आले होते. या अभ्यास वर्गामध्ये राज्यशास्त्राचे आणि आंतरराष्ट्रीय राजकारणाचे अभ्यासक प्रा.अविनाश कोल्हे यांनी  ‘संघ आणि राज्य लोकसेवा आयोग : काल,आज ,उद्या’ या विषयावर मार्गदर्शन केले.’हा अभ्यास वर्ग सर्वांसाठी खुला असून प्रवेश विनामूल्य होता.  भारत जोडो अभियानाचे पश्चिम महाराष्ट्र समन्वयक आणि संविधान प्रचारक संदीप बर्वे  यांनी सूत्रसंचालन  केले .हा तेरावा संविधान अभ्यास वर्ग होता .

़समाजवादी पक्षाचे विनायक लांबे यांच्या हस्ते प्रा.कोल्हे यांचा या वेळी सत्कार करण्यात आला.संविधान प्रचारक निलम पंडित यांनी संविधान उद्देशिकेचे   वाचन केले आणि कार्यक्रमाचे प्रास्ताविक केले.यावेळी वाचन संस्कृतीचा प्रसार करणारे अशोक सुलाखे यांचा जनता दलाचे प्रकाश डोमळे यांच्या हस्ते विशेष सन्मान करण्यात आला.शाहीर बाबासाहेब.  जाधव यांच्या गीतांने कार्यक्रमाची सांगता झाली.

प्रा.कोल्हे  म्हणाले,’भारताला स्वातंत्र्य मिळाल्यानंतर मात्र वल्लभभाई पटेल यांनी इंग्रजांचे हुकूम गाजविणारे आणि त्यांच्या मर्जीनुसार चालणारी प्रशासकीय पद्धती बंद केली आणि नवीन संघ आणि राज्य लोकसेवा आयोगाची, लोकाभिमुख प्रशासकीय पद्धती अवलंबली, आणि तुम्ही जनतेचे सेवक आहात, तेंव्हा न घाबरता, लोकशाहीसाठी काम करावे असे सांगितले, म्हणूनच वल्लभभाई पटेल यांना आधुनिक भारतीय नोकरशाहीचे जनक मानले जाते.भारतासारख्या बलाढ्य देशावर राज्य करण्यासाठी व्यावसायिक प्रशासकांची आवश्यकता असल्याचे लक्षात आल्याने लॉर्ड कॉर्नवॉलिस, मेकॉले आदींनी प्रयत्न केले, आणि भारतातीलच हुशार लोकांना आणि अर्थातच युरोपियन ज्ञानी लोकांनाही प्रशिक्षित करून व्यावसायिक प्रशासक नेमणे सुरू केले, 
‘अशा प्रकारे प्रशासकीय अधिकारी नेमण्यासाठी स्पर्धा परीक्षा घेण्यात यावी अशी मागणी मेकॉले यांनी पुढे केली.अशा प्रशासकांना राजकीय नेत्यांनी स्वतःच्या निवडणूक जिंकण्यासाठी काही लोक अनुनय करून निर्णय घ्यायला लावू नये म्हणून त्यांना कायदेशीर संरक्षणही देण्यात आले !’, अशी माहिती प्रा.अविनाश कोल्हे यांनी यावेळी दिली.

पुणे- गणेशोत्सवाच्या विसर्जन मिरवणुकीच्या रथांची यांना चिंता नाही , मेट्रोच्या स्थानकांना नावे देताना महात्मा फुलेंच्या सारख्या शहरातील थोर समाजसुधारकांच्या नावांची टाळमटाळ करायची आणि त्यांचे नाव द्या अशी मागणी करायला लावायची असे राजकारण करणाऱ्या मेट्रोच्या अधिकाऱ्यांना आता पुणेरी हिसका दाखविण्याची वेळ आली आहे अशी प्रतिक्रिया पुण्यातून उमटते आहे . सावित्रीमाई यांच्यामुळे साऱ्यांच्या मुली शिकल्या,स्त्रियांना अत्याचाराविरोधात बळ म. फुलेंच्या सामाजिक कार्याने दिले आणि पुणे घडले. पण महात्मा फुले मंडई असा मंडईचा नामोल्लेख असताना येथील मेट्रो स्थानकाला मंडई असे नाव देण्याचे कारण काय ? असा सवाल संजय मोरे,बाळासाहेब मालुसरे, विशाल धनवडे,जावेद खान, चंदन साळुंके नंदू येवले नागेश खडके,अजिंक्य पांगारे, सचिन चिंचवडे, नितीन रावळेकर, गनी पटेल,यांनी निवेदन देऊन मेट्रोच्या अधिकार्यांना केला आणि मंडइतील मेट्रो स्थानकाला महात्मा फुले मेट्रो स्थानक असे नाव देण्याची मागणी केली . आता त्यांना … निवेदने कसली देता ? आणि विनंत्या कसल्या करता ?यांना समजत नसेल तर एवढे निर्बुद्ध लोक मेट्रोचे अधिकारी कसे झाले ? असे सवाल करत पुणेकर आता या अधिकार्यांना पुणेरी हिसका दाखवा अशी मागणी करू लागलेत .

दरम्यान शिवसेनेचे शहर प्रमुख संजय मोरे उपशहरप्रमुख बाळासाहेब मालुसरे आणि कसबाविधानसभाप्रमुख विशाल धनवडे यांनी या संदर्भात मेट्रोला दिलेल्या निवेदनात म्हटले आहे कि,’महामेट्रोरेलच्या माध्यमातून पुणे शहरात होत असलेल्या मेट्रोच्या स्थानिकांना नाव देताना आपणाकडून नेहमी इतिहासाची तोडफोड करण्याबरोबरच महापुरुषांच्या नावाचा विसर पडणे, चुकीचे नाव देणे असे प्रकार करण्यात आले आहेत. त्याबाबत शिवसेनेच्या वतीने अनेकदा निवेदन आंदोलन करण्यात आले आहे. यामधे आपला नवीन प्रताप म्हणजे महात्मा फुले मंडई असा मंडईचा नामोल्लेख असताना येथील मेट्रो स्थानकाला मंडई असे नाव देण्याचे कारण काय ? महापुरूषांचा नामोल्लेख टाळून त्यांचा अवमान करण्याचे कारण काय ? असा सवाल आम्ही आपणास समस्त पुणेकरांच्या वतीने विचारत आहोत. महात्मा फुले मंडईच्या नामोल्लेखाचा इतिहास आपणास माहिती करून देत आहोत.आपल्या देशात इंग्रज राज्य करीत होते त्याकाळात म्हणजे 1882 सालात इंग्रजांनी मंडईचा बांधण्याचे काम चालू केले. 5 ऑक्टोबर 1886 सालात बांधकाम पूर्ण होउन मंडईला त्यावेळेच्या गव्हर्नर लाॅर्ड रे मार्केट इंडस्ट्रीयल म्युझियम असे नाव देण्यात आले. मात्र 1938 साली नगरपरिषदेत आचार्य अत्रे यांनी ठराव मांडून मान्य करून मंडईला “महात्मा फुले मंडई” असे नामकरण करण्यात आले. स्वातंत्र्यपूर्व काळात देण्यात आलेले नाव व त्याकाळातील इतिहास पुसण्याचा काम आपण करीत आहात. हे आम्ही कदापि सहन करणार नाही. त्वरीत या नावात बदल करण्यात यावा. आमच्या माहितीनुसार येत्या 27 सप्टेंबर 2024 रोजी होणाऱ्या उद्घाटना अगोदर हे नाव बदलण्यात यावे. अन्यथा शिवसेनेच्या वतीने पुन्हा उग्र आंदोलन करण्यात येईल याची नोंद घ्यावी. आपण पुणे शहरात मेट्रो स्थानकाला अशी चुकीची नाव देउन वेगळा पायंडा पाडू नका. त्याची उदाहरणे खाली नमूद करीत आहोत.

छत्रपती शिवाजी नगर स्थानकाला शिवाजी नगर असा एकेरी उल्लेख केला. आरटीओ येथील स्थानका जवळील भागात छत्रपती शाहू महाराजांनी शैक्षणिक संस्था उभी केली. त्यांचे नाव देणे आवश्यक होते. परंतू महामेट्रोरेल प्रशासनाने या मेट्रो स्थानकाला मंगळवार पेठ नाव दिले. कसबा पेठेतील मेट्रो स्थानकाला बुधवार पेठ नाव देउन अवहेलना केली. तसेच माता रमाई आंबेडकर पुतळा येथील स्थानकाला पुतळा समितीची जागा घेऊनही येथील स्थानकाला रूबी हाॅल नाव दिले गेले. वारंवार आपणाकडून पुणे शहराचा इतिहास पुसण्याचा कार्यक्रम चालू आहे.असे या निवेदनात म्हटले आहे.

पुणे -पुण्यातील इलेक्ट्रॉनिक उपकरणांच्या उद्योजकाचा पाच जणांच्या टोळक्याने घरात शिरून धारदार शस्त्राने वार करत खून केला. कर्नाटकातील कारवार तालुक्यातील हणकोणमध्ये टोळक्याने घरात शिरून हा हल्ला केला. विनायक काशीनाथ नाईक (५२) असे खून झालेल्या उद्योजकाचे नाव आहे. या घटनेत त्यांची पत्नी वृषाली या गंभीर जखमी झाल्या आहेत.

दरम्यान, हल्ल्याचे कारण अद्याप स्पष्ट झाले नाही. सदाशिवगड पोलिस ठाण्यात गुन्हा दाखल करण्यात आला आहे. विनायक नाईक हे पुण्यातील मोठे उद्योजक असून त्यांचा इलेक्ट्रिकल व इलेक्ट्रॉनिक्स उपकरणांचा मोठा व्यवसाय आहे. ते कारवार तालुक्यातील हणकोण या मूळ गावी सातेरी देवीच्या उत्सवानिमित्त गेले होते. हा उत्सव १० ते १६ सप्टेंबरदरम्यान होता. त्यानंतर आईचे श्राद्ध करायचे असल्याने नाईक कुटुंबासह तिथेच थांबले होते. रविवारी (दि. २२) ते पुण्यात जाण्यासाठी निघणार होते. त्यामुळे ते लवकरच उठले होते. पहाटेच्या सुमारास मोटारीतून आलेल्या पाच जणांनी विनायक नाईक यांच्यावर चाकू, लोखंडी रॉड, तलवारीने निर्घृण हल्ला केला. त्यात त्यांचा जागीच मृत्यू झाला. या वेळी त्यांची पत्नी वृषाली यांनी हल्लेखोरांचा प्रतिकार केला तेव्हा त्यांनी वृषाली यांच्यावरही वार केले. त्यात त्या गंभीर जखमी झाल्या आहेत. या घटनेची माहिती मिळताच कारवार पोलिस तातडीने घटनास्थळी दाखल झाले.

विद्यार्थ्यांनी आपल्या कामाविषयी आवड, वचनबद्धता, उत्कृष्टता, व्यापक दृष्टीकोन आदी तत्वे अंगी बाळगावीत- राज्यपाल

पुणे, दि. २४: पदवीनंतर व्यावसायिक प्रवासाला सुरुवात करताना विद्यार्थ्यांनी आपल्या कामाविषयी प्रचंड आवड, वचनबद्धता, उत्कृष्टता, व्यापक दृष्टीकोन, कुतूहल तसेच सचोटी आदी तत्वे अंगी बाळगावीत, असे मार्गदर्शन राज्यपाल सी. पी. राधाकृष्णन यांनी विद्यार्थ्यांना केले.

लोणी काळभोर येथील एमआयटी कला, रेखांकन व तंत्रज्ञान विद्यापीठाच्या ७ व्या पदवीप्रदान सोहळ्यात श्री. राधाकृष्णन बोलत होते. यावेळी विद्यापीठाचे संस्थापक व अध्यक्ष विश्वनाथ कराड, इस्त्रोच्या बेंगळुरू स्थित यु. आर. राव उपग्रह केंद्राचे संचालक एम. शंकरन, एमआयटी कला, रेखांकन व तंत्रज्ञान विद्यापीठाचे कार्यकारी अध्यक्ष तथा कुलगुरू डॉ. मंगेश कराड, एमआयटी संस्था समुहाचे कार्यकारी विश्वस्त राहुल कराड आदी उपस्थित होते.

हे जग खूप मोठे असून विद्यार्थ्यांनी सर्वत्र संधी शोधल्या पाहिजेत, असा कानमंत्र देऊन राज्यपाल म्हणाले, जे सक्रियपणे सतत काम करत राहतात त्यांच्यासाठी यश नेहमीच उपलब्ध असते. त्यामुळे कधीही निराश होता कामा नये. जे अविरतपणे शारीरिक आणि मानसिक कष्ट करत राहतात त्यांना यश निश्चित मिळते. तुम्ही इतरांशी स्वतःची तुलना न करता ते कसे आणि कशामुळे यशस्वी झाले, कसे काम करतात, आपल्या कल्पनांना कामाशी कशा प्रकारे जोडतात, या बाबींचे निरीक्षण केल्यास तुम्ही निश्चितच यशाकडे वाटचाल करू शकाल, असेही ते म्हणाले.

विद्यार्थ्यांनी यश मिळविण्यासाठी सोपा मार्ग (शॉर्टकट) निवडता कामा नये. तुम्ही तुमचा योग्य मार्ग निवडला पाहिजे आणि मूल्यांच्या सहाय्याने वाटचाल करावी. 2047 पर्यंत भारताला विकसित भारत बनवताना विद्यार्थ्यांचे योगदान आपले पालक, शिक्षक आणि भारताला अभिमान वाटेल असे राहील; तसेच आपण देशाला केवळ बलवानच नव्हे तर भारताला जगाची सेवा करण्यासाठी सक्षम कराल, असा विश्वासही त्यांनी व्यक्त केला.

कोविड काळात आपण जगाप्रती दयाभाव बाळगला. आपण तयार केलेली लस आपल्या सर्व भारतीयांना मोफत उपलब्ध करुन दिली. केवळ आपल्याच देशासाठी नव्हे तर अन्य गरीब देशांना मोफत उपलब्ध करुन देत मदतीचा हात पुढे केला, ही आपल्या देशाची महानता आहे, असेही श्री. राधाकृष्णन म्हणाले.

डॉ. विश्वनाथ कराड म्हणाले, भारतीय संस्कृती, परंपरा, तत्त्वज्ञानाकडे संपूर्ण जग आकर्षित झाले आहे. आर्थिक समृद्धीपेक्षा आपले जीवन शांतीमय, सुखमय आहे का आणि जगाची सेवा करता का याला महत्त्व आहे. विज्ञान आणि धर्म यांची युती मानवी जीवनात सौहार्द आणण्यास उपयुक्त ठरेल असा विश्वास स्वामी विवेकानंद यांनी व्यक्त केला होता. स्वाभिमान, नम्रता, लीनता यांनाच भारतीय संस्कृती म्हटले जाते, ज्यामुळे संपूर्ण जग भारताकडे पाहत आहे, या बाबी विद्यार्थ्यांनी अंगी बाळगाव्यात, असेही ते म्हणाले.

एम. शंकरन म्हणाले, शिक्षण म्हणजे वर्षाच्या शेवटी देण्याची परीक्षा नव्हे तर जीवनभर शिकत राहणे हे विद्यार्थ्यांनी लक्षात ठेवले पाहिजे. आपल्याला जीवनाच्या प्रत्येक टप्प्यावर अचानक, पूर्व कल्पना नसताना कसोटी, परीक्षा, समस्यांना सामोरे जावे लागते. तुम्ही शैक्षणिक संस्थांमध्ये अभ्यासक्रमाशिवायचे जे अन्य शिक्षण घेता ते देखील तितकेच महत्त्वाचे आहे. नकार आणि अपयश आपल्या जीवनाचा अविभाज्य भाग असून त्याला घाबरू नये, असेही ते म्हणाले.

डॉ. मंगेश कराड म्हणाले, एमआयटी कला, रेखांकन व तंत्रज्ञान विद्यापीठाकडून आज २ हजार ९७२ विद्यार्थ्यांना पदवी बहाल केली आहे. यात २२ पी.एच.डी., ५३ सुवर्ण पदके, १९४ उच्च क्रमवारी धारक (रँक होल्डर्स) यांचा समावेश आहे.

कार्यक्रमाला विद्यापीठाचे कार्यकारी संचालक विनायक घैसास, प्र- कुलगुरू अनंत चक्रदेव, निबंधक महेश चोपडे, विविध विद्याशाखांचे अधिष्ठाता, संचालक, विद्यार्थी आदी उपस्थित होते.
0000

मुळशी धरण परिसरातील पर्यटनासह स्थानिकांच्या रोजगारासाठी
धरणक्षेत्रात जेट्टी उभारण्यासाठी मेरिटाईम बार्डाचे सहकार्य घ्यावे
– उपमुख्यमंत्री अजित पवार यांचे निर्देश

मुंबई, दि. २३:- मुळशी धरण भागातील प्रकल्पग्रस्त नागरिकांना पिण्यासह सिंचनासाठी पाणी, दळणवळणाच्या सुविधा, विद्युत दाहिनी यासारख्या सार्वजनिक पायाभूत सुविधा मिळण्याच्या दृष्टीने वारंवार निर्देश देऊनही टाटा पॉवरकडून सहकार्य मिळत नसल्याचे निदर्शनास आले आहे. त्यामुळे मुळशी धरण भागातील टाटा पॉवर कंपनीच्या वापरात नसलेल्या जमिनींचे सर्वेक्षण करुन वर्षानुवर्षे पडीक असलेल्या जमिनी सार्वजनिक कामासाठी शासनाच्या ताब्यात घेण्याची कार्यवाही करण्याचे निर्देश उपमुख्यमंत्री अजित पवार यांनी पुणे विभागीय आयुक्तांना दिले.

मुळशी धरण भागातील नागरिकांच्या विविध मागण्यांबाबत उपमुख्यमंत्री अजित पवार यांच्या अध्यक्षतेखाली आज मंत्रालयात बैठक झाली. बैठकीस नियोजन विभागाचे अपर मुख्य सचिव व विकास आयुक्त डॉ. राजगोपाल देवरा, वित्त विभागाचे अपर मुख्य सचिव ओ.पी. गुप्ता, ऊर्जा विभागाच्या अपर मुख्य सचिव आभा शुक्ला, ग्रामविकास विभागाचे प्रधान सचिव एकनाथ डवले, जलसंपदा (लाभक्षेत्र विकास) विभागाचे सचिव संजय बेलसरे, टाटा पॉवरच्या हायड्रो विभागाचे मुख्य अधिकारी प्रभाकर काळे, पुणे नियोजन समितीचे सदस्य अमित कंधारे, नंदकुमार वाळंज आदी उपस्थित होते. पुण्याचे विभागीय आयुक्त डॉ. चंद्रकांत पुलकुंडवार, पुणे जिल्हा परिषदेचे मुख्य कार्यकारी अधिकारी संतोष पाटील आदी दूरदृश्यप्रणालीद्वारे सहभागी झाले होते.

उपमुख्यमंत्री अजित पवार म्हणाले की, मुळशी जलाशयातील प्रवासी नौका जुनी व नादुरुस्त झाल्याने नवीन प्रवासी नौका खरेदी करण्यासाठी जिल्हा नियोजन निधीमधून १ कोटी ४० लाख रुपयांची तरतूद करण्यात आली आहे. येथील पर्यटनास चालना मिळून स्थानिकांना रोजगार मिळण्यासाठी याठिकाणी जेट्टी उभारण्याची स्थानिकांची मागणी आहे. यासंदर्भात महाराष्ट्र मेरीटाईम बोर्डाकडून तांत्रिक मंजुरी प्राप्त करून घेऊन तात्काळ कार्यवाही करावी. तोपर्यंत मुळशी धरण क्षेत्रातील नागरिकांच्या दळणवळणासाठी जिल्हा परिषदेने पर्यायी नौका उपलब्ध करून द्यावी. यासाठी टाटा पॉवरने तात्काळ ‘ना हरकत प्रमाणपत्र’ द्यावे, असे आदेश उपमुख्यमंत्री अजित पवार यांनी दिले.

मुळशी प्रादेशिक नळपाणी पुरवठा योजनेच्या टप्पा क्रमांक एक व दोनच्या कामांचा आढावा घेताना उपमुख्यमंत्री अजित पवार म्हणाले की, महाराष्ट्र जीवन प्राधिकरणाने मुळशी भागातील पाणीपुरवठ्याच्या कामांना गती द्यावी. टप्पा क्रमांक १ अंतर्गत २८ गावांचा तर टप्पा क्र. २ अंतर्गत २२ गावांचा समावेश आहे. या गावांसाठी मागील बैठकीत ०.२० टीएमसी एवढे अतिरिक्त पाणी मंजूर करण्यात आले होते. या सर्व गावांना पाणीपुरवठा होण्यासाठी उर्वरित कामे गतीने करण्यात यावीत. या सार्वजनिक हिताच्या कामात टाटा पॉवर कंपनीकडून सहकार्य मिळत नसल्यास पाणीपुरवठा विभागाने पोलीस विभागाची मदत घ्यावी, अशा सूचना त्यांनी दिल्या.

उपमुख्यमंत्री अजित पवार म्हणाले की, मुळशी धरण भागातील नागरिकांना पिण्यासाठी आणि शेतकऱ्यांना सिंचनासाठी वाढीव पाणी उपलब्ध होण्यासाठी यापूर्वीच्या बैठकीत धरणाची उंची १ मीटरने वाढविण्याचा निर्णय घेण्यात आला आहे. त्यासाठी टाटाची ८० टक्के आणि खाजगी स्वरुपाची २० टक्के जमीन संपादन करावी लागणार आहे. त्यासाठी आवश्यक असणारे सर्वेक्षण महसूल विभागाने तातडीने सुरु करण्याचे निर्देश त्यांनी विभागीय आयुक्तांना दिले.

यावेळी मुळशी धरण भागातील गावठाण विस्तारासाठी अत्यावश्यक असणारी जमीन मोजणी करुन हद्द कायम करण्याबाबत चर्चा करण्यात आली. मुळशी धरण भागातील विविध गावांना पाणीपुरवठा योजना तयार करण्यासाठी तसेच इतर शासकीय कामांसाठी टाटाने सहकार्य करण्याबाबत व मुळशी धरण भागातील नागरिकांच्या समस्या सोडविणेबाबत सकारात्मक चर्चा करण्यात आली.
०००००

• 4 हजार महिलांच्या उपस्थितीत पार पडला मेळावा

पुणे – भारताने 2047 पर्यंत ‘विकसित’ राष्ट्र बनण्याचे आपले स्वप्न निश्चित केलेले असताना, या आव्हानाच्या केंद्रस्थानी महिलांचे सक्षमीकरण आहे. महिला सक्षमीकरण आणि सामाजिक-आर्थिक विकास हातात हात घालून चालतात.
महिलांना आर्थिक बळकटी दिली तरच समाजाची प्रगती होत असते असे अमोल बालवडकर फाउंडेशनचे संस्थापक अध्यक्ष अमोल बालवडकर म्हणाले.

कोथरुड विधानसभा मतदारसंघात ‘मुख्यमंत्री माझी लाडकी बहिण योजने’च्या अनुषंगाने अमोल बालवडकर फाउंडेशनच्या वतीने रविवारी (दि. 22) रोजी महिला मेळाव्याचे आयोजन करण्यात आले होते. या अभियानांतर्गत ज्या महिला भगिनींनी नावनोंदणी केली अशा असंख्य भगिनींचा कोथरुड मधील परमहंस नगर, जीत मैदान येथे महिला मेळावा मोठ्या उत्साहात संपन्न झाला.

यावेळी अमोल बालवडकर म्हणाले भारत पायाभूत सुविधांनी बळकट होत असताना महिलांचे सक्षमीकरण तितक्याच ताकदीने केले जात आहे. यासाठी महिलांना आर्थिक पाठबळ दिले जात आहे मुख्यमंत्री माझी लाडकी बहीण योजना याचाच एक भाग आहे. कोथरुड मतदारसंघातील सुमारे 10 हजार महिलांची लाडकी बहिण योजनेसाठी नोंदणी करून घेतली होती. यापैकी रविवारी 4 हजार महिलांचा काल मेळावा घेण्यात आला. यावेळी अमोल बालवडकर फाउंडेशनच्या वतीने नावनोंदणी करणाऱ्या प्रत्येक महिलेस आकर्षक साडी देखील भेट म्हणून देण्यात आली. तसेच महिलांच्या मनोरंजनासाठी विविध कार्यक्रमांचे आयोजन करण्यात आले होते.

दरम्यान परिसरातील समस्त महिला भगिनींनी या मेळाव्यास उत्स्फूर्तपणे सहभाग दर्शवून या कार्यक्रमाचा आनंद द्विगुणित केला. यावेळी फाउंडेशनच्या वतीने महिलांशी संवाद साधण्यात आला. यातून महिलांच्या आर्थिक सक्षमीकरणाच्या अनेक गोष्टींचा उलगडा देखील झाला.